صباح الخير ياكاريزما.. خلينا الاول نحلل ونطلع كام نقطة سوا عشان نكون عارفين اى الحكاية.. 1. انعدام الثقة بالنفس.. مش قادرة تتكلمي بحرية أو تعبري عن رأيك بسبب خوفك من الانتقادات.. 2. الشعور بالتوتر الاجتماعي.. بتخافي تتواجدي مع ناس وتترددي حتى في أبسط الأمور.. 3. الاعتماد على الآخرين.. بتحسي دايما انك في انتظار تأكيد من اللي حواليكي إنك كويسة .. 4. محاولة تقليد شخصيات من المسلسلات.. ده تعبير واضح عن عدم حبك لذاتك الحقيقية ومحاولة انك تكوني نسخة مختلفة.. بتهربى من الواقع وعاوزة تشوفى نفسك فى شخصية تانية تكون جاهزة قدامك.. ممكن نقول ان دى النقط الاساسية فى كلامك.. تعالى بقى نحكى.. تخيلي نفسك كدا لوحة فنية مرسومة بعناية.. كل خط فيها هو جزء من قصتك..كل تفصيلة فيها هيا انتى.. حتى لو شايفة في نفسك عيوب ، هي دي اللي بتميزك وبتخليكى فريدة عن غيرك.. فما تحاوليش تكوني زي حد تاني، لأنك في الأصل جميلة بشخصيتك الحقيقية.. انتى مش نسخة لحد... الخوف من آراء الناس مجرد وهم.. الناس هتتكلم دايما، سواء كنتي الأفضل أو الأسوأ.. فليه تعيشي حياتك على مقاسهم؟.. جربى تعيشي زي ما أنتي عايزة لأن رضاكي عن نفسك هو اللي هيشبع روحك ويحسسك بنفسك وقيمتك.. الخطأ مش نهاية العالم.. لو غلطتي مش معناه إنك فاشلة، معناه إنك بتحاولي وبتعيشي.. كل الناس فشلت ف حياتها، بس اللي بيفرق إنهم قاموا او لا ..وانتى اختارى.. اتكلمي حتى لو صوتك بيرتعش.. تعبيرك عن نفسك مش ضعف ده شجاعة...كوني فخورة بكل كلمة تطلعيها لأنك تستحقي تتسمعي.. مهما كان اللي هيقولوه صوتك مهم وله قيمة..وقيمتك من نفسك من اخلاقك من ثقافتك من علمك من احتياج الناس ليكى.. لازم تطورى نفسك ف كل دا.. حبي نفسك زي ما بتحبي صحباتك.. لما بتشوفي حد بتحبيه متضايق بتعملى اي ؟ بتحضنيه وبتقولي له إنه قوي.. ليه ما تقوليش نفس الكلام لنفسك؟ احتضني ضعفك، كوني صديقتك المخلصة ليكى... اتقدمي حتى لو بخطوة صغيرة.. النهارده ممكن تكوني متوترة.. بس بكرة خطوة واحدة ممكن تغير شعورك بالكامل..كل يوم هو فرصة جديدة لتكوني أفضل..ابدأى بعمل خطة كاملة ليكى على خطوات.. اهتمى اول حاجة بدراستك وفكرى نفسك تدخلى كلية إيه.. اهتمى انك تكونى ست بيت شاطرة.. اهتمى انك تعرفى تطبخى تعرفى تلبسى تعرفى تتكلمى تعرفى تناقشى تعرفى تفيدى الى قدامك تكونى مثقفة عندك معلومات وأراء.. اهتمى بجسمك بأكلك بنومك..اهتمى بعبادتك ودينك وحفظك للقرآن.. كل دا هيساعد كتير ف بناء ثقتك بنفسك.. ابنى نفسك زاى ماتحبى يكون ابنك او بنتك.. التميز في البساطة.. فمش لازم تعملي حاجات خارقة عشان تكوني مميزة..كوني نفسك، وده لوحده كفاية يخليكي نجمة في حياتك.. ودا الاهم.. دى حاجات بسيطة اتكلمنا فيها.. واخيرا.. عاوزك تعيشي حياتك وأنتي عارفة إنك قوية مميزة وعندك نور خاص بيكي.. الموضوع مش سهل لكن مش صعب.. الموضوع حسب ماتتعاملى مع نفسك وافتكرى ان نظرة الناس ليكى من نظرتك لنفسك.. خليكى كبيرة وواثقة من نفسك عشان الناس تشوفك كدا.. استمري وما تستسلميش وهليكى عارفة انك صح مادام بدأتى تدورى ع طريقة تعالجى بيها امورك..
بصي انتي حبي نفسك وقولي لنفسك انا احسن واحده في الدنيا اتكلمي وسط الناس بطبعتك عادي طالما بتقولي الصح يبقا محدش ليه حاجه عندي حاولي تكوني صداقات كتر واتقبلي نفسك وزاتك متخديش علي كلام الناس الناس كدا كدا بتتكلم فعيشي حياتك بأسلوبك الي انتي بتحبيه وحطي أولوياتك ونظميها قبل اي حاجه تانيه وقربي من ربك كتييير عشان دا هيكون جزء كبير من حبك لنفسك واتفوقي في دراستك واثبتي للناس انتي تبقي مين بجد ساعتها انتي تعرفي قيمتك كويس
تم النشر الخميس، ١٣ فبراير ٢٠٢٥
أشكرك على تعقيبك الجميل والمشجع ولنصائحك المميزة التي أرجو أن تفيد صاحبة السؤال. أتمنى لكما كل النجاح والتوفيق في خطواتكما المستقبلية!
تم النشر الأربعاء، ١٢ فبراير ٢٠٢٥
صباح النور مبدأيا شكرا بجد ححاول لسة مش عارفه ابدا منين انا ف 2 ثانوي واهلي عايزيني ادرس بره مصر وانا الموضوع دا مخوفني لاني بتوتر من فكره تعلم حاجه جديده وافشل فيها و اصلا عمري ما فكرت عايزه اطلع اي لاني لما بسأل نفسي مش بلاقي اجابه غير معرفش وحاسه اني بجد مفيش اي هدف ليا ف الحياه وفي فتره كنت كل يوم اصحي من النوم ابص ف المرايه واضحك واقول لنفسي صباح الخير علشان قريت ان بيديني ثقه ف نفسي بس كل ما بعمل كده برجع اقول لنفسي اي الهبل الي انا بعملو دا وبتكسف من الي بعملو لاني بحس انو مرض مفيش حد بيكلم نفسو و انا عندي 4 اخوات بنات 3 اكبر مني ووحده توأمي وانا توأمي دي انا مسؤله عنها ف كل حاجه وبعملها كل حاجه هي عايزاها علشان تحبني معرفش وبحس اني لو قولتلها لا ف حاجه بتزعل وانا مش عايزاها تزعل مني مع انها زي الفل وممكن تعمل الي هي عايزاه لوحدها وبحسها بتستغلني لاني بقولها ماشي وبتستخسر فيا حاجه لو معاها فلوس علشان فلوسها متخلصش يعني مع اني لو معايا فلوس بقسمها بيني وبنها عادي ومش بحس اني بعملها حاجه كبيره لان احنا اخوات ودا الطبيعي
تم النشر الأربعاء، ١٢ فبراير ٢٠٢٥
لعرض الإجابة في فدني اضغط هنا