السلام عليكم
ممكن تقولولي ازاى اهيئ قلبي لرمضان انا حاسة بجمود ف قلبي..عمري ما عدى عليا رمضان وكنت حاسه فيه انه شهر مختلف وانى بقيت احسن ! نفسي رمضان ده يكون البداية لانسان وحياة جديدة .. اعمل ايه يخلينى احس بالروحانيات اللى الناس كلها بتحس بيها ما عدا انا💔 مبعرفش اعمل ولا استمر ع حاجة انا رمضانات كانت بتعدى انى مجرد بمتنع عن الاكل ! انا نفسيتى تعبت من البعد عن ربنا... بعد اذنكم محدش يطنش ويقولي اى حاجة حتى لو سمع عنها ومجربهاش يقولهالها لعلى انتفع بيها وياخد فيا ثواب
وعليكم السلام ورحمة الله وبركاته شكرا لحضرتك علي المشاركة جميل النية الطيبة دي فبداية الشهر الكريم وكل عمل صالح بدايته نية طيبة يمكن دا خير او نداء من رب العالمين ليك في هذه الايام المباركة هاخد من كلامك نفسي رمضان ده يكون البداية لانسان وحياة جديدة ودا الخطوة الاولي والهدف اللي عايز توصله ورمضان فعلا فرصة عظيمة للوصول لده مع التخطيط لده متاح ع اليوتيوب دروس كتير عن التخطيط لرمضان وكيفية الاستفاده منه وازاي اقضي يوم شغل وإدارية مع العبادة والروحانيات الموجودة بتعلي القدرة علي الالتزام علي ده بزيادة اختار لنفسك حد بتحب اسلوبه وكلامه بيلمس جواك ويرن فدماغك واكتب ازاي اقدر أحقق الهدف ده بخطوات بسيطة وسهله وثابته تقدر تعملها لو تبدأ بالفروض والالتزام بها وتنظيم الوقت والأوليات وترك مانهي الله عنه قدر استطاعتك لمدة شهر بنية الاستمرارية مع استشعار العبادة زي استطعام الاكل كده حتي استشعار ترديد الأذان له أثر قوي علي هدوء النفس والنفس اما تكون متصلة بالخالق بتحيي حياة طيبة وبتكثر من الطاعات للوصول لهذا السلام النفسي ودي صوري لجدول محاسبة النفس لرمضان ممكن تطبعا وتعلم فيها ولو محتاجها pdf يمكنك التواصل خاص
تم النشر الأحد، ١٠ مارس ٢٠٢٤
وعليكم السلام ورحمة الله وبركاته استعدى لرمضان كأنك مسافره اولا اتوضى وصلى ركعتين بنية التوبه ..وياريت يكونوا فى اخر الليل والدنيا هدوء.....وبعد ما تسلمى متقوميش وخليكى على السجادة وكلمى ربنا واطلبى منه انه يرزق قلبك الخشوع ويمسح من على قلبك اى غشاوة و دوسى على نفسك فى انك تعيطى ...ده بيصحصح القلب كده ...خليكى كده لحد ما تحسي انك قولتى كل حاجة .وانوى باخلاص ان رمضان هيكون لله وهتبعدى نفسك عن اى حاجة تلهيكى . ثانيا : ابدأى حضرى نفسك ..حددى زاويه فى الغرفه او اى مكان فى البيت وافرشى فيه سجادة الصلاة و حضرى مصحفك بتاعك انتى و حضرى نوته صغيره تكونى هتكتبى فيها انجازات كل يوم فى رمضان متعمليش جدول عشان متحسيش بتقل الموضوع اعملى ورق صغير على شكل فانوس وابحثى عن ادعيه من القرءان واكتبيها و علقيها فى اوضتك او هادى بيها المقربين حضرى اسدالك وعطريه للصلاة فى البيت ....وحضرى عبايتك لو هتصلى ف المسجد . لو حد بيتفق معاكى على ميعاد بعد الفطار قوليله المهم الحق التراويح ..هيأى نفسك ومواعيدك كلها بنظام رمضان اى حد تشوفيه ابتسمى وقوليله ...رمضان بالخير عليك وعلينا يارب الحاجات الصغيره دى هى اللى بنعظم بيها شعائر الله والشهور العظيمة عند الله ...هى اللى بتخلينا نفكر نفسنا باحساس الروحانيات اللى بتدورى عليها
تم النشر الأحد، ١٠ مارس ٢٠٢٤
وعليكم السلام ورحمة الله وبركاته الجمود اللي في القلب بييجي من الاسراف في المعاصي تخيلي مثلا إن القلب دا ثوب أبيض والمعاصي طين كل شوية تحطي نقطة طين عليه بعد سنه هيبقا شكله إيه تب بعد سنتين دلوقتي إنتي بتقولي إنك مش حاسة برمضان تب إنتي كنتي عاوزه تحسي بيه إزاي وإنتي مقصرة في القرءان وفي الصلاة فلازم تغييري الاول من جوا علشان اللي برا يتغير لأن الاناء بيافيض بما فيه فأكيد محدش هيسرف في المعاصي ويلاقي نفسيته كويسه وحياته سعيده مش عقل (إن الله لا يغير ما بقوم حتي يغيروا ما بأنفسهم) فإنتي عاوزه تغيري نفسك للأحسن أول حاجة لازم تعملي لنفسك جدول يشمل أذكار الصباح والصلاة واذكار بعد الصلاة واذكار المساء واذكار النوم وياريت ورد من القرءان الكريم ولازم تلتزمي بده هيبقا صعب في الاول لكن لازم تضغطي علي نفسك وتنتظمي علي ده الشهر كله ولو عاوزه تقييمي الليل ولو بركعة (وتر)يبقا جميل جدا ودا هيساعدك أوي وأكثري من الدعاء لنفسك بالثبات ودايما لما تذنبي إستغري صلي ركعتين توبة ما تسبيش الثوب متسخ وتكملي حياتك القعة لو إتشالت أول ماتقع بتبقي سهلة جدا في الازلة وحتي لو يوم مثلا ضيعتي وماصلتيش او مالتزمتيش بأي حاجة من اللي إنتي حاطها لنفسك ماتيأسيش دا طبيعي وما تخليش الشيطان يدخلك من النقطة دي وتذكي دائما أنه (من تاب وعمل عملا صالحا فإن الجنة هيا المؤوي) وإننا في دار الاختبار وفي النهاية ربنا يثبك علي الطريق الصحيح ويلقي الهداية في قلبك ويصلح قلبك ويجعلكي من الصالحين المصلحين اللذين يحب الله لقائهم والسلام عليكم.
تم النشر الأحد، ١٠ مارس ٢٠٢٤
اول ما بلاقي نفسي كده صراحة بشغل الراديو ، دايما في حاجة جميلة بتبقي شغالة ، و الجميل في الأمر أن لما بسرح و ما انتبهش بتبقي في جملة معينة اسمعها (حديث ، آية ...) و بتشجع جدا أن أعمل حاجة ، و التزمي بقيام الليل و لو بعدد ركعات المهم دومي عليها ، ساعدي مامتك في البيت اتشجعي و كلمي اهلك و قرايبي و هنئيهم بحلول شهر رمضان ، اقولك ممكن لز ساعة في اليوم تسمعي انتي و اي حد من اهل البيت تتفرجوا علي سيرة الرسول صلي الله عليه و سلم بحيث تبقوا بتشجعوا بعض
تم النشر الأحد، ١٠ مارس ٢٠٢٤
انتظم في صلاتك اعمل شنط اقرا قرآن واحفظه قم اللليل
تم النشر الأحد، ١٠ مارس ٢٠٢٤
خلي لسانك دائما يزكر الله وانتي بتعملي اي حاجه متوقفيش تسبيح او حمد او استغفار و صلي تحت اي ظرف واي شعور انتي حساه حتي لو غصب علي نفسك لان بعد كدا هتتعودي الصلاة والذكر تطهير للقلوب والنفوس من كل شر وخلي حوليكي ناس تسعدك وتشجعك وربنا يفرحك وكل عام وانتي بخير وتوكلي علي الله وصلي علي النبي كتير صلي الله عليه وسلم
تم النشر الأحد، ١٠ مارس ٢٠٢٤
ممكن حضرتك تبدلي عاداتك اللي بتعمليها ف رمضان لعادات افضل كمثال استمعي لبودكاست السيرة النبوية لأستاذ احمد عامر حتي لو كنتي متذكره السيره و حاولي تاخذي عهد مع ربنا انك هتقراي صفحه في القرآن بعد كل صلاه او في اليوم و الاجمل و الاحلي بعد ما تقرأي الصفحه تدوري علي تفسير اياتها و ليه انزلت و امتي وتفهمي كل حاجه قرأتيها مش مجرد قرأه وبس هتخلي قلبك معلق بالقران اتمني لحضرتك شهر مبارك
تم النشر الأحد، ١٠ مارس ٢٠٢٤
ركزي على التغيير مش التأثر بأجواء رمضان ... لإنك ببساطة ممكن تتأثري اثناء الصلاة و قلبك يخشع و تبكي ثم بعد إنتهاء رمضان يعود كل شيء كمان كان ! .... فما فائدة التأثر إذًا ؟! .........عليكِ بالقرآن و هتفهمي كلامي أكتر لما تسمعي التسجيل دا للدكتور أحمد عبد المنعم https://youtu.be/SL2CdQ1cqKE?si=sru5Iv9mpkWhwMwV
تم النشر السبت، ٩ مارس ٢٠٢٤
حبيبتي ربنا يخليكي. شكرا. 🤍🤍🤍🌹✊
تم النشر الاثنين، ١١ مارس ٢٠٢٤
آسفة ايه بس ده انا اللى متشكرة🤍
تم النشر الاثنين، ١١ مارس ٢٠٢٤
،👏👌اهو وصلتك الفكرة. فكرة التميز فحجات غير اي شهر تاني. وان تحسي أن الناس فجأة كده بقا فيه امان وخير. ارتياح كده متحسهوش بقيه السنة شكرا جزيلا وايفه علي الاطالخ
تم النشر الاثنين، ١١ مارس ٢٠٢٤
وإنتي طيبة وبألف خيروصحة وعافيه يارب وربنا يجعل لقلبك نصيب من جمال دعواتك زى ما جعلك نصيب فى جمال كلامك ورقته ..انتى كومنتك لوحده فكرني وحسسنى بسعادة قدوم رمضان 🤍🌜 متشكرة وممتنة لردك على سؤالي
تم النشر الاثنين، ١١ مارس ٢٠٢٤
فعلا معاكي حق ، الفكرة انى بصلي فى البيت وبرتاح اكتر فى البيت من انى انزل اصلى فى الجامع .. لكن معاكى حق جدا فى نقطة لما بشوف الناس بتصلي بحس انى عايزة ادمع من جمال المنظر حتى فى الشهور العادية بس فى صلاة الجمعة بتفرج عليهم من ورا الستارة فى الشباك😅 .. انا عشان احس بالاجواء دى المفروض اشوفهم او انزل فى الوقت ده اكتر واسمع الامام وهو بيقرأ واعدى على كذا جامع اللحظات دى هى اللى بتحسسنى بالروحانيات اللى انا مفتقداها خصوصا الشوارع اللى معلقة زينة رمضان وكده 🤍
تم النشر الاثنين، ١١ مارس ٢٠٢٤
وكل رمضان وانتي بالف خير. احنا عندنا رمضان المحبه. رمضان الخير رمضان الامان ياشيخه ده كفايه لمت العيله علي سفرة واحدة فمعاد واحد بفرحه. ده مش بيشعرك بالدفئ بعيدا عن الشهور التانيه. شويه بخور. عربي وقت المغربية. الادان المميز فرمضان.
تم النشر الاثنين، ١١ مارس ٢٠٢٤
احنا فالصعيد هنا الناس بيتزاوروا لما بياجي رمضان عشان يهنوا بعض. بس ياجي المفتي أو فالفون. ده لو حده علامه بسيطه فإن في حاجه حلوة انا بقولك في حجات بتحصل بتشعرك أن فالشهر ده الدنيا بخير والناس بخير. وكمان الناس بتتكلم وتلتف علي بعضها وتدعم بعضها
تم النشر الاثنين، ١١ مارس ٢٠٢٤
مش قصدي. انا قصدي. انتي شايفه ده قدامك وشايفه الناس اللي بتروح تصلي التراويح أو حتي عندكم فالبي. ده بيدعم نفسيتك بأن بيحسيك أن انتي ي شئ مختلف وروح حلوة روحانيات اساس الروحانيات لما تشوفي ده قدامك انا مبعرفش بتصليها ولا لا بس كونك شايفة شئ زي ده فالبيت وتجمعات فالشارع عشان يروحواالتراويح. ده لوحده داعم نفسي بيخسيك أن شئ مختلف ظه من ير الحجات التانيه من العطف علي الغلبان اللي بيلجأ ليكم فالبيت عشان المال أو لقمه حلوة.
تم النشر الاثنين، ١١ مارس ٢٠٢٤
بصي اولا انت اصلا من بدايه تزيين البيت بالاضاءات واعدادات رمضانيه مفرحه. لحد التعبد البصيت وهو لقيتي حد عدغلبان جالك علي باب البيت بتحسي اصلا أن الناس دي في شهر محتاجين الرحمه فشهر الرحمه والمغفرة ده غير صلوات الترابويح اللي بتجمع فالجوامع والفرحه اللي متتوصفش من الجران وروائح رمضان وقعدات الليل بالبلكونات والجو الأسري ده اصلا بيخليكي تحسي أن الشهر ده سهر محبه وحنيه بين الناس علي بعض حاجه تتحس متتلميش. فبالتالي ده هينعكس علي روحانتياتك وختحسي أن سهر رحمه ومحبه وده خينعكس علي ادائك فالعبادات مالصدقات لو حد مش لاقي زيك التراويح وتجميع الناس فالشارع لادائها هيخليكي تغيري وتاديها هتحسي بشي مختلف شهر محبه كده ظاهرة متتوصفش وقبلك فيه الرحمه علي الناس الغلبانه اللي ملقياش زي منتي لاقيه فبيتك من خيرات رمضان. خصوصا فالظروف دي
تم النشر الأحد، ١٠ مارس ٢٠٢٤
حاضر بإذن الله ، وحضرتك طيب وبخير ،عليه الصلاة والسلام ، شكرا جزيلا
تم النشر الأحد، ١٠ مارس ٢٠٢٤
حاضر ، بارك الله فيكي ومتشكرة لاهتمامك ربنا يقدرنى وأعمل بيه ويكتب ليكي الأجر🤍
تم النشر الأحد، ١٠ مارس ٢٠٢٤
آه وركن الصلاة ده اهم حاجه بالسجادة بتاع الصلاه وسبحتك ومصحفك خليهم ثابتين وماتبدلهمش عشان مخك وقلبك يرتبط بيهم
تم النشر الأحد، ١٠ مارس ٢٠٢٤
العادات ، لازم تعملي عادة تستنيها من السنة للسنة وتدخلك ف جو رمضان وتعرفي تتماشي مع اللي حوليكي ، حرام يضيع الشهر مننا واحنا مش حاسين بقيمتة ده فيه اوقات ليها دعوات لا ترد كرري دعواتك كل يوم وخلي من ضمن الدعوات دي أن يجعلك تقدري كل وقت بفرحتة أو لقدر الله حتى لو وقت حزن ، وطبعا التراويح والقرآن اعملي جدولك وخطتك اللي هتختمي بيها وهاتي عود نور صغير حطيه ف اوضتك أو مكان معين هادي وتحته سجادة الصلاة ثابتة وترابيزة صغيرة خالص عليها مصحف وبس ده مكانك طول الشهر رايحة جاية عليه فروض ونوافل وقيام وتراويح و بعد اسبوع او اقل هيكون دي مكانك اللي بترتاحي فيه وعلى نهاية رمضان هتلاقي نفسك بتودعي المكان للقاء آخر ف رمضان آخر تكوني عايشه فيه بتحقيق امنيات رمضان الحالي ، أعاد الله عليكي الأيام بالخير والستر والسعادة والصحة آمين يارب
تم النشر السبت، ٩ مارس ٢٠٢٤
مش فاهمة كويس كلامك يا مريم ممكن توضيح اكتر ؟ تقصدي اتفرج ع صلاه التراويح لو مش هقدر انزل اصليها ولا ايه بالظبط
تم النشر الاثنين، ١١ مارس ٢٠٢٤
حاضر بإذن الله ..شكرا جزيلا استاذ احمد
تم النشر الاثنين، ١١ مارس ٢٠٢٤
اللهم آمييين ،نحن وإياكم ... كده القرآن والتراويح وتزبين اوضتي صح؟
تم النشر الأحد، ١٠ مارس ٢٠٢٤
لعرض السؤال في فدني اضغط هنا