لغات البرمجة زيها زي لغات المحادثات العادية بين البشر، ليها قواعد معينة شبه النحو لازم تعرفيها تستخدميها صح، ومع الوقت هتقدري تعرفي مصطلحات وكلمات أكتر. في حالة لغات البرمجة، الكلمات والمصطلحات هي الاوامر إللي هاينفذها البرنامج. وزي لغات البشر، اللغة بتموت بدون ممارسة وبتلاقي صعوبة اننا نفتكر الكلمة أو المصطلح أو حتى القاعدة اللغوية. شخصيا، بعتبر إن البرمجة ممارسة أكتر منها تعليم تلقيني، لكن لكل شخص أسلوبه الأنسب في التعلم. وتاني، زي لغات البشر، أفضل طريقة بتعلمها عاجلا أو آجلا هاتكون التطبيق العملي واستخدامها. اللغة الأكثر شيوعا حاليا للمبتدئين وحتى الأطفال في الإبتدائي في بعض الدول هي بايثون Python، ودي لغة مرنة جدا تقدر تعمل بيها تطبيقات ويب تطبيقات سطح مكتب زي البرامج إللي بنعمل لها install على ويندوز وكمان مواقع نت وألعاب. بايثون كمان في مقدمة لغات البرمجة المستخدمة في الذكاء الصناعي وعلوم البيانات. ممكن تبدأي من كورس CS50 أو CS50P ومتاحين مجانا على موقع www.edx.org الكورس دة من جامعة هارفارد. الكورس هايبدأ معاكي على برنامج بيخليكي تعملي ألعاب بسيطة من غير ما تكتبي كود عشان تفهمي أساسيات البرمجة وبعض مفاهميها وبعدين هايوصل إنك تحلي شوية مسائل بلغة بايثون. الكورسات دي مصممة للناس إللي عمرها ما كتبت كود برمجي ولا تعرف حاجة عن البرمجة. وبتسمح للطلاب والمدرسين يتفاعلوا ويساعدوا بعض في مجتمع صغير متعاون. يعني مش هتكوني وحدك في المشوار دة. الكورس مجاني، بس لو عاوزة ممكن تدفعي فلوس عشان تاخدي شهادة معتمدة إنك خلصتي الكورس. في ميزة تانية كمان، الشهادات دي ممكن تتحسب من ضمن نظام الساعات المكتسبة في الدراسات الاكاديمية لو عاوزة مؤهل عالي يحتوي الكورس دة. يعني مثلا، الكورس دة عبارة عن منهج مادة في الماجستير المصغر لعلوم الحاسب الآلي في جامعة ما، لو أخدتي الشهادة تقدري تقولي للجامعة إنك خلصتي المادة دي من هارفارد من خلال edx وماتدخليش امتحان تاني فيها. مش هاستفيض هنا آكتر في الموضوع دة لأنه موضوع لوحده. أخيرا، في بعض المجالات والتطبيقات محتاجة لغات مساعدة، زي إنك تعملي مواقع ويب مثلا، هاتلاقي نفسك محتاجة جافا سكريبت Javascript وHTML مثلا. أكتر من لغة برمجة ممكن تعمل حاجات مختلفة مع بعض في تطبيق أو برنامج واحد. يعني ممكن تشتغلي بلغة بايثون مع جزء بواحدة من عائلة لغات C, C++, C# أو جافا )جافا غير جافاسكريبت(.
أكيد في كتير وبحث بسيط في App store هايجيب نتائج كتير، لكن ما أقدرش ارشح حاجة لأني مجربتهمش.
تم النشر الأربعاء، ٢٤ يوليو ٢٠٢٤
طب فيه تطبيقات معينة انزلها تكون بتعلم من البداية؟
تم النشر الأربعاء، ٢٤ يوليو ٢٠٢٤
لعرض الإجابة في فدني اضغط هنا