ازاي ابطل العادة السريه خصوصا إن انا حاسس ان اهلي عارفين وكمان كل ما ابطلها فترة ارجعلها ارجو الرد
هقولك كام خطوة تحاول تلتزم بيهم وتساعد نفسك: 1- اعرف ايه الاسباب اللي وجهتك للتصرفات دي .. لو فراغ؟ اشغل وقتك .. لو هروب من مشكلة؟ واجهها .. لو بتثبت لنفسك بيها حاجه معينه؟ شاركنا بيها ونحاول نساعدك .. لو اي سبب تاني حاول تحله ولو معرفتش توجهه لحد يساعدك في حله .. وطبعا فدني موجود لو موصلتش لحل. 2- (استثمر ذنبك) .. بمعنى كل ما تعمل خطوه تجاه الذنب ده .. على طول تعمل طاعه زي انك تصلي قيام ليل .. تطلع صدقة .. تستغفر 1000 مره .. وهكذا. 3- ادخل على اللينك ده واتبع الخطوات اللي فيه https://youtu.be/2xl3jyhlFNM . 4- دعوة ثابته في الصلاة وبين الاذان والاقامة وعند المطر وفي كل اوقات الاستجابة (اللهم اغنني بحلالك عن حرامك واغنني بفضلك عمن سواك)... اي دعاء تاني شايف انك محتاج استجابته وهيعينك اعمل كده مش شرط الصيغة دي. 5- استغفر طول ما انت مش بتتكلم. 6- اسعى في الزواج ولو مفيش مقدرة حالياً صوم وتلعب رياضه. لقيت نفسك مش قادر تعمل الخطوات دي وبتواجهه صعوبه شديده ف انك تتغلب على ده لوحدك توجه لمنصة واعي على الفيس او التليجرام او الاسك او اي منصة تانيه .. وان شاء الله تلاقي الافادة والتوجيه والمعونه منهم.
تم النشر الثلاثاء، ٢٠ ديسمبر ٢٠٢٢
في نقطة من وجهة نظر الطب النفسي ممكن ناس كتير متعرفهاش، وهي إنه العادة السرية ممكن تكون في الحقيقة مش عادة سرية أصلاً! إزاي يعني؟! يعني العادة السرية أحياناً بتكون مجرد (قناع) بتلبسه مشاكل تانية، وتيجي في شكل العادة السرية. وخصوصاً حاجة زي اضطراب القلق العام، والاضطرابات المزاجية المختلفة. بشكل عام المشاكل النفسية المكتومة اللي مش بيتم التعامل معاها بشكل سليم بتتحول لأشكال أخرى، ضمنها أوجاع الجسم، وضمنها البحث عن مواد مُخدّرة، وهنا العادة السرية بتشتغل زي الموادّ المخدرة، وعشان كده بيحصل معاها الإدمان، ومش بتكون مجرد عادة بتحصل لتفريغ شهوة طبيعية، لا الموضوع بيدخل في إدمان فعلياً ومراحل صعبة منه كمان. وده على فكرة من علامات إنه العادة السرية مجرد (قناع) لمشكلة تانية أعمق بكتير. أول ما تلاقيها دخلت في شكل الإدمان، إعرف أن الموضوع فيه إنّ، والموضوع معادش مجرد حاجة لتفريغ لتفريغ الشهوة. طيب والحل؟! أول حاجة توصل لتشخيص صحيح للمشكلة، ونسأل نفسنا سؤالين الأول: هي العادة دي إيه اللي وراها؟ هل أنا مضغوط زيادة عن اللزوم فبهرب بيها؟ هل فيه حجات تانية بشتكي منها في حياتي بتخليني ألجأ لها؟ ظروف أسرية؟ مذاكرة وضغط عصبي؟ مزاج متخبط؟ الثاني: هل أنا بطبيعتي شخصية إدمانية؟ هل أنا شخصية بدور دايماً على (الرضا السريع)؟ بلعب جيمز عشان الإنجاز فيها سريع؟ باكل كتير عشان المتعة فيه سريعة وسهلة؟ تاني حاجة بقى نبدأ نعالج المشكلة! وده هيبقى عن طريق حاجتين أول علاج: علاج المشكلة الأعمق (لو فيه مشكلة أعمق) تاني علاج: نستبدل الدور اللي بتقوم بيه العادة السرية بحاجة تانية تعمل نفس الدور (مؤقتاً) مثلاً أنا فهمت أني لما بتضغط جامد بفكر فيها، طيب نبدل بقى هنا العادة بنشاط تاني يزيل القلق والتوتر تالت علاج: العادة هي سلوك إدماني في المقام الأول، وعلاجها زي علاج الإدمان بالظبط، نبعد عن المؤثرات وأي حاجة بتفكرني بيها، نسحب كل الأجهزة أو الأدوات اللي بتساعد في الموضوع ده، وغيره كتير من طرق علاج الإدمان. ------------------------- اسمحلي أعلق من وجهة نظر دينية بردو بنقط بتفرق مع ناس كتير.. : أولاً: لو العادة مرتبطة بأي سلوك تاني حرام، نمنع السلوك ده تماماً، وبالتحديد الأفلام الإباحية وأمثالها، ليه؟ لأنه حاجة زي الأفلام الإباحية حُرمتها أعظم بكتييييير جداً من مجرد العادة السرية، لأن فيها تطلع على عورات الناس، ومشاهدة الزنا، ونفع الزُّناة، والتشجيع على الزنا والفاحشة، وغيره كتير أوي أوي! ده غير إنك ممكن تبرر لنفسك العادة بأي مبرر، لكن الأفلام ملهاش أي مبرر إطلاقاً. : ثانياً: منعلّقش على الذنب، ونتعامل معاه صح. طب إزاي أتعامل مع الذنب صح؟ أول ما نعمل الذنب منقعدش نولول جوه الذنب! لأ خلاص إتبع الحسنة السيئة تمحها. تاني حاجة نفهم، (أنا لستُ خطأي)، ودي حاجة مهمة في علم النفس بردو. مش معنى إني عملت خطأ معين أني أوصم نفسي بيه، ونقعد نقول، آه أنا أصلاً وحش عشان كده بعمل كده، أنا أصلا بني آدم مش كويس، فطبيعي يحصل مني كده! لأ نهائي، خلاص محمد عمل خطأ ، انتهى، لكن محمد مش هو الخطأ، محمد مش وحش ولا سيء، هو شخص فيه الخير وفيه الشر زي كل الناس، وعمل خطأ، ودلوقتي هيعمل وراه حاجة صح. خلاص انتهى، مات الكلام، مش هنقعد نولول ده من كيد الشيطان للإنسان، آدم لما أخطأ تاب، ربنا فوراً عفا عنه، انتهى، إنما إبليس لأ، أخطأ وأصر على الخطأ وقعد يلوم وقال (أغويتني)، فطبييعي مش هيسيبك تتوب. تالت حاجة وأخطر حاجة، اليأس من رحمة الله، افتكر ده كويس، لما تعمل الخطأ وتقعد تلوم نفسك بدون ما تتوب وتعمل حسنات، انت كده قفلت في نفسك باب حسن الظن بالله وحب الله.
تم النشر الخميس، ٢٢ ديسمبر ٢٠٢٢
محتاج تقتنع إن هذه العادة مضرة، وعلشان تعزز الجانب ده أكتر، بأقترح عليك أنك تبحث عن أضرار العادة سواء ضررها على الجانب البيولوجي، أو النفسي. ده هيعزز أكتر بعدك عنها، لأنك لازم تعرف كل الأضرار اللي هتقع عليك في الاخر منها. انت أثرت في سؤالك نقطة أيضًا الا وهو الافلام الاباحية، فالخطوة التانية أنك تبتعد تماما عن الافلام الاباحية، لأنها هي من المحفزات الأساسية التي تثير عندك الشهوة في عمل العادة. الخطوة الثالثة أنك متقعدش لوحدك كتير، لأن القعدة لوحدك بتخليك تفكر كتير وممكن تلاقي نفسك بتفكر في هذه الامور، علشان كده سهل جدا أنك تنفذ. عارف زيها زي مدمن المخدرات لما يقرر يبطل، أوقات بتيجي عليه فترات ضعف وانتكاسات، زي ما هيحصل معاك، أول حاجه بيعملوها أنهم بيحاولوا يكلموا حد علشان يبقى فيه حد معاهم، وينسوا فكرة الضرب اللي بتيجي. يعني حاول تشغل نفسك أول ما تيجي فكرة العادة في دماغك، انزل اجري، اتمشي، كلم صحابك، اتفرج على فيلم كوميدي مثلا، اعمل اي حاجه، المهم متسبش نفسك لدماغك. الخطوة الرابعة هي ان لو فيه وقت فراغ في حياتك، اشغله بشغل، بعمل تطوعي، بتعليم. اقتل الفراغ بأي طريقة علشان متسبش لنفسك وقت للتفكير. انت ممكن تقع مرة أو اتنين أو حتى عشرة، ده عادي جدا، متيأسش بسرعة، ده طبيعي جدا. هتفضل تقع وتقوم، هتقع وتقوم. علشان كده الخطوة الخامسة هي الايمان، مش الايمان بالله وبس، لازم نؤمن بنفسك، أنك هتقدر إنك تكون أفضل مما أنت عليه. أتمنى ليك السلامة
تم النشر الثلاثاء، ٢٠ ديسمبر ٢٠٢٢
فيه عاليوتيوب قناة دور محمد دياب ده افضل حد ممكن يساعدك ويحطك علي الطريق بجد هتستفيد
تم النشر الثلاثاء، ٢٠ ديسمبر ٢٠٢٢
غض بصرك
تم النشر الأربعاء، ٢١ ديسمبر ٢٠٢٢
غض بصرك حتى على نفسك واتوكل
تم النشر الأحد، ٥ فبراير ٢٠٢٣
غض بصرك ولاتلمس ذكرك
تم النشر الأحد، ٥ فبراير ٢٠٢٣
الصلاه... كمان على قد متقدر متفضلش لوحدك كتير خليك مع اهلك وصاحبك
تم النشر الاثنين، ٢ يناير ٢٠٢٣
صلى
تم النشر الأحد، ٢٥ ديسمبر ٢٠٢٢
عليك بالصيام والصلاة وان شاء الله تبطل
تم النشر الجمعة، ٢٣ ديسمبر ٢٠٢٢
عليك بالصيام
تم النشر الأربعاء، ٢١ ديسمبر ٢٠٢٢
لعرض السؤال في فدني اضغط هنا