بنام كتير الفترة دي و حلمت مرة اني كنت بشوف فستان ابيض للافراح..
بفكر كتيير في الموضوع ده انو نفسي اتجوز من حد ويحبني ويكون حنون واعيش معه بعيدا عن الناس وبفكر في حاجات تانيه زي (الجن*س والممارسه)
حاولت اشغل يومي باني اعمل حاجات تخليني افكر في الموضوع ولكن حتي اخر اليوم لما بجي بنام بتخيل لو اتجوزت وهعيش في سعادة مع الشخص ده وادلع زوجي المستقبلي
يمكن بفكر في الموضوع ده عشان ابعد عن مشاكل حياتي او اتهرب من الواقع
انا عارفه اني لسه صغيرة، حتي لو مثلا اهلي قبلو وكده ولكن الموضوع مش سهل وعارفه اني هكون خايفه من الموضوع عكس تفكير اني هكون مبسوطه لو حصل
وانو مش سهل وعارفه كمان اني مش بثق في حد بسهوله عشان يكون مصدر امان لي
في الحقيقة نفسي في جواز زي اللي في الراويات..
بحس اني عايزة شخص ما بشكل مؤقت وبعدين ارجع لحياتي تاني وبس.
انا عندي 16سنه ف ممكن حد يساعدني في الموضوع: ♡
جميل جدا وعيك باللي انتي فيه وانتي لسه سنك صغير في جملة انتي قولتيها رائعة ( انك عايزة حد بشكل مؤقت، تاخدي بس المشاعر اللي عايزاها وخلاص ترجعي لحياتك) وده معناه ان فعلا فيه مشاكل معينة في حياتك .. ومأثرة عليكي ممكن زي الاهل .. انك مش واخده الحب بشكل كافي منهم، ومش حاسه بالامان علشان كده بدوري على حب وامان يشبعوا مشاعرك، لانك بس عايزة حاجة معينة من الشخص مثلا اللي بتتمنى يدخل في حياتك وهو انه يديكي الاحتياج اللي انتي عايزاه وخلاص مش اكتر من كده، وده اللي هنركز عليه. وده طبعا سببه الاحلام، واحلام اليقظة او التخيل .. الحل انك تركزي انك تحاولي تغيري حياتك شوية هنبدأ بالاهل .. قوليلي علاقتك بأهلك شكلها ازاي .. وهل ينفع تقربي منهم ولا مش مهتمين؟ والجزء التاني هيبقى عليكي .. اللي بيحفز الموضوع برده جواكي هو عدة حاجات وتتمثل في الاثارة ( روايات رومانسية، افلام) وهكذا ... ياريت تبدئ بالتدريج انك تسحبي الحاجات ديه من حياتك ... وتستبدليها بحاجات تانية .. تبسطك برده وتكون مفيدة ليكي .. حاولي تدخلي نشاطات في حياتك زي الرياضة، التطوع، الكورسات، اي حاجة بتحبيها ممكن تعمليها سواء رسم، او تلعبي موسيقى معينة، الهدف من ده كله انك تدخلي في حياتك حاجات تستفيدي منها وتبسطك في نفس الوقت، وتحسي منها انك فعلا بتعملي حاجات مفيدة وده هيديكي شعور بالثقة والانتاج في يومك وكمان السعادة.
تم النشر الخميس، ٩ فبراير ٢٠٢٣
طبعا هو ده كله نوع من الهروب والشيطان بيساعد فيه اوى ...بانه يجيبلك افكار من النوعية دى. اغلب البنات بيفكروا فى اللى هيريحهم من مشاكل الاهل ومن المذاكرة......اكيد الجواز وانى ابقي فى بيت تانى وفى ظروف تانية....بس دى مجرد خدعة لو مشينا وراها ولا هنحل مشاكلنا ولا هننجح ولا حتى لو اتجوزنا بالشكل ده هنبقي مبسوطين. لو عاوزه تحسي الاحساس المؤقت ده خليه يدوبك فى رواية تقرأيها او فى فيلم او مسلسل تتفرجي عليه... لكن الحياة مش مؤقته بالشكل ده ...قراراتنا واحوالنا ليها ضريبة ....استعيذى بالله من الشيطان لما تجيلك الافكار دى واتوضى وصلى ...
تم النشر الخميس، ٩ فبراير ٢٠٢٣
بطلي تمسكي الفون كتير
تم النشر الأربعاء، ١ مارس ٢٠٢٣
فكري في حاجه تانيه تحبيها بنفس الطريقه في حياتك حاليا
تم النشر الثلاثاء، ٢٨ فبراير ٢٠٢٣
لعرض السؤال في فدني اضغط هنا