ليس لدي رغبة بالزواج في هذا الوقت ولا بهذا الشخص. مخطوبة ولكني في علاقة لا أستطيع إنهاءها!

Question

أنا عندي 21 سنه بقالي 3 سنين مخطوبة لواحد اكبر مني 13 سنه مسافر برا مشفتوش ولا قعدت معاه اتخطبتله بسبب ضغط الأهل والتخويف بالكلام ان دا فرصه مش هتتعوض وهتندمي والخ مع العلم اني كنت بحب واحد وبتكلم معاه واتمني من الله ان يغفر لي وله هذا الذنب لإن كان بينا تجاوزات كتير فالكلام بالذات لإن وقتها سننا كان صغير وكنا منساقين جدا ورا مشاعرنا.. وانا من النوع اللي طالما بيحب حد مستحيييييل يقدر يدي لحد تاني وش او فرصه حتى فالكلام فانا دايما كنت مزنقه على خطيبي فكل حاجه وهو راضي ومستحمل ووقت مكان يشتكي ويعاتب كان بيرجع يتصالح لوحده لإني برضه مش بقدر اصالحه مهما كنت حاسه بالذنب اتجاهه بعد سنه خطوبه وانفصال اللي بحبه عني بدأت اتعود على وجود خطيبي فحياتي بدأت اقبل منه الهديا اللي بيبعتها اللي كانت بتضايقني فالاول بس برضه مفيش اي حب او عاطفه اتجاهه ومازلت مبقدرش اقوله اي كلمه حتى اراضيه بيها ومع مرور الوقت التواصل بيني وبين الشخص اللي بحبه رجع تاني ومازالت مشاعرنا هي هي بل ووقعنا فنفس الذنب تاني للأسف 💔.. وللأسف فرحي فاضل عليه أقل من 4 شهور والمفروض اني من اول متخطبت بحاول افركش بس اهلي ضاغطين عليا جدا وموضوع الفركشه دا صعب اوي واللي مخليه صعب ان موقفي قدام نفسي ضعيف جدا لإن خطيبي شخص مناسب جدا واهله كةيسين معايا وهو خلوق وسيرته كويسه وكريم جدا معايا ومش بيتاخر عليا باي حاجه رغم معاملتي دي ليه بس انا مش بحبه ومش متخيلاه جوزي بيقولوا الحب بيجي بعد الجواز بس انا برضه مازلت خايفه وبكابر ضد اهلي لإن مش هاين عليا اجرح اللي بحبه جرح زي دا وكمان مش مستعده نفسيا للجواز دلوقتي وعندي اهداف زي اني اكمل تعليمي واشتغل واعمل لنفسي حاجه.. اسفه اني طولت عليكم وبتمنى بجد تساعدوني عشان انا نفسيتي صفر وحالتي صعبه كل يوم بقرار شكل وتفكير 24 ساعه ومش عارفه اعمل اي

Accepted Answer

مبدئيا كدة الشخص اللي أنت على علاقة به وما زال مستمر في العلاقة حتى بعد ما اتخطبت وفرحك فاضل عليه ٤ شهور ولسة بيعمل حاجات غلط معاك إنسان نذل (وهذه أقل صفة يمكن وصفه بها) ولا يجب أن تراعي له أي مشاعر أو خاطر لأنه لو كان محترم كان ابتعد عنك بمجرد خطوبتك وتوقف عن الحرام .. للأسف أنت اللي دخلتي نفسك في المشكلة دي لما تعديتي حدود الله وخليتي واحد يستولي على مشاعرك ويعلقك به فلما جالك واحد ابن حلال ومحترم ملقاش مكان في قلبك لأن قلبك كان مشغول بواحد عمال يمتع نفسه بيك ببلاش والحل بالنسبة لك هو التوبة! بمعنى إنك تقطعي علاقتك بالشخص النذل اللي مش حاطط أي حساب لدين أو أعراف وعمال يستمتع بواحدة المفروض فرحها بعد ٤ شهور - ودة بغض النظر عن الخطوبة دي هتكمل أو لا .. يعني تتوبي من أجل ألا تسقطي من عين الله وإذا صلحت توبتك فالأمور بعدها هتوضح بالنسبة لك إن شاء الله وهتلاقي صدرك انشرح لما فيه الخير والقلوب بيد الرحمن يقلبها كيف يشاء لكن قبل التوبة قلبك هيظل منشغل بالشخص النذل ونفسك هتفضل مشتتة بين الشخصين ودة هيأثر على قرارك بشكل كبير أو حياتك الزوجية إذا تم أمر الزواج.

Answer

انتى قدام حاجتين : نعمة وابتلاء ابتلاء الاختبار فى الامانه والصدق مع نفسك وغيرك . ونعمة ان ربنا ظهرلك الحقيقة وكمان اكرمك بحاجة تساعدك انك تتغلبي على الابتلاء. الشيطان بصراحة شغال معاكى الله ينور وانتى مسلماله دماغك على الاخر واكتر اثبات مش علاقتك مع الولد ده ..الاثبات الاكبر هو قصة اصل انا مش مستعدة للجواز اصلا عشان اكمل تعليمى والكلام ده . الشيطان بيحارب اى حاجة فى الحلال ...وعاوز يخلينا مساجين فى الحرام وبيزين الحرام وبيهييئله كل الاسباب والاوقات عشان يفضل فى السجن ده . اتقى الله فى نفسك ولا تجحدى النعمة وانتبهى للاختبار . سنك صغير اه بس انت ى فاهمه كل حاجة وتقدرى توقفى العلاقة الغلط دى فى لحظة وتحترمى الراجل اللى معاتكى وتديله قدره وتراعى الامانه وانه مسافر ومدى الامان للبيت المحترم اللى انتى منه . اياكى بقى والظلم لو معرفتيش تقدرى الراجل ده وتصونيه ....سيبيه وبدون اى اعتبارات وتحملى كل الضغط ....لان الظلم عواقبه لا تحتمل.

Answer

سنك فعلا لسه صغير زي ما قولتي، بس مش على الزواج وبس على علاقتك بالشخص اللي انتي حبتيه وارتبطي بيها، ممكن أسالك سؤال؟ هل انتي فعلا واثقة منه 100% انه شخص كويس ومحترم وكل حاجه في الحياة! ايه الضمان اللي معاكي انه شص محترم؟ هو لو شخص محترم هيفضل يكلمك، بل ويتجاوز معاكي في الكلام؟ وكمان يكلمك وانتي مخطوبة؟ هل انتي شايفة ان ده احترام ورجولة؟ هو فيه راجل يقبل على نفسه ان مثلا خطيبته تكون بتكلم راجل تاني؟ انا هسيب ليكي انتي الرد! اقطعي علاقتك بالشخص ده، لان اللي فعلا كويس ومحترم وخايف على بنات الناس، لا يمكن يتصرف التصرفات ديه. اما عن خطيبك، بصي انتي قدامك شخص كويس، بس انتي لو مش مستعدة نفسيا اساسا للموضوع، ولا حباه، ولا شايفة نفسك هتكوني مسؤولة في الوقت الحالي عن زوج وبيت ... يبقى بلاش تظلمي نفسك وتظلمي الراجل. واتكلمي معاه، ووضحي له الامر بصراحه، واتكلمي مع اهلك حتى لو كانوا ضاغطين عليكي، ده جواز .... يعني مفيش حد هيشيل الشيلة كلها في الاخر غيرك انتي!

ليس لدي رغبة بالزواج في هذا الوقت ولا بهذا الشخص. مخطوبة ولكني في علاقة لا أستطيع إنهاءها!

اجتماعية

زواج

حب

علاقات

سؤال من احد أعضاء فدني

تم النشر الجمعة، ٢٣ يونيو ٢٠٢٣

4 إجابة

11 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك