انا برتكب ذنب كبير في حق نفسي و في حق ربنا و دايما بحس إن مستحقش ادعي ربنا بحاجه بسبب الذنب ده و بحاول في كل مرة اتوب بس برجع تاني و رغم كل ده إلا إن ربنا دايما معايا و بيساعدني.... انا تالته ثانوي فكونت بدعي ربنا كتير إنه يعفو عني و يحببني في طاعته و يبعدني عن معصيته و كنت بدعي برضو إنه يوفقني في الامتحانات و اشهد ان ربنا فعلا وفقني في كل الامتحانات إلي امتحنتها لحد دلوقت و انه وفقني في إجابة اسئلة مكونتش اعرفها حتى و لما استوعبت ده زعلت اوي اوي انه مازلت مستمرة على ذنب في حين ربنا واقف معايا و يوفقني في طريقي و كل ما اجي ادعي إفتكر إني بعمل ذنب و بحس بالعار و إنه مستحقش ادعي ربنا بسبب الذنب ده.... انا واثقة تماما ان الذنب ده اختبار و بلاء من ربنا عشان ارجعله و أنا فعلا بحاول اتوب بس برجع أعمل نفس الذنب ده تاني و ده مدمر نفسيتي و دايما بعيط و زعلانه بسبب كده.... بحس اني منافقة اوي لما بتوب يوم و ارجع للذنب اليوم الي بعده...
إذا تاب العبد توبة نصوحا ثم زين له الشيطان المعصية فزلت قدمه وقارفها، فليسارع إلى تجديد التوبة مرة أخرى والإكثار من العمل الصالح وبذلك يغفر ذنبه إن شاء الله, كلما تاب منه فإن توبة التائب لا يبطلها رجوعه للذنب بعد التوبة منه إذا كانت قد استوفت شروطها ، ومن أهم هذه الشروط أن لا يكون وقت التوبة عازما على العود للذنب ولو بعد حين, فإن الله تعالى يتقبل توبة من تاب إليه بصدق؛ كما قال تعالى :وَهُوَ الَّذِي يَقْبَلُ التَّوْبَةَ عَنْ عِبَادِهِ {الشورى : 25 }
تم النشر الأحد، ٣٠ يونيو ٢٠٢٤
السلام عليكم ورحمه الله ✴️ربنا يوفقك في امتحاناتك و تحصلي علي اعلي الدرجات . 🔹خلينا عارفين أن خير الخطائين التوابون، و أن مش العيب انك تحاولي و تحاولي لحد اما تتوبي توبه بدون انتكاسه. ✴️ الشيطان دائما عاوز يجرك الي النقطه دي و هي انك متحاوليش و تفضلي في المعصيه ، و ربنا سبحانه و تعالي عاوزك دائما في رجوع و توبه حتي يغفر لكي ذنوبك، و نحن بشر يعني غير معصومين من الخطأ و لكن يكون الخطأ بدون قصد أو نيه. ✴️ لازم تراجعي الأحداث اللي قبل المعصيه و تعرفي السبب وراء المعصيه علشان فعلا يحصل تغير في السلوك المؤدي الي المعصيه ، لان طول ما مفيش مراجعه ايه الأسباب اللي بتوصلني لكدا ف هيفضل فيه انتكاسه. ✴️ الدعاااء دائما ادعي ربنا أنه يساعدك علي التخلص من هذا الذنب و أنه يقويكي، الدعاء بيغير كتير و كمان الاستغفار بنيه أن ربنا يبعد عنك اي شر و أنه يرزقك فضل الاستغفار و الصلاه علي النبي تزيل الهم و الغم. ✴️ ركزي حاليا في مستقبلك و امتحاناتك و متخليش الأفكار دي تسيطر عليكي و تلهيكي أسال الله لك التوفيق و النجاح تحياتي لك 💐 💐
تم النشر السبت، ٢٩ يونيو ٢٠٢٤
متيأسيش واطلبي من ربنا يتوب عنك ويزودك ليكي إيمانك وحاولي تزودي حاجة من أولادك أو علي أقل خالص لو عندك ورد متنزليش عنه ومتخليش ذنب ده يضيع ليكي الفروض أو أي عبادة تانية انتي بتعمليها يعني مثال مش عشان انا بعمل الذنب الفولاني أسيب صلاة في المسجد عشان انا مستحقش انتي كده عملتي للشيطان الي هوه عايزه والي مكنش متخيله اصلا فلا اثبتي علي العبادات الي انت بتعمليها وحاولي تقرأي كتير عن الذنب من عقوبته وأهميته وازي تسيبيه لما تجتهدي إنك تكون عايزة تسيبي الذنب ده وتسألي وتاخد بالأسباب لعل الله يتوب عنك خالص وحاولي تذكري نفسك علي طول بربنا انك تفتحي المصحف بتقرأي فيه بنية بتعرفي علي ربنا المهم من ده كلو انتي بتجتهدي إن ربنا يهديكي للطريق الصحيح ويتوب عنك ويعفوا عنك من الأبتلاء ده بإنك تسألي كتير عن حل مشكلة فولانية وتاخدي بالأسباب وتفتقري إلي الله وتعرفي إن الإنسان ضعيف جدا وبتعرفي علي ربنا أكتر عشان يزيد إيمانك عشان متقعيش في الذنب بسهولة بإنك تسمعي عن أسماء الله الحسني مثلا أو تقرأي قرآن
تم النشر الأحد، ٣٠ يونيو ٢٠٢٤
وهو الشيطان عاوز ايه منك غير كده ؟ استمري في التوبة ولا تيأسي س/ أنا أذنبت كتير جدًا وحاجة صعبة خالص ممكن ربنا يتوب عليا؟ ج/ بتشُك ليه؟ ألم تسمع الله عز وجل وهو يَخُصُ المُسرِف دون غيرِه؟ ﴿قُل يا عِبادِيَ الَّذينَ أَسرَفوا﴾ إللي هو زي ما بنقول إحنا في اللفظ الدّارِج؛ "خَرَبها" إوعى تيأس منه أبدًا، ولو آيست منه تبقى كفرت! قُم إليه بالعجز والإفلاس، قل له لا أملِك لنفسي شيئًا فإذا إنكسرت بين يديه غفر لك، ولو جِئته بِتراب الأرض خطايا، تعرّف على الله عزّ وجلّ لِتُحسِن عبادته. - الشيخ سمير مصطفى.
تم النشر الجمعة، ٢٨ يونيو ٢٠٢٤
مش انتي اللي بتحسي الشيطان اللي بيهيألك "أحسب الناس أن يقولوا آمنا وهم لا يفتنون" كل اللي هو عايزه انه يبعدك فطبيعي ما تعرفي انك مجرد ما تدعي ربنا معناها انك محتاجه سند ربنا في كل وقت فمش هتعصي اللي دايما واقف معاكي ووجوده بيخلي حياتك جميله مطمئنه فيقوم يعمل اي هو بقى الشيطان.... عايز يندمك على ذنبك مع ان ربنا بيغفر بمجرد الاستغفار عايز يكرهك في نفسك ويهدم الثقه دي ودا شغله انه يخلي حياتك تعاسه اديك عرفت اللعبه فهل ستكوني على يقين المره القادمه وتدعين الله؟
تم النشر الجمعة، ٢٨ يونيو ٢٠٢٤
حبيبتي، أنا فاهمة تمامًا إنتِ بتمري بإيه والشعور بالذنب والمجاهدة مع المعصية شيء صعب جدًا. الرغبة في التحسن والعودة لله دي أول خطوة وده شيء رائع. التأنيب على الذنب طبيعي لكن ما تخليش ده يمنعك من الدعاء أو التقرب من الله. أولا، مهم تعرفي إن ربنا رحيم جدًا وهو بيفتح أبواب التوبة دايمًا. الرسول عليه الصلاة والسلام قال: "كل ابن آدم خطاء وخير الخطائين التوابون". يعني كلنا بنرتكب أخطاء وأحسن الناس هما اللي بيتوبوا ويرجعوا لربنا. ده معناه إن التوبة ممكن تتكرر وكل مرة بتحسني فيها ربنا هيرجع يقبلك. ثانيًا، حاولي تفكري في الأسباب اللي بتخليكي ترجعي للذنب ده. حطي خطة عملية للتجنب للأسباب دي واشتغلي عليها. مثلا، لو المكان أو الأشخاص بيساعدوا على الذنب حاولي تبعدي عنهم أو تقللي التواصل. ثالثًا، الدعاء ما يتوقفش أبدا حتى لو انتي بتحسي بالإحباط. استمري في الدعاء واطلبي من ربنا القوة للمقاومة والتوبة الصادقة. ربنا سعداء دايمًا بالنفس اللي بتجاهد وتحاول ترجع له مهما كان عدد المرات. وأخيرًا، اصبري على نفسك واعلمي إنها مجاهدة تسحق ومن حقك تاخدي فرص كتير إنك تتحسني. حبك للرغبة في التوبة والتقرب من الله هو دليل إن لسه هناك خير كبير جواك. تعملي على تقوية علاقتك بربنا واستمري في الدعاء وإن شاء الله تتخلصي من الذنب ده وتبصري نفسك ونفسيتك تتحسن بحب الله وقوته. خليكي قوية وربنا يوفقك ويبعد عنك كل سوء يا رب.
تم النشر الجمعة، ٢٨ يونيو ٢٠٢٤
أولا هدانا الله وإياكم اللهم يا مقلب القلوب ثبت قلبي على دينك ،، اجعله دعاءك دوماً ،، لا تيأس من رحمة الله أبدا أبدا أبدا وأقرأ أية لا تقنطوا من رحمة الله ،، التوبه والاستغفار ولا تمل أبدا ده مدخل من مداخل الشيطان ،، غير المكان والأصدقاء إن كان لهم يد في مساعدتك على الذنب ،، واعلم أن الله غفور رحيم ،، تحياتي
تم النشر الجمعة، ١٢ يوليو ٢٠٢٤
لعرض السؤال في فدني اضغط هنا