محتاجة رأي حد ضروري علشان مبقتش عارفة اعمل اي ولا عايزة أشارك حد من اللي حواليا علشان مش عايزة حد يشوف خطيبي او علاقتنا بصورة وحشة .. أنا و خطيبي مخطوبين جديد عن حب و بقالنا مع بعض ٧ سنين و متفاهمين جدا و علاقتنا مع بعض فوق الممتازة من حيث كل حاجة بس بالصدفة جبت خط جديد و قولت ابعتله منه ارخم عليه الاول و كلمته كأني بنت تانية و لاقيته متجاوب و سارح ف الكلام اوي و بيهزر و يضحك و بيتجر ل اي كلام عادي ..وانا مبقتش عارفة اكمل كلام و اجيب اخره مع البنت الوهمية دي ولا اوقف علشان متقفلش منه و اكرهه ولا احاول اصاحبه و اسمع منه يمكن عايز يحكي مع حد تاني ف مصدق بنت تانية تبعتله !
خلينا نبص للموضوع بشكل منطقي ومرتب. اولا إنه يتكلم مع بنات في نطاق شغل، زمالة، معرفة او فيه حدود واضحة ده طبيعي وعادي جدا ولكن أي كلام بدون حدود وعلي سبيل التعارف أو الدردشة أو الهزار المستباح فهو لا يجوز وملوش مبرر إطلاقاً. وده مش كلامي ده كلام دار الإفتاء وممكن ترجعي لصفحتهم الرسمية أو تكلمي الخط الساخن بتاعهم او تشوفي المقال المكتوب عن الموضوع ده علي المصري اليوم. ثانياً نيجي بقي لسؤالك اعمل ايه. فيه جزء منك عنده فضول اكيد يعرف آخر الحوار بس واضح من خلال محادثتك معاه إن فيه عدم أريحية لطريقة كلامه مع واحدة غريبة ولهذا انصحك بمحادثة وجها لوجه مع خطيبك بدون توجيه اتهامات طبعاً لأنك محتاجة تفهمي موقفه من التصرف. اعرضي عليه الموقف اللي انتوا فيه علي أنه موقف حاصل مع صديقة ليكي وافهمي رأيه من تصرف الرجل في الموقف ده. طبعاً من خلال رده تقدري تفهمي اكتر هو بيفكر في ايه وبعد النقاش وضحي له إنك غير راضية عن التصرف وإنه ضايقك وفهميه ضايقك ليه وحددوا مع بعض الأسس اللي حابين تكملوا بيها علاقتكوا في ضوء حاجة زي دي. هل يرضي إنك تتم بينك وبين زميل أو صديق محادثة أو شات بالشكل ده؟ هل يوافق إنك يبقي ليكي اصدقاء ولاد؟ هل يرضي تخرجي مع زمايل ليكي لو كان فيه ولاد في الخروجة دي؟ هل هو شايف إن فيه سبب اقدر عشانه اكلم زميل وافضفض له عن تفاصيل حياتي ولا دي حاجة ممكن تضايقه؟ ايه رأيه في العلاقة او الصداقة بين الولد والبنت سواء علي المستوي الإجتماعي وعلي المستوي الديني؟ ايه المعايير اللي المفروض تكون موجودة في التعامل بين الولد والبنت لو فيه زمالة أو شغل أو معرفة بينهم؟ اتناقشوا اكتر عن كل واحد فيكوا يقبل أو ما يقبلش إيه علي المدي البعيد. وطبعا الأهم من ده كله إنك تستخيري تكملي ولا متكمليش لو لقيتي النقاش موصلكيش لحاجة او لقيتي نفسك مش مرتاحة بعد ما تتكلموا مع بعض.
تم النشر الجمعة، ٢٤ نوفمبر ٢٠٢٣
سألتيه هو خاطب أو في حياته حد هو هيبقي زوجك لو معرفتيش نهاية موضوع البنت الوهميه دي والله هتندمي ولما تكشفي الموضوع دلوقتي أفضل ليكي عن إنك تتدبسي ولو عايز يحكي مع حد ليه ميحكيش معاكي إنتي وهتبقي زوجته وسره
تم النشر الجمعة، ٢٤ نوفمبر ٢٠٢٣
السلام عليكم ورحمة الله وبركاته جميعكم ادلوتو برايكم وانا كا قرأ لم أجد حل جزري او ما يبدو عليه لفعل ذلك فا حضرتك اذا كنتي هتاخدي تصرفه خطاء بأنه اتكلم معا حد تاني فا حضرتك ارتكبتي نفس الخطاء بكونك قومتي بالدخول عليه بي حيله او تطفل او في ف ذلك فا إذا كنتي عوزا تحكمي عليه انه خاين هو حضرتك كذبتي بقصد او دون قصد نبص للجانب الاخر هو ليه وافق يتكلم ومدا العلاقه اللي واصلت ايه الأخت الواهميه دي وليه هل تقصير منك أو أنه انسان غير صالح ليكون امين عليكي كل دا حضرتك اللي تقرريه من انا ولا غير معا ان في بينكم عشره زاى ما حضرتك بتقولي اما بقا ع الناس اللي عمالهتدي نصايح ع الفاضي والمليان اتقو الله ممكن يكون الإنسان اللي بيسال دا انسان لا يعقل كلامكم فا تصبح انك تسببت في خراب بيت أو ضياع أسرة
تم النشر الجمعة، ٢٤ نوفمبر ٢٠٢٣
عادي الرجالة عينها زايغة ماتشغليش دماغك دا طبع مش بيطلع الا بخروج الروح
تم النشر الجمعة، ٢٤ نوفمبر ٢٠٢٣
لو حطيت افتراض انه ملاك ..يبقى هقولك بكل انفعال ...ياااه كويس انك ربنا كشفهولك بس الحقيقة ان كل اللى مكملين مع بعض بيتعاملوا مع النوع ده وغييره من الاخطاء الموضوع محتاج قرار واحد من نفسك ...اذا رأيتى مميزات فى الشخص اللى هتكملى معاه ..ايه كمان العيوب اللى تقدرى تتحمليها معاه لما تظهر ...وايه العيوب اللى مستحيله بالنسبالك . اذا ده شىء لا تستطيعى تحمله حتى بالنظر للمميزات فيبقى دى نقطة لازم تقفى عندها ..بس مش باستكمال الحديث بانك بنت تانيه ...لكن بالتحدث معه مباشرة
تم النشر الجمعة، ٢٤ نوفمبر ٢٠٢٣
التجسس أو الاختبارات اسوء حاجه بجد بتكرهك فى حد وكمان نصيحه ليكى بقا ابعدى عنو لانو اكيد خانك قبل كده فى فترة ٧ سنين وانتى متعرفيش ابعدى بجد
تم النشر الجمعة، ٢٤ نوفمبر ٢٠٢٣
عادي خطبة تدوم لسبع سنوات فالرجل يمل و يبحث عن شخص اخر يتعرف عليه ليدردش معه لاكن لا تخافي في الاخير سيتزوجك انت و حتى بعد الزواج سيبقى يدردش مع فتيات اخريات لاكن فقط دردشة و نقاشات و تعارف
تم النشر الجمعة، ٢٤ نوفمبر ٢٠٢٣
بصي الولد الي يكلم بنت يقدر يكلم عشره ويمكن دا حصل عشان ربنا يبينلك حقيقتو وانا من رأيي انك تصارحيه وتقوليلو انك انتي الي بتكلميه وشوفي رد فعلو هيكون اي وقتها
تم النشر الجمعة، ٢٤ نوفمبر ٢٠٢٣
بصي دي اول مشكله من النوع ده انتي وقعتي فيها ف لازم تتصرفي صح عشان تنهي الموضوع ده من جذوره اول حاجه كملي معاه شويه لحد لما توصلي معاه انه يوافق انه ممكن يقابل البت دي او يخرج معاها وساعتها روحي انتي قابليه وخليه يتصدم اعملي مشكله تحسسه انك ممكن تسبيه ف حاجه زي دي لو حسيتي انه فعل ندمان خلاص قوليله الثقه لو راحت مش هينفع اكمل معاك لو لقيتي ف مبررات ان ده ممكن يحصل عادي يبقي انتي لسه ع البر ومخسرتيش حاجه
تم النشر السبت، ٢٥ نوفمبر ٢٠٢٣
لو كان يعتبر صداقة ولو الصداقة اعتبره اذا ويه رجل خاطب او متزوج تحرق قلب الشريكة وتحس باهانه بينما المرأة تحب تخلي حدود مع أي رجل على العموم إذا كان كلام بغير الصداقة فهذا انسان اصلا مايحترم انو هو شخص مرتبط واحس كانوا فرصة من رب العالمين حتى تشوفين خطيبج بصورة ثانية وأكيد الخيار اول وتالي لكِ. ان شاء الله رب العالمين يهدي بالج ويريحج🙏🏻🙏🏻
تم النشر الجمعة، ٢٤ نوفمبر ٢٠٢٣
لعرض السؤال في فدني اضغط هنا