السلام عليكم
انا عندي مشكله كبيره اوي وهي تشتت الانتباه بس مش عندي فرط حركه الحمدلله كان عندي فرط حركه وانا صغيره لكن لما كبرت قل لكن تشتت الانتباه وعدم التركيز والنسيان بداء يزيد عن الاول وطبعا ده كان ماثر علي مستوايا الدراسي كمان طول فترات الدراسه لكن للاسف اهلي وانا صغيره مش كانوا فهمين حاجه زي كده خالص وكانوا علي طول فاكرين اني فاشله و والدي كان علي طول بينتقدني باني فشله ومش هينفع في حاجه خالص ودايما يقرني ب اولاد عمامي لان كلهم كانوا شاطرين ويطلعوا من الاوئل وكان علي طول بستعمل معانا الضرب وكان علي طول هو و الدتي في خناقات كبيره وعلي طول برده كان بينتقد والدتي واخواتي كتير جدا هو طيب وكويس وحنين بس كان مشكلته انه عصبي جدا ولما بتعصب مش بيشوف قدامه وبيقعد يزعق ويضرب و انا كمان شخصيه حساسه جدااااا كنت كل لما اشوفه بيتخانق مع والدتي او بيضرب حد من اخواتي مش كنت بقدر ادافع عنهم خالص ف كنت بدخل احبس نفسي في اوضتي واعيط لحد مايشوفني بعيط يقولي هو انا كلمتك علشان تعيطي كل حاجه تعيطي عليها ويفضل يزعق فيا جامد و والدتي برده كانت علاقتي بيها مش كويسه خالص وكانت علي طول بينتقدني زي بابا وكانت دايما مخليه الحب مشروط هي والدي ماانتي لو بتحبني كنت ساعدتني في شغل البيت زي ولاد خالتك ماانتي لوبتحبني كنتي ذاكرتي وتفوقتي زي ولاد اعمامك لحد ماتعبت نفسيا جامد وبقت حبه الوحده والانطواء حتي مش عرفت اكون صداقات خالص بسبب كل الي عندي ده تشتت الانتباه مع عدم تركيز ونسيان مع حساسيه زياده واني مش كنت بفكر في الكلام كويس قبل مااقوله وكنت صريحه زياده كل ده كان بيبعد عني الناس حاولت كتير اصلح من نفسي بس مش عرفت خالص لما كبرت و دخلت الثانوي قدرت اكون صداقات بس محدوده جدا وهي صديقه ليا الي بقت مقربه مني اوي ولما دخلت الكليه هي بقت تكون صداقات كتير وانا علشان صاحبتها ف بقنا اصحاب كلنا بس محدش كان بيهتم بيا لما بيغيب او بزعل عادي محدش كان بيهتم ف ده كان بيضاقني ويتعبني نفسيا اكتر كانوا علي طول مسميني دلدوله صحبتي دي لما اكلم حد منهم في التليفون يقولولي انتي مين اصلا اقولها انا صحابه فلانه يقولي اها عرفنكي لحد ماجيه وقت ومش قدرت خلاص اتعبت مش قادره اتحمل كل ده انفجرت في ماما وطلعت كل الي جوايا بس مش قدرت اواجه بابا للاسف ومن هنا والدتي حست بالندم شويه وقربنا من بعض جدا وبقنا اصحاب جدا ودلوقتي الحمدلله ربنا عوضني ب رجل كويس ومحترم ومعايا منه بنت و ولد بس المشكله ان ده كله خلي مش عندي ثقه في نفسي انا واثقه من شكلي وجمالي وكل حاجه بس مش عندي ثقه في نفسي في حته معينه اني نفسي احقق حلمي واشتغل مدرسه او افتح حضانه بس كل لما افكر في الموضوع يجي في عقلي كل الماضي والانتقادات الي حصلت ليا مع المتلازمه Adhd الي عندي بقول اني مش هقدر اشتغل واني هكون مدرسه فاشله والعيال هتسقط ده غير اني خايفه ان بنتي يبقي عندها نفس المرض وراثه لاني ملاحظه انها علي طول بتنسي الكتب بتاعتها في الدرس وبتنسي بسرعه يعني ممكن تكون بتكتب بالقلم وتحطه في جبها مثلا فين القلم ياحبيبتي مش عارفه يا ماما واقعد ادور عليه ساعه وفي الاخر القيه في جبها هي عندها ٣ سنين ونص ف ده مخلي عندي اكتئاب شديد خايفه يبقي عندها نفس المرض الي عندي مش عاوزه يحصلها نفس الي حصلي او تشوف الي انا شوفته ده غير ان ابني وقع من ايدي وهو صغير وعمل شرخ بسيط واتحجز في المستشفي بس الدكتور قال حاجه بسيط مافيش حاجه احنا هنحطه تحت الملاحظة يومين بس للاطمئنان مش اكتر والحمدلله يومين وخرجنا وهو دلوقتي عنده سنه وبقي كويس الحمدلله بس لسه مش بيعرف يظبط توازن بتاعه خالص يعني وهو قاعد ويجي يحاول يعدل نفسه ممكن يتقلب علي ضهره ويقع علي الارض يتخبط علي دماغه ومن ساعه ماشوفت دكتور منزل بوست علي النت بيقول ان الوقوع علي دماغه ممكن ياثر عليه وهو كبير ويقلل عنده التركيز والذكاء من ساعه ماقراءت كده وانا علي طول بعيط وعندي اكتئاب شديد وحاسه اني ام واحشه وظالمه لي اولادي واني مش عارفه اذاكر لي بنتي صح او ابدء معها صح علي طول بتخيل ان ممكن بعد الشر يحصل لهم حاجه وحشه واكون انا السبب فيها ممكن حد يرد عليا ويقولي علي حل بالله عليكم ومحدش يقولي روحي لي دكتور نفسي او العبي رياضه لان جوزي رافض الفكره دي تماما من المستحيل اني اعمل حاجه من الاتنين فايريت حد يرد عليا واسفه علي الاطاله
طيب خلينا نتكلم في كذا حاجة في الاول ليه معتقدة اللي عندك ده مرض؟ يعني على أساس ايه شخصتي نفسك بكده .. ممكن يكون فعلا عندك ADHD وممكن لأ. ولكن في الحالتين انتي لازم تتأكدي ولازم تقنعي زوجك انك لازم تروح لمتخصص. تاني شئ .. طبعا انا اسفة جدا لكل اللي حصلك وانتي صغيرة، ولكن خلينا نرتب مع بعض عدة أشياء من اللي حصل. كويس جدا ان علاقتك ب ماما بقيت احسن من الاول وبقيتوا اصحاب. بس عايزة اسألك عن احساسك اتجاه والدك حاليا عامل ازاي؟ ولكن خلينا نحلل شوية من اللي حصل وازاي ده بقى نتيجة لحاضرك دلوقت. انتي اكيد عارفه ان اللي حصل زمان ليه أثر عليكي لحد دلوقت .. نتيجة لطبيعة التربية، ولكن تخيلي ان كل ده مكانش مقصود بيه كل الاذي اللي انتي فيه دلوقت. لما كان بيتقال ليكي وانتي صغيرة اشربي يا حبيبتي اللبن علشان ربنا يحبك، اعملي كذا يا حبيبتي علشان ماما وبابا يحبوكي، ما هو انتي لو كنتي بتحبيني كنتي عملتي كذا. ده كله غير مقصود .. انا عارفه يعني ايه يبقى الحب بالشكل ده .. بس ده غير مقصود بالشكل اللي انتي فهمتيه، انتي لو بحثتي في نيتهم هتلاقيها غير كده، هيكون بداخلهم الحب ليكي ع اي حال، مش مشروط ولا حاجة، بالعكس حتى لما كانوا عايزين يخلوكي شاطرة جدا، كانوا بيختاروا ليكي حافز قوي وهي "المقارنة" طبعا خطأ كبير لكن نيتهم انك تكوني اشطر منهم .. نيتهم انك تكوني احسن حد في الدنيا لانهم بيحبوكي، بس بيحبوكي بطريقة غلط، وتربيتهم ليكي غلط. لكن للاسف هما مش عارفين ان ده هيسبب ليك كل ده، مش عارفين ان كل اللي بيعملوه غلط، مش عارفين انهم بيأذوكي. ارجو انك تركزي على نيتهم فقط مش فعلهم، بالدليل اهو مامتك اتغيرت معاكي بعد ما صارحتيها بكل ده. اتمنى انك تعملي ده مع باباكي. نروح للحاضر شوية .. انتي ليه مش هتقدري؟ ليه مش هتقدري تشتغلي وتعملي كل اللي نفسك فيه؟ ليه بتظني انك مش هتعرفي تتعاملي مع اولادك؟ اللي حصل مش لازم يحصل تاني. ادراكك ل اللي حصل ده هيكون له عامل مهم جدا في حاضرك .. بايدك ان اللي حصل قبل كده ميحصلش تاني معاكي او مع اولادك. فقط .. ثقي في نفسك واتعلمي .. بصي معالجة اي شئ بتبدا بالتعلم يعني ايه الكلام ده؟ لو عندي مشكلة .. ازاي هحلها .. علشان اعرف احلها، لازم اكون مدركة فعلا انها مشكلة ومدركة كل ابعادها، ومن ثم ابدا ادور على حلول، طيب انا مش عارفه ازاي الاقي حلول اصلا، ومش عارفه اتعامل معاها .. يبقى اتعلم. دلوقت عندنا:- 1- عدم الثقة بالنفس. 2- مشاكل الاولاد. 3- اضطرابات منذ الطفولة. مين السبب في كل ده ...؟ (اضطرابات الطفولة) لازم تتحل الاول علشان تعرفي move on تتخطي من كل المشاكل اللي انتي فيها حاليا. ف احنا اتكلما في الماضي واتمنى اكون افادتك بشئ منه .. الحاضر ملكك .. مش هتعرفي تروحي لدكتور يبقى تتعلمي تثقفي نفسك. يعني ايه اثقف نفسي؟ يعني تعلمي نفسك بنفسك .. تتعلمي انك فعلا تقدري تشتغلي، لان الانسانة اللي كانت بتكتب المشكلة ديه كانت الطفلة اللي لسه فاكرة كل حاجة بتاعة زمان، ومش قادرة ولا عارفه تتخطها، وده اللي مخليها لسه مش واثقة في نفسها، اعرفي انك بايدك متكونيش تاني الطفلة بتاعة زمان، لما تتخطي الالم. اقري كتير عن التربية ده هيساعدك جدا ازاي تتعاملي مع اطفالك، خليكي قوية علشانك وعلشانهم، واقري عن تشتت الانتباه وفرط الحركة كتير .. ده اذا طبعا لو مروحتيش لمتخصص علشان تعرفي التشخيص بالظبط. لكن انك تتعلمي وتثقفي نفسك بنفسك هيساعدك انك تتعاملي مع الامور بشكل افضل، متيأسيش لسه محتاجة مجهود ف متيأسيش من اول الموضوع.
تم النشر الاثنين، ٦ فبراير ٢٠٢٣
وعليكم السلام اولا معرفش انتى اللى مقررة انك تشتت ولا ده تشخيص دكتور مختص. انتى واضح ان عندك نوع من الوسواس وخوف من ان حاجة وحشة تحصل وبتركزى اوى مع الافكار السلبية وده طبعا بيدخلك فى حالة توتر بتمنعك انك تركزى فى الحاجات المهمة. ممكن تكون بنتك بقت بتتصرف زيك وتتوتر فمتركزش بردوا. خلينا نعمل تمرين بسيط اوى ...لما تفكرى فى حاجة وحشة ممكن تحصل ...تكلمى نفسك كده وتمشي مع الفكرة لاخرها ...مثال..لو القلم اللى بندور عليه اتأكدنا انه ضاع خلاص ...هل دى مصيبة كبيرة ...طب مش هنلاقى بديل ..طيب مش هنعرف نكمل يومنا ولا حياتنا هتقف مثلا...هتلاقى الفكرة خلصت والتوتر بتاعها انتهى. تمرين تانى.....جاتلك فكرة سيئة حطي قدامها ع طول فكرة حلوة تحاربها . الولد وقع واتخبط وده ممكن يأثر عليه....بس الولد صحته تمام ومش ف المستشفى ولا الموضوع هيوقف حياته ..يعنى بشوية تمارين بسيطة ومتابعة يبقي احسن ... وهكذا ....وياريت متعتمديش على اى حاجة بتقرأى اعراضها ...خصوصا المسائل الطبية ...كل حالة ظروفها مختلفة ...الاحتمالات فى الطب كتييير وبتفرق من شخص للتانى ...اقطعى دايما حبل الشك عندك بانك تسألى اهل الخبرة وتثقى فى كلامهم ومتفكريش فى الموضوع بوساوس الافكار المتشائمة بعدها. ثقتك فى نفسك محتاجة متابعة نفسية فعلا ...حتى لو مش هتروحى تابعى اون لاين . ولو حبيتى انا فى الخدمة ..ابعتيلى على صفحتى وانا اتشرف بمساعدتك لو حبيتى
تم النشر الاثنين، ٦ فبراير ٢٠٢٣
اولا بعتذراك جدا عن اي مشاعر سلبيه حسيتيها ف الماضي والحمد لله ان ربنا عوضك بزوج بيحبك وبأولاد حلوين ...النسيان والتركيز عندك اتأكدي ان مش مزود مشكلتك الانميا عندك والضغط من المسؤليه وخوفك الزياده ع ولادك واحب اقولك ان في ناس كتير عظماء مصابين بADHD وماثرش عليهم خالص بالعكس انتي اكتر حد هيحس بمشكله الاطفال وهتقدري تساعديهم ف ثقي انك هتنجحي من معاناتك الي مريتي بيها ... مستوى ذكاء الطفل العموما وقدراته العقليه مبتتاثرش بخبطه بسيطه الي بيأثر عليها الصدمات الشديده ف اماكن خطيره ف المخ وبياثر ع القدرات الي عنده زي الانتباه او التركيز وغيره وبنتك وارد تمر بكده ووارد متمرش بيها ولقدر الله مرت بيها يبقا خليكي اول دعم وسند ليها وجيشها الوحيد وساعديها انها تستغل مشكلتها ف انها تطور نفسها واشركيها ف رياضه ع طول
تم النشر الأحد، ٥ فبراير ٢٠٢٣
توكل على الله
تم النشر الثلاثاء، ٧ فبراير ٢٠٢٣
طب معلش ممكن شكل برنامج منصه معارف لاني مش لقيه خالص علي جوجل بلاي
تم النشر الاثنين، ٦ فبراير ٢٠٢٣
ماشي متشكره جدا ليكي
تم النشر الاثنين، ٦ فبراير ٢٠٢٣
ان شاء الله هيبقو كويسين مع بعض وتكوني قد المسؤليه وربنا معاكي انتي بس متخافيش وسيبيه لله لا هتلقي كورسات كويسه ع معارف وادراك اللي قلتلك عليهم وفي عاليوتيوب حلقات كتير شرح كورسات لو عايزه تفتحي حضانه كمان
تم النشر الاثنين، ٦ فبراير ٢٠٢٣
انا ودتها حضانه قعدت شهرين وبعدين اخدوا اجازه نص السنه وهيرجعوا مع الدراسه ان شاء الله واخوها لسه عنده سنه صغير والحمدلله بحاول علي قد مااقدر انهم يكونوا كويسين مع بعض لكن انا خايفه لما يكبروا تكون المسؤولية كبيره واخاف اغلط وكده فهمني وفعلا حاولت اخد كورس انجليزي بس ساعه الكرونا هما قفلوا علشان الكرونا وبعدين روحت اخدت كورس Icdl بس بعد ماخلصته لقيته مش كويس مختصر جدا وضحكوا علينا و دورت كتير علي كورسات تنميه بشريه بس لسه مش لقيت حاجه كويسه ودورت برده علي دورات نور البيان او كورس اعداد معلمات مش لقيت حاجه كويسه علي النت وفي الواقع المكان بيبقي بعيد عليا محافظه تانيه ف مش هينفع اسافر ساعتين او ٣ واسيب العيال لان ابني صغير حتي فكرت اشتغل بس مافيش شغل مناسب خالص
تم النشر الاثنين، ٦ فبراير ٢٠٢٣
بالنسبه الكورسات اول حاجه انتي لو معاكي فلوس وكدا ممكن تنزلي تاخدي كورس انجليزي كورس كمبيوتر كورس تنميه بشريه هكذا عشان تلاقي صداقات كويسه او حاجه تفرغي فيها نشاطك وناس جديده لو مش متاح ماديا عندك ع جوجل حاجه اسمها منصه معارف و إدراك متوفر عليها كورسات مجاني ولشهاده كمان اي كورسات حباها م اول تطوير الذات لحد الهاند ميد وهيفديك ويطلع طاقتك بجد ع جوجل بلاي بقى ليكي اكتبي العاب الذاكره او التركيز وهتلاقي كتير هيسيليكي و تزود انتباهك بالنسبه لبنتك او لأي طفل محتاج يزود الانتباه والتركيز والحجات دي اكتبي ع يوتيوب انشطه تركيز الانتباه هتلاقي كتير جدا وكمان لو شكه ان عندها حاجه زي ماقلتلك روحي للدكتور اطمني وبردو عندك اليوتيوب وشوفي طرق التعامل مع الأطفال واذاي ميبقاش ف غيره بينهم وكدا بس غالبا الغيره بتكون بسبب انك مهتمه بطفل عن التاني م وجهه نظره حتى لو مش صح يعني مثلا قوليلها اخوكي جاب ليكي كذا شكولاته مثلا العبو مع بعض اخوكي حبيبك هو اللي بيلعب معاكي وهيروح معاكي الحضانه ويجيلك اللي انتي عايزاه خليهم يبقو حنينين مع بعض قوليل ه اختك ف عنيك حافظ عليها وهكذا مع الاستمرار وزي ماتعملي لاخوها اعمليلها
تم النشر الاثنين، ٦ فبراير ٢٠٢٣
والله ماعرفه اقولك اي غير أن ربنا بجد بيحبك اوي كل اللي انتي مريتي بيه دا والاذي اللي اتحملتيه ربنا هيجازيكي ويرضيكي عنه متزعليش م اللي فات والله يبنتي لاصحاب ولا زفت حتى لو كنتي أيده صوابعك العشره شمع هما كلهم كذا مش عشان فيكي حاجه لا والله ابدا ونتي شكلك كويسه ماشالله واقولك ع حاجه انا اتبهدلت انا كمان احلى بهدله وحاليا معنديش صحاب خالص وكنت بعملهم كل حاجه وبابا الله يرحمه كان صعب جدا برغم حنيته لكن عصبي وكل يوم مشاكل بردو بس اهو حال نص البيوت المصريه كدا كل اللي عايزه اقولك عليه انك قويه وبرغم الللي عديتي بيه واثر ف نفسيتك ربنا هيعوضك عنه متخليش هم حاجه وسيبيه لله وإذا كان ع موضوع الكحه دا ممكن تروحي تكشفي او تجيبي دوا الكحه الناشفه وبنتك ان شالله هتفرحي بيها وهتوصل لأعلى المراتب بس انتي وديها زي ماقولتلك اطمني عليها
تم النشر الاثنين، ٦ فبراير ٢٠٢٣
قلبي بتوجعني وببقي مش عارفه اعمل ممكن تقولي ايه الكورسات المفيده الي ابدا بيها معها هي واخوها والصفحات الي علي النت الي تفدني وازي اعرف اذاكر معها وازي اصحابها ونبقي اصحاب وعلاقتنا تبقي كويسه وازي اخليها تحب اخوها ومش تغير منه وازي اشتغل علي نفسي الاول واقدر اعالج نفسي ازي علشان اعرف اكون قد المسؤولية وعندي خبره وايه الالعاب الكويسه الي اقدر اشتريها انها تنمي مرارتها وتزود ذكائها
تم النشر الاثنين، ٦ فبراير ٢٠٢٣
انا طول عمري حولت اكون صداقات بس مش عرفت محدش كان عاوز يصاحبني لان والدي كان علي طول بيحطني في دائره الشاطرين علشان ابقي زيهم ف هما مش كانوا يرضوا يصحبوني انتي مش شاطره وكده وكمان انا عندي حساسيه صدر من صغري وكحتي ناشفه جدا وصوتها عالي جدا كان علي طول بيتقلي لما انتي تعبانه بتنزلي لو كحت مره غصب عني كانوا بيقولي اطلع بره الفصل وكحي هتعدينا ياستي وحاجات من دي كتير ده غير انا مكنش في حد بيسمعني في البيت انا لما كنت في ابتدائي واعدادي انا كنت في مدرسه اقارب ابي وامي فيها ف اولادهم كمان ف لازم ابقي البنت العاديه المطيعه الاموره الشاطره الي مافيش منها علشان المدرسين مش يقعدوا يشتكوا ويقولوا بنت اخك او بنت اختك مش بتبطل حركه وعلي طول مش مركزه ولما كبرت ودخلا ثانوي الدنيا اتعقدت اكتر لاني دخلت المدرسه الي ابويا شغال فيها ف طبعا اي شكواي كانت بتجي لازم خناق وزعيق ولما دخلت الكليه كانت جمب البيت ب الظبط وانا فجاءه لقيت نفسي في مجتمع غريب مش عارفه اتعامل معاه خالص مجتمع مختلط والمفروض اني مش اختلط بالجنس الاخر خالص علي طول كنت خايفه لحد يشوفني في الكليه وانا باخد محاضره من حد ده غير ان كان عندنا مشاريع مختلطه كده حاجه غصب عني ف خلاص كنت تعبت خالص بقي ف انفجرت في البيت بس ساعتها مكنش في غير والدتي الحمدلله انا منكرش ان ابويا وامي احسن اتنين في الدنيا وكانوا كويسين وحنينين جدا معنا ومش حرمنا من حاجه بس هي طريقتهم بس الي كانت مختلفه وعماله حاجز بنا ومش كانوا عندهم وعي بحالتي علشان كده انا بقول يمكن غصب عنهم لو كان عندهم وعي مش كانوا اتعاملوا بالطريقه دي وكل لما بنتي بتكبر قدامي عيني كل يوم وانا مشتت ومش عارفه ابدا معاها ازي ولا اذاكر لها ازي بحس بتانيب ضمير واني ام ظالمه و وحشه وكل لما اتخيل انها ممكن يحصل لها الي حصلي قل
تم النشر الاثنين، ٦ فبراير ٢٠٢٣
بصي ياقلبي اول حاجه نحمد ربنا ع اللي احنا فيه وان دا كله اختبار م ربنا بيدهولنا وعارف اننا هنقدر نعديه حتت ان والدك ووالدتك كان بيتعاملو معاكي بطريقه غلط لأنهم زي ماقلتي مش عارفين طبيعه المشكله وكتير م الآباء معندهمش وعي بحاجه زي دي لكن بردو كتر خيرهم ف تحمل ظروف الحياه ومشاكلها والتربيه هما بس بيشحعوكي انك تبقى اشطر بس ع حد علمهم وتفكيرهم انهم مفكرين انه صح هما ف الاخر خايفين عليكي تاني حاجه حتت الانطوائيه دي بتبقى اكتر ف الشخص نفسه انا جه عليا فتره كنت مصاحبه ناس كتير جدا وحاليا م كتر الضغوطات اللي عندي بقيت لوحدي وملقتش صحاب كويسين ف دا مش عيب فيكي خالص الناس مش بتعرف حد غير وقت مصلحه ف الزمن دا اي حد يتصل ع حد يبقى عايز حاجه مفيش ازيك بتبقى لله ف لله🙂 بالنسبه لموضوع تشتت الانتباه ممكن تروحي لدكتور مخ واعصاب يديكي دوا لمووضع التركيز والانتباه بردو اتعودي تاخدي اوميجا ثري ومكسرات وكدا ف اكلك وفي العاب تركيز ع النت ممكن تنزليها بتزود التركيز مره ف مره لحد ماتوصلي لنتيجه انتي عايزاها احنا نقدر نخفف م اعراض المتلازمه ع قد مانقدر عايزه تفتحي حضانه اعملي دا واتشجعي ربنا معاكي هيرضيكي وشويه شويه هتتعودي وهتقفي ع رجلك وتكسبي ثقه ف نفسك انزلي جيم روحي خدي كورس اي حاجه هتخلي عندك معلومات وهتتثقفي اقري كتب تطوير الذات هتفرق معاكي ف شخصيتك اي حد بيبقى حواليه ظروف وضغط الشاطر اللي يعرف يتأقلم معاه ويحقق هدفه مفيش حاجه مستحيل دلوقتي لو حسه ان بنتك عندها المشكله دي ممكن لأنها بتبقى معاكي طول الوقت والطفل طبيعته بيقلد عالعموم حتى لو لقدر الله الحاجه دي عندها ضروري تتعاملي معاها زي ماكنتي تتمنى اهلك يتعاملوا معاكي وديها لدكتور مخ واعصاب يشوف دنيتها اي وكدا اطمني عليها وان شاء الله لو فيها تلحقيها سواء ب التدريبات بتزود الانتباه او توديها حضانه تفرغ طاقتها او دكتور يديها دوا لانتباه وان شاء الله خير❤️
تم النشر الاثنين، ٦ فبراير ٢٠٢٣
لعرض السؤال في فدني اضغط هنا