السلام عليكم
أنا بنت عندي ٢٠ سنة، في أحدى الكليات العملية الفنية
على المستوى الدراسي والشخصي عندي مشكلة ألا وهي إني مببدأش في الحاجة اللي عايزاها إلا بعد وقت ومناهدة طويلة مع دماغي، وعلى الأغلب لما ببدأها بيكون علشان خلاص الوقت النهائي بتاعها قرب، وأحيانًا بلحق وأحيانًا بكون في النهايات خالص، وأحيانًا بطلعها عن الوقت بتاعها بس باخد فرص تانية، وأحيانًا ممكن أخرجها عن وقتها بشكل نهائي من كتر التأخير، وممكن ماعملهاش أصلًا في النهاية..
بجانب إني بتعب جدًا من الالتزامات والموضوع مرهق نفسيًا جدًا ليَّ، وكتير جدًا بوقف حاجات عايزة أعملها بسبب إني مش قادرة ألتزم وإن الموضوع صعب..
--
بخاف جدًا إني اتأذي، بخاف حد يشوفني وحشة، ف بخاف أعمل حاجة مش سليمة بشكل كامل واسمع نقد سييء عليها.. وبخاف من حكم الناس..
وده وصل حاليًا إني بقيت أحيانًا بتجنب بعض الأشخاص خوفًا من الأذى..
--
في فترة معينة -فترة نهاية الإعدادي- كنت أتلقى دعم معين، واختلف مستوايا بشكل واضح جدًا ما شاء الله وكنت واثقة من نفسي عن الطبيعي كتير!! ومستوايا كان مرتفع بشكل ملحوظ الحمدلله وجبت درجات كويسة جدًا في السنة دي.. وكنت متفوقة بشكل كبير ما شاء الله
لكن الدعم ده كان لازم يتوقف لسبب ما، ف للأسف انتكست أعتقد، ونفسيتي ساءت جدًا في وقت معين -فترة ثانوي- بعد ما حصل ده..
--
معرفش ممكن تكون معلومة مهمة ولا لا..
بس أنا كنت بالنسبة للمدرسين اللي في الدروس أو كده -اللي بيتعاملوا معايا بشكل كويس وبيتعاملوا معايا بشكل شخصي مش مجرد طالبة من آلاف الطلاب اللي بيمروا عليهم قاعدة قصادهم وخلاص- إني بنت شاطرة ما شاء الله ومتفوقة -بالأخص في الفترة اللي كنت حاسة بدعم فيها واللي كان أغلب مدرسينها من النوع ده تقريبًا بما إن مكانش في مدارس أصلًا وقتها يعتبر-
وعلى العكس، مستوايا كان بالنسبة لبعض مدرسي المدرسة البعيدين عن التعامل معايا إلى حد ما -في إعدادي وثانوي- إني طالبة غريبة وغير متفوقة وهكذا، رغم إني مبحبش ده، ومبحبش النظرة دي من طلبة ولا من مدرسين وبتأثر فيَّ بشكل رهيب لدرجة إني وصلت إني في تانية ثانوي كنت بتجنب الطلبة اللي معايا في المدرسة بشكل كبير وبفضل القعدة لوحدي -بالأخص بعد ما حسيت منهم بالتجنب في بعض المراحل المدرسية الأخرى- ومستوايا الدراسي قل، بس مكنتش قادرة أقاوم علشان أكون أفضل بشكل ملحوظ وتتغير نظرتهم..
وللأسف في ثانوية عامة جبت مجموع مكانش أفضل حاجة خالص..
--
بفقد الشغف بسرعة إلى حد ما.. ومبعرفش أجمع نفسي إني أقعد أذاكر وقت ما أحتاج لذلك بسهولة، رغم إني الحمدلله ذكية إلى حد ما ومش صعب إني أجمع معلومات في وقت بسيط لو المعلومات منظمة..
--
مش من السهل إني أتذكر وأترتب كل اللي في ذهني للإجابة على سؤال أكاديمي مقالي أو إذا كان مطلوب مني كتابة شيء مقالي، حتى وإن كنت قد قرأت الصفحة منذ دقائق، لكن أتذكر بسهولة ويسر الحمدلله في الأسئلة الإلكترونية..
ولكن لا أعرف إن كانت المشكلة من طريقتي في المذاكرة ولا في مشكلة ما
--
بتوصف بالكسل وعدم الاهتمام -من أهلي مثلًا- لإني بالنسبة لهم إن المشكلة من عندي وإن أنا اللي مش مهتمة وإني أنا اللي مش عايزة ابدأ وإن أنا اللي بكسل أكمل وإن أنا اللي بضغط نفسي وإن أنا اللي بكون عايزة أريح نفسي فبسيب اللي المفروض أأديه أو بأخره..
--
نقطة أخرى قد يكون ملهاش صلة..
إني عندي وسواس قهري، بالأفعال زي في النضافة في بعض الأشياء أو في الطهارة والوضوء والصلاة أو كده
أو حتى في التفكير، زي إني أخاف أحسد حد، أخاف أكون كده برائي الناس، الحاجات دي
والموضوع ممكن يوصل إني علشان أوقف أفكاري اللي بتحسسني بده فاخبط دماغي بإيدي أو أخبط إيدي في حاجة أو اخبط دماغي في حاجة جنبي.. لدرجة حصلت أكتر من مرة كدمات في إيدي بسبب ده..
وحقيقي الموضوع بقى متعب ليَّ إني كل شوية أضرب نفسي أو كذا
--
إيه المشكلة اللي ممكن تكون عندي وممكن اتعامل معاها إزاي من فضلكم
اهلا ومرحبا بك. أولا بنصحك أنك تبدأي تاني تتابعي مع دكتور لو الظروف تسمح في الوقت الحالي. ثانيا الوسواس القهري مرتبط بحاجه عندك وهي المثالية. تعرفي موظف الحسابات اللي عنده وسواس ده يعمل الشغل بتاعه كويس جدا وعلى أكمل وجه. لأن الوسواس مرتبط بالكمالية، اللي هتخلي الواحد يعمل الحاجه كويس جدا. فموضوع عدم الانجاز مرتبط شوية بالوسواس، لانك عايزة تعملي الحاجه بيرفكت، عايزة تعملي الحاجه ديه وتكون على أعلى مستوى، وفي نفس الوقت خايفة تعمليها أحسن متكونش زي ما انتي عايزة. خايفة من منين، وعلشان خاطر ايه؟ من الناس ومن أحاكمهم، ما طول عمر الناس بتتكلم، فكري معايا كدا بشكل منطقي شويه، هل الناس بتبطل كلام وأحكام على بعض، سواء على حاجه وحشة ولا حلوة؟ أنتِ أهم حد مش الناس، ديه حكايتك انتِ، مش الناس، ركزي مع نفسك أكتر، لما هتركزي مع نفسك أكثر وتهتمي بنفسك، كلام وأحكام الناس مش هيشغلوكي. أما موضوع الأفكار القهرية اللي بتجيلك وانتي بتخبطي دماغك، انا فاهمة انتي متعصبة اد ايه، وانك مش عايزة كل ده يحصل. بس ده مش حل اطلاقا... الافكار مش هتبطل اكيد لما تخبطي راسك أو تأذي نفسك بالشكل ده. محاربة الأفكار هتبقى بالافكار مش بالاذي الجسدي ابدا. ابدأي كلمي نفسك بالشخصية المنطقية، يعني مثلا أنتِ لسه غاسلة ايدك يعني نظيفة، يجيلك فكرة ان ايدك مش نظيفة ولازم تغسليها. هنا لازم تكلمي نفسك بالمنطق، هل هي فعلا مش نظيفة طيب ما انا لسه غسلاها. لا لا ديه فكرة خطأ، ديه مش حقيقة. حاربي الفكرة بالفكرة، متقوميش علطول تنفذي الفكرة اصبري شوية على نفسك وكلميها. ممكن في الاول يبقى الموضوع صعب. ف أنتِ ممكن تعملي ايه حاليًا! لو الظروف تسمح ياريت ترجعي تتابعي مع الدكتور. لو الظروف حاليا متسمحش، ابدأي اكتبي الأفكار اللي بتجيلك. ابدأي اعملي تمارين استرخاء. ابدأي أن تقرأي كتب تساعدك، زي الكتب التنمية الشخصية. ده كورس تعلم: كيف تتعلم من على منصة كورسيرا هيساعدك في حاجات كتير https://www.coursera.org/learn/learning-how-to-learn-ar
تم النشر الأحد، ١٨ سبتمبر ٢٠٢٢
خلينا نتكلم بشكل منظم جدا ١. الجزء الاول من المشكلة : انتى تحتاجين للدعم المستمر المباشر ...بتحبي تعملى الحاجة وتشوفى شخص محدد فرحان معاكى وبيكى ( حد يكون بينكم صفة قريبة ) وده طبيعى ...كل البشر يحتاجون للاحساس بالدعم وبعد الانجاز يحسوا بالتقدير. ده ممكن نحله باننا نعرف ان من حقنا نطلب الدعم عادى جدا ..نشوف الشخص اللى هنحب نشارك معاه كل اللحظات بدون خوف او شعور بالانتقاد ونطلب منه يكون معانا. ٢. الجزء الثانى : نظرة الاخرين ليكى : انتى بتحسي ان الضوء متسلط عليكى فى اى مكان بتروحيه وتتواجدى فيه ...موضوع الدراسة هو اكتر حاجة ذكرتيها بس اعتقد ده شعور عام ...بس انتى بتحاولى تستخبي واصلا محدش مركز معاكى للدرجة اللى انتى حاساها ...انتى اللى مركزة مع نفسك اوى وخايفة دايما تظهرى بالشكل الغير مناسب.( زى اللى بيطبخ اكله فمن كتر ما هو خايف تطلع مش حلوه عمال يحطلها اضافات ويزود وقت الطبخ بتاعها ...لحد ما باظت ومبقاش ينفع تتاكل ) طب وليه كده ( ببساطة نتبع الوصفة وبس ونحط المكونات المطلوبة بس ونطبخها الوقت المطلوب وبس ) متزوديش اضافات وتتخيلى ان لسه ممكن تعملى حاجة تانيه فاللى بتعمليه يكون احسن ....انتى بتزودى مجهود منك وتفكير ع الفاضى ( الحل هنا تتبعى الوصفة ). ٣ . الجزء الثالث ...انك توصلى انك تبقي مش عارفه توقفي الوسواس للدرجة دى ...دى محتاجة طبيب نفسي فورا ...ع الاقل يعديكى اول مرحلة وبعدها ممكن متحتاجيش حاجة تانى وتسيطرى على ده لوحدك ...متخليش الموضوع يزيد ...ده جرس انذار ...الحقى قيل ما يزيد. لو مش عارفة تعملى اى حاجة لوحدك ...اطلبي المساعدة....زى ما سألتى السؤال هنا..اطلبي المساعدة عشان تبدأى تتغيرى ...هتقدرى تفضلى البنت الشاطرة بس انتى ابدأى وانا عن نفسي مستعدة اساعدك بس اطلبى .
تم النشر الجمعة، ٩ ديسمبر ٢٠٢٢
انا مش متخصصه ولكن انصحك تعملي حجامه وتحرصي على اذكار الصباح والمساء
تم النشر الثلاثاء، ٢٢ نوفمبر ٢٠٢٢
بصي مش هطول عليكي ... كل الكلام ده محتاجه تروحي لطبيب نفسي لأن في بعض الأمراض والاضطرابات لازم لها علاج دوائي لتظبيط بعض خلايا المخ لان الوسواس القهري قريب جدا من اضطراب الشخصيات الحدية والكمالية وده اضطراب عقلي ليصيب كل الي بينشدوا الكمال والمثالية انصحك تقرأي عنهم اكتب وتعرفي نفسك اكتر
تم النشر الجمعة، ١٨ نوفمبر ٢٠٢٢
رقم تلاته حسنى علاقتك مع ربنا
تم النشر الأحد، ٢٥ ديسمبر ٢٠٢٢
رقم اتنين لازم تتابعى مع دوك نفسي فى اسرع وقت
تم النشر الأحد، ٢٥ ديسمبر ٢٠٢٢
رقم واحد فى العلاج الاعتراف بوجوده
تم النشر الأحد، ٢٥ ديسمبر ٢٠٢٢
لعرض السؤال في فدني اضغط هنا