حصل مشكله بيني وبين خطيبي من حوالي سنه وكانت غلطه منى غير مقصوده ممكن تحصل بين اي اتنين عادي واتكلمنا فيها كتير واعتذرت عنها اكتر ولحد دلوقتي بيكلمني انها غيرته ناحيتي ومعتش زي الاول وتعبته نفسيا ومازالت وغيرته فكل حاجه ومشيلني ذنبها طول الوقت مهما عملت مع انها متستحقش كل دا ابدا ، ومع انه غلط او عمل مشاكل ضايقتني بنفس الشكل بالظبط ،، ف هو مشيلني ذنب طول الوقت اني تعبته واذيته ولما بقوله نفركش لاني مبقتش حاسه انه عايزني مبيرضاش ومبقتش عارفه دلوقتي اي الصح انه معاه حق ولا هو كدا ال بيأذيني؟
ازيك، يارب تكوني بخير. كتير اوي بتحصل مشاكل في كل العلاقات اللي في حياتنا. ممكن وقت نبقى فعلا قادرين، ووقت تاني لأ. لكن، من وجهة نظرك أنه عمل مشاكل كتير وانتي عديتي كل ده. ف تمام . في ظل أنه مش عارف يغفر الغلطة اللي عملتيها، هو عادي أنه مش عارف يسامح أو ينسى أو يتخطى، اللي مش عادي أنك دلوقت بتستنزفي. يعني هو مستني ايه من العلاقة ديه دلوقت؟ مستني ايه في ظل كل اللي بيحصل وأنه كل شوية يفكر بغلطتك؟ انتي نفسك مستنية ايه من علاقة زي ديه بترهقك؟ ايه الجديد اللي المفروض يحصل، هل انتي حاليا مرتاحة، على ما اظن لو كنتي مرتاحة مكنتيش هتسألي السؤال ده! المفروض أنه لو كان وعدك خلاص أنه هينسى المشكلة ديه أنه خلاص ميفتحش الموضوع ده تاني. ولكن مش طبيعي أبدا إن كل ما تحصل حاجة يقعد يقولك انتي عملتي وعملتي وعملتي! شوفي اللي يريحك واعمليه، حتى لو كنتي اللي هتعمليه أنك هتنهي العلاقة.
تم النشر الأحد، ١١ ديسمبر ٢٠٢٢
التغافل والتسامح من أهم الصفات لنجاح أي علاقة .. لو كل غلطه عملتيها هنقف عندها بالشهور والسنة يبقى حياتنا هتمشي ازاي؟ لو مش هتبقى متطمنه وانتي مع شريك حياتك وبتتصرفي بطبيعتك بدون ما تفكري ف ردة فعله عشان حاسه انك في أمان .. امال هتحسي كده مع مين؟ دي اسئلة مهمه تتكلمي معاه فيها لو مش هيقدر انه يتجاوز عن غلطه عملتيها وانتو مخطوبين امال هيتعامل معاكي ازاي بعد الجواز وانتو كل حياتكم بحلوها ومرها هتكونوا فيها مع بعض؟ اتكلمي معاه وجهاً لوجه ولو مفيش استجابة وموصلتوش لحل وسط انفصلي دلوقتي احسن من بعدين. أهم حاجه قبل ما تتكلموا استخيري وقبل ما تقرري تكملي او تسيبيه استخيري تاني .. ربنا يقدرلك الخير.
تم النشر السبت، ١٠ ديسمبر ٢٠٢٢
هو صعب نحدد كدة اذا ممكن الغلطة تكون كبيرة فاثرت فيه بشكل كبير مثلا وهو مش عارف يعديها بينه وبين نفسة فطبعا ده مأثر على تعامله معاكى. او الغلطة خلاص موقف وعدى وهو بيتبع اسلوب انه يفضل يحسسك بتأنيب الضمير دايما بس الاساسى هنا انك لازم تاخدى موقف حازم ( يا اما يعاملك كويس يا اما انتى اللى مش هتتحملى تكملى ) لانه ممكن يفضل يستنزفك على حس الموقف ده . ودى مش حاجة كويسة ابدا فى اى علاقة.
تم النشر السبت، ١٠ ديسمبر ٢٠٢٢
طالما اعتذرتي كتير وهو مش متقبل يبقي حياتك كده هتكون جحيم انتي وهو لازم بعض التنازلات والتغافل ففهميه ولو دي طبيعه فالافضل الانفصال
تم النشر السبت، ١٠ ديسمبر ٢٠٢٢
لو شايفه ان الانفصال هو الحل انفصلي لكن انا منصحش حضرتك بكدا بس حاولي تتجنبي الشئ اللي يدايقه انتو خلاص ربنا يكرمكم وتكملو بقيت حياتكم مع بعض وربنا يهني الناس جميعا
تم النشر الجمعة، ٩ ديسمبر ٢٠٢٢
اسف بس ممكن اعرف ايه الغلطه الي ارتكبتيها ومن الواضح انها غلطه عاديه لانها لو غلطه كبيرا مكنش كمل معاكي انصحك تقولي اي الي حصل بلظبط
تم النشر الأحد، ١١ ديسمبر ٢٠٢٢
لعرض السؤال في فدني اضغط هنا