عارف سيل الافكار اللي بييجي في دماغك فجأة وتلاقيه معظم الاسئلة ليه ؟!
ومفيش اجابة
قلة نووم باليومين والتلاتة.
او بنام لوقت طويل جدا جدا.
وحدة بس بمزاجي ..لما بكون وسط ناس بقيت ببقي عايزة اقوم امشي.
عايزة طول الوقت اتعامل مع ناس غريبة ..بحسهم مريحين اكتر.
حاولت انتحر مرتين ..
بفكر ف الانتحار كتير ..لان بعد الشغل والفسح والمزاكرة والخروجات وصحابي واهلي وكل الحياة دي ..مش لاقية هدف او فايدة ..انا عارفة ان فيه وجع ..بس ليه مش عارفة اشارك وجعي مع حد واسند يمكن لو ساندت اتحسن
ورغم حياتي بشيل ذنب دايما مشاكل الناس اللي بحبهم ..زي مثلا ان مشكلتهم دي حلها مش ف ايدي ..وان بس اسمع وعاجزة ع اني احل ..بجلد نفسي كتير بسبب الموضوع ده ..انا بحب اسمع اووي من صحابي واخواتي ..وعمري محد فيهم حكالي حاجة وقلتها او حتي بصيتله وحش..بس مستنية حد فيهم يعاملني بالمثل
انا بخاف وفي نفس الوقت بحب اجرب واغامر في اي حاجة الا العلاقات بخاف اثق بخاف حبايبي يخزلوني
انا بحاول طول الوقت اشغل نفسي ..عشان مبقاش فاضية ابدا للاكتئاب او للافكار ..بس لو فصلت دقيقة واحدة عن شغل او لعب او مزاكرة برجع للصفر ..انا ف حرب بس مع نفسي..
انا عايزة سلام ...مرهقة ااوي عايزة اعمل استوب من كل حاجة ..عايزة اعمل استوب لحياتي كلها...
يمكن الناس اللي زيي ملوش انه يعيش ..حتي لو باين للناس انه مبسوط .
في الحقيقة انتِ شاركتي أكتر من حاجة أو مشكلة، وكلهم محتاجين نلعب على منطقة الأفكار. الأفكار هي اللي بتشكل سلوكنا وآرائنا في نفسنا وفي الناس، وفي الحياة عموما. انا والناس لكن عندي بعض الاسئله ليكي، هل جربتي في مرة تسألي نفسك ليه عايزة في حياتك ناس تانية غير اللي حواليكي دلوقت، ليه بتفضلي تقعدي مع ناس جديدة، بالرغم من وجود ناس في حياتك بالفعل؟ احساس الذنب تفتكري هل احنا سوبر مان، طيب مكلفين بحل كل مشاكل الكون؟ احساس جميل منك أنك تكوني عايزة تحلي مشاكل صحابك، أو الناس اللي قريبين منك، وده شعور نبيل منك، بس هو مين اللي قال إن لو مقدرناش يبقي احنا مقصرين، "لا يكلف الله نفسا إلا وسعها". احنا مش مطالبين اننا نكون سوبر مان، احنا بشر، فيه حاجات قادرين عليها وحاجات لا، إذا كانوا الدكاترة لما بيعملوا لمريض عملية بيقولوا احنا عملنا اللي علينا والباقي على ربنا. التوقعات اكيد ساعات كتير الواحد بيبقي محتاج يسمع من الناس نفس اللي بنقدمه ليهم، بيبقي محتاج ياخد مقابل الشئ ده. طب هل اساسا احنا بنتوقع حاجات منطقية ولا لا؟ لكن هنا في نقطة مهمة، هل سألتي نفسك هو ليه علاقاتي كدا، ليه انا بعطي كل اللي عندي ومش باخد حاجة، طيب هو العيب مني ولا منهم، طيب اذا كان العيب مني هيبقي ايه؟ بخاف مثلا أني ابقي مقصرة معاهم فبعطي كل شيء عندي ليهم، خايفة يمشوا؟ يعني ده احساس خوف ولا حب ؟ الانتحار والهدف مهم جدا مش كدا ؟ مهم تبقي حياتنا في حاجة نحس اننا بنعيش عشانها. طيب مش يمكن احنا مش عارفين نحس بكمية النعم اللي في حياتنا، اه ساعات الواحد بيبقي مغيب شوية عن نفسه، مش عارفها، مش مقدرها، مش شايفها. فبالتالي هنوصل لنقطة الانتحار بسهولة. هاتي ورقة وقلم اكتبي فيها النعم اللي في حياتك كلها، واللي منهم نعمة الصحة، نعمة البصر، نعمة التذوق، نعمة أن كل يوم بفتح عنيا على يوم جديد. أما بقي لو عايزين نزود النعم ديه فطبعا ممكن، اخلقي لنفسك حاجات جديدة تتعلميها، وده أصبح دلوقت متاح جدا حتى لو من جهاز في البيت، اخلقي عادات جديدة، تحسي فيه بوجودك. الهروب من المشاكل الهروب عمره ما كان حل لأي مشكلة، بل بتفضل المشكلة ديه جوانا طول الوقت، وزي انتِ ما قولتي بمجرد بس ما تبقي فاضية وأفكارك تبقي حاضره تفتكري كل حاجه. المواجهة حل لمشاكل كتير مدفونة، المواجهة كمان محتاجة شجاعة. الخوف من العلاقات سمعتي قبل كدا عن أنماط التعلق، احنا شخصيتنا الحالية دلوقت طبعا ليها مرجعية لطفولتنا، لتربية الاب والام، للحب، للحنان، لكل حاجه احنا اتعرضنا ليها في مرحلة الطفولة وخاصةً في أول 5 سنين. بتبدأ تتشكل شخصيتنا.. وبيبدأ معانا نمط التعلق بتاعنا .. اللي هو ممكن يكون قلق، أو أمن أو رافض متجنب، أو خائف متجنب. في إختبار عليهم ع الانترنت وكمان مقالات برده لو حابه تاخدي فكرة. وده مهم جدا علشان تفهمي نفسك في علاقاتك بتبقي عامله ازاي، وايه اسباب الخوف، في الحقيقة هي بتوضح حاجات كتير. وأخيرًا انتِ بحاجة لأخصائي نفسي علشان يتابع معاكي رحلتك. أتمني لكِ السلامة
تم النشر الثلاثاء، ٢ أغسطس ٢٠٢٢
تابعى السؤال على صفحة الفيس بوك ايضا https://www.facebook.com/groups/fedni.group/permalink/837237987551073/?mibextid=Nif5oz
تم النشر الخميس، ٨ ديسمبر ٢٠٢٢
مش سهل إنك تقدري تعبري عن كل ده وأكيد ده مسببلك معاناة بقالك فترة مش قليلة عشان كده بنصحك تزوري معالج نفسي هيقدر يقدملك أكتر بكتير من اللي ممكن أجاوبك بيه هنا.. وطالما بدأتي وقدرتي تحددي شوية من الحاجات اللي بتعاني منها فمن رأيي متقفيش وكملي ده بمساعدة معالج شاطر عشان تبقي أحسن فأقرب وقت.
تم النشر الأحد، ٣١ يوليو ٢٠٢٢
انتى قولتى الحل فى النص . الهدف ...مفيش هدف ومش مدركة الهدف من وجودنا فى الحياة. نفسك مضطربة وعايشة فى دوشة ع الفاضي . عارفة لما يبقي عندك لعب كتييير اوى وانتى طفلة وكلهم مش مترتبين ومتلغبطين على بعض فى صندوق واحد ....غالبا مش هتميزى من اول بصه اللعبه المكسورة من اللعبة السليمة ...طبيعى جدا لما تبدأى تدورى جوه الصندوق تتخنقى وتزهقى لحد ما تلاقى اللعبة المناسبة اللى هتبسطك. ده حال دماغك بالظبط ....جواها حاجات كتيييير مش مناسبة وملهاش استخدام كمان بس انتى سايباها لانها بتديكى احساس بالامتلاء وان حياتك فيها حاجة مهمه . مش حاسه من كلامك ان فى هدف شخصى بيترتب عليه حياتك. كل حياتك غالبا هروب . التفكير الزائد محتاج هدف عشان تركزى فى افكار محدده وترمى الباقى. بابسط الكلمات ( انتى مش عارفة انتى عاوزة ايه) ده هو اول الطريق عشان ترتاحى ونفسك تهدأ. لو مش عارفه تعملى ده لوحدك ( لايف كوتش يساعدك جدا فى النقطة دى ) اتمنى تطلبي ده فى اقرب وقت لانه سهل ومش صعب وهيختصر عليكى تعب كبيير.
تم النشر الخميس، ٨ ديسمبر ٢٠٢٢
والله دي مشكله ناس كتير فعلا بس ممكن يكون تشتت انتباه لأن التفكير المفرط بيخلي العقل الباطن يفتح كل دفاتره القديمة انتي محتاجه تهدي وتروقي وتستعيني بمختص نفسي لكن قبلها استعيني بالله وقيمي الليل وادعيه ينور بصيرتك لكل خير وفي النهاية متعمليش غير الي مؤمنه بيه وقلبك حاسه ومرتحله
تم النشر الأحد، ٢٧ نوفمبر ٢٠٢٢
قرر انك هتنسي كل د وهتفتح بيدج جديده مع روحك مش نفسك لان ربنا خلق كل اروحنا مميزه وجميله ادي فرصه لنفسك لانها تستاهل حياه افضل من الحياه اللي انت معيشهلها فكر فربنا وحب قربه لو عملت كد وعد خلال فتره بس هتلاقي عكس كل د
تم النشر الأحد، ٨ يناير ٢٠٢٣
حاول تاخد قرار من نفسك اخرج سافر وقضى يوم لوحدك
تم النشر الاثنين، ٨ أغسطس ٢٠٢٢
لعرض السؤال في فدني اضغط هنا