السلام عليكم ورحمة الله وبركاته
محتاجة اتكلم و استشيركم،
انا شاكة اني عندي اضطراب ADHD، و عارفة اني المفروض محكمش غير لما اتشخص من دكتور مختص، لكن معرفش دكاترة متخصصين أو يعرفوا يشخصوا الحالات دي،
من خلال بحثي الكتير لقيت ان كل اعراض ال ADHD تنطبق عليا بالظبط و عملت اختبارات ع النت كتير و كانت كل النتايج ان انا احتمال يكون عندي اضطراب تشتت الانتباه و فرط الحركة و اتفرجت ع فيديوهات بتشرح طبيعة الاضطراب و بحس كأنهم بيصفوني بالظبط،
و انا بجد بعاني من الموضوع ده بقالي فترة طويلة و مش عارفة احل الموضوع و بدأ يأثر ع نفسيتي لاني بحس ان الغلط فيا و انا داخلة ع تالتة ثانوي و داخلة ع سنة مهمة و خايفة ده يأثر على دراستي زي ما هو مأثر دلوقتي و انا مش عايزة كده.
فممكن مساعدة أو حتى كلمة تشجيعية.
لازم أولا تفرقي بين هل دا ADHD ولا دي حالة عادية من عدم التركيز أو التشتت أو النسيان الطبيعي اللي عند كل الناس كلها بنسب متفاوته، إتأكدتي انها مش طبيعي ومبالغ فيها يبقى تتواصلي مع أخصائي يبدأ يتابع معاكي، من غير أخصائي حاولي نظمي أكلك قللي سكريات جدا لو عندك فرط حركة HD، تركزي جدا جدا ع الألعاب والأنشطة اللي بتحتاج تركيز وذاكرة، بس طبعا علشان نقول انك ADHD لازم تشيخص مختص حاجة كمان الأكل والفيتامينات بتفرق جداا في الانتباه والتركيز لما كنت في ثانوي كنت اشتكيت لدكتور اني عندي مشكلة اني بحس اني بنسى كتير اوي وبسرح بس وقتها مكنش اكلي منتظم واخدت فيتامينات معينة وحسيت بنوع من التحسن، وكمان علشان جزئية انك شوفتي الاعراض وحسيتيها كلها عندك، أنا المفروض بدرس الإعاقات كل ما ناخد كلام عن أعاقة وندرس أعراضها بحس اني عندي الاعاقة دي 😂😂 ف طبيعي صدقيني تحسي بكدا لمجرد انك قريتي الأعراض
تم النشر الجمعة، ٢٨ مارس ٢٠٢٥
صباح الخير يا فندم اللي بتمري بيه مفهوم، لكن لازم تقييم دقيق من دكتور متخصص في المخ والأعصاب أو الطب النفسي، لأن ADHD له معايير تشخيصية محددة، واختبارات الإنترنت مش دقيقة. بما إن الأعراض مأثرة على دراستك وحياتك، أنصحك بزيارة دكتور عشان يحدد السبب الحقيقي ويوجهك للعلاج المناسب، سواء كان تنظيم وقت، تمارين تركيز، أو أدوية لو لزم الأمر. متقلقيش، كتير بيكون عندهم أعراض مشابهة وبيلاقوا حلول تساعدهم بشكل كبير.
تم النشر الجمعة، ٢٨ مارس ٢٠٢٥
كنت زيك بالظبط وكل المؤشرات كانت بتجزم اني مصاب به ولكن صراحة انا لم اكن اعاني من شيء وكل هذه كانت تهيئات ، ابعد بس عن المشتتات و وقف مشاهدة المقاطع القصيرة وابتدي ركز في شيء معين مثلا لمدة خمس دقايق وزود الوقت تلقائي وهتلاقي نفسك بقيت تمام بإذن الله
تم النشر الخميس، ٢٧ مارس ٢٠٢٥
وعليكُم السَّلامُ و رحمةُ اللَّهِ وبركاتُه شوفي هو عشان تشخصي أي اضطراب نفسي لازم على الأقل يكون عدىٰ عليه ٦ شهور ونتي بنفس الحالة دي فاهمة... عموما لو حاسه إن عندك مشكلة روحي لـ دكتور/ة او أخصائي/ة نفسي يحاوِل يهدي من الموضوع ده عندك لو بتجيلك منه مشاكل يعني حتى ممكن تروحي عياده بعيدة شوية عن بيتِك، او ممكن تشوفي علاجات سلوكِية ليها على الانترنت تحاولي تساعدي نفسك بيها...
تم النشر الخميس، ٢٧ مارس ٢٠٢٥
وعليكم السلام ورحمة الله وبركاته، أختي العزيزة، أولاً أود أن أقول لك أن مشاعرك مهمة جدًا، وأن ما تعانينه يستحق الاهتمام والتقدير. من الطبيعي أن تشعري بالقلق حيال أعراض قد تكون تشير إلى اضطراب ADHD، ومن الجيد أنك تقومين بالبحث والتوعية حول هذا الموضوع. يجب أن تتذكري أن التشخيص الدقيق يحتاج إلى تقييم شامل من قبل مختص، لذلك أنصحك بالبحث عن طبيب نفسي أو طبيب مختص في اضطرابات الإعاقة السلوكية في منطقتك. يمكنك استشارة الأصدقاء، أو العائلة، أو حتى مدرسيك للحصول على توصيات لأطباء موثوقين. أما بالنسبة لأثر هذا الأمر على دراستك، فمن المهم أن تحاولي تنظيم وقتك وتهيئة بيئة مناسبة للدراسة، مثل تقليل الفوضى من حولك وتحديد فترات الدراسة والتركيز. يمكنك استغلال الموارد المتاحة، مثل المجموعات الدراسية أو الدروس الخصوصية. في النهاية، تذكري أنك لست وحدك في هذا الأمر، وأن هناك العديد من الأشخاص الذين يمرون بتجارب شبيهة. كوني صبورة مع نفسك، وامنحي نفسك الوقت للتكيف وطلب المساعدة. أنت فتاة قوية وقادرة على التغلب على التحديات التي تواجهينها. وفقك الله في دراستك، ونسأل الله أن يسهل لك الأمور.
تم النشر الخميس، ٢٧ مارس ٢٠٢٥
بصي انا اللي أعرفه أن كل حاجة بتيجي بالتعود يعني مثلا اعرف أن المرض ده بيخلي الواحد مستعجل أو كده انتي جربي تعيشي شهر واحد بهدوء و هتلاقي نفسك فعلا اتعودتي على العيشة دي و ادعي ربنا كتير و ثقي في قدرته
تم النشر الجمعة، ٢٨ مارس ٢٠٢٥
حاولت احل المشكلة كتير بطرق مختلفة و لكن انا لوحدي مبعرفش و مفيش تحسن، و معرفش دكاترة متخصصين في الحاجات دي
تم النشر الجمعة، ٢٨ مارس ٢٠٢٥
حاولي تقولي لنفسك ان دي اوهام م حقيقة و الاعراض دي موجودة عند ناس كتير جدا بنسب متفاوتة. عشان هتدخلي نفسك في دوامة هتأثر عليكي و تخليكي مريضة نفسياً فعلاً حتي لو مش مريضة ناو....خففي علي نفسك و هوني عليها و لو عاوزة مساعدة احنا هنا ف الكومنتات معاكي و لو فعلا مافيش تحسن ممكن تتواصلي مع دكتور نفسي او اخصائي
تم النشر الجمعة، ٢٨ مارس ٢٠٢٥
التأمل نص ساعة في اليوم .. إبدأ ارجوك
تم النشر الخميس، ٢٧ مارس ٢٠٢٥
لعرض السؤال في فدني اضغط هنا