انا ازاي ابقي محبوب بين أصدقائي وابقي مثلا انا المفضل بالنسبه لمعظمهم ولما اعرف حد اعرف اصاحبه بسهوله وبنفس الوقت تبقي شخصيتي مش ضعيفه
أول حاجة لازم تكون نفسك، وأنت مش هتكون نفسك إلا لما تحب نفسك انت الأول و تشيل فكرة لفت نظر الناس من دماغك، عشان تكون طبيعي ومش متصنع؛ لأن لغة الجسد بتوصل للعقل الباطن ديما وبتتحس. وأنا لما بقول تحب نفسك مش معناها انك تبقى مغرور أو تحب العيوب اللي في نفسك، لكن معناها انك تكون متصالح مع نفسك مش رافضها وكارهها وعايز الناس تحبها، مش تكون انت متخانق مع نفسك وحياتك وعايز الناس تختارك الصديق المفضل. ثانيا لازم تكون مميز في شيء ، متفوق في حاجة ، لك هواية معينة أو اهتمام معين انت بارز فيه وبتفهم فيه أوي وتقدر تفيد أي حد فيه أو حتى تناقشه، زي الجيم.. الشعر.. روايات وكتب.. معلومات دينية. ثالثا تكون مثقف وده مش بيحصل بالمذاكرة ولكن مع الوقت بالتعامل وكثرة القراءة (اكيد مش روايات وقصص) ودلوقتي ممكن اليوتيوب بلا منازع يخليك مثقف فيه ملايين البرامج القصيرة والمقاطع اللي حسب اهتمامتك هتلاقيها. رابعا أنك تكون إنسان محترم، مش تكون إنسان تابع بتعمل زي بقيت الناس عشان تحس انك منهم وتحسسهم بده. وده اللي انت قولت عليه شخصية ضعيفة. لأ، أنت لازم تكون مؤثر، وتكون صاحب رأي، وتكون لك ميولك ودماغك، وعلى أساسهم تبدأ تختار الصحاب اللي شبهك، ومش تروح لناس وتحاول تبقى شبههم. خامسا بقى والأهم، الدين! لو انت انسان فاشل دينيا محدش هيحبك ولو حتى قضيتوا وقت او كان بيسألك عن حاجة أو بتتفسحوا أو أو أو محدش هيحبك بجد إلا اللي هيفسدك أو يخونك أو يسيبك بعدين. لأن الحب الحقيقي بيجي من ربنا اللي بيملك القلوب بين إصبعين من أصابعه زي ما الحديث علمنا. فلما بيحب فلان بينادي في أهل السماء والأرض أحبوا فلان فإني أحبه، وبيتحط حبه في قلوب الناس، فبيكون فيه القبول اللي انت يتدور عليه، والصدق والإخلاص. لكن بحثك يا صديقي عن حب الناس والصحاب هو أكبر خطيئة، ابحث عن حب ربنا .. وحب نفسك حب ربنا يخلق لك حب في قلوب الناس وحب نفسك الناس تحبها. سادسا فيه شوية سلوكيات، يعني لازم تسمع، وتحاول تساعد وتلاقي حلول، واوعى تساعد في الغلط ديما الناس هتستنقصك وتنزل من نظرهم. وكمان، حاول تكون الغائب الحاضر، يعني مش متاح على طول بس يحسوك ديما موجود.. سيب أثر. أوعى تكون 24 ساعة أونلاين وأي وقت نتقابل وأي رسالة أرد.. الناس بتكره الإنسان السهل، بس في نفس الوقت انت موجود. مشغول بس مش غايب.
تم النشر الثلاثاء، ٧ مايو ٢٠٢٤
شىء طبيعى أنك تكون عايز تكون محبوب من اصدقائك بس اوعى تخلي ده غايه او حاجه انت بتدور عليها دايما حاول تحب نفسك انت الاول وصادق اصدقائك بنفس شخصيتك ما تتغيرش عشان يحبوك بزياده لان صدقني هتكتشف في الاخر ان ما فيش اي حد في الدنيا كان يستاهل انك تتغير علشانه او علشان تنال اعجابه حاول تثق في نفسك وخليك مدرك دائما ان مش شرط يكون الكل متقبلك او بيحبك لان طباعنا مختلفه وشخصياتنا مختلفه وخلي بالك ان ممكن يكون سبب ضعف شخصيتك هو دايما انك بتدور على قيمتك في عيون بشر ودي حاجه عمرها ما هتحصل مهما كان اللي قدامك ملاك صاحب اللي عايز يصاحبك وما تخليش الصداقه دايما من اولوياتك لانها شيء يكتسب مع الوقت هتلاقي الناس اللي شبهك حتى لو مش لاقيها دلوقتي واوعى تسمح لحد يغير نظرتك لنفسك مهما كان هو مين لانك لو سمحت بده مره هتسمح بيه الف مره والصداقه مش معناها ان احنا دايمين في حياه بعض ومش لازم ابدا انك تصاحب ناس جداد باستمرار وصدقني لو اصحابك دول مش بيحبوك زي ما انت يبقى بلاش تقول عليهم اصحاب لانهم كده مع الاسف مش اصحابك فحاول ما تخدعش نفسك وعيش في الدايره اللي تناسبك اتمنى تفكر في كلامي كويس وتحاول دايما تستشعر انك انسان محبوب حتى لو اللي حواليك مش بيبينوا ده لانك ممكن تكون في الدايره الغلط
تم النشر الأربعاء، ٨ مايو ٢٠٢٤
حبي نفسك وعززيها وبعد كده كل الناس هتديكي قمتك وربنا يجمعك بالناس اللي تسبة قلبك ف الوقت المناسب يارب
تم النشر الأربعاء، ٨ مايو ٢٠٢٤
أولاً لازم نوضح نقطة جوهرية جداً في مسألة معنى الصديق .. لو وجدنا شخص وأطلقنا عليه كلمة صديق فلابد من سماته الأساسية إنه يكون بيحبك وبتحبه بجد وليس بتسعى إلى بداية حبه وإلا كان مجرد زميل إذا لم تتوافر فيه أركان المحبة .. أما بالنسبة عن الرغبة تجد أي شخص تجده تصاحبه بسهولة : فهذه النقطة أحب اقول لحضرتك نصيحة غالية جداً : اقتصد في الصداقة ولا تجعل أصدقاءك كثيرون .. اكتفي بالقليل الصالح .. لأن كثرة الصداقة ستقلل انتاجك في العمل أو المذاكرة إن كنت بتدرس .. وستقلل انفرادك بعائلتك وإعطاء المزيد من الحُب لهم .. ده كمان حيقلل من وقتك فيقل الوقت المخصص بجلوسك للعبادة وقراءة القرآن وقيام الليل .. وزيادة معرفتك بقراءة كتب جديدة وتعلم مهارة جديدة .. حاول يكون أصدقاءك هي زوجتك أو زوجك وأطفالكم وأقاربكم وصاحب والدك ووالدتك.. هؤلاء أحق بوقتك من أشخاص غُرباء لا أحد يعرف نواياهم وما هو مستخبي من العلاقة معهم ..
تم النشر الأربعاء، ٨ مايو ٢٠٢٤
هتحتاج حضرتك عشان توصل لدا انك تشتغل علي جزأين الاول : تاخد كورس soft skills دا هيساعدك تقدر تتعلم مهارات زي التفاوض والمرونه والتاني : انك تتعلم مهارات توكيد الذات assertive behaviour هتتعلم فيه مهارات من أهمها ازاي تقدر تقول لاء بطريقه مقبوله وفي نفس الوقت تاخد حقك
تم النشر الأربعاء، ٨ مايو ٢٠٢٤
والله نفس مشكلتي ربنا يجعل فينا القبول
تم النشر الأربعاء، ٨ مايو ٢٠٢٤
لعرض السؤال في فدني اضغط هنا