أنا هحاول اختصر بقدر الإمكان أنا قضيت حياتي بحفظ قران بفضل الله ودخلت حاجة تقربني من الطريق دا أكتر ولأننا ارياف ف طبعا البنت لازم تتجوز وهي صغيره والكلام ده كله فضلت ارفض لحد ما وصلت ١٨ طبعا اتخطبت قبلها مرتين وفركشت بعدها علطول اتقدم واحد كغ العيلة موافقين عليه وقالولي لو رفضتي تبقي بتحبي حد وكده فوافقت علشان اثبتلهم إنهم غلط وفي فترة الخطوبة لاحظت شوية حاجات وبالنسبة لياكانت كفيلة تخليني ابعد عن الشخص ده لكن أهلي قالولي إن أنا مكبرة الموضوع وهو مناسب جدا وكل دي حجج فارغة بعد سنة وسبع شهور اتجوزت وحصل خلافات كتيرة جدا جدا وضرب وإهانة وعدم التوافق فطلبت منه الطلاق لاستحالة العيش في سلام فرفض ووالدي خدني عنده 10ايام جم هو واهله اخدوني وبعدين اكتشفت إنه كان مغصوب رجعت وأنا بعيط بعدها كان في حمل مفرحوش خااالص بالعكس حاول اكتر من مرة بطريقة غير مباشرة إني اجهض الحمل دا
لكن ربنا اراد ليها الحياة واتولدت بدري كمان بعد الولادة ب7شهور ضربني جامد جدا جدا فروحت عند أهلي وطلبنا الطلاق فرفضو ورفعت خلع وتم من شهر 6 دلوقتي بنتي قربت تتم السنتين واهلي بيقولو لازم تتجوزي سؤالي بقي هو مش ظلم ليها كده لو حد مر بتجربة زي كده يوضح لي أنا مش مستعدة دلوقتي خاالص بقول ليهم ماشي بس مش دلوقتي خاالص وفي نفس الوقت خايفه اتجوز كبيرة ما الحقش اربي ولادي وافرح معاهم بحكم السن إللي هوصله أنا دلوقتي يدوب 22سنة وخايفة لو اتجوزت يكون مش مناسب ويأذيني اكتر نفسيتي تعبانة جدا جدا مش عارفه اعمل ايه
بحييكي إنك قدرتي تنفصلي حتى لو تنازلتي عن حقوقك لكن فدا نفسك وحياتك وحياة بنتك .. دلوقتي حياتك مختلفه عمّا كانت من 4 سنين .. مسؤوليات جديده ف طبعا أولوياتك هتختلف. أكيد من غير ما أي حد يقولك أهم حاجه ف حياتك دلوقتي هي بنتك .. وهكون معاكي جداً ف ده .. اتعلمي واقرأي واسمعي محاضرات عن التربية عشان تعرفي تربيها صح ويبقى ده مشروع حياتك اللي نجاحه من نجاح حياتك .. بجانب ده أوعي تهملي نفسك سواء دينيا أو ثقافيا أو علميا ولو تعرفي ماديا كمان يبقى كويس اووي عشان تقدري تكفي مصاريفك ومصاريف بنتك ومتحمليش حاجه زيادة على أهلك (طبعا إذا كان أهلك هيسمحولك بالشغل بدون ضغوط) الشغل كتير ومبقاش دلوقتي شرط تنزلي تشتغلي ف مكان ممكن من مكانك ف البيت تعملي مشروع أو تتعلمي مهارة وتشتغلي أون لاين لو عندك ميول لكده. كمان متهمليش نفسك عاطفيا.. مترفضيش مبدأ الجواز لكن اختاري بعنايه شديده .. اي حد يتقدم اقعدي معاه مره واتنين ولو ارتاحتي اعملي فترة خطوبة مناسبه ليكي تقدري تتعرفي عليه كويس فيها .. ده مهم ليكي ولبنتك ولمستقبلكم. ممكن جداً ربنا يرزقك بزوج أفضل بكتير من الاول ويشيلك انتي وبنتك فوق راسه ويعاملكم كويس وتكوني مبسوطه ومرتاحه معاه .. متخليش حد يشكك ف ده وخليكي واثقه ف ربنا وادعيه يرزقك بالزوج الصالح اللي يهتم بيكي وببنتك ويساعدك انك تربيها وتعلميها كويس.
تم النشر الأربعاء، ٧ ديسمبر ٢٠٢٢
متتجوزيش خالص دلوقتى طبعا انتى محتاجة تهدى من كل اللى حصل ده وتفوقى الاول. الحمدلله على اللى عدى وكله كان سبب عشان بنتك دى مكتوب ليها الحياة. انتى عارفه قيمتك واللى يناسبك وخوفك ان حد يعمل فيكى كده تانى بسبب اللى شوفتيه ...مش شرط طبعا ده يحصل من حد تانى .. بس لازم يعدى فترة عشان تفكرى وتحسبيها كويس بدون ما الخوف يكون مأثر عليكى.
تم النشر الأربعاء، ٧ ديسمبر ٢٠٢٢
بصي ياحبيبتي اتعودي تستقلي بنفسك حتى لو انتي وسطيهم يعني انتي اتجوزتي غصب وخلفتي غصب كفاية عليهم كده انزلي دوري علي شغل واشتغلي وفلوسك في جيبك حد ياخدها قوليله لا ده حق بنتي ودافعي عن حقها أما بخصوص الجواز طول ما انتي مش مستعدة ولا محتاجة متدخليش علاقات تأذيكي وتأذي غيرك وتأذي بنتك فكري في مستقبلك وحياتك وبنتك
تم النشر الخميس، ٨ ديسمبر ٢٠٢٢
لعرض السؤال في فدني اضغط هنا