مش عارفه انام كويس ولا اكل كويس و حاسه دايما بخنقه و صداع في الجهه اليسري للدماغ و مفيش اي حاجه ممتعة بالنسبة لي و بفكر في الثانويه العامه لأني لسه هدخل جديد
و كل م اصاحب حد بحس اني مخنوقه و مش عايزه اكمل مع الشخصيه دي ،لأني للأسف انطوائيه بطبعي و مش بعرف اختار الناس الصح ، اللي منهم كاذب أو بتحب نفسها زياده او غلاويه و كدا يعني
كلنا بنغلط انا عارفه بس انا مش بطيق حاجات زي دي
و حاسه ان فيه فجوة بين أفكاري و افكار الأهل
و فيه تحكم ملحوظ مش قادره اتخلص منه زي الدراسه او طلب مجموع عالي لدخول كليه معينه مع العلم انهم عارفين اني مليش في المجالات اللي هما عايزيني ادخلها
بس بسمع كلامهم لان الضرر مش هيبقى كبير اوي ، هو نفسي بس بقول عادي اللي ملوش خير في أهله ملوش خير في حد
و نفسيتي تعبانه جدا و مش عارفه اتعامل مع اي حد
و بهرب ب قراءة الكتب أو النوم ، بس انا ملاحظه منهم بردو هجوم على موضوع قراءة الكتب دا
انتى بس مش قادرة تحددى حاجات لشخصيتك وده اللى مشتتك بشكل كبير وعندك خلط بين ارضاء الاهل وانك تكونى شخصية واضحة الانسان ممكن يبقى واضح ويحترم اهله ويسمعهم ويطلب منهم اللى محتاجة بكل ادب وهدوء واحترام . ممكن بس انتى نفسيتك هشه شوية ومن اقل حدث يحصل معاكى بيحصلك تأثر شديد ويمكن يكون اكبر من الموقف نفسه ...وده اللى عامل فيكى كل اللغبطة دى
تم النشر الخميس، ١٣ يوليو ٢٠٢٣
طيب اول حاجه بالنسبة لأصحابك ... انتي قولتي كلنا بنغلط او بمعنى ادق كلنا فينا عيوب .. بس احنا لازم نتعامل بمنطلق انك لو مش قادرة تستحملي اللي قدامك، او مثلا شايفة انك مش قادرة تتعاملي معاه، او الشخص ده انتي متضررة منه .. قولا واحدا بلاش من الشخص ده اصلا .. اكيد هتلاقي ناس تانية تفهمك وتكون في نفس الوقت شبه افكارك وتعرفوا تبقوا اصحاب. أما بقى عن جزء الاهل .... معاملتهم تبان من بره على ع انها تحكمات، بس صدقيني هما بيعملوا كل ده وغرضهم مصلحتك في الاول وفي الاخر .. بس للاسف بيعملوه بشكل خاطئ .. حب اه، بس ححبهم بشكل غلط .. خوف عليكي، بس خوف برضه بشكل غلط ... حاولي تتعاملي مع نيتهم ليكي، مش افعالهم .. يعني ايه؟ يعني انتي اول ما تتخنقي منهم حاولي تقولي لنفسك انا هتعامل مع اللي جواهم مش افعالهم .. اللي جواهم اكيد خير وحب وخوف .. زيهم زي باقي الاهالي .. ف هحاول اتعامل مع نيتهم ديه بدل ما اتعامل مع افعالهم. بالشكل ده هترتاحي اكتر. وحاولي برضه تتكلمي معاهم في انك هتبذلي اقصى ما عندك علشان تنجحي بتفوق، بس في نفس الوقت انا محتاجة منكم تشجيع داعم .. مش هدام .. انا عارفه انكم خايفين عليا واوعدكم انكم هتتشرفوا بيا ... كلام من هذا القبيل .. يعني .
تم النشر الاثنين، ١٠ يوليو ٢٠٢٣
بصي خلي نفسك قدامك على طول، إنتِ لسه مدخلتيش ثانوي وعامله كده، اومال لما تدخلي؟ لما إنتِ الي تكوني متحكمه إقلبي الترابيزه ذي مابيقولوا، وواجهيهم أكيد ممكن يتفهموا شويه، قوليلهم أنا دخله سنه هعمل فيها إلى أنا أقدر عليه وذياده مش طالبه منكم أي حاجه غير الهدوء النفسي لا تضغطوا عليا ولا أي حاجه، خليكِ واثقه من نفسك، ده مستقبلك مش مستقبلهم، ولو فضلو ذي ماهما، إعملي لنفسك طاقه إيجابيه، سمعي لنفسك كلام حلو كتير، افضلي قولي أنا هقدر انا هعمل انا شاكره....... مش يبقا أهلك وإنتِ على نفسك، هييئي لنسفك أجواء حلوه من دلوقتي عشان تعرفي تبني مستقبلك من دلوقتي، وسيبك من المجموع الي عاوزينه والكليه، اعملي لنفسك مجموع وكليه الي نفسك إنتِ فيهم مش الي نفسهم هم فيهم، ده مستقبلك إنتِ لوحدك وإنتِ إلي مسؤوله منه.....
تم النشر الأحد، ٩ يوليو ٢٠٢٣
عزيزتي، انا فاهمة انك في وضع نفسي صعب جدا. لكن لازم تطمني ان الحالة دي مؤقتة وهتعدي. انتي لسه صغيرة ومازال قدامك حياة كاملة. هنا بعض النصائح: أولا، حاولي تهدي نفسك وتخففي من القلق والتوتر بخصوص الثانوية العامة والكلية. ركزي على دراستك الحالية واعملي افضل ما عندك. مش هتنفع نفسك بالقلق الزائد. ثانيا، اعملي علاقات صداقة مع ناس متفهمة وداعمة. انتي مش مضطرة تكوني صداقات مع كل الناس. اختاري ناس هادية وبتحب تسمع. ده هيساعدك تخففي الضغط. ثالثا، تكلمي مع أهلك وقوليلهم انك بتمري بمرحلة صعبة وانك محتاجة دعمهم وتفهمهم. قوليلهم على افكارك ومخاوفك بدل ما تبقي ساكتة. ده ممكن يقربكم لبعض
تم النشر السبت، ٨ يوليو ٢٠٢٣
للاسف الاهل احيانا بيحكموا بقصر وجهة نظر ع اللي عايزينه لأبنائهم مش للي ابناءهم عايزينه ويمكن هما معذورين لانه يمكن انه دا من وجهة نظرهم احسن لابناءهم، بس هل دا الاحسن فعلا ؟ ومين يحدد دا هما ولا الشخص نفسه ؟، خدي منهم النصيحة واسمعي رأيهم جايز يضيفولك بس هتعملي اي دي بتاعتك انتي لانه ف النهاية اختيارك، وافتكري كويس الجملة دي "حياتك محدش هيعيشها غيرك".
تم النشر الأحد، ٩ يوليو ٢٠٢٣
روحي لدكتور
تم النشر الأحد، ٩ يوليو ٢٠٢٣
اهلا يا حبيبتي، ما تزعليش نفسك كده. انا فاهمة انك ماشية في مرحلة صعبة ومضغوطة نفسيا بسبب الثانوية العامة. ده شيء طبيعي ومعظم الناس بتمر بيه. اول حاجة لازم تعمليها هي انك تحكي مع اهلك وتشرحي لهم اد ايه انتي متوترة ومش عارفة تنامي ولا تاكلي عشان الدراسة والنتيجة اللي هما عايزينها. قولي لهم ان ده بيأثر على صحتك النفسية وانك عايزة تختاري مسارك الدراسي بنفسك. ثانيا، ما تشعريش بالذنب انك شخصية انطوائية او مش بتقدري تتعاملي مع الناس. دي مجرد سمات في شخصيتك وما تعنيش ان فيكي حاجة غلط. حاولي تقضي وقت مع الناس اللي بتحسي مرتاحة معاهم. محدش بيختار أصحابه الغلط من أول مرة. مهم إنك تكوني واضحة في شخصيتك ومبادئك، وده هيساعد الناس الصح تتقرب منك. ولو لقيتي حد مش مناسب، ابعدي عنه على طول. مش مهم كترة الأصحاب، المهم إنهم يكونوا صح.
تم النشر الأحد، ٩ يوليو ٢٠٢٣
لعرض السؤال في فدني اضغط هنا