السلام عليكم
الموضوع حساس شويه بس مهم بالنسبالى دلوقتى فى فتره الخطوبه كلامنا بيكون بحدود وكل حاجه ومش بناخد على بعض اكيد زى بعد الجواز فالمهم كنت عايزه اسأل عن حاجه معينه ناس كتير جدا قالت انها عندها نفس الخوف هل الشخص اللي هيتجوزنا هيتقبل كل حاجه فينا كشكل ولا لاء ؟ هيتقبل فينا اسوء حالتنا ولا لاء ؟ انا انسانه نظيفه ومهتمه بنفسي لكن انا قصدى هل هو هيزهق منى ولا لاء انا حبيت شخص من طرف واحد فى فتره المراهقه واعتقدت انى تجاوزت إلا انى أدركت أن الموضوع تسبب لي ف شك وانى دايما ف تردد وعندى خذلان وبحس طول الوقت انى في اى وقت اللي قدامى هيحب حد تانى ويبعد عنى وازاى المتجوزين ممكن يتقبلوا بعض وانا اعرف كل ده منين ف الخطوبه مش عاوزه ادبس
وعليكم السلاام ورحمة الله الموضوع ده قلة تقدير لنفسك كل نظرتك لنفسك بتاخديها من اللى بيرضى اللى حواليكى ضرورى تفكرى اكتر فى اللى بيرضيكى انتى عن نفسك الاختيار السليم لشريك الحياه بيكون انك تعرفى انه متقبل عيوبك قبل مميزاتك شوفى ازاى بيتعامل مع عيوبك ....لو بينتظر انك تتغيرى فى عيوبك وطول الوقت بينتقدها ومش بيحتوى عيوبك او يراعيها ولا مره يبقى اه ممكن تقلقى انه فى المستقبل يزهق زى ما بتقولى النقاط اللى خايفه منها ضرورى تناقشيها مع خطيبك ممكن بردوا تناقشيها بشكل غير مباشر مثلا تقوليله قصه قرأتيها او سمعتيها عن راجل عارف عن مراته انها نظيفه ولما تعبت ومقدرتش تعمل نفس نظامها ونظافتها بقى بيعامىها وحش وينتقدها ...قوليله انك حسيتى ان ده احساس وحش اوى وكأنه عنده استعداد يرميها لو تعبت او ميكونش قابلها وكأنها روبوت
تم النشر الثلاثاء، ٢٨ يناير ٢٠٢٥
وعليكم السلام ورحمة الله وبركاته.. حبيبة قلبي أينعم أنا لسه موصلتش للجزئيه دي من حياتي وممريتش بالبارت ده قبل ڪده، لڪن أنا عايزه أقولك حاجه.. فـ أي وقت من حياتك حتي من غير م تتدخلي فـ علاقه مع أي شخص، لازم تثقي فـ نفسك جدًا وتحبي نفسك وتتقبليها بڪل م فيها من عيوب (من وجهة نظرك أو من وجهة نظر غيرك ) ، لڪن خليني أوضح إن حضرتك مش مطلوب منك إنك تفڪري فـ أي حد أو فـ وجهة نظر أي شخص لمّا الأمر يتعلق بيكِ أو بأي شيء يخصك، أها إحنا بنقبل النصيحه، بس مش بنغيّر من نفسنا ومن شخصنا عشان حد، أيا ڪان مين هو، أنا عايزه أغيّر أي حاجه فـ نفسي، هغيرها عشان أنا عايزه ڪده، عشان أنا عايزه أڪون أفضل نسخه من نفسي، مش عشان فلان أو فلانه، لأاه أنا واثقه فـ نفسي جدًّا جدًا، وأي شخص حابب يدخل معايا فـ علاقه لازم يتقبلني زي م أنا علي طبيعتي، والله مش عاجبه يبقي بالسلامه، مش محتاجينه، لأن اللى حضرتك بتقوليه لنفسك وبتعتقديه عن نفسك وبتشوفيه ف نفسك، بينعكس علي الناس حواليڪي، وبيشوفوه فيكِ، وأنا أنصحك تقرأي ڪتاب "ڪاريزما الأنوثه" . وأنصحك ڪمان وبشده تسمعي " الدڪتور عمرو أبو خليل " فـ دوائر علي يوتيوب. واللينك أهو https://youtube.com/playlist?list=PLx9K_iSa8TCgwVXqEhxAyf5p3SMnjRhpo&si=DSSUrNlNmHMH73pM ومتنسيش تسمعي ضوابط الخطوبه سواءا للدڪتوره هاله سمير أو غيرها. وربنا يڪرمك يارب ويوفقك 🤍🤍
تم النشر الثلاثاء، ٢٨ يناير ٢٠٢٥
حبي نفسك وتقبليها زي ماهي واوعي تحسسيه لوهله واحده انك مش حابه نفسك لو فيكي عيوب وتباني مكسوره ومكسوفه عشان اللي ميعملش قيمه لنفسه محدش هيحترمه فأنتي كبري نفسك وحسي بيها واقفي قدام المرايا وقولي انا حلوه وزي القمر واي حد يتمناني شوفي مميزاتك سواء في شكلك او شخصيتك واكيد كلنا فينا عيوب مش بنحبها بس ده بنقوله بينا وبين نفسنا اوعي تصارحيه بالكلام ده وهو لو مش حابك مش هيتجوزك
تم النشر الثلاثاء، ٢٨ يناير ٢٠٢٥
وعليكم السلام ورحمة الله وبركاته، أقدر مشاعرك واهتمامك العميق بما يتعلق بفترة الخطوبة والشعور بالقلق تجاه المستقبل. فترة الخطوبة هي فترة مهمة للتعرف على شريك الحياة والتواصل بشكل أعمق، وهي فرصة لإقامة أساس متين قبل الزواج. أولاً، من المهم أن تعلمي أن التقبل المتبادل يعتمد على الصراحة والاحترام. التواصل الصادق يشمل الحديث عن القيم، الأحلام، والأمور التي تهمكما. حاولي طرح مواضيع تتعلق بالمستقبل، وكيفية التعامل مع التحديات والصعوبات. هذا سيمكنكما من بناء فهم مشترك وعلاقات أقوى. ثانيًا، الشعور بالخوف من الرفض أو عدم القبول هو أمر طبيعي، لكن لا ينبغي أن يدفعك إلى الشك في نفسك أو في شريكك. تذكري أن التقبل الحقيقي يعتمد على الحب والاحترام المتبادلين. إذا كان شريكك يحبك بصدق، سيتقبل عيوبك كما يتقبل ميزاتك. اعلمي أن التجارب السابقة، سواء كانت مؤلمة أو سلبية، يجب أن تكون دروسًا لا تعيقك، بل تدفعك لتكوني أكثر وعيًا في اختياراتك. ركزي على تطور نفسك وكوني كما أنت، فالشريك المناسب سيرى قيمتك الحقيقية. إذا كان لديك مخاوف محددة، كوني جريئة في مناقشتها مع شريكك. الشفافية تمهد الطريق للعلاقة الصحية. ختامًا، كوني صادقة مع نفسك ومعه، واتأنسي في تلك المرحلة. فكلما كان أسلوبك في التواصل أوضح، زادت فرصتك في بناء علاقة مبنية على الثقة والتفاهم. إذا كانت لديكِ المزيد من الأسئلة أو تحتاجين إلى دعم إضافي، فلا تترددي في طرحها. أود مساعدتك بما أستطيع.
تم النشر الاثنين، ٢٧ يناير ٢٠٢٥
أكيد هيجي وقت ويزهق، وأكيد هيجي وقت وتزهقي.. طبيعي يعني. لكن استمرار العلاقة مش معناها استمرار الانبهار والاندهاش والحب الأفلاطوني. لا، استمرار العلاقة هي القدرة على التكيف مع الظروف والضغوط والحياة والمسؤولية، في مزيج عجيب بين الحب والزهق.
تم النشر الثلاثاء، ٢٨ يناير ٢٠٢٥
لعرض السؤال في فدني اضغط هنا