الناس اللي ازتني في حياتي اللي هما ابويا و امي
بقيت دلوقتي بتخيل غصب عني اني بتخانق معاهم و بزعق و اطلع اللي جوايا و هما بيزعقو معايا لدرجه ان صوتي بعلي في الحقيقه و لا و كمان مزاجي بيتغير لا و ممكن اخد منهم موقف في الحقيقه
الموضوع بقي بيتعبني
للعلم انا اتمرمط بسببهم و هما منفصلين و في محاكم و قواضي من وانا عندي 14 سنه انا حاليا 20 سنه
دا غير انهم استهلكوني جامد و وصلت لمرحله اني اخترت اقعد لوحد و حاليا انا قاعد فعلا لوحدي بس و حابب الوحده
دا غير انهم خدو كل حاجه مني كل حاجه حتي هدومي ابويا اخدها لما اتهرت اعيش مع امي و لما كلمت امي مرديتش تعيشني معاها لدرجه ان دلوقتي عدي عليا 3 سنين عايش لوحدي
ابوس اديكم انا محتاج حل لموضوع التفكير دا
انا فقدت الشغف لكل حاجه حتي الاحساس بقيت بارد
بقيت لو دخلت نقاش بكون متخيل كل السنيروهات اللي ممكن تخصل و الاكتر ان في سيناريو بيحصل فعلا ف رده فعلي بتكون باردة حتي لو داخل خناقه بكبر دماغي لان عارف اخرها اي و ممكن كمان بسيب الخناقه و امشي و الناس تقول اللي تقوله معدش فارق معايا يقولو دا هفق او خرع او اي حاجه من دي مع لني اقدر اطرشم اللي قدامي بس معدش عندي طاقه
انا و صلت لمرحله بحس اني عايز اعيط و مش عارف
لو الموضع محتاج طبيب نفسي ياريت حد يعرفني اتواصل مع حد ازاي علشان مش عارف اوصل لحد
اول مره يجيلي فضول اتجاه شخص وادخل اشوف كل الاسأله بس انت بتعانى كتير جدا جدا فى حياتك ورغم كده مصمم تختار قرارات غلط اول حاجه بالنسبه لموضوع اهلك انت ملكش اى ذنب فى اى حاجه ليها علاقه بأهلك تماماً كل واحد بيتحمل نتيجة اخطاؤه ، انا دايما عندى وجهة نظر مقتنعه بيها فى حياتى ومريحانى جدا من التفكير وهى ان ربنا بيعطى كل واحد رزقو فى حاجه مختلفه فى الي واحد حياتو عذاب وصحابو منافقين ولكن ربنا اكرمه بأهل كويسين وفى الي ربنا اكرمه بعد وقت كبير من معاشرة ناس منافقه بزوجه واولاد يعوضوه للاسف الواحد مش بيعرف رزقه فين غير لما ربنا يكرمه بحاجه تعوضو عن الي فات يمكن رزقك مش ف أهلك أو دول نقطه فى حياتك تخليك على يقين أن ربنا هيعوضك لفتنى جملة انك اصبحت شخص عندو شخصيه عنيفه نتيجه التعذيب النفسي من والدك وده طبعا هيطلع علي المجمتع وعلاقتك بالناس والحقيقه انك محتاج تغير نفسيتك وتبقي شخص بيفكر قبل ما ياخد قرارات عشان حياتك تتحسن بدل ما تخلي إهانة والدك فى الطفوله حاجه تخليك شخص عنيف خليك طيب هتلاقي حد يحبك ويقدرك الطيبه هى الي بتستمر مش العنف والأذى وربنا يكرمك وتحط كل المشاعر الي اتحرمت منها فى ولادك انت اتحرمط من الحنان ومعنى الحضن والدفا إن شاءالله ربنا يكرمك بعيله انت تختارها بنفسك اعرف اخطاء أهلك واتعلم منها ربنا هيجبر بخاطرك كمان بالنسبه للبنت إلى انت كنت بتحبها أو مازلت انتوا كنتوا فتره فى حياه بعض ، حضرتك من كلامك بتمر بمعاناة كبيره جدا مينفعش تسيب كل حاجه مؤذيه فى حياتك وتركز مع البنت والله انا عارفه انها مهمه فى حياتك لكن هل حضرتك هتعرف تكمل معاها وانت لسه معالجتش صدمات الطفوله أو التفكير الزائد الي عندك ؟ الي هيحصل انك هتطلع انفعالك عليها ازاى عاوز تدخل فى علاقه حب وانت لسه موصلتش للسلام النفسي ؟ انا من رأى تقولها انك محتاج تراجع نفسك وتعالج نفسك داخلياً عشان تقدر تكمل حياتك يعنى حضرتك ميكونش عندك مشاكل كتير وتركز فى الحب والله ما اقصد حاجه بس هو الموضوع ترتيب أولويات مش اكتر بالنسبه لأهلك ف فى مقوله بتقول ( لا يشفي الإنسان فى نفس البيئه الي جعلته مريضاً) يعنى مستحيل حضرتك تتغلب علي صدمات الطفوله وانت عايش معاهم لو انت عايش ف بيت لوحدك هيكون احسن من انك تعيش مع ناس بتدمرك وهنا مش لازم تبعد عنهم بمعنى انك تقطع صلة الرحم لا بس لازم تتصل عليهم كل فتره تسألهم والله هما حبوا التواصل معاك كويس ولو رفضوك تكون انت بينك وبين ربنا عملت الي عليك ف كل واحد هيتسأل قدام ربنا عن صلة الرحم وسمعت قبل كده حد بيشتكى من أذى اخواته ليه وسأل شيخ قال ليه أن مينفعش يقطع صلة الرحم لكن علي الاقل لو شافو ف مكان يسلم عليه ف السلام لله أولاً ف مش لازم تفضل تتعامل مع ابوك وانت عارف بيأذيك انت كده بترجع نفسك لنقطة الصفر اتعامل معاه فى الضروره يعنى حاول تكلموا تسأل عليه لكن لما تكون عارف ان هو هيخليك انسان عنيف ومؤذى مينفعش ابدا تعيش معاه ، طيب كده اتكلمنا ف كام نقطه اهم نقطه بقا موضوع الصدمات وغيرها الصدمات فى الطفوله هى اكتر حاجه لو متعالجتش بتدمرك بص انا بالنسبالي الموضوع لازم يبدأ من جواك انت ممكن تروح لدكتور نفساني ومتلاقيش نتيجه لانك مش عارف تعالج نفسك أو تساعد نفسك بالنسبه المعالجه حاول كل يوم تقرأ صفحه واحده من القرآن أو حتى ايه واحده ربنا يكرمك وصلي كتير وداوم علي الصلاه مهما كان يومك متعب وكمان الدكاتره النفسيين دلوقتى بقوا علي النت يعنى اى مشكله بتواجهها تقدر تبحث عن علاجها وتستعين بالله عشان يساعدك اكتر واكتر كمان انصحك جدا جدا تسمع مصطفى حسني أو اى شيخ بيتكلم فى الدين مع العلم النفسي وكمان حاول قبل ما تنام تسمع قران وبالنسبه انك مبقتش عارف تنام انصحك تسمع شيخ اسمو عبدالرحمن مسعد ، وفى كمان شيخ اسمو ياسر الدوسري كمان شغل اى سوره واسمعها هتدخل فى سكينه وتنام ، ✨كمان عوزاك تركز بس فى دول علاقتك بربنا ، علاجك النفسي ، شغلك واعمل فلوس متحتجش لحد ،✨ هتلاقي صحابك واى حد هو الي بيجيلك وركز فى هم جدااااااا✨✨✨✨✨✨✨ واهم حاجه الحب مش كفايه انت محتاج تحط كل مشاعرك مع حد يعرف يكمل معاه حياتك ويخليك تكون اسره تحقق فيها كل حاجه تخيل نفسك مع واحده بتحبها بس انتوا مش قد فكرة انكوا تكملوا وواحده تانيه حبيتها لأن عارف انها كويسه وهتقدر تخليك تكون اسره سويه وقادره تحققلك كل ما فقدته فى الطفوله وفى النهايه احب افكرك تانى أنه لا يشفي الإنسان فى نفس البيئه التى جعلته مريضاً
تم النشر الثلاثاء، ٢١ مايو ٢٠٢٤
قريت عبارة من فترة بتقول (ما نحن إلا نتاج طفولة ظالمة). انا شايفة انك تروح لدكتور نفسي هيساعدك جدا، هيساعدك تخرج اللي جواك ويساعدك تبقى احسن. ممكن تبحث في جوجل وهيجيلك الدكاترة في المكان اللي انت فيه و انا ارشح الخيار دا لإنك هتبقى واثق فيهم. ولو دا مش متاح ممكن تشوف دكاترة اونلاين، بس خلي بالك من حاجتين اول حاجة لازم تسأل عن مكانهم عشان تمنع عمليات النصب تاني حاجة تاخد بالك من السعر، حاليا فيه جلسات ب ٢٠٠ ولو المكان راقي شوية بتبقى ب ٣٠٠ مش اكتر، غير كدا يبقى غالبا نصب. وماتعتمدش على الدكتور النفسي انت برده لازم تساعد نفسك بنفسك
تم النشر الثلاثاء، ٢١ مايو ٢٠٢٤
ايوه طبعا خناقاتك الداخليه هتفضل تاعباك انت كاتم الخناقات ليه ززاللى انت حاسس بيه ضرورى يعرفوه ويفهموا هما ازاى اذوك افتح تسجيل صوتى وسجل خناقتك بصوتك وطلع كل اللى انت حاسس بيه ...هما عملوا اللى شافوا بيه انه من حقهم وده مش معناه انهم يمنعوك من حقك فى التعبير طلع كل اللى واجعك مع ربنا وقوله يارب انا زعلان منهم ...قوله يارب هما معرفوش يطبطبوا وانت احن منهم حتى الاهل لو كويسين هيجى مرحله ولازم ننفصل عنهم نفسيا وذهنيا عشان بنكون حياه خاصه بينا .....انت بس بدأت ده بدرى شويه ومش باختيارك فطبيعى تتوجع من الحاله كلها عموما لو حاسس ان مرحلة التفريغ دى والتخطى للى فات مش عارف تعملها لوحدك ...اطلب المساعدة من مختص
تم النشر الثلاثاء، ٢١ مايو ٢٠٢٤
شكرا لحضرتك علي المشاركة من الأكثر الأساليب المؤذية هوا تلقي الأذي من منبع الأمان والطمأنينة بيكسر كل الثوابت داخل الإنسان بس هرجع واقول احنا بنتعامل هنا والآن بالأمر الواقع حاليا نقدر نغيره للأحسن ازاي لان تعافي كل انسان هو مسؤلية شخصية له التدوين سحر بيرتب الافكار جدا وبيهدي الدوشة الداخليه والضغط الناتج عن الافكار الكتير المتكعبلة جوانا وبيكون ازاي بكتب عنوان رئيسي أنا عايز اتكلم فيه معايا واخصص وقت بدون مقاطعة واحط القلم بدون مااشيله واكتب كل اللي بيجي فبالي عن هذا الموضوع ولو دماغي تاهت ومفيش كلام اكتبه اكتب اي حاجة بدون ماتشيل القلم لحد ماالافكار تتلقط تاني واكمل كتابة بالتطبيق والاستمرار هتلاقي نتيجة هايلة وتغير فالمود ملحوظ ان دماغك اهدي فده هيحسن افكارك وبالتالي هيتحسن مودك
تم النشر الثلاثاء، ٢١ مايو ٢٠٢٤
السلام عليكم اعلم أن التفكك الأسري و وجود مشاكل يؤثر علي الأبناء نفسيا بشكل كبير و مقدره جميع المشاعر اللي بتحسها و لكن مفيش سلوك بيتم من تلقاء نفسه ، يعني ايه ؟؟ يعني ممكن تفكر في الأحداث اللي بتحصل جوالك و حواليك لكن انك تتفاعل بارتفاع الصوت او تزعل منهم في الحقيقه ف انت محتاج لتدخل و تشخيص. و اي كلام بدون تدريبك و فهمك انت ايه اللي بتعاني منه ف هو يظل كلام تتأثر بيه لحظيا و لكن بترجع تاني لنفس المعاناه و الالم. لو حابب اعمل لك اختبار بسيط جدا بيتحدد عليه إذا كانت تحتاج زياره طبيب أو لا راسلني و هذا بالمجان و طبعا في سريه للاختبار التشخيصي.
تم النشر الثلاثاء، ٢١ مايو ٢٠٢٤
للاسف انت وضعك ده ملاييين من الناس زيك اطمن و في الأغلب بيكونوا اللي واجهتهم حالات انفصال من اباهتم و امهم و من رايي الشخصي انت محتاج طبيب نفسي عشان يدخل جواك اكتر و يحللك المشكله دي ز أن شاء الله تكون احسن
تم النشر الثلاثاء، ٢١ مايو ٢٠٢٤
لكل مننا عندو مشاكل ممكن تكون كبيره و ممكن تكون صغيره بس بتفرق عن طريقه تعامل الشخص مع المشاكل دي و أنت لازم تواجه المشكله و تحاول تحلها مش وحش إنك تكون بارد لأن فعلاً في مواقف مبتبقاش محتاجه العصبيه المفرطه و تضييع الوقت الوحش اكتر إنك تتعصب بشكل أوفر ف كل الخناقات و متحاولش تقفلها أو تحلها ممكن تغير من نفسك بكذا طريقه جرب مره و اتنين انك لو المشكله كبيره اللي اتعرضتلها تحلها بشكل هادي منغير عصبيه و ذي مبتقول إنك بارد اتجاه المشاكل دا هيساعدك انك تحل كل مشكله بشكل هادي منغير تفكير زائد لأنك أصلا مش هيكون هامك المشكله بشكل كبير جرب تعمل دا انا فعلياً دي شخصيتي بارده و بتجنب المشاكل زيك بظبط و لكن العكس ف حاجه إني بحلها بشكل هادي بدون لا شتايم ولا عصبيه شديده لدرجه بقا في أغلب الخناقات ناس تستشرني ف أنت جرب تبقا كدا هتحس حياتك غير الناس اللي بيبقا رد فعلها أوفر ف المواقف و الخناقات حياتهم بتتأثر بشكل كبير مش هيقدروا يقعدوا هاديين ولا مره دي نقطه الحاجه التانيه كل واحد بردو عندو ف عقلو ناس بتكلمو و لكن انت الفرق بسبب المشاكل بقيت ترد و بصوت عالي دا طبيعي لأنك غير الوحده اللي هتخليك تفكر كتير غير إنك اتعرضت لمواقف مش كويسه خلتك تفكر ف كدا الموضوع مش محتاج طبيب نفسي ولا حاجه الموضوع بس محتاج إنك تندمج مع الناس بشكل أكبر الوحده بتسبب اكتر من كدا و أنت كدا هتنغمس ف افكارك بشكل كبير أنت عندك ٢٠ سنه اكيد بتشتغل جرب تشتغل شغلانه غير مجالك مثلا او تتعلم حاجه تفيدك و تخليك تخرج من احساس الوحده و لو لسه طالب جامعي ف بردو حاول تعمل حاجات جديده و تروح اماكن جديده لأنك لسه ف عمر الشباب جرب تصاحب شخص كويس يكون معاك ف كل ازمه و يساعدك تتخلص من الأفكار الكتير اللي بتجيلك بس صُحبه صالحه تعينك و بردو قرب من ربنا دا هيخليك تتحسن اكتر هتبقا بدل مبتتكلم مع أصوات دماغك هتتكلم مع ربنا أو دور ع بنت الحلال اللي ممكن تونسك ف وحدتك في كذا حل بس كل اللي عليك تبادر ب لو ع الأقل واحد فيهم حياتك هتتحسن بشكل أكبر سلي نفسك هيخليك تخرج من إحساس الوحده اللي بسببوا نتج عنو مشاكل كتير و كل اللي عليك خلاص تتقبل وضع و فكره إنك قاعد لوحدك و إن أهلك مش حابين إنهم يدخلوك بشكل أكبر ف حياتهم بس مش معنى كدا إنك تقاطعهم أمك روحلها ب حاجه مثلا مش لازم تتكلم معاها ف حوار مشاكل و إن ليه مش عايزاني اعيش معاكي كل اللي عليك برها و عاملها كويس و أبوك كذلك حتى لو عمل ايه عاملو كويس بردو اسأل عليه كل حبه بس بردو منغير متفتح حوار مشاكل او اي حاجه كدا تكون عملت اللي يريحك و يريح مامتك و باباك و اللي يرضي ربنا بردو و بإذن اللّٰه حياتك هتتحسن و كل حاجه هتتحل
تم النشر الثلاثاء، ٢١ مايو ٢٠٢٤
أولاً أحب أقولك إنك مش لوحدك في الوضع دا، ومش عليك تتحمل كل العبء بنفسك. الأول بنساعدك ترجع تكتشف الاهتمامات اللي بتفرحك وتركز عليها، وتعمل جدول زمني بسيط بالنشاطات اللي بتحبها وبتريحك، كأنك تقضي وقت برفقة أصحاب أو تمارس هوايات جديدة. تعرف، الوقت اللي بتقضيه بناس إيجابيين وفي بيئة محببة بيساعدك تتحسن مزاجيتك وتخليك في حال أفضل. التفكير السلبي بيولد مشاعر سلبية، فحاول تغيير النظرة للحياة وتركز على الأمور الإيجابية. ممكن تبدأ بقراءة كتب تطوير الذات أو مشاهدة فيديوهات تحفيزية عشان تبدأ تشعر بالإيجابية. أما بالنسبة للمساعدة النفسية، ممكن تبدأ تبحث عن مراكز أو جمعيات تقدم خدمات نفسية في مجتمعك أو تتواصل مع أخصائي نفسي عبر الهاتف أو الإنترنت. ولو حابب نكون جنبك في الرحلة دي ونساعدك نحنا موجودين هنا للحديث معك ومساعدتك بقدر الإمكان. قدامك طريق طويل وموجودين معاك فيه عشان تلاقي السعادة والاستقرار النفسي.
تم النشر الثلاثاء، ٢١ مايو ٢٠٢٤
انت محتاج دكتور بس مش عشان انت فيك مشكله انت محتاج دكتور عشان تتكلم سكوتك وحش و هيأذيك و مشاكل أهلك طبعا انت ملكش ذنب فيها بس المشكله ان البيئه اللي كنت فيها هي اللي بنت الشخصيه اللي أنت بقيت عليها دلوقتي محتاج تصفي ذهنك خالص و تبني شخصيه من اول و جديد و ده مش سهل اكيد بس مش مستحيل محتاج تبني كل حاجه من اول و جديد بعيد عن مشاكل أهلك بس عشان كده انت محتاج دكتور عشان يساعدك بس
تم النشر الثلاثاء، ٢١ مايو ٢٠٢٤
لعرض السؤال في فدني اضغط هنا