السلام عليكم
انا طالب في الصف الثالث الثانوي شاطر والحمد لله بجيب درجات كويسه بس مش عارف بقالي فتره فاقد الشغف او حاسس اني مش زي اول السنه كنت بذاكر كويس وبحل أسئله كتير بس دلوقت يدوبك بعمل الواجب بالعافيه وبعمله كمان على آخر وقت ومش براجع كويس
كنت بعمل جداول مذاكره مكنتش بنتظم عليها ممكن اقضي يومين او تلاته تمام وبعد كدا مش بكمل
حاسس بالذنب علي طول من كدا وبحاول ارجع ذي الاول بس مش عارف وبدأت أخاف لأن فيه حاجات اتراكمت و باخد جديد في الدروس ومش عارف اجمع جديد مع قديم وخصوصا ان رمضان قرب ومش هبقى مركز اوي عشان الصيام وباليل هيكون دوشه في البيت
عايز نصيحه امشي عليها أنا علمي علوم ونفسي اجيب مجموع عالي أدخل بيه طب
وعليكم السلام ورحمة الله وبركاته، شعورك ده طبيعي جدا لان في اول السنة بتكون لسه طالع من اجازة وداخل بحماس لان الاجازة مملة وبتبقا خلاص انا هاكل الكتب دلوقت بس طبيعي ان بعد فترة الحماس يقل لانك زهقت من المذاكرة بشكل روتيني كده لان برضو السنة بتبقا طويلة عشان كلها مذاكرة، والشعور ده عادي انا برضو كده وفي حجات بتتراكم وبيبقا مبني عليها الجديد تيجي تاخد متراكم الجديد يتراكم ودايرة بنلف فيها، بص بقا اتبقا حاليا 3 ايام اهو على الشهر المبارك حاول ترتب فيه جدول تمشي عليه ويكون على قد قدراتك وحمس نفسك كده متجيش اخر السنة وتضيع مجهودك كله حاول توازن بين موادك عشان متذاكرش في مواد وتسيب الباقي وانت كده كده لازم تشوف طريقة تذاكر بيها في رمضان مستحيل شهر بحاله يضيع كده رتب امورك يا تذاكر بليل بعد التراويح واقفل على نفسك وحط اي سماعة لو في دوشة لغاية السحور اتسحر وكمل مذاكرة وصلي الفجر وذاكر مثلا لغاية الشروق ونام واصحى الظهر صلي وذاكر من الظهر للعصر وبعد العصر هتكون خلاص انت جعان مش قادر حاول تراجع ولا تقرا حاجة بسيطة "الروتين ده مش هينفع لو عندك دروس طبعا" يعني جايز يبقا عندك دروس بعد الظهر او قبله ايا كان طيب لا هتعرف تذاكر بعد تراويح ولا بعد الفجر، قسم يومك بكذا طريقة ممكن تشوف انت بتنام كام ساعة لو 8 هيتبقالك 16 ساعة قسمهم زي ما انت عايز ممكن 3 الصبح 3 بعد التراويح 3 العصر الي مرتاح فيه وفيه Dr. Hossam Issa على يوتيوب بيقدم نصايح جميلة لتقسيم الوقت سواء في رمضان او غيره وبصراحة كويس وجرب تعمل حاجة بتحبها وسط المذاكرة عشان متقفلش نفسك يعني لو بتطور الانجليزي او بتتعلم لغة جديدة خد 10 او 30 دقيقة على مدار اليوم عشان متزهقش اي هواية يعني، بردو في برنامج حلو اوي اسمه flip ده بيحسبلك عدد ساعات مذاكرة وهتلاقي ناس كتير في ثانوية بيذاكروا عليه وبيظهرلك هم ذاكروا قد ايه جايز ده يحمسك تبقا احسن منهم وتذاكر اكتر، وحاول تقنع نفسك اكتر بدل ما انا ببقا حاسس بالذنب على الي مذاكرتوش وهتلاقي نفسك وانت بتضيع وقت كده مش مرتاح لا قوم ذاكر الي وراك عشان لو هتمسك الجوال تبقا راضي عن نفسك ولو شوية يعني متبقاش مراكم باب مثلا وتذاكر منه جزئية وتبقا مش راضي انت مش شرط تخلصه في يوم كامل ولكن قسمه، لو الدروس بتاعتك مش مبنية على الي قبلها اوي حاول تذاكر الجديد مع حتة قديم بحيث تلم المتراكم وتذاكر القديم، وربنا يوفقك يارب وتحقق الي بتتمناه وتبقا دكتور قد الدنيا.
تم النشر الأربعاء، ٢٦ فبراير ٢٠٢٥
السلام عليكم ورحمه الله وبركاته. انا عايزاك تركز في الجمله اللي انا هقولها دي كويس جدا. حاله المذاكره والدراسه الاكاديميه ملهاش علاقه بالشغف خالص ماشي الشغف هنا بره الموضوع هنا في مسؤوليه فانت مسؤوليتك تجاه الهدف اللي انت عايز تحققه عاوز تحصل مجموع يدخلك كليه معينه اذا انت هنا مسؤول عن كل يوم بيعدي عليك هل انت اديت في اليوم ده بحق الهدف اللي انت عايز تحققه دي مسؤوليتك شوف انت عاوز تعمل ايه بقى لما هتبص للايام بتاعتك بالشكل ده اعتقد الموضوع هيبقى مختلف هنا مفيش شغف هنا موضوع ملهوش علاقه بالمزاج او بالحاجه اللي انا بحبها او بالحماسه اللي جايه لي من الشغف بتاعي ولا الكلام ده خالص خرج المعنى ده بره مساله الدراسه الاكاديميه خالص علشان الموضوع يختلف معاك عشان تقدروا تكون ملتزمك هيجي من احساسك بالمسؤوليه تجاه اللي انت عاوز تعمله وتحققه دي نمره واحد نمره اثنين. ممكن يكون بس الاحساس اللي انت فيه بسبب انك مش بتاخد فترات راحه تخليك تبقى كانك بتعمل ريستارت كده وبقيت حاسس ان انت فريش وتقدر تكمل اليوم اللي بعديه او تدخل على المذاكره كده وانت نفسك مفتوحه اعمل فواصل ترفيهية. فواصل فيها راحه فيها انتخة فيها لعب وهزار الفواصل دي تبقى ما بين فترات الدراسه جوه نفس اليوم او في جدولك اللي انت بتعمله لانك لو معملتش كده طبيعي جدا توصل للي انت فيه دلوقتي.
تم النشر الأربعاء، ٢٦ فبراير ٢٠٢٥
وعليكم السلام ورحمة الله وبركاته. أحب أن أشيد بجهودك ونجاحك في الدراسة حتى الآن، فهذا يعكس حماسك وقدرتك على التفوق. من الطبيعي أن يشعر الإنسان أحيانًا بفقدان الشغف أو الرغبة، خاصة في ظل الضغوط الدراسية والاستعداد للامتحانات. إليك بعض النصائح العملية التي قد تساعدك في استعادة حماسك وتحقيق أهدافك: تحديد أهداف قصيرة المدى : ضع لنفسك أهدافًا صغيرة وقابلة للتحقيق يوميًا. يمكن أن يكون ذلك بمقدار فصل أو درس محدد تراجعه يوميًا. إعادة تنظيم جدول المذاكرة : حاول وضع جدول بسيط ومرن للمذاكرة، وتجنب الكمال. يمكنك تخصيص وقت محدد لكل مادة والتقليل من عدد الساعات، مما يسهل عليك الالتزام. تنويع أساليب المذاكرة : جرب استخدام أساليب مختلفة مثل الملخصات، أو الخرائط الذهنية، أو الدراسة مع زملائك. التنويع قد يمنحك دافعًا أكبر للمذاكرة. تحسين بيئة الدراسة : حاول إنشاء مكان هادئ ومريح للدراسة، حيث يمكنك التركيز. تأكد من تقليل المشتتات، خاصة إن كان هناك ضجيج في البيت. تخصيص وقت للراحة والنشاطات : حاول أن تخصص بعض الوقت لنشاطات ممتعة، مثل ممارسة رياضة خفيفة أو قراءة كتاب، لأن ذلك يساعد على تجديد طاقتك وذهنك. الدعاء والاستغفار : اجعل الدعاء جزءًا من يومك، وتذكر أن الله سبحانه وتعالى هو المعين. استعن به واطلب منه التوفيق والسداد في امتحاناتك. لا تتردد في طلب الدعم : إذا كنت تشعر بالضغط، تحدث إلى معلم أو مستشار قد يساعدك في وضع خطة دراسية تناسبك. تذكر، رمضان هو فرصة لتجديد العزيمة وزيادة الحماس، ولكن تأكد من إدارة وقتك بذكاء خلاله. ولا تنسَ أن كل خطوة تقوم بها نحو هدفك هي إنجاز بحد ذاته. وفقك الله لما فيه الخير.
تم النشر الأربعاء، ٢٦ فبراير ٢٠٢٥
عليك بالصلاه والدعاء وإن شاء الله خير يا اخى ولا تيأس إن بعد العسر يسر
تم النشر الثلاثاء، ٤ مارس ٢٠٢٥
خد يوم ل نفسك بعيد عن التليفون
تم النشر الاثنين، ٣ مارس ٢٠٢٥
هنحاول تاني لحد ما واحدة من المحاولات دي تنجح ونوصل لاحلامنا ماتفضلش وقت كتير خلينا نبدا وكأننا بدأنا انهاردة و اينا يكن اللي حصل الفترة اللي فاتت نقدر نخلصه
تم النشر الأحد، ٢ مارس ٢٠٢٥
طيب هنعمل اي
تم النشر الأحد، ٢ مارس ٢٠٢٥
و بعمل جداول و مش بمشي عليها و الدنيا ظيطه خالص
تم النشر الأحد، ٢ مارس ٢٠٢٥
كلنا كدا 🙂🙂
تم النشر الأحد، ٢ مارس ٢٠٢٥
للاسف وانا و اظن دا طبيعي خدلك يوم إجازة مع صحابك وخصوصا اننا بقينا ف رمضان وافصل شوية عن الدراسة خالص وكانك اخدت الإجازة بس متغبش من الدروس 🙂 وتانى يوم هيتجدد شغفك واظن الطاقة هترجعلك تاني قبل كل مذاكرة اكتب انت بتذاكر ليه اظن دا كافى انك تكمل ومش ضروري تراجع ع القديم حاليا وتضغط نفسك حاول متراكمش الجديد المدرسين كدا كدا هيراجعوا بعد العيد عشان متزهقش بس ف الفترة الجاية
تم النشر السبت، ١ مارس ٢٠٢٥
وانا برضك
تم النشر الأربعاء، ٢٦ فبراير ٢٠٢٥
لعرض السؤال في فدني اضغط هنا