بيحصل خناقات مع اهلي كتير و ده بسبب ان قريبنا معظم الوقت بيستغلونا و بابا و ماما دايما يتكسفوا يكلموهم فبتخانق مع بابا و ماما انهم دايما يجوا علينا عشان حد ميستاهلش و بمقابل ده طبعا خناقات و انت مالك و طلاما انت عايشة هنا في بيتنا و كده و سعات كتير للاسف بغلط و بخرج عن شعوري و بقول كلام كتير وحش و ببقى ندمانة كل مرة و اقعد اقول انا همسك نفسي مينفعش ارد كده المره اللي بعدها يحصل اسوء مش عارفة اعمل ايه بالذات ان الخناقات دي مأثرة عليا صحيا و كمان نفسيا بقيت حسه اني مستاهلش الحب و اني حد وحش و دايما بابا و ماما بيقولولي الكلام ده رغم انهم بعد كده بيقعدوا يشتكوا من العيلة و من استغلالهم ليهم و طمع و حاجات كتير كل اللي عيزاه اني ازاي مدخلش نفسي جوه المشاكل دي ازاي اكون عادي مش فارق معايا مين بيستغلهم و لا مين بيعمل ايه انا عايزة افصل مش عايزة حياتي تكون كلها خناق
ده غير ان بابا احيانا بيقعد ياخد قرارات قصده بيها يعاند معايا مع ان ممكن متكونش ليها لازم و بيعمل كده لوحده من غير حتى ما يبقى مضايق مني و دايما يكرر كلمة انا حر و ده بيتي و انا اللي اقرر ازاي اتعامل مع المشاكل دي ببرود و متعصبش و مغلطش و ازاي كمان اشيل حزن المشكلة دي من تفكيري و قلبي و الكلام الكتير الوحش اللي بيتقالي و العصبية الزياده انا دايما بحل مشاكلي لو مع شخص بتجنب اتكلم معاه انما دول بابا و ماما و انا نفسي نعيش في حب مقدرش ابدا ابقى عايشة و انا بتجنبهم
اهلا بيكي. أي مشكلة مستحيل تتحل بالخناقات، والمشاكل. أنتِ لو شايفة أنهم بيستغلوا بابا وماما، أولا كلامهم ف أنهم هما المسؤولين، هما فعلا المسؤولين عن البيت طبعا. وأكيد هما مش بياخدوا قراراتهم على أساس العند معاكي، مفيش اي سبب يخليهم يعملوا كدا، انتي بنتهم في الاول والاخر، أهم حد عندهم. ولكن لو فيه أي مشكلة مينفعش نقابل المشكلة ديه بخناقة، ده مش اسلوب، وطبيعي أنهم يقولوا في الاخر انك غلطانه، لان الأساس من الاول والأسلوب خطأ. فطبيعي انكم متوصلوش لأي حل، بل المشكلة تتعقد اكتر. واجهي مشاكلك بالحكمة والهدوء، انتي اللي محتاجة تشتغلي على نفسك أكثر. اتكلمي معاهم بهدوء، علشان أي مشكلة هتتناقشي فيها بالخناق مستحيل هتتحل. أتعلمي المفاوضة، والسياسة في الكلام. لو عايزة تتكلمي في حقوقك، وحقوق البيت اتكلمي في وقت يسمح ليكم كلكم بالكلام، ميكونش وقت كله مشدود فيه، اتكلمي مع كل واحد لوحده في الاول. على سبيل المثال:- والله مثلا يا بابا مش انت اشتكيت كذا مرة من الناس ديه وشايف أنهم مستغلين، طيب انت ايه أسبابك انك بتصغى ليهم في كل مرة بيجوا يطلبوا منك مساعدة، حضرتك شايف حاجه انا ممكن اكون مش شايفاها ؟ الحوار يكون رايح وجاي، ميكونش انك بتوجهي ليهم ديما المعاتبة بالحدة، وبالخناق، خليه هو اللي يفتح قلبه ويتكلم معاكي ويبتدي ياخد رايك، وبكدا هتكسبيه.
تم النشر الاثنين، ١٩ سبتمبر ٢٠٢٢
محتاجة مهارة الذكاء الاجتماعى تتطور زيادة ومهارة سرعة البديهه وضبط النفس دول مهمين عشان تقدرى تتصرفى بشكل سليم فى الاوقات اللى تكون مستفزة بالنسبالك وجزاك الله خيرا ونعم التربية انك مهتمة بعلاقتك بوالدك وحابة تصلحى اى حاجة تعكر الحياة دى
تم النشر السبت، ١٩ نوفمبر ٢٠٢٢
لعرض السؤال في فدني اضغط هنا