انا حبيت شخص علي موقع تعارف وبعد ما حبيته كدبت عليه في حاجات كتير في البدايه ماكدبتش عليه علشان اضحك عليه بس كدبت عليه في الاول لان ماكنتش واثقه فيه وكنت خايفه إنه يعرفني منين ويقول لاهلي بس بعد ما عرفت الشخص ده فتره حسيت إنه قد الثقه واقدر اقوله كل حاجه عني بس في نفس الوقت كنت خايفه اخسره فمرضيتش اقوله
بس هو كان بيقولي انا حاسس انك بتخبئ عني حاجه وانا بطلت أوثق فيكي وفي كلامك وهو كمان كان بيحبني بس من كتر ما كدبت عليه بطل يحبني يعني انا في الاول كنت حاطه صوره غير صورتي علي الموقع بس بعدها هو عرف وقالي عايز اشوفك انتي وشافني وبردو كمان فضل بيحبني بعد ما شافني
بس انا كنت قلت له أن عايشه في المنصوره وانا من الصعيد وهو كان بيدني فرص كتير وسامحني كتير وفي آخر فرصه انا قررت اقوله اني من الصعيد وهو قالي إنه مش هينفع يتزوج من الصعيد لانه مش بيرتاح لاهل الصعيد وقالي تعرفي لو كنت بحبك زي الاول كنت حاولت علشانك بس دلوقتي وافق وقالي هاتي رقم اخوكي وعنوانك بس احس انه وافق من كتر الزن عليه وأنه قلت له انا عارفه اني غلطانه اني كدبت عليك بس انا بحبك مع العلم انا لسه 19 سنه
غلط يا استاذة غلط تثقي فيه ده غريب ده غير انه ممكن يقول لاخوكي و الصعيد بيتعاملو مع الامور دي بشدة جدآ يعني اقل حاجة هيقولك عرفتيه منين او هيسأله عرفك منين و لو هو مش صعيدي مش هتعرفي تتجوزيه عشان الصعايدة مش بيدو برا اولا كدة و بسم الله العلاقة دي حرام وغلط،مهما وثقتي فيه او موثقتيش ،مفيش واد محترم هيدخل موقع زي ده و زي معرفك و زهق منك هيعرف غيرك عادي،مترخصيش نفسك لكلاب الشارع انتي لسة صغيرة ما شاء الله و نصيبك مش هيروح لحد والله انتي غالية مينفعش تكوني موجودة على موقع و واحد يختارك بناءآ على صورة صفحتك لو عجبتيه او لا و مدام طلب صورتك يبقى عايزك عشان عجبه شكلك تعديل: و ممكن يقول لاخوكي كل حاجة برضك فخلي بالك
تم النشر الخميس، ٦ فبراير ٢٠٢٥
السلام عليكم، بصي هو أنتِ غلطتِ من البداية خالص... مش عشان كذبتِ.. أكيد ده غلط طبعًا لكن الغلط من الأول إنك دخلتِ موقع تعارف وتعرفت على شاب وارتبطتِ به ودخلتِ في كل الدوامة دي. أنتِ لسه صغيرة وبرأيي بدري قوي على الارتباط وإنك تثقي في حد وتسلميه قلبك وخاصة لو شخص غريب عرفتِه عن طريق الانترنت. لو عاوزة رأيي، انهي الموضوع ده خالص... لا تعطيه رقم أخوكِ واقطعي العلاقة واعتبريها صفحة وانتهت. أولا، كذبتِ كتير وعلى كلامك هو مبقاش يحبك ولا يثق فيكِ... لو كان صادق أصلا إنه هيتقدم لك فخليكِ متأكدة إنه هيفضل شاكك في كل كلمة بتقوليها ولو تزوجتوا ممكن الموضوع يعمل مشاكل كتير بعدين. ثانيا، أنتِ شاكة اصلا يكون وافق عشان كتر (الزن) عليه... بعيدًا عن إن أصلا مينفعش إن أنتِ اللي تزني والمفروض هو اللي يسعى ويبذل جهد عشان يتقدم لك وتوافقي عليه لكن اللي حصل... هل بعد ده هتكوني واثقة في مشاعره وإنه مش هييجي يوم ويزهق. ثالثًا، أنا كمان شايفة إنه بلاش تعطيه رقم أخوكِ... تضمني منين أصلا إنه مش عاوز يكلم أخوكِ عشان يعرفه اللي عملتِه؟.. يعني، كنوع من الدروس ويكون بيأدبك من وجهة نظره على كذبك الكتير عليه. رابعًا، قالك مش عاوز من أهل الصعيد ولو بحبك كنت حاولت وبعدين رجع يقول خلاص هاتي رقم أخوكِ... ده مش أدعى إنك تشكي أصلا فيه؟ *** هل شايفة إن ممكن عادي تكملي مع حد مبقاش يحبك (على كلامك) ولا يثق فيكِ وكمان مش عاوز يرتبط بحد من الصعيد وتكملي عادي لمجرد إنك حاسة إنك بتحبيه؟ انهي الموضوع ده واستغفري ربنا عشان كانت علاقة غلط وفكري في نفسك ودراستك وثقة أهلكِ فيكِ. طوري نفسك وأجلي موضوع الحب والزواج ده لحد ما تكوني واثقة في نفسك وقدرتك على اختيار الشخص الصح وبلاش مرة تانية ترمي مشاعرك لأي حد. ربنا معك.
تم النشر الخميس، ٦ فبراير ٢٠٢٥
هو انا حابه اسأل سؤال هو الحب مش حرام في الاسلام طيب امتي يكون الحب حلال لانه مثلا عندنا لما بنت بتكلم ولد كلام عادي انا عارفه إنه مفيش صحاب بين ولد وبنت ومثلا بعد ما يتعرفوا وحبوا بعض وبعدها اتقدم لاهلها هل ده حرام لان بسمع كتير أو عارفه إنه مثلا بنت اتعرفت علي شاب واتكلموا وحبوا بعض بنقول أنه ده حرام وده ذنب ليه مع إنه حب والحب مش حرام في الاسلام وغرضه شريف ولو ده حرام فعلا امتي يكون الحب حلال وأنه مش مخالف للإسلام
تم النشر السبت، ١٥ فبراير ٢٠٢٥
عزيزتي، أفهم تمامًا ما تمرين به، وأقدّر الصراحة والشجاعة التي تظهرينها في مشاركة مشاعرك وتجربتك. العلاقات العاطفية تتطلب الصدق والثقة المتبادلة، وهما أساس أي علاقة ناجحة. لقد مررتِ بمرحلة من الخوف من الكشف عن هويتك الحقيقية، وهذا أمر مفهوم، ولكن كذبتك أثرت على الثقة بينكما. من الجيد أنك اعترفت بخطأك، ولكن يجب عليك إدراك أن الثقة تكون صعبة في استعادتها بعد أن تضررت. بالنسبة لشعورك بأن الشخص الآخر وافق فقط بسبب الإلحاح، يجب التأكد من أنه كان مستعدًا حقًا لمواصلة العلاقة بناءً على الصدق المتبادل، وليس بدافع الضغط. فكري في أولوياتك وأهدافك، وهل هذا الشخص يناسبك حقًا، أم أن هناك تحذيرات يجب أن تأخذيها بعين الاعتبار. في متناول يدك اليوم فرصة لتطوير نفسك ولتعلمي كيفية بناء الثقة في العلاقات المستقبلية. حاولي أن تتعلمي من هذه التجربة. وفّري لنفسك الوقت لتفكري في ما تريديه حقًا في العلاقة، وما إذا كان هذا الشخص هو الأنسب لك. استثمري في تعزيز ثقتك بنفسك، وتأكدي أن الشخص الذي يستحق حبك سيكون مستعدًا لقبولك كما أنت، دون الحاجة للكذب أو الخوف. اجعلي الهدف هو البحث عن شخص يشاركك قيمك ويستطيع أن يكوّن علاقة قائمة على الصدق. أتمنى لك التوفيق في رحلتك العاطفية، تذكري دائمًا أن الله ييسر أمورك ويعينك على اتخاذ القرارات الصحيحة.
تم النشر الخميس، ٦ فبراير ٢٠٢٥
ده مش حب ده لعب مراهقين ياحبيتي اعملي بلوك وابعدي وادعي ربك يغفر لك لكن المجال ده مش بيأكل عيش ولا بيفتح بيوت ياحبيبتي خد رقم اخواكي لو شاري هيجي ليكي لكن ده بيتسلى والله اعلى واعلم وانتي رخصتي نفسك المفروض انك غاليه اويي عززي نفسك ياحبيتي 💔
تم النشر الثلاثاء، ١١ فبراير ٢٠٢٥
ومالهم أهل الصعيد كل مكان في الحلو وفيه الوحش ده كلام واحد متخلف سيبك منه ومتحبيش تاني من النت النت ده مفهوش خير
تم النشر السبت، ٨ فبراير ٢٠٢٥
انا ضد الحب عن طريق التواصل الاجتماعي الناس في الحقيقة بمليون وش فما بالك علي النت نادرا لو كان في حد صادق بس الكلام مش كفايه وخديها مني نصيحه من شب كل الشباب فيك وبالذات بتوع النت بيتسلى لقى انك جاده بيتلكك باي حاجه عشان يخلع والله لو كان بيحبك مهما حصل بينكم كان سامحك مهما حصل لأن اللي بيحب حد مبقدرش يسببه أبدا ويحاول يتفهم شعوره ومبرراته الحب مش كلمه حلوه وخلاص في معني لازم يكون في المواقف اللي بيحب بيسامح هو بيعمل حوار عشان يخلع
تم النشر السبت، ٨ فبراير ٢٠٢٥
رخصتي نفسك جدا ،البنات دايما غاليه اوي مترخصيش نفسك ي جميله اعمليلوا بلوك اقفلي اي حاجه تواصل معاه امسحي كله ومن ترك شيئا لله عوضه الله خيرا منه لو نصيبك هيجمعكوا ربنا قال: ( ولا متخذات أخدان) يعني مفيش صحاب بين الولد والبنت ولا من اي نوع احفظي نفسك يبنتي انتي غاليه جدا جدا اتقي الله في كل شي وفي نفسك واهلك وفي ربنا لان ستره عليكي ده فرص لحد ما توبي واهو وجع قلبك ، بعدين انت ازاي من الصعيد! ف اتقي الله في اهل بيتك وفي نفسك ي جميله
تم النشر الجمعة، ٧ فبراير ٢٠٢٥
لعرض السؤال في فدني اضغط هنا