انا عندي 17سنه، مشكلتي اني معنديش ثقه في نفسي خالص وحساسه او واي كلمه بتتقال عليا من اي حد حتي لو هزار بحس ان انا مشاعري اتجرحت وعيني بتدمع وانا مش عايزه أبقى كده عايزه أبقى انسانه طبيعيه وواثقه في نفسي مع ان شكلي لما اي حد يشوفني بيقولي ان شكلي كرزما وعندي شخصيه قويه اوي بس لا انا مش كده خالص
وكمان اهم حاجه عندي ف الدنيا هي اني ارضي ماما في اي حاجه ولو قالت عليا كلمه مش حلوه او كده بنهار وبحس اني مليش لازمة لان اكتر انسانه بحبها في الدنيا شيفاني كده وكمان الناس بيقولو اني طيبه اوي ولما بيقولو كده بقيت بآخد بالي اني بآجي علي نفسي اوي علشان مزعلش حد علي حساب سعادتي
وانا اصلا طبيعتي مبحبش ازعل حد أبدا حتي لو الشخص دا هو الغلطان فبسامحه عادي وبحس اني دايما مليش لازمة لان حتي في اي وقت في تجمع عائلي او قاعده مع صحابي الكل بيتكلم عادي بس انا اول ما بآجي اتكلم بيتكلمو ومحدش بيسمعني خالص كان بيبقي عادي في الاول بس بعدين بدا يضايقني واحس اني ولا حاجه وان محدش مهتم يسمعني وانا اصلا في طبعي بحب اتكلم كتير وافضل ارغي حتي لو مفيش حاجه نتكلم فيها وانا الحمد لله مسلمه وبقالي فتره بقرب من ربنا وببدأ أصلي بس مفيش حاجه لتتغير في حاجات كتير جدا عايزه اقولها بس مش اعبر كويس
وعندي حاجه دايما بعملها علشان اضيع وقتي اني انا بحب اتفرج علي مسلسلات تركيه عادي فبفضل اعمل فيها كأني بكلم الاشخاص الي بتعجبني ف مسلسل معين مثلا واكلمهم امثل مشهد معين مثلا بس انا اصلا في الحقيقة مش بشوفهم انا بعمل نفسي شايفاهم وفي نفس الوقت ممكن اقعد ساعات كده ومش بزهق و كمان الي انا بعملو دا مش بيأثر علي شخصيتي العاديه خالص يعني بعرف افصل بين اللي انا بعملو بين حياتي العاديه وبتعامل طبيعي بس حاسه اني الي بعملو دا حرام ولازم ابطل بس مش عارفه لي انا كده ومحتاجه منكم مساعده لاني عايزه طبيعيه واتغير للاحسن واثق ف نفسي
صباح الخير ياكاريزما.. خلينا الاول نحلل ونطلع كام نقطة سوا عشان نكون عارفين اى الحكاية.. 1. انعدام الثقة بالنفس.. مش قادرة تتكلمي بحرية أو تعبري عن رأيك بسبب خوفك من الانتقادات.. 2. الشعور بالتوتر الاجتماعي.. بتخافي تتواجدي مع ناس وتترددي حتى في أبسط الأمور.. 3. الاعتماد على الآخرين.. بتحسي دايما انك في انتظار تأكيد من اللي حواليكي إنك كويسة .. 4. محاولة تقليد شخصيات من المسلسلات.. ده تعبير واضح عن عدم حبك لذاتك الحقيقية ومحاولة انك تكوني نسخة مختلفة.. بتهربى من الواقع وعاوزة تشوفى نفسك فى شخصية تانية تكون جاهزة قدامك.. ممكن نقول ان دى النقط الاساسية فى كلامك.. تعالى بقى نحكى.. تخيلي نفسك كدا لوحة فنية مرسومة بعناية.. كل خط فيها هو جزء من قصتك..كل تفصيلة فيها هيا انتى.. حتى لو شايفة في نفسك عيوب ، هي دي اللي بتميزك وبتخليكى فريدة عن غيرك.. فما تحاوليش تكوني زي حد تاني، لأنك في الأصل جميلة بشخصيتك الحقيقية.. انتى مش نسخة لحد... الخوف من آراء الناس مجرد وهم.. الناس هتتكلم دايما، سواء كنتي الأفضل أو الأسوأ.. فليه تعيشي حياتك على مقاسهم؟.. جربى تعيشي زي ما أنتي عايزة لأن رضاكي عن نفسك هو اللي هيشبع روحك ويحسسك بنفسك وقيمتك.. الخطأ مش نهاية العالم.. لو غلطتي مش معناه إنك فاشلة، معناه إنك بتحاولي وبتعيشي.. كل الناس فشلت ف حياتها، بس اللي بيفرق إنهم قاموا او لا ..وانتى اختارى.. اتكلمي حتى لو صوتك بيرتعش.. تعبيرك عن نفسك مش ضعف ده شجاعة...كوني فخورة بكل كلمة تطلعيها لأنك تستحقي تتسمعي.. مهما كان اللي هيقولوه صوتك مهم وله قيمة..وقيمتك من نفسك من اخلاقك من ثقافتك من علمك من احتياج الناس ليكى.. لازم تطورى نفسك ف كل دا.. حبي نفسك زي ما بتحبي صحباتك.. لما بتشوفي حد بتحبيه متضايق بتعملى اي ؟ بتحضنيه وبتقولي له إنه قوي.. ليه ما تقوليش نفس الكلام لنفسك؟ احتضني ضعفك، كوني صديقتك المخلصة ليكى... اتقدمي حتى لو بخطوة صغيرة.. النهارده ممكن تكوني متوترة.. بس بكرة خطوة واحدة ممكن تغير شعورك بالكامل..كل يوم هو فرصة جديدة لتكوني أفضل..ابدأى بعمل خطة كاملة ليكى على خطوات.. اهتمى اول حاجة بدراستك وفكرى نفسك تدخلى كلية إيه.. اهتمى انك تكونى ست بيت شاطرة.. اهتمى انك تعرفى تطبخى تعرفى تلبسى تعرفى تتكلمى تعرفى تناقشى تعرفى تفيدى الى قدامك تكونى مثقفة عندك معلومات وأراء.. اهتمى بجسمك بأكلك بنومك..اهتمى بعبادتك ودينك وحفظك للقرآن.. كل دا هيساعد كتير ف بناء ثقتك بنفسك.. ابنى نفسك زاى ماتحبى يكون ابنك او بنتك.. التميز في البساطة.. فمش لازم تعملي حاجات خارقة عشان تكوني مميزة..كوني نفسك، وده لوحده كفاية يخليكي نجمة في حياتك.. ودا الاهم.. دى حاجات بسيطة اتكلمنا فيها.. واخيرا.. عاوزك تعيشي حياتك وأنتي عارفة إنك قوية مميزة وعندك نور خاص بيكي.. الموضوع مش سهل لكن مش صعب.. الموضوع حسب ماتتعاملى مع نفسك وافتكرى ان نظرة الناس ليكى من نظرتك لنفسك.. خليكى كبيرة وواثقة من نفسك عشان الناس تشوفك كدا.. استمري وما تستسلميش وهليكى عارفة انك صح مادام بدأتى تدورى ع طريقة تعالجى بيها امورك..
تم النشر الأربعاء، ١٢ فبراير ٢٠٢٥
أختي العزيزة، أود أن أبدأ بالتأكيد على أن مشاعرك وأفكارك مهمة للغاية، وتستحقين الدعم والتوجيه لتحسين ثقتك بنفسك. من الواضح أنك مررت بتجارب تجعل من الصعب عليك الشعور بالثقة، ولكن تذكري أن الثقة بالنفس ليست شيئًا يأتي تلقائيًا، بل هي مهارة يمكن تطويرها. إليك بعض الأفكار التي قد تساعدك: قبول الذات : ابدأي بتقبل نفسك كما أنت. تذكري أن لكل شخص صفاته الخاصة، والفردية هي ما تجعلك مميزة. كوني لطيفة مع نفسك، ولا تقارني نفسك بالآخرين. التواصل مع المشاعر : من الجيد أن تعترفي بمشاعرك وأحاسيسك. عندما تشعرين بالتجريح، حاولي أن تعبري عن ذلك بطريقة صحية، مثل التحدث مع شخص تثقين به أو كتابة مشاعرك في دفتر. تعزيز الثقة : ابدأي بالقيام بأشياء صغيرة تتطلب الشجاعة، مثل التحدث في مجموعة صغيرة أو المشاركة في نشاط اجتماعي. كل خطوة صغيرة تمنحك شعورًا بالإنجاز وتجعل الثقة تزدهر. التوازن بين رضا الآخرين وراحتك النفسية : من المهم أن توازني بين مشاعر الآخرين وراحتك النفسية. حاولي أن تتعلمي قول "لا" عندما تحتاجين إلى ذلك، واعملي على تحديد الحدود الشخصية اللازمة لحماية مشاعرك. الصداقة مع نفسك : خصصي الوقت للقيام بأنشطة تحبينها، مثل قراءة كتاب أو ممارسة هواية. هذا سيساعدك على بناء علاقة إيجابية مع نفسك. استمر في الاقتراب من الله : قربك من الله والصلاة تعزيز للإيمان والثقة. اعملي على تقوية هذه العلاقة وستشعرين بالراحة والسلام الداخلي. بالنسبة لتقليد الشخصيات في المسلسلات، إذا كنت تجدين ذلك ممتعًا ولا يؤثر سلبًا على حياتك اليومية، فلا بأس بذلك. ولكن تأكدي من أن ذلك لا يسبب لك مشاعر سلبية، وكوني واعية عند ممارسة هذه التصرفات. تذكري أنك لست وحدك في هذا، وأنك قادرة على التغلب على ما تشعرين به. كوني صادقة مع نفسك واعملي بجد لتحسين حياتك، وثقي بأنك ستحققين تقدماً.
تم النشر الأربعاء، ١٢ فبراير ٢٠٢٥
انتى محتاجه تحبى نفسك وتعرفى قيمتك كويس
تم النشر الأربعاء، ١٢ فبراير ٢٠٢٥
ثانياً انتى مش عارفه قيمة نفسك خالص وكمان انتى مش فاهمه نفسك وعشان كده بتتخيلى شخصيات وهمية
تم النشر الأربعاء، ١٢ فبراير ٢٠٢٥
اولا عايزه اقولك عامله ايه ومساء الخير
تم النشر الأربعاء، ١٢ فبراير ٢٠٢٥
لعرض السؤال في فدني اضغط هنا