السلام عليكم، مفيش حاجة اسمها فاشلة في دراستي، فيه إني إن شاء الله هبذل جهدي وأذاكر والحاجة اللي مش فاهماها هشوف أتعلمها إزاي. مجرد ما تقولي لنفسك أنا فاشلة فأنتِ لاشعوريًا بتحققي ده، عقلك الباطن بيصدق اللي بتقولي عليه وينجحك فيه، فوقفي خالص فكرة إنك فاشلة دي، عشان النتيجة بتاعتها هتكون سلبية. *** بالنسبة للمواد اللي انتِ ضعيفة فيها أو مش متأسسة زي ما قلتِ، فدلوقتي الإنترنت بقى عليه كل حاجة والمعلومات متوفرة، شوفي ناقص عندك إيه من الأساسيات وتبدأي منين بالضبط وهتلاقي شرح المواد كلها من أبسط المستويات... أحيانًا بتكون المشكلة مش فينا احنا، ممكن تعلمنا المادة بطريقة غلط خلتنا كرهناها أو حسينا إننا فاشلين فيها أو مش بنفهمها. جربي اسمعي شروحات أكتر من شخص واللي تفهمي منه تابعي وذاكري. اسمعي المحاضرة مرة واتنين وسجلي ملاحظات وحلي أسئلة باستمرار. الممارسة والمراجعة بتثبت المعلومات. ** أولى ثانوي موادها كتير ومضغوطة، حاولي ترتبي وقتك وجدولك وإن شاء الله تقدري تنجحي في كل المواد، وعودي نفسك من دلوقتي على التحكم في وقتك وتنظيمه عشان هتحتاجي ده جدًا في تانية وتالتة ثانوي. بالتوفيق إن شاء الله.
لعرض الإجابة في فدني اضغط هنا