السلام عليكم
عندي مشكلة مأثرة على حياتي بالسلب و هي إني مش فاهمة نفسي و مش فاهمة انا مين بالظبط و عايزة ايه و دايما تايهة، يعني مثلا ممكن اكون حاسة بالوحدة ف اكون عايزة حد يحبني و يكون جنبي و فاهمني ولو انا زعلانة اكلمه و لما حد يجي يعمل اي حاجة من دي سواء اهلي او صحابي بصدهم و ببعدهم، و لما بكون عايزة حد اكلمه و احكيله و افكر ادخل لأي حد من صحابي احكيلهم احس اني كده بكشف سر من أسراري و اقعد افكر كتير و هل ممكن انا كده اكون بدايقهم أو هكون تقيلة عليهم عشان هحكيلهم مشكلتي و بحس بالذنب الشديد و بالندم و بحس اني مينفعش اقول لحد حاجة عني لانه كده هياخد عني فكرة حسب الكلام اللي قولته، و لو اتصرفت تصرف مندفع من غير تفكير زي مثلا اني اقول لصحبتي اسقطي، اودام الناس بحس بعدها اني مكنش ينفع اقول كده و كده الناس هتاخد فكرة عني ان انا قليلة الادب أو أخلاقي وحشة مع اني مش كده أو ان صحبتي دي زعلت مني و بقعد افكر كتير في الحاجات اللي ممكن تحصل، و انا بقعد اقلق كتير و افكر كتير في اسوء حاجة ممكن تحصل و ده بيجبلي صداع بس مبعرفش أوقف التوتر بحاول اخد نفس عميق و التوتر بيرجع تاني بقعد اذكر ربنا و احس براحة بس بعد كده القلق بيرجع تاني، زائد ان انا مبعرفش اعبر عن نفسي و عن مشاعري و كتومه و مبحكيش لحد حاجة ولا اللي بمر بيه بس لما اكون وصلت لمرحلة صعبة جدا و مرحلة ضغط شديدة بضطر ان انا اتكلم عشان حد يساعدني لاني لو كتمت ده هيزيد من معاناتي اكتر، رغم ان انا بقلق كتير و بتخيل اسوء سيناريوهات لمواقف حياتي، مع ذلك اول ما يحصل موقف يستدعي القلق مبقلقش وبلاقي رد فعلي هادي أو مفيش رد فعل اصلا أو رد فعلي بيكون بارد زي مثلا ماما مرة وقعت من على السلم و انا كان رد فعلي ميبينش ان انا قلقانة فضلت ساكتة و ساعدتها و بس، ااه انا قلقانة عليها و خايفة يكون حصلها حاجة بس رد فعلي كان عكس كده، ف انا مبقتش فاهمة حاجة و عايزة تشخيص لحالتي لاني فعلا تعبت و هل انا محتاجة دكتور نفسي ولا لا.
الحل متخصص ليه !؟ لأن حضرتك ماشاء الله فاهمه كويس انت بتقولى اى وفكرة انك حاسه بدا كويس جدا ...فمش كومنت او رد هنا هو اللى هيغيرلك حياتك ..المتخصص عارف شغله كويس ..و من اللى هتحكيه هو هيقدر يستكشف حلقات ناقصة عندك ويجمعها ويحاول يوصل افكارك ببعضها وهيفهم النقط دى كويس وهيوجه تفكيرك وعقليتك وشخصيتك لل normal level فان شاء الله مع المتابعة ترجع الامور سليمة باذن الله...بس فى الاول والاخر الصلاة والروحنيات وقربك من ربنا هو اول سبب هيخليك مش تايهة و حاسة بنفسك و مستقوية بنفسك ..وطالما ربنا عارف ان قلبك معاه هيهديلك قلبك وعقلك ..وان شاء الله خير 🤍
تم النشر الخميس، ٩ مايو ٢٠٢٤
هذا احتياج طبيعي ان يكون لديك شخص ( صديقه -اخت - والدتك ) تتحدثين معه بأريحيه ،حاولي ان تبحثي عن شخص واحد فقط للتحدث معه عن مشاعرك وأفكارك ولكن بشكل تدريجي ومريح، ولكن افضل ان تسالي نفسك لماذا هذه الافكار ؟ولماذا مشاعر الخوف مسيطرة عليكي في علاقاتك ؟مواجهة النفس بهذا السؤال مهم جدا وحتي تصلي الي اجابه حقيقيه ، يفضل ان تقومي بكتابه يوميه عن اسباب خوفك ولماذا القلق من رد الفعل ، ويكون جزء من روتينك اليومي . وايضا قومي بعمل علاقات بالحديث عن مواضيع بسيطة وتدريجياً زيادة الثقة في التحدث عن مشاكلك. يمكن أن تكون الاستراتيجية البطيئة والمستمرة هي الأكثر فعالية. وتأكيد على أهمية سرية المحادثات وثقتك بالشخص قد يساعد في تخفيف القلق والخوف. إذا استمر القلق بشكل شديد، فقد يكون من الضروري التحدث مع متخصص في الصحة النفسية للمساعدة في إدارة هذه الأفكار والمشاعر.
تم النشر السبت، ١١ مايو ٢٠٢٤
انا عديت بكل ده بس كان مرتحتش غير لما بقيت بقول كل اللي جوايا و لا يهمني مين ولا هقول ايه.. بس بعد فترة قررت بلاش فضايح انا عندي صاحب كتوم وجدع مثبت واحد بس من أصحابي احكيله... ربنا ان شاء الله يعفو عنك و في شيخ قالي صاي وادعي ربنا و خلص صلاة وادعي و كلم ربنا لو حتي مش عارف تبدأ منين... بقيت بقول يارب و اتكلم حتي لو منغير صوتك و حركة شفايف و ربك كريم هو يعلم و هو مدبر و الله أكبر و أكرم من سؤل
تم النشر السبت، ١١ مايو ٢٠٢٤
وعليكم السلام ورحمه الله ، ضروري نتابع مع متخصص وان شاء الله الأمور بسيطه وتتحسني بسهوله ادراكك للمشكله في حد ذاته هيختصر عليكي نص الطريق
تم النشر الأربعاء، ٨ مايو ٢٠٢٤
فاهمكي مش لوحدك اللي كدا أنا زيك والله وحقيقي نفسي في حد اتكلم معه من غير. منظم بعدها .
تم النشر السبت، ١١ مايو ٢٠٢٤
شكرا لتعاونك
تم النشر الخميس، ٩ مايو ٢٠٢٤
لعرض السؤال في فدني اضغط هنا