السلام عليكم، هل مريت بفترة صعبة وبعدها حصل التغير ده؟ حصل حاجة معينة في حياتك؟ علاقتك بربنا كانت كويسة قبل كده وبعدين بعدت؟ ممكن تكون مريت بضغوط أو لو بتدرس أو بتشتغل ممكن حصل وضغطت على نفسك كتير فدخلت في احتراق نفسي أو وظيفي. ممكن نفسك محتاجة ترتاح وتبعد عن الواقع ففصلت باختصار ودخلت في حالة لامبالاة نحو كل شيء. هو أيًا كان السبب فأول خطوة عامة للخروج منها هو إنك ترجع تقرب من ربنا. هتقول إنك أصلا مقصر ومش بتصلي، الحل إنك تصلي، تجبر نفسك إنك تصلي حتى لو مش حاسس أو شايف إنك مينفعش تصلي لأي سبب أو مش هيكون فيه خشوع. اجبر نفسك ومتخليهاش هي اللي تمشيك على مزاجها. عود نفسك أول ما تسمع الأذان تقوم تصلي حتى لو مش عاوز. واحدة واحدة هيبقى الموضوع سهل ومع قراءة القرآن بتدبر إن شاء الله تخرج من الحالة اللي انت فيها. استعن بالله وصلي وادعي ربنا وردد كتير ذكر (لا حول ولا قوة إلا بالله) ربنا يقويك وتبقى في حال أفضل، وإن شاء الله أحد الخبراء هنا يجاوبك من الناحية النفسية ويقول لك إذا فيه خطوات عملية تانية تمشي عليها أو إذا هتحتاج تتابع مع مختص. بالتوفيق إن شاء الله.
بصي هو ساعات العبادات ودرجة القرب اللي بتقولي عنها بتتحسد سواء مننا احنا نفسنا أو من الغير، ممكن أنتِ تكوني حسدتِ نفسك أو داخلك الإعجاب تجاه نفسك فعشان كده راحت أو ممكن حكيتِ لناس عنها.. ممكن ده تزامن مع بعدك عن أصحابك وحالتك تأثرت أكتر... المهم دلوقتي اعملي بالنصائح اللي قلناها ودي أول خطوة هتظبط بعدها حياتك كلها حتى خطوة الدراسة. والدك معتمد عليكِ بمعنى؟ معتمد إنك هتنجحي بتفوق وتدخلي كويسة ولا معتمد عليكِ في حياتكم والبيت فمش لاقية وقت تذاكري؟ إذا هو معتمد عليكِ من ناحية دراستك فقلقك ناحية تطلعاته هيسبب لك ضغط زيادة... أي تطلعات من ناحية الأهل والناس انسيها خالص... كل اللي مطلوب منك حاليًا إنك تعملي اللي عليكِ وتذاكري وبس... متفكريش في النتيجة حتى ولا تقلقي الامتحانات هتكون عاملة إزاي... ذاكري وخليكِ موقنة إن في النهاية ربنا هيكتب لك الخير مهما كانت النتيجة أو الكلية. ده اللي لازم تخليه قُصادك طول الوقت. مش لكِ نفس تذاكري، تجبري نفسك... خليكِ أنتِ اقوى منها ولا تطاوعيها في هواها. مش عاوزة تصلي تجبريها تقوم تصلي... النفس عاوزة مننا احنا اللي نمشيها ونقوّمها مش العكس. لو فيه أي حاجة تانية عاوزة تسأليني عنها متتردديش، بالتوفيق.
تم النشر الأربعاء، ١٦ أبريل ٢٠٢٥
صلي واجبري نفسك بعد كده هتذوقي حلاوه الصلاه واحده واحده يبقى الموضوع ممتع بالنسبه لك بس طبعا في الاول هتبقى ممله وتبقى حاسه نفسك انك تعبانه ومش قادره بس بعد كده هتحسي نفسك انك مستلزه بالصلاه وهتخشعي فيها بس ما تجريش نفس الايات كل صلاه لا حاولي كده تجري كل صلاه ثلاث ايات مختلفه بحيث تذوقي حلاوه الصلاه بسرعه ربنا يكرمك ان شاء الله وشد حيلك دوسي على نفسك الفتره دي وخدي لك يوم راحه في الاسبوع ضروري علشان تعرفي تخشي عن الاسبوع اللي بعده وانت فريش بالتوفيق ان شاء الله
تم النشر الأربعاء، ١٦ أبريل ٢٠٢٥
و عليكم السلام لا بالعكس كنت شاطره الدراسة وكان عندي صحاب وبحبهم واول ما دخلت اعدادي اتفرقنا من ساعتها بدأت،كانت كويسة جدا لدرجة كنت بحس بالحاجة قبل ما تحصل ودعاء كان مستجاب وكنت بحفظ قرآن فجأه وقفت كل حاجة كويسة بعملها ومع ذلك الناس شايفه انك قريبة من ربنا وطيبه معرفش ليه ،طب يا اختي لو سمحت انا تالتة ثانوي عام مش ازهر وامتحناتي خلاص قربت ولحد دلوقتي مذكرتش اي حاجه ووالدي معتمد على عندك اي نصيحة او حل حضرتك وبعتذر علي الازعاج وشكرا جدا ليك
تم النشر الثلاثاء، ١٥ أبريل ٢٠٢٥
لعرض الإجابة في فدني اضغط هنا