مقدر اللي انتي فيه و كل واحدة زيك عارف حجم الألم النفسي و الخنقة و الشعور بالظلم ، و الاحساس بعدم الراحة .. نبدأ واحدة واحدة سواء ليكي حق او لاء مينفعش تخرجي عن طاعة زوجك مالم يحدث لك ضرر مباشر ، زيارة الأقارب مودة و صلة رحم ، المشكلة و الضرر لسه محصلوش بشكل كامل و لكنه علي وشك يحصل ، غلطتك مش الجواز من الشخص ده و لو اني اصلا ضد جواز الأقارب و لكن غلطتك انك رضيتي تسكني قريب من اهله ، 8 من كل 10 حالات من السيدات اللي بيسكنوا مع قرايب زوجهم او امه او في بيت عيلة جوزها بتعيش مش مرتاحة بس بنات الناس غلابة و بتعدي الأمور دي علشان الدنيا تمشي ، انت مسؤلة من زوجك بس و ايوه كلمته تتسمع ، بشرط انه ميكونش فيها حاجه تغضب ربنا ، عايزك لما تيجي تخرجي بعد كده تستأذني من زوجك و بس و تقللي موضوع سيطرتهم عليكي ده او تمنعيه بس بالتدريج ، طبعا ده هيسبب مشكلة ليكي في المستقبل بنسبة كبيرة مش هيتسامحوا مع فكرة انك مبقتيش تستأذني منهم لما بتروحي لأهل والدتك ، تذكري انتي متجوزة زوجك بس مش امه و باقي اهله ، هو الوحيد اللي له حكم عليكي و لو ميقدرش يحكم عليكي بما يرضي الله خلي اهلك علي اتصال و حدي رأيهم في اللي بيحصل لو جوزك بعد فترة استمر زي ما هو هتلمي هدومك و العيال و تطلبي والدك او اخوكي علي التليفون ييجي ياخدك ( تذكري احنا مش بنسعي لخراب البيت اتقي الله في بيتك و زوجك إحنا بس عايزين الراجل الطيب بزيادة ده يتغير شوية فلازم شوية ضغط )) بس كل دي مرحلة متقدمة ، و طالما مساعدتك في بيت أهله مش نافع او شافع خلاص تمنعيه تماما و لما حد بعتلك قولي انك تعبانة او مش قادرة وودي حاجه انتم ستات بتعرفوا تعملوها كويس قوي ،ل و زودوا في الكلام قولي بمنتهي البرود ماليش نفس .. لو عايزين يصعدوا و يحشدوا ضدك يتفضلوا .. و بيت أهلك مفتوح تروحي معززة مكرمة و لما يبقي ييجي نفعد قعدة و نمنع فيها الكلام ده بشكل رسمي من قبل اهلك بعد قعدة معاه . او الحل التاني انك استحملي ، و بلاش تتلككي و خلي اهلك برضه علي اطلاع استعدادا للي جاي و متخليش حد يتدخل او تمشي من بيت زوج الا لما يبقي هو نفسه عارف ان فيه خلاف و انك بتتعرضي لأزي ، غير كده اللي بيحصلك ده بيحصل لناس كتير فأنت مش لوحدك . ربنا ييسر لك الأمور .
كون ردي كويس و انتي حسيتي بكده فده مش معناه ان اي حد هتحكي له هيكون محايد متنسيش برضه ان خلافات الزوجية محظور طرف تالت يدخل فيها و متنسيش برضه ان اللي هيبقي عايز يخرب بيوت هيدخلك من مدخل ان كلامه كويس جدا ، انا بس بفكرك تبقي حذرة ،و كلامي كويس علشان انا براعي كلامي و محايد في تقديم النصيحة ، و مفيش سابق معرفة بيننا ولا بيني و بين اي حد هنا ( تقريبا ) من اللي بقدم ليهم نصيحة و عندي ضمير و آخر حاجه عايزها اشيل ذنب بيت اتخرب بسببي ، اغلب الحموات كده و يمكن اللي عندك دي مش وحشة ، عايزك تبقي ذكية ان الأوان تستخدمي مخك شوية ، مفيش مانع انك تساعدي حماتك و تكسبيها كمان و العبي علي النقط اللي بتضايقها و انتي راجعة من عند امك هاتيلها هدية حاجه بتحبها ايشارب كيلو حلويات اي حاجه رمزية و لما تقابلينها منقولش نهائي اننا غلطانين و بنصالحها هنقول (( علشان تعرفي قد ايه انتي غالية عليا )) و كام حركة من دي و انت ست و عارفة ان كل الستات بتيجي بالحنية مهما كانت معتبراكي دخيلة و اخدتي ابنها (( بعض الأمهات بتغيير فعلا بس مش بيقولوا )) مع تصرفاتك دي هتحس بنوع من اللين ناحيتك ، متحسسيهاش انك عايشة مع جوزك ابنها في سعادة و هيه معكرة صفو حياتك ، العكس لما يبقي عندك شكوي خشي عليها دخلة انها امك و اشتكيلها بتهريج من ابنها ، بس مش قوي متطلعيش جوزك وحش برضه قدام امه سوقي عليها الدلال ، الحياة علمتني ان اللي قارش ملحتي اعامله باللين و اللطف و بتربية البيت اللي جاي منه ، و لما احب اعمل اعداء بعملهم علي شرط ميكونوش في دايرتي و عارفين كل شيء عني ، مع الوقت حبة حبة خدي اللي انتي عايزاه قطعة واحدة كل مرة حتة صغيرة لحد اما تبقي عايشة مبسوطة و مش ناقصك شيء ، العند بيورث الكفر ، فلازم ال براحة مع البشر خصوصا لو انتي في موقف ضعف ، و ربنا يوفقك .
تم النشر الاثنين، ٢٥ نوفمبر ٢٠٢٤
كلامك كويس جداا.. حابه اوضحلك ان انا كل مره بستأذن من جوزي وقولتله اكتر من مره انت اللي تقولي اخرج ولا لأ مش اهلك بس هو يفضل يأجل فالخروج او يرفض بحجة انه مش عايز يسمع كلام من حد ولما واجهت حماتي وبقولها انتي بتمنعيني اني اروح لاهل ماما ترد وتقولي علشان انتي بتروحي وتيجي مقلوبه علينا وانا والله والله ما بعملهم حاجه انا بروح اغير جو مش اكتر وباجي انضف البيت والمواعين واعمل اكل وبحط اكل للطيور بتاعتها ومقصرة جداا ف شقتي وفي نفسي.. وجيت فتره حصل بيني وبينهم مشكله والحق كان معايا وجوزي شايف دا وقعدت شهر ف شقتي وفالاخر نزلني اخدمها من تاني.. المشاكل مظهرتش غير لما بابا مات. بابا كان اخوهم الكبير ومحدش كان يقدر يتكلم ف وجودة واول ما مات الكل بقي يجي عليا ومعملش اي اعتبار لاخوه بالعكس انا بيجي وقت وبقول لو انا كنت غريبه عن العيله هيعاملوني باحترام عن كدا. اسفه طولت عليك
تم النشر الاثنين، ٢٥ نوفمبر ٢٠٢٤
لعرض الإجابة في فدني اضغط هنا