اتصرف ازاي في حالة لو الشخص اللي بحبه قالي احنا مضطرين ننتظر 7 سنين لان اهله مش عاوزين قبل التلاتين وبيقولوله كون نفسك وبيقولي لو جالك جد ارفضي ومعني ده اني هدخل في دراما شرقية هدفعها تمنها لوحدي وبيقولي نفضل كده نتكلم بدون ما اهلك يعرفوا لاني مش هرد علي مامتك انا اختارت التضحية والحب عشانه بس واضح مبقاش يحبني بيقولي الشخص بتاع دلوقت غير اللي كان زمان وفسريها لوحدك ومش هيقدر ياثر علي اهله الحجة بتاعته ان اخواته مجوزوش قبل التلاتين وانه لسة فاتح موضوع الجواز معاهم من يومين بس اتصرف ازاي انا بحبه لكن انا مدركة ان كده هخش في تحديات ممكن مكونش قدها قدام اهلي
عاوزة الصراحة؟ الشخص ده بيخلع منك رسمي... والاحتمال الأسوأ إنه بيشوف رأيك لو ممكن تسمحي له يتسلى بك كمان سبع سنين، لو نفعت المحاولة أهو نجح وهيركنك جنبه كمان سبع سنين وبعدين يقول لك أهلي رافضين وشافوا لي عروسة تانية ولا يخلع بأي حجة من بتاعة الشباب. ولو فشلت المحاولة بقى وأنتِ رفضتِ تكملي انتظار هيقول لكِ عادي مع السلامة وأنا مش هقدر أخالف أهلي أو زي ما قالك مبقتش بتاع زمان وفسريها لوحدك. فعلى إيه يا بنت الناس؟ انتِ كنتِ نزلتِ مشكلتك قبل كده وتقريبًا انتِ في ثانوي لسه، فأنتِ لسه صغيرة ووراكِ حاجات أهم كتير في حياتك من مجرد علاقة هي حرام أصلا عند ربنا... فمعلش... ليه تعملي في نفسك كده؟ ليه تسمحي لأي شخص يتسلى بك أو يشوفك مجرد حاجة ثانوية في حياته يقربك وقت ما يحب أو يرميكِ أو يركنك جنبه زي ما هو عاوز. الفكرة مش إنه مستسلم لكلام أهله زي ما انتِ فاكرة... الفكرة إنه أصلا مش عاوز الخطوة دي ومش جاد معكِ. الشاب اللي بيحب بجد واللي عاوز يتزوج فعلا البنت اللي بيحبها بيقنع أهله بكل الطرق وبيحاول معهم ومع أهلها عشان يوافقوا. وبيعمل كل شيء قبل ما يستسلم للقدر لو ربنا مش رايد لهم يكونوا سوا. عززي نفسكِ واعرفي إنك تستحقي أفضل من كده ومشاعرك أغلى من إنك ترميها تحت رجل واحد مش شايفك أساسية أصلا في حياته.
تم النشر الاثنين، ٢٨ أكتوبر ٢٠٢٤
بصى انتى فعلا مش ضمنة هايجى يتقدم بعد ال٧ سنين ولا لا بس حرام تفضلى مستنيه واحد على انو هايجى يتقدم وترفضى العرسان وفى الاخر يخلع سعتها انتى الى هاتكون اضريتى لو عاوزك بجد ومش بيتسلى قوليلو يجى يتقدم وخطوبة وقعدى السبع سنين دول خطوبة عادى بس على الاقل يكون رسمى وضمنتيه لاقتيه رفض يبقى انتى كمان اقطعى الكلام معاه ولو عاوزك هايحارب علشانك
تم النشر الاثنين، ٢٨ أكتوبر ٢٠٢٤
بأيد كلام دكتورة مي بصراحه انتي مش ضامنة هو فعلا بعد الـ ٧ سنين هيجي ولا هيتحجج فاهمةة وبعدين ٧ سنين مش هتزهقوا يعني هيكون في كلام تتكلموه بعد الجواز؟
تم النشر الاثنين، ٢٨ أكتوبر ٢٠٢٤
السلام عليكم و رحمة اللّٰه و بركاته انتي مش مضطره تتحملي قوانين عائلته العجيبه و لا يصح أبداً أنكم تتكلموا بدون وجود شيئ رسمي مبينكم أعتقد انتِ محتاجه تفكري و تراجعي نفسك في العلاقه دي ،و تفكري من ناحيه دينك اه بتحبيه و الموضوع صعب ، بس هل يستاهل تغضبي ربنا و تدخلي النار عشانو ؟؟ ميستاهلش ابداً تغضبي ربنا عشانو مهما كان هو مين ، لو استنيتي ٧ سنوات كدا بتضيعي وقت من عمرك على شخص اللّٰه أعلم هيتقدم فعلاً ولا واخدها تسليه نصيحه مني بلاش تدخلي نفسك في علاقه ذي دي أبدا نهايتها محدش عارفها و نهايتها دي هتكون مؤذيه ليكي بشكل كبير و افتكري إن الإرتباط حرام و الي عايزك فعلاً هيتقدم و مش هيرضى أبداً إنك تخوني ثقه أهلك أو تعملي حاجه غلط من وراهم ، فكري كويس لإن كل الي بتعمليه هينعكس عليكي في المستقبل بصوره سلبية ،و بالتوفيق
تم النشر الأربعاء، ٦ نوفمبر ٢٠٢٤
٧ سنين في علاقة غير شرعية وتتكلموا من غير أي حاجة رسمية بينكم؟ وبعد ما العريس المنتظر يوصل سن ال٣٠ والمشاعر تتغير تيجي تسألي ازاي أعمل موف أون؟ ليه تعملي في نفسك كدة؟
تم النشر الاثنين، ٢٨ أكتوبر ٢٠٢٤
لعرض السؤال في فدني اضغط هنا