أي حد لو بعتلي نقطة بس كده بكون عايز اكلمه و اهزر معاه بدون سبب ولو مكلمنيش فترة بسال عليه وبفضل مستني اي رسالة منه او من اي حد وزهقت من الكلام ده والله وعايز اخلص منه عايز اعيش عادي زي اي انسان اعمل ايه
فى البداية من الواضح أن حضرتك شخصيه اجتماعية وان التعلق بيكون مهم فى حالة أن يكون فى وضعه الصحيح ولكن التعلق الزائد ده ممكن يضرك جدا وممكن يوصل أن لو فى حد فى حياتك متعلق بيه تعلق زايد ممكن يبعد وده هيسبب ليك ضرر كبير فحاول انك توسع دائرة علاقتك سواء بأهلك أو اصدقائك وكمان لو فى رياضه معينه مارسها أو موهبه معينه حاول تشتغل عليها وتنميها وكمان ممكن تاخد كورسات ... حاول انك اول ما تحس بفكرة التعلق أنه زائد تشتت انتباهك بأفكار وأشياء أخرى ممكن تفيدك اكتر ودايما افتكر ان لازم تعلقك بشخص ميوصلش أنه يأذيك لانك حالتك النفسية مهمه جدا وتذكر أن ربنا هيساعدك فى كل خطواتك.. ولازم تكون واثق انك هتقدر
تم النشر الثلاثاء، ١٨ يونيو ٢٠٢٤
التعلق ليه أسباب كتيره و لكن اهم سبب هو صدمات الطفولة..... صدمات الطفولة ممكن تكون مواقف بسيطة لا تذكر حتى و لكن المواقف دي سببت صدمة ذي مثلا إنك و انت صغير كنت بتحب تتكلم كتير وسط التجمعات و أهلك مثلا يزعقولك أو ميهتموش لكلامك أصلا ده ممكن يسبب صدمة و هكذا بقى في مواقف كتير جدا من الطفولة ممكن تسبب صدمات و دورك هنا إنك تقعد مع نفسك و تفكر في كل المواقف الي ضايقتك أو الي تعتقد إنها ممكن تكون سبب في تعلقك و تكتبهم في ورقة ده هيساعدك تفهم نفسك اكتر و بعد كده لما هتقابل ناس بيقدموا ليك حاجات إنت محصلتش عليها و انت طفل هتفهم كويس سبب تعلقك بيهم و ده هيقلل من تعلقك بالتدريج...... ثانيا بقى من أكبر أسباب التعلق هو انك مش عارف قيمتك كويس. مش بتحب نفسك كفاية للدرجة إلي مش بيكون عندك مشكلة تفضل لوحدك و تستمتع بوحدتك.... حب النفس ده من اكتر الحاجات الي بجد ساعدتني اني أبطل تعلق بالناس لما الواحد بيحب نفسه و يبقى فاهم نفسه وقتها هيكون عارف قيمة نفسه كويس للدرجة إلي هتخليه مش بيتعلق بحد و مش هيكون فارق معاه لما شخص يطلع من حياته لان ببساطة انا بحب نفسي و عارفة كويس اني استاهل أشخاص افضل بالتالي مش هضيع وقتي في التعلق بأشخاص ميستاهلوش اساسا عشان كده لازم تشتغل على حب النفس و إنك تزود ثقتك بنفسك و ترفع من استحقاقك هتقولي طب ده هيساعدني اذاي هقولك إن لما بتثق في نفسك مش هتكون بتجري ورا أي شخص يديلك اتنشن أو الاهتمام الي انت مأخدتوش من صغرك الثقة في النفس مش معناها إنك تمشي في الارض مش شايف غيرك عليها لا الثقة في النفس معناها إنك عارف نفسك كويس بكل مميزاتك و عيوبك و متقبل نفسك ذي ما إنت و بتحاول تكون أفضل نسخه من نفسك و ده كله هيساعدك إنك تكون في انسجام مع ذاتك وقتها مش هيكون عندك مشكلة تفضل لوحدك و هتستمتع بوقت الوحدة ده اوي فلازم لازم إنك تشتغل على حب نفسك و ثقتك بنفسك...... ثالثا بقى و ده هيساعدك في كل الي قولته فوق هو انك تقرأ في علم النفس هيساعدك تفهم نفسك و تفهم إلي حواليك و تفهم انت ليه بتتصرف بالشكل ده و ليه غيرك بيتصرف كده و ده هيسهل عليك التعامل سواء مع نفسك أو مع غيرك و هيقلل من تعلقك بإذن الله
تم النشر الثلاثاء، ١٨ يونيو ٢٠٢٤
أفهمك تمامًا يا صديقي. التعلق أو الارتباط الزائد بشخص معين ممكن يكون مرهق ومُتعب نفسيًا. أول حاجة لازم تعرفها إن مشاعرك طبيعية وكلنا بنمر بها في مراحل مختلفة بحياتنا. هشاركك شوية نصائح تساعدك تخلص من التعلق المبالغ فيه: إعادة توجيه تركيزك: حاول تركز على هواياتك وأشياء بتحب تعملها. اكتشف حاجات جديدة تستمتع بيها زي القراءة، الرياضة، الرسم، أو حتى السفر لو تقدر. تحديد وقت معين للتواصل: حدد وقت معين تتواصل فيه مع الناس اللي بتحبهم مش طول اليوم. كده هتقدر تسيطر على مشاعرك بشكل أفضل. الاهتمام بنفسك: اعتني بنفسك جسديًا وعقليًا. الأكل الصحي، الرياضة، والنوم الجيد هيساعدوك على تحسين صحتك النفسية. العلاقات الاجتماعية الصحية: اصنع علاقات جديدة ووسع دائرة معارفك. لما يبقى عندك ناس كتير حوالك هتحس إن التعلق بشخص واحد مش بنفس درجة الأهمية. التحدث مع أخصائي نفسي: ممكن يكون مفيد تتكلم مع أخصائي نفسي أو مدرب حياتي. هما ممكن يساعدوك تفهم أفضل أسباب التعلق ويقدمولك استراتيجيات عملية عشان تحسن من حالتك. النمو الشخصي: استثمر في ذاتك وتعلم حاجات جديدة. دورات تدريبية، كتب تطوير الذات، أو حتى ممارسة التأمل ممكن يكون ليهم تأثير قوي على تحسين حالتك النفسية وتقليل التعلق. الوقت والتدريب على التحكم في مشاعرك ضروريين، فماتحكمش على نفسك بسرعة، خليك صبور وخد خطوات صغيرة يوم بعد يوم. 🌸
تم النشر الثلاثاء، ١٨ يونيو ٢٠٢٤
لازم يكون عندك قدرة الاستغناء ولازم يكون ليك اصحاب مقربين وحاول تروح لأخصائي نفسي تشاركه كلامك ده حاول تشغل نفسك بحاجة جديدة.. عمل او ارتباط جديد
تم النشر الثلاثاء، ١٨ يونيو ٢٠٢٤
علقي قلبك بربنا قربي منه.
تم النشر الخميس، ٢٠ يونيو ٢٠٢٤
لعرض السؤال في فدني اضغط هنا