حاسة مجرد احساس أن الشخص المرتبطة بيه بيخوني ولكن معنديش اي دليل علي ده ، يعني كان حاكيلي من فترة صغيرة أن صاحبه كان عارض عليه يتجوز أخته و لكن هو رفض عشان بيعتبرها اخت مش اكتر و البنت دي المفروض خلاص هتتجوز اخر الاسبوع ف انا بالصدفة كنت بقلب في اكونته لقيت فيديو ليه في أول السنة دي كان لابس بدلة و معاه صاحبه ده و كاتب في الفيديو مبارك عليك ل صاحبه و لكن تحتها كاتب و ربنا يتمملنا علي خير ، فمفهمتش و قولت ممكن من كتر ما هما صحاب كاتب يتمملنا دي و لكن شئ جوايا خايف جدا و خصوصا أني اتعرضت لعلاقة سامة من فترة طويلة و تعبت علي ما تعافيت و خايفة يكون الشخص ده بيخوني أو ليه اي علاقة مع البنت دي و لكن مش معايا اي دليل علي كده حتي الفيس مش بيعلقلها علي اي حاجة ولا هي كمان و اللي مخليني مش عارفة اتاكد انها مش كاتبة اي معلومات ليها علي الفيس بوك ولا هتتجوز مين و لكن الفيديو ده اللي جنني بسبب كلمة يتمملنا ، أما بالنسبة للشخص اللي أنا مرتبطة بيه ف هو شخص لطيف و طيب جدا بيصلي و معتقدش في حاجة زي كده تحصل منه و لكن انا قلقانة و كمان عشان اكون صريحة انا عندي وسواس قهري شديد و عندي قلق دايما ناحية كل حاجة ، اخاف احاول اساله عن ده يتصدم مني و اكون ظلمته فعلا و يبعد عني و مش عارفة اعمل ايه عشان اهدا و اللي بيخليني بسكت شوية أنه النهاردة كان بيقولي انا رايح فرح اخت صاحبه اللي كنت حاكيلك عنه و بدون ما اساله قالي فاكرة لما كنت بقولك صاحبي كان عايزني اتجوز أخته و لكن انا كنت رافض ، اهي الحمد لله هتتجوز و انا ربنا عوضني بيكي .. محتاجة خبير نفسي يحاول يحلل مشكلتي أو حتي يساعدني اطرد الشك من راسي عشان اقدر اعيش ..
بصى فى شباب بيعرفوا بنات بنية أنهم يرفهوا عن نفسهم بيهم أيا كان هو بيعمل زى ما أنتى شاكة و لا لأ غلى نفسك يا بنتى هتتعبى فترة بس أحسن ما وقتك و مشاعرك يضيعوا على الفاضى و لو هو شاريكى فعلا هيجى يتقدملك غير كده كان هيسيبك كده كده متضيعيش عمرك و مشاعرك فى علاقة أنت مش عارفة نهايتها و اشغلى نفسك فى دراستك أو شغلك و ربنا معاكى
تم النشر السبت، ٦ يوليو ٢٠٢٤
طب هو يا أختي الكريمة بيتكلم معاك بصفته ايه؟ هو مادام مجاش ودخل البيت فمينفعش خالص والله وأنت حتى قولت بلسانك...(خصوصا إني اتعرضت لعلاقة سامة من فترة طويلة) طبعا هيجي في دماغك" بس ده مختلف ده بيصلي وبيصوم وبيتصدق...وبيقيم الليل كمان!" فتمام براحتك أنا مش هكلمك من جهة شرعية لأنها واضحة زي الشمس الحمدلله...لكن من جهة الواقع والمنطق: أكثر من 90% من اللي أعرفهم اللي بيكلموا أو كانوا بيكلموا، كل واحد فيهم على الأقل كان بيكلم 3 بنات في نفس الوقت! محدش فيهم اتجوز اللي بيكلمها، واللي حاولوا بجد واحداترفض من أهلها، وواحد أهله رفضوها، وواحد اتجوز فعلا بس اقسم بالله العظيم من أفشل الجوازات اللي شوفتها في حياتي %85 من الشباب اللي بتعمل كده هو حتى لو بقى عنده مقدرة أنه يتجوز...هو مش هيتجوز، اصل ليه اتعب دماغي وابقى مسؤول عن واحدة، وكل الهري ده، طب ما أنا بكلم 3/4 بنات وبخرج والدنيا حلوة الراجل بيخش الباب من بيته؛ لأنه حتى لو جاهل بالحكم الشرعي، فهو ميرضاش كده لأخته فهو إن كان قادر...فلازم يتقدم لو هو صادق ولو مش قادر، فمينفعش نتكلم خالص والله وربنا يرزقك زوج صالح يارب
تم النشر الثلاثاء، ٢ يوليو ٢٠٢٤
طب ما طبيعي يخونك يحبيبتي هو انتى مراتو مثلا ؟ مانتى مجرد بنت بتكلمو معلش لو كلامى يدايق بس احسن من انى اوهمك واقولك تعالي نفكر نتصرف ازاى فى موضوع الشك ده طب ما نتكلم بصراحه ونقول إن يمكن دى إشارات من ربنا عشان تبعدى عنه ربنا يهديكى ويبعد عنك اى اذى 🤍
تم النشر الأربعاء، ٣ يوليو ٢٠٢٤
لعرض السؤال في فدني اضغط هنا