من فضلكم هو أنا ارتبطت ب بنت لفترة ٣ سنين كاملين، طبعاً كان فيه مشاكل زي أي علاقة طبيعية بس كان حبنا لبعض بيغطي على أي مشكلة و بنعدي كل حاجة سوا و هي كانت أكتر واحدة بتستحملني و بتستحمل عصبيتي حتى أكتر من أهلي، بس جت في نهاية العلاقة اتغيرت معايا و في النهاية طلبت إننا ننفصل و قعدنا سنة كاملة مش بنتواصل و ده على حسب تفضيلها رغم كدة دخلت قالتلي كل سنة وانت طيب بس بعد اكتر من سنة ف هل ده طبيعي علما بأنها مقالتليش كل سنة وانت طيب رمضان اللي فات، ف رديت ب و انتي طيبة و خلاص، أنا كنت معتقد بسبب انفصالنا اللي مكنش ليه سبب إنها شافت حد احسن مني و كدة، بس دلوقتي هم سابوا بعض مثلاً ف هي عايزة ترجع تاني هل أنا كدة صح ولا أي ، أرجو الإفادة
فيه نوعية من الناس ممكن ترجع .. وده بيبقى لأسباب مختلفة ولكن بتبقى متشابهة عند البعض. ممكن الحنين. ممكن علشان حست انها كانت مخطئة في قرارها. ممكن علشان عايزة تتخطى الشخص اللي كان في حياتها بيك، بما انها كانت في علاقة برضه بعد ما سبتوا بعض. الله اعلم هي عايزة ترجع ليه .. بس السؤال هنا، هي لو رجعت انت هتعمل ايه؟ هل العلاقة بالنسبالك عاوزها تكمل؟ ولا لا طيب لو عايزها تكمل انت غرضك منها ايه؟ علاقة في النور ولا تفضلوا كده زي ما انتوا؟ القرار عندك .. وربنا يعمل لك الصالح
تم النشر الخميس، ٢٨ مارس ٢٠٢٤
هو انا احب اقول لك انه ده النمط الطبيعي اللي بيحصل في العلاقات اللي هي بتتسمى ارتباط غير رسمي او قبل اي خطوبه او اي جواز. لانه لما بيكون ما فيش اي مرحله تطوريه في اي علاقه هو ما بيكونش رايحين في اتجاه معين طبيعي جدا انه يكون في طرف من الاتنين يحس انه خلاص كفايه كده هو احنا رايحين لفين ممكن ما يكونش فكر فيها كده ممكن هيكون عندها اسباب كتير ممكن تكون عرفت انه اصلا فكره الارتباط دي غلط وما تصحش بكل الاشكال فقررت انها توقفها وده قرار صح مش قرار غلط ولكن لو هكلمك بعيدا عن الفكره دي حتى اقول لك انه طالما انتم مرتبطين يعني وبعدين.
تم النشر الخميس، ٢٨ مارس ٢٠٢٤
لو بتحبها روح أتقدم لها
تم النشر السبت، ٣٠ مارس ٢٠٢٤
العلاقه الي بدايتها لا ترضي الله نهايتها لن ترضيك دا اولا ثانيا لو استقريت على قرار انك ترجع تكلمها يبقا روح اخطبها احسن
تم النشر الجمعة، ٢٩ مارس ٢٠٢٤
هو اكيد هيتوقف عليك انت لو كنت لسه مقتنع انها لسه ليها نصيب من فلبك وانت حابب تفتح معاها علاقه جديده وتنسي اي حاجه حصلت مكنتوش انتم الاتنين متفقين فيها وكمان انت قولت انها استحملتك وكانت قريبه منك فأكيد هي بتحبك فبلاش تضيعها من ايدك وكلمها عادي ومش شرط تكون ملقتش حد ذيك وعلي عصبيتك فأنت لازم تتغير مش عشانها هي لكن عشان نفسك واي شخص هيكون معاك مش شرط نفس البنت
تم النشر الخميس، ٢٨ مارس ٢٠٢٤
بص هو ميهمكش هي شافت حد تاني ولا لا ولا تفكر في كده عشان متبقاش ظالمها بس فكر في نفسك اللي يبعد كده من غير اسباب يبقي ميستاهلش ترجع تاني عشانه ايه اللي يضمنلك انه مش هيمشي تاني لو رجعتوا خلي ردك علي القد وفكر في نفسك بس
تم النشر الخميس، ٢٨ مارس ٢٠٢٤
انا شيفه انه بيقول استحملته اكتر من اهلو لمده 3 سنين مثلا واكيد مرت ب حاجات كتير اوي معاه، انتوا سبتوا كل حاجه ومسكتوا انها مشيت ورجعت ع فكره هيا ليها طاقه واكيد كانت خلصت بسبب اسلوبه وعصبيته كانت محتاجه تمشي عشان يتغير او حتي يتمسك شويا بيها او يروح يتقدم، لو انت بتحبها روح اتقدم ليها وغير من نفسك واحده شافت منك اوحش ما فيك وكملت معاك، ومش شرط عشان بعدت عنك يبقي عرفت حد تاني
تم النشر السبت، ٣٠ مارس ٢٠٢٤
العلاقة اللي بدايتها لاترضي الله نهايتها مش هترضيك وبعدين ممكن تكون مجرد رسالة لا اكتر ولا اقل
تم النشر الجمعة، ٢٩ مارس ٢٠٢٤
بغض النظر هي بترجع ليه مش هي اللي انفصلت و عايزه ترجع تاني انت ازاي ترضي علي نفسك تبقي لعبه بين ايديها تلعب بيها لما تكون فاضيه انا شايف انك تلغيها من حياتك و بص لنفسك و حاول تحسن من نفسك و خليها تندم و تحاول ترجع اكتر و انت ترفض و ده حق مش بتظلمها ولا حاجه طالما هي اللي انفصلت فالاول
تم النشر الجمعة، ٢٩ مارس ٢٠٢٤
بكل اختصار ماترجعش ليها عموما انت من ليبيا ؟...
تم النشر الجمعة، ٢٩ مارس ٢٠٢٤
لعرض السؤال في فدني اضغط هنا