انا اتعرفت علي زميلتي في الكلية من حوالي سنتين وكانت العلاقة مجرد كلام عادي في الدراسة وكنا ممكن منكلمشي بعض لفترة ونرجع ايام الامتحانات نتكلم وهكذا
بس من سنه بدأت علاقتنا تزيد وتعاملنا يزيد خصوصا ايام مشروع التخرج وكنت السنادي بحضر كتير فانا حاولت المح ليها اكتر من مره قالت انها مش مستعده للارتباط والجواز وقدامها لسنتين عما تجهز مع ان حالتهم المادية كويسه بس في نفس الوقت بحس انها مش مقفوله مني وبتعاملني اكتر من زميل فمش عارف هل انا متوهم ولا هي مش عايزه تقفل الباب خالص كاني خطة تانيه
*ملحوظة هي كانت من سنتين مرتبطه ارتباط طفولي كده بقريبها والمفروض انفصلوا بس من فتره كلمتني انها مضايقه انه ارتبط وكده فهل ده يكون ليه سبب ف حاجه*
البنت لمه بتحب شخص بتفكر فى مستقبلة معه ده اول حاجه بتخطر فى باله وبتفضل تفكر فيها وتكلم والشرط ده مش موجود فى البنت ده معنها مش بتحبك أو مش بتحبك كفايه أنها تاخد الخطوه ده معاك وثانيا احتمال كبير تكون حبت اهتمامك بيها وبمجرد ما يروح الاهتمام ده احتمال كبير مش تلقيها فى حياتك تانى لو اى كانت ظروفك سببت قلت الاهتمام ده هى حقيقي معتبرك زميل وبس وبالنسبة اللى معامله هى بس عاوزه تطمن وجودك بمعامله حلوه كلمه حلوه
تم النشر الثلاثاء، ٦ يونيو ٢٠٢٣
ياريت متعلقش نفسك بيها وتشيل الموضوع من دماغك خالص .. لان هي كانت واضحة جدا معاك في كلامها هي مش مستعدة للارتباط، وممكن يكون السبب مش مادي ممكن يكون نفسي، ممكن اي حاجه غير الاسباب المادية! كمان لما جت وقالت ليك ان هي مضايقة علشان الشخص اللي كانت بتحبه ارتبط .. ف اكيد لسه جواها مشاعر .. والموضوع لسه مخلصش بالنسبالها. اما قصة بتعاملك كويس او بتعاملك بلطف .. حاول متفسرش افعال البنات اوي في الموضوع ده، خاصة بقى في الموقف اللي هي فيه، يستحسن بالنسبالها وبالنسبالك ان ميكونش فيه علاقة دلوقت .. هي نفسها محتاجة وقت علشان تتخطى ده وتتعافي منه .. علشان انت متكونش (علاقة بديلة) علشان متكونش مجرد مسكن فقط! ف حاول متفسرش افعالها لانها ممكن تكون متلغبطة! او مشتتة ... واحترم رغبتها ب انها بتقولك انها مش جاهزة .. وده ليك برضه. وبالتوفيق
تم النشر الأحد، ٤ يونيو ٢٠٢٣
هى واضحة جدا وقالت انها مش مستعدة ...فهى بتتكلم على الاستعداد النفسي عموما. واللى انت قولته بيأكد ده هى مشاعرها لسه فيها اثار من ارتباطها بشخص تانى . وحتى لو شايفاك شخص لطيف و ممكن ترتبط بيك بس مش ده الوقت المناسب للارتباط بيك . بلاش تعلق مشاعرك وتعمقها بزيادة بيها الا اذا ربنا اراد ووافقت هى على ارتباط رسمى بيك . ده اللى ممكن تعمله لو انت شايف انك حابب ده ...فكل فتره جدد الطلب بانك تتقدملها وان شاءالله لو هى مستعدة وقتها هتوافق.
تم النشر الأحد، ٤ يونيو ٢٠٢٣
صدقني لو لن يلتمس الشخص الحلال في أي من أمور حباته فعلى الأقل فليلتمسه في الزواج، الموضوع يصعب شرحه من كتر تعقيده وخطورته
تم النشر الاثنين، ٥ يونيو ٢٠٢٣
باختصار وعن تجارب ناس أعرفها بقولك بلاش ثم فكر أنت من ناحية دينك وغيرتك ورجولتك كيف تقبل وهي لها علاقة سابقة بهذه الطريقة ولا زالت تذكرها وتهتم بها؟
تم النشر الاثنين، ٥ يونيو ٢٠٢٣
لعرض السؤال في فدني اضغط هنا