اكتشفت اني ظاهري أمام الناس يختلف عن اللي جوايا تماماً.. أمام الناس ملاك و من جوايا يكاد يكون شيطان .. !!
اول مرة احس الإحساس دا و هو يكون الغالب علي تفكيري ،مش قادر اتخيل بجد انا ازاي كنت كدا الفترة اللي فاتت دي في حياتي ..
انا كل اللي بيهمني في حياتي اني ابان بصورة مثالية أمام الناس أما من الداخل ف انا مختلف تماماً ...
يهمني ابان ملتزم قدام الناس و انا لوحدي عارف اني بقطع في الصلاة و بعمل بلاوي و محدش عارف
يهمني ابان مثقف و فاهم و قارئ و عارف كتير جدا وانا من جوايا ابيض و مفيش خالص...
يهمني انتقد أفعال اللي قدامي عشان أبين اني انضج منه و انا ممكن اكون بعمل حاجات اسوأ منه
و هكذا و هكذا و هكذا ..
لما باجي اقارن (انا اللي قدام الناس) و (انا قدام نفسي) بحتقر نفسي جدا ..
ازاي انا قدامهم فلان المحترم الملتزم المجتهد في دراسته و شغله المثقف الناضج اللي مش بيضيع وقته في تفاهات
و علي العكس تماماً وانا لوحدي لما مش بيكون فيه حد
لا محترم ولا ملتزم و منتظم في صلاة ولا في مذاكرة ولا في شغل و بضيع وقتي في كل حاجه تافهه تتخيلها ولا تتخيلها!!
انا فعلاً كان هدفي في حياتي إني أكون الشخص المثالي اللي الناس شايفاه دا و في فترة في حياتي كنت بسعي لكل دا فعلاً ولكن معرفش ايه اللي حصل .. بقا الشخص المثالي دا صورة فقط أمام الناس محدش عارف حقيقتي غيري انا !
مش عارف اكتب اكتر من كدا .
دة الشيطان اللي هيألك كده استعذ بالله من الشيطان الرجيم وحاول تسمع محاضرات دينيه لو مش هتسمع بالساعه اسمع بلدقائق صلي الفجر بالسنه ومن جواك عارف ان محدش شايفك صلي لو صلاه واحده وانت من جواك عايز تصليها لانك عايز ده مرة علي مرة هتلاقي نفسك عايز ده فعلا من جواك بس حقيقي شيطانك اللي مهيألك كدة وكمان في حاجه انت لو وحش اوي زي ما انت متخيل مكنتش كتبت مشكلتك دي لان الوحش مبيخدش باله وبيبقي ف نظر نفسه انا ملاك وانا جميل ف انت اكيد حد جميل من جواك بس الشيطان متغلب عليك شويه واسال الله ان يهديك وان شاء الله هتبقي احسن واحسن❤
تم النشر الاثنين، ١ يوليو ٢٠٢٤
فى البداية كده.من الواضح انك شخص قوى لانك واجهت نفسك بكل اللى جواك واكيد المواجهه وراها هدف . ممكن تكون مريت بمواقف وأشخاص وحاجات كتير ممكن تكون دفعتك انك تكون كده. ممكن نبدأ انك تتفهم الوضع وان الصوره المثاليه دى نحاول نخليها واقعيه.بمعنى أدق نبدأ بالجانب الدينى ودى علاقه خاصه جدا لو حسيت انك صادق فيها مع نفسك التغيير هيجي تلقائى اكتب كل اللى جواك واللى بتحس بيه كله واختار عايز تكون ازاى يعنى واجه نفسك وخليها تختار الافضل. حدد هدفك اللى حابب تحققه واكتب حابب تحققه ازاى اعمل اللى بتحبه واللى بتلاقى نفسك فيه اكتر . كل ما تحس انك بترجع للشخصيه المثاليه دى افتكر انك بشخصيتك الداخليه هتكون مرتاح اكتر لكن طبعا بعد ما تبدأ تغيير التغيير بياخد وقت فكن صبور وحابب انك تعمل شخصية منك جديدة لازم تكون مقتنع علشان تتغير لو معاك صديق ليك مقرب أو لايف كوتش هيكون مهم جدا تشاركه افكارك وافتكر دايما أن ربنا معاك في كل خطواتك ويساعدك.وانك قوى وهتقدر🌷
تم النشر الاثنين، ١ يوليو ٢٠٢٤
السلام عليكم ورحمة الله وبركاته، أولًا أحييك على إدراكك لمشكلتك وشجاعتك في الاعتراف بها. ولا داعي للقسوة على نفسك فشيء إيجابي وجيد إنك تحاسب نفسك لكن لا تقع في خطأ الإغراق في اللوم عليها أو احتقارها. وأعتقد عامة إن هذه المشكلة أو بعضها موجود في كثير منا لكن البعض لا ينتبه والبعض الآخر مثلك يحاسب نفسه ويبحث فيها ليدرك قصورها وما يحتاج للإصلاح منها. ثانيًا، كما هو معروف الاعتراف بالمشكلة هو نصف الحل، أنت الآن مدرك وواع لوجود هذه المشكلة بك وما عليك إلا أخذ الخطوات اللازمة لحلها. *أعتقد أول خطوات الحل هي التقرب من الله أكثر والحرص على الصلاة وأن تدعوه أن يخلص نيتك دائمًا لوجهه ويبعد عنك الرياء وحب الظهور. *من المهم أيضًا كما قلت عدم احتقار النفس أو اليأس منها، جملتك (بحتقر نفسي جدًا) ستتسبب في ضرر لك وستعيقك عن مساعدة نفسك للخروج من هذه المشكلة. القصور طبيعة بشرية والخطأ والذنوب أيضًا لذا ما علينا إلا تقبل أنفسنا وطبيعتنا وفي نفس الوقت العمل على إصلاح ما نراه قصورًا فيها قدر استطاعتنا. *بالنسبة للمثالية فهي فخ يقودك للفشل وحرصك الشديد عليها أدى إلى نتيجة عكسية كما ترى... لا أحد مثالي فلا تفكر في المثالية. *اجلس مع نفسك واكتب قائمة بكل السلبيات التي تراها في نفسك وابدأ في تغييرها من الأهم فالمهم واعرف قبلًا أن تغيير الصفات والعادات السيئة والتغيير عمومًا يأخذ وقتًا فلا تستعجل. هذه بعض النصائح التي أرجو أن تفيدك وإن شاء الله يجيبك الخبراء المختصين بخطوات أكثر تساعدك على تغيير ذاتك للأفضل. بالتوفيق إن شاء الله.
تم النشر الاثنين، ١ يوليو ٢٠٢٤
أنا متفهمة مشاعرك واللي بتمر بيه، وده شئ طبيعي نشعر أحيانا بالتباين بين شكلنا الخارجي وحقيقتنا الداخلية. كتير مننا بيعيشوا نفس الصراع ده. بس فيه شوية نقاط مهمين أحب أقولهم لك، يمكن يفيدوك: الصراحة مع النفس : مهم جداً إننا نكون صادقين مع نفسنا أولاً. مشكلتك دلوقتي إنك واعي تماماً للتباين اللي في حياتك، وده أول خطوة للتغيير. التغيير مش على طول بياخد يوم وليلة : التغيير بيبدأ بخطوات بسيطة. حاول تبدأ بشئ صغير مثل الالتزام بالصلاة، أو تقليل وقت ضياعك على الأمور التافهة خطوة بخطوة. لازم يكون عندك هدف واضح : حدد لنفسك أهداف صغيرة وقابلة للتحقيق. مثلاً، اليوم حابقى ملتزم بالصلاة، النهارده حاقرأ فصل من كتاب. الهدف يكون مش كبير ومبهم، لكن خطوات صغيرة وواضحة. اتقبل نفسك : كلنا عندنا عيوب ومشاكل. الحب الذاتي والتقبل هو أساس أي تغيير. متعاقبش نفسك على الأخطاء لكن اتعلم منها. الدعم والارشاد : مفيش مانع إنك تتكلم مع حد تثق فيه، صديق قريب أو مدرب حياتي مثلاً. الدعم ممكن يعمل فرق كبير. التوازن : حاول توازن بين صورتك الأمامية وداخلك. مش لازم تبقى مثالي، كون نفسك بعيوبك ومزاياك، واشتغل على التحسين. اللي انت فيه دلوقتي حاجة طبيعية وكلنا بنمر بمراحل مشابهة. حاول تهدأ ومتاخدش الأمور بشكل قاسي على نفسك. التغيير بياخد وقت والقبول الذاتي أول خطوة في المسار الصح. أنا واثقة إنك تقدر تحقق التوازن اللي بيدور عليه.
تم النشر الاثنين، ١ يوليو ٢٠٢٤
أولا مجرد اعترافك بده قوه منك واحترام لذاتك يحسب ليك وهذا اول طريق للعلاج ،، ثانياً لا تكن قاسي على نفسك بالاحكام السيئة كلنا نخطيء ونصيب ومن منا معصوم من الخطأ حاول الرفق بنفسك ،، ثالثاً هنبدا خطوات عملية لعلاج المشكله وأولها البدأ بالرياضه وتمارين التنفس هتفيد جدا في زيادة الثقة بالنفس ،، رابعاً هنجيب دفتر نكتب فيه كل الصفات الإيجابية الحقيقية الموجوده فيك والصفات الإيجابية التي يراها الآخرون فيك وهنكتب الفرق الموجود بين الاتنين في مكان تاني خالص ونشوف اي اللي ناقص ونحاول نوصل له بصدق مثال لو الناس شايفاك صادق اي اللي وانت بتكتب إنك كاذب اي الخطوات التي تمنع للوصول الصدق في وجهة نظرك ونجاهد نفسنا للوصول ليها ،، إحنا كده بنعمل تطابق بين الذات الاجتماعيةالتي يراها الآخرون والذات الواقعية التي تراها انت فقط ،، خامساً لا تجعل الله اهون الناظرين إليك نكتب المقولة دي في ورقه وتعلقها في غرفتك وتتذكر كلما أردت تزييف الحقائق نظر الله فوق الجميع ولا عيب في الخطأ ونحن لسنا مثاليون والكمالية اضطراب نفسي يعالج وليس سمة مميزة لأي شخص لأنها تنفي صفة البشرية ،، تقرب من الله وتذكر أن المتقون هم الفائزون التقوى أنك ترى ما يرضي الله في كل قول وفعل في خائنة الأعين ،، واعلم أنك بمجرد معرفة مشكلتك فأنت بدأت الطريق للإصلاح الداخلي لأنك رفضت الخداع ولكن الرفق بنفسك ،، وعليك بالقراءة كثيراً فهي أمر إلهي وحياة عقول ،، تحياتي وتقديري ،،
تم النشر الثلاثاء، ٢ يوليو ٢٠٢٤
لعرض السؤال في فدني اضغط هنا