السلام عليكم
السنة دي أنا ٣ ثانوي ،وخلاص إمتحاناتي باقي عليها أقل من شهرين ف محتاجة نصايح إزاي أحافظ على ثباتي الإنفعالي ومتوترش في اللجنة وإزاي أجهز نفسيا للإمتحانات.
وإدعولي كتير 🥲
اهلا يا ندى ، بالتوفيق حبيبتي ، وربنا يرزقك التوفيق والنجاح اولا ، ابدأي اتدربي على اجابة نماذج امتحانات في حدود الوقت المخصص للامتحان، يعني مثلا امتحان العربي بيكون 3 ساعات اظن ، اظبطي التايمر على الموبايل لمدة ساعتين ونص ، واقعدي على ترابيزة او مكتب ، واقفلي النت عن الموبايل ، وابداي حلي نموذج امتحان، وشوفي هتخلصيه في قد ايه ، ساعتين ونص مش 3 ساعات ، لان الوقت في الامتحان بيعدي اسرع من لما تكوني في البيت ، كدا هتتدربي و تتعودي على الاجابة برتم مناسب لوقت الامتحان، وهتتدربي على اجابة اسئلة الامتحانات، اغلبها مش هيبقى جديد عليكي ثانيا، اتدربي على تنظيم تنفسك، شهيق وزفير ، في هدوء ، لو لقيتي نفسك متوترة ، بيبقى في ترتيب للتنفس ممكن تشوفي طريقة التنفس الصحيحة (5 عدات شهيق ، انتظار 5 عدات، 5 عدات زفير ، انتظار 5 عدات وتكرري الطريقة دي 5 ل 10 مرات) عشان يكون تنفسك صحيح ، وتملي الرئة بالاكسجين مظبوط ويساعد على وصول الاكسجين اسرع للمخ، ودا كمان هيساعدك على التركيز وانك تفتكري المعلومات اسرع. ثالثا، قللي استخدام الموبايل ، واقفلي الموبايل قبل النوم بساعة، دا هيساعدك تنظمي نومك وتنامي مرتاحة وتصحي مرتاحة ، وهيساعد مخك على استعادة نشاطه وتركيزه واستغلال فترة النوم في تحليل وحفظ المعلومات. رابعا، خلي ليكي روتين نوم ورياضة يوميا ولو مشي او حركة في المكان لمدة 5 او 10 دقايق ، هيساعدك على تقليل التوتر وزيادة النشاط والتركيز خامسا، اهتمي بأكلك يكون صحي ، بروتين وخضار ، ومتنسيش الميا مهمة جدا، لتقليل التوتر والمحافظة على نشاط الجسم والمخ وتجنب الجفاف. سادسا، اسالي المدرسين عن نماذج الامتحانات، وايه المهم في كل مادة، واسلوب التفكير والتركيز على الاسئلة ، لان اسلوب الامتحانات بدأ يتغير مبقتش اسئلة مباشرة، فهتحتاجي تتدربي على اسلوب التفكير في الاسئلة وتحديد الاجابة الصحيحة. سابعا واولا واخيرا، الاستعانة بالله والدعاء والمحافظة على الصلاة في وقتها ، وفي ادعية للمذاكرة تقدري تلاقيها على النت، هقولك منهم "رب اشرح لي صدري ويسر لي امري واحلل عقدة من لساني يفقهو قولي" ، دا دعاء سيدنا موسى ، كرريه طول الوقت وخصوصا قبل بداية الامتحان ، وكمان دعاء "اللهم افتح لي فتوح العارفين" ، "اللهم علمني ما ينفعني وانفعني بما علمتني" ، ولما تخلصي مذاكرة ادعي "اللهم استودعتك كل ما قرات وما حفظت"
تم النشر الخميس، ١٨ أبريل ٢٠٢٤
وفقك الله لكل ما يحب و يرضى معظم الناس يشعرون بهذا لا تحملي نفسك فوق طاقتك اعلمي أن التوفيق بيد الله و عليك بالدعاء للتوفيق و بالاسباب الدنيوية و كل شيء في هذه الدنيا هو رزق من الله و الخيرة فيما اختاره الله و الحياة واسعة و اكبر من امتحان يقيمك في فترة معينة في حياتك و تستطيعي أن تتنفسي بعمق بالطريقة الصحيحة (ابحثي كيف) و ان تمارسي بعض التمارين الرياضية (مهمة جدا) و ان تضحكي و لا تتوتري و افعلي ما يحبه الله من عبادات و... وعليك بقراة أدعية الامتحان
تم النشر السبت، ٢٠ أبريل ٢٠٢٤
أولا ربنا يوفقك وينجحك ثانيا قربي من ربنا اكتر وادعي ان ربنا ينجحك وحكايت التوتر في اللجنه في ادعيه كتيره التوتر وبصي اجتهدي واعملي العليكي والباقي على ربنا
تم النشر الجمعة، ١٩ أبريل ٢٠٢٤
اذكري الله كتير حاولي مشتغليش بالك غير مذاكرتك وان شاء الله تحافظي علي ثباتك
تم النشر الخميس، ١٨ أبريل ٢٠٢٤
حاولي تستغلي الشهرين دول كويس عشان يبقي قدام نفسك متحسيش بأنك قصرتي،وأثناء الامتحان يبقي كل تفكيرك في ورقة الاسئلة وقف معاكي سؤال تفكيرك ميخرجش من الورقة وحتي لو عكيتي ف الامتحان عادي انسي اللي حصل وركزي ف اللي جاي وخلي فكرة ان الله لا يضيع اجر من احسن عملا ف بالك دايما، حاولي تبعدي افكار ان ده امتحان كذا وهيحدد كذا وكل الأفكار اللي بتجيب توتر دي . وربنا يوفقك يارب
تم النشر الخميس، ١٨ أبريل ٢٠٢٤
اول حاجة لازم تعملي اللي عليكي علشان ميبقاش عندك احساس بالتقصير ودا هيزيد توترك ف الامتحانات وهيزيد التساؤلات في عقلك بعيد عن الامتحان ، وانا هنا اقصد المذاكرة علي فكرة ذادري ذاكري ذاكري ، ثانيا في الامتحانات استنفذي كل الوقت المتاح وبلاش الخروج بدري حتي لو خلصتي وابدأي بالاسئلة السهلة والبسيطة وسيبي الاقي للتفكير تفكري فية بتعمق باقي الوقت ، واعرفي وحطي ف بالك دايما انك هتحلي السؤال يعني هتحلية مهما كانت صعوبتة ، وصدقيني هيتحل ، ولو حسيتي بأي توتر افتكري بس تتنفسي بعمق ، الشهيق من الأنف والزفير من الفم ، ربنا ينجحك
تم النشر السبت، ٢٠ أبريل ٢٠٢٤
لعرض السؤال في فدني اضغط هنا