السلام عليكم ورحمة الله وبركاته.
انا ****** ٢٨ سنة متجوز و ربنا رزقني الحمدلله . مشكلتي اني مبقتش عارف مشكلتي او بمعنى اصح مش عارف احدد انهي حاجة في حياتي هي السبب الرئيسي لمشاكلي .. فجاة بعد ما كنت حد فاكر نفسه متحكم في حياته و اني بمشيها زي منا عايز وواثق في تفكيري وجهة نظري و نفسي طبعا و اني جامد اوي ، فجأة لقيت نفسي بودرجي/ شمام !! ايه دا مين دة ؟؟ انت بتعمل كدة ..ازاااي!!؟؟؟ هحاول اختصر مع اني مش عايز دة.
بدأت تدخين و انا بيبي.. مش مجازا والله بس بدأت اشرب القرف دة ممكن في ٤ ابتدائي و بقيت بشرب سجاير فعلا و انا في ٦ و طبعا كان معاها حشيش بس تفاريحي يعني ياعم ... ياعم دة هو يوم في الاسبوع..بقت يومين..بقت كل يوم مع ثقة كاملة اني بشرب حشيش بمزاجي و اها ممكن في الوقت دة كان لسة الموضوع تحت السيطرة شوية.
كنت مصاحب ناس اصغر واحد فيهم اكبر مني ب ٣ سنين و طبعا كلهم فشلة. كان في الوقت دة البرشام بدأ ينتشر و انا عشان دايما كنت ببقى عايز اكون انا الشخص اللي كله بيقول ايه دا يخربييتك !! و عشان دماغي في الشمال ولا ايلون ماسك ف بيعت برشام (مع العلم ان ماديا الحمدلله مكنتش محتاج اي حاجة بالعكس كان مستوايا يمكن اعلى من اللي حواليا من عائلة او اصدقاء).. و من هنا بدأت اللعنة تقريبا كنت طفل بيمسك فلوس عبيطة و عايز اصرفها ف طبعا فلوس شمال هتروح شمال ف كنت بشرب حشيش اكتر و مكنش عندي اي فضول ناحية البرشام بس كنت دايما عارف ان طباخ السم بيدوقه، المهم بدأت اتعرف و الحكومة عرفتني بس كان سني مساعدني و شكلي كإبن ناس و طبعا ستر ربنا قبل اي حاجة اني متمسكش و دي حاجة بترعبني لوحدها. بس حد من اهلي وصله المعلومات دي و اجبرني اني ارجع مصر وقتها (انا مولود و متربي برة مصر) الحمدلله رجعت. نفسيتي متدمرة مع كرهي لنزول مصر.. ادمنت الترامادول فترة مش كبيرة يمكن ٦ شهور تقريبا بس. قدرت ابطل بسهولة بس بطلت عشان شوفت صاحبي (الله يرحمه)اللي متربيين مع بعض تقريبا و كان معايا برة و هنا كان هيموت بسببه، معرفش يبطله و اضطرينا نوديه مصحات و نشحنه بس للاسف في المصحات اتعلم البودرة، و بعد عني طبعا مع محاولات سنين انه بلاش الحاجة دي بس للاسف منفعتش. و دة اللي اداني الثقة و الغرور اكتر انه انا غير انا مش مدمن انا بطلت برشام في كلمة قولت هبطل بطلت، بس الحشيش موجود طبعا . تعدي السنين و دخلت كلية و خطبت في الفترة دي كان عندي مشاكل في البيت و سافرت افصل عند ناس قرايبي اللي ابنهم بيحشش زي طول عمره بس وقتها كان دخل في البودرة و خلاني اجرب بعد الحاح غريب و رفض مني عشان عارف دي ايه بس جربت في الاخر . رجعت محافظتي و مع ظهور اول مشكلة دماغي قالتلي هات بودرة و للاسف عشان زي ما قولتلك دماغي في الشمال بس شغالة عرفت اوصلها عندي و بدأت اتعاطى بس بسرعة فوقت و بطلت (كلاكيت تاني مرة انا جامد اوي و بطلت بمزاجي). خلصت كلية( بفضل ربنا و مراتي) بس مكنتش لسة حاسبت على حاجة في الدنيا . كنت بشوف ان اللي عايز يبطل حاجة هيبطلها (مع اني عمري ما بطلت حشيش )و دي حقيقة بس الكارثة اني مكنتش اعرف اني ممكن تكون دماغي متحكمة فيا مش العكس و دة للاسف كان بيخليني بشوف البرشامجي او البودرجي هو اللي مش عايز يبطل مع ان صاحبي فيها مش عارف يبطل و انا نفسي حشاش بس مجتمعنا خلانا نبص للحشيش زي السجاير انهم حاجات عادية لدرجة اننا بقينا نشكك في حرمانيتهم . اتجوزت و انا لا افقه شيء عن المسؤولية ولا الجواز و دخلت الجيش و قبل ما اخلص بشهرين جالي خبر وفاة اخويا و صاحب عمري الله يرحمه و يغفرله و الله اعلم هو توفى بسبب القرف دة ولا لا بس ان شاء الله يكون لا و هو كان مبطل وقتها و اتمنى تدعوله بالرحمة . كان الموضوع صدمة بالنسبة لي مش سهلة على قد ما كنا بعدنا بس كنا بنتواصل و دة كان لسة مكلمني عايز يخطب ما علينا الله يرحمه. خلصت جيش و كنت خلفت وقتها و بدأت اواجه بقى الدنيا . بقيت مضغوط من كل حاجة ملقتش مهرب ليا غير المعتاد المخدرات ، بس الحشيش بقى شربه صعب محتاج انزل اقعد مع ناس و اضيع وقت و في البيت بقى عندي بيبي ف الدخان مؤذي مكنتش اعرف اني مؤذي ليها اكتر من اي حاجة فطبعا دماغي ودتني للبودرة و بدأ الحساب من هنا . طبعا نزيف فلوس و مشاكل في البيت و افعال و ردود افعال محدش فاهمها غيري طبعا . بعد سنة مراتي بقت متاكدة اني بشرب حاجة عشان كنت وهمتها اني بطلت حشيش طب الفلوس فين طب انت كدة إزاي و طلبت تحليل مخدرات و انا ببجاحتي جبته و عملته و ظهرت فيه بودرة بس مراتي حرفيا مكنتش تعرف الفرق بين الحشيش و البودرة بس عشان هي نظيفة مش جهل، لدقايق اقنعتها انه برشام باخده فيه مادة المورفين و عادي بس طبعا كلام اهبل بالنسبة لها دورت و عرفت ان دة هبل و ان دي مخدرات فاقنعتها اني باخد تامول و للاسف صدقتني و قالتلي هقف معاك و فعلا وقفت معايا و دة مش حديد عليها يعني هي حد لو شافتني مخنوق عادي جدا تبيع خاتم دهب عشان تسفرنا ف وقفت معايا اول مرة و هي مش عارفة هي بتعمل ايه ولا المفروض تعمل ايه و قعدت كام يوم في البيت بس مبطلتش و عدت الدنيا مفيش شهرين ولقت ان نزيف الفلوس شغال طب اعمل تحليل بغشه لحد ما سبحان الله غشيته و ظهر فيه مورفين معرفش ازاي ؟ و المرة دي هي زودت ابحاثها عن المورفين و طبعا عرفت ان كدة جوزها مدمن او بودرجي و كانت الصدمة بالنسبة لها كبيرة اوي .. و للمرة التانية وقفت معايا بس مكنتش فاهمة اوي لسة و في نفس الوقت خايفة ماهي بالنسبة لها اني كنت بحشش ف انت فاجر ف بودرة دي كانت كبيرة عليها اوي المهم قعدت في البيت و برضو مبطلتش و مكنتش عارف ابطل ماهو انا نفسيا زي الزفت و هي زفتين تلاتة على قد ماهي جدعة و بتحبني على قد ماهي فجأة بقت في مكان تاني خالص مش في خيالها ف كانت مش قادرة تنسى طول الوقت ، يومين و قولتلها انا كدة تمام . و انا مش عارف ابطل و مش عارف اواجه وقتها عرفت اني بحاسب على جزء من سيئاتي . و جات المرة التالتة و هي مبقتش قادرة تشيل الليلة لوحدها فاضطرت تقول لأهلي و عشان هي عملة نادرة فعرفتهم اني بتعاطى ادوية نفسية و ادمنتها . و المرة دي كانت اول محاولة ليا اني ابطل و كان غصب عني اصلا بس المحاولة فشلت من تالت يوم و كلمت معرفة عن طريق الحاجة دي و خليته يجيلي قريب من البيت نزلت قابلته و قعدت اسبوع على كدة و خلصت فترة العلاج الوهمية ، و كانت( دماغي/العقل الباطن/النفس الامارة بالسوء /شيطاني ) بتقولي هي ازاي تيجي تخرج اللي جواها هي مش عارفة انا بمر بإيه هي ازاي مش مقدرة دة انا هكمل بقى و هعاقبك و كنت بدمر و بهدم كل حاجة بحجة النكد و المشاكل و وصلت لمرحلة دوز عالية جدا كانت بتوصل ل ١٠ جم في اليوم و بقى خلاص شكلي يبان عليه للي فاهم و بقى سلوكي بشع مش بفكر غير هضرب ازاي و هجيب فلوس منين..إهمال و لا مبالاة في كل حاجة و خلاص بقى معايا حد فاهم الادمان تجربة قدامه و دراسة عشان هي راحت درست الادمان و الهيروين بكل تفاصيله و المرة دي قررت اننا نسافر بعيد فترة و سافرنا و بطلت الحمدلله و شايف نفسي بقى البطل اللي مفيش زيه (خدعة الدماغ ) رجعت من السفر الدنيا بقت احسن الحمدلله بدأت عملت بزنس تاني عشان اول واحد خربته و بعد اقل من شهرين كنت ضربت تاني و هوب اتشديت تاني و كنت انصح بقى منا اتعلمت انا بتقفش ازاي و الفلوس مش ملحوظة عشان دايرة في شغل بس دة مش هيكمل شهرين تلاتة و بدأت تحس تاني ،و انا بدأت افوق بقى ايه دة في ايه ؟ انا خسرت كل فلوس كنت املكها و هي ماشاء الله ارخص حاجة عندها الفلوس او اي حاحة قصادي رخيصة ف كانت باعت دهبها كله سواء انا حايبه او والدها و فجأة بقيت مديون. و طبعا من كتر المشاكل للاسف حمايا عرف و للاسف عشان هو شخص زي بنته ميستاهلش غير كل حاجة حلوة و للاسف هو كمان وقف معايا و المرة دي بطلت فعلا و حقيقي بدأت افهم و حبيبتي قعدت تفهمني كل حاجة عن الادمان و الخمدلله فهمت بس متأخر اوي بعد ما كنت خسرتها و كسرتها . فوقت من كابوس اخترت اكون فيه على كابوس التوابع بطلت بودرة الحمدلله بقالي ٣ شهور تقريبا بس توابع الكابوس كبيرة اوي. خسرت فلوس كتير و الكارثة اني خسرت حبها و هي لسة بتعافر بس كسرتها بجوزها اللي المفروض يسندها ويكون حمايتها و اللي هي عملتله كل حاجة لا يمكن غيرها يعمله طلع مش سند . و حاليا عندي حالة توهان عارف مشكلتي و عارف حلها و مش قادر اتحرك مش قادر اعوضها و هعوضها ازاي عن كل دة وقت و فلوس و مشاعر ، بقيت شايف نفسي صغير اوي و عاجز و فاشل اه اقدر اغير دة بس هي غصب عنها مبقتش قادرة تتحمل كل يوم هي شايفة خسارتها قدام عينيها و اللي خسّرها . و اللي اختار خسارتها قصاد مليون مرة هي اختارت تكسبك و تعليك . هل ممكن اعوضها ؟، طب هل ممكن تنسى الاذية دي كلها ؟.
وعليكم السلام ورحمة الله وبركاته قبل اى تعليق انا هطلب منك تسجد سجدة شكر ( بدون وضوء وحتى لو مش فى اتجاه القبله عادى ) اسجد بس واشكر ربنا على انه وقفلك مراتك جنبك وانك لسه معاك فرص والرصيد مخلصش. عارف اللى انت بتفكر فيه دلوقتى عامل زى اللى كان كافر واقتنع بالاسلام وعاوز يبقى مسلم بس كل اللى موقفه فكرة ( يا ترى ربنا هيغفرلى كل البلاوى دى ويقبلنى ؟ ) الحقيقة ان يمكن البشر مينسوش ويفضل جواهم اثر التجارب الصعبه ...لكن ده مش هيمنع انهم يقدورا يعيشوا لحظات جميلة تقبل ان مراتك هتحتاج وقت لحد ما تعرف جروحها تلتئم واقل رد للجميل ليها انها تشوفك فى حال كويس وتحس ان تعبها مراحش فى الهوا. الخسارة الحقيقة ان النهاية تبقى سيئة ...اوعى تسمح بالخسارة دى فى فن اسمه فن الترميم ...زى الصورة كده ...حاجات غاليه لما تتكسر نعرف نصلحها وتبقى اغلى كمان ...بيرمموها بالذهب ..فبتزيد قيمتها رغم علامات الكسور حط انت افعال غاليه وقيمتها عاليه وابدأ رمم الجروح والكسور وقصة المعافرة در كلها هتبقى هى الصخرة اللى هتسندوا عليها قصاد اى محاولة تانى من الشيطان انه يجركم لخراب البيت وضياع الرزق الجميل ده
تم النشر السبت، ١٧ فبراير ٢٠٢٤
مبدأيا اي مشاكل ف البيت معناه انك مكنتش سابقاً قريب من ربنا علاج كل دا قرأتها للقرآن و يا ريت تواظب ع الصلاه و تشغل قرآن طول الوقت ف البيت عندكوا و قرب من ربنا اكتر عشان يقويك و مترجعش تاني أولا متقولش انك مش هتعرف تعوضها لا هتعوضها ب كل دا وقف جلد ذاتك اللي مبيبطلش او حاول متسمعش لعقلك بالأصح لو حسيت انك هتبدأ تفكر ف اللي فاتك او تفكر انك ترجع تاني للي كنت بتعملو ف اشغل نفسك ب حاجات كتير تانيه و صدقني لو قربت من ربنا كل دا هيتحل انت لسه ٢٨ يعني لسه صغير و العمر قدامك تقدر تغير حياتك ١٨٠ درجه لو انت عايز افتكر ان ذي مكنت عايز تشرب و عملت دا انك لو فكرت تصلح حياتك هتعرف و تعمل كدا أولا انا معرفش بتشتغل ايه أيا كان شغلانتك حتى لو قبضها قليل استثمر فيه حاول تقسم الفلوس اول لما تقبض كل حاجه أو هقولك فكره حلوه خلي مراتك هي اللي تمسك مصروف البيت مش عيب انها هي اللي تمسكوا و انك اول متقبض تديها قبضك و تقسموا فلوس ابنك و فلوس كهربا و ميا و غيرو خلي فلوس لأساسيات البيت اول متقبض تخصمها من مرتبك ع جمب شيلها مع حد تثق فيه بس لما تقبض خدلك فلوس منغير متعرف حتى ، الفلوس دي ليه بقا حاول تخرجها خروجه حلوه تسافرو تقضوا يومين حلوين ف مكان تفصلو عن كل اللي حصل قبل كدا و قدامك انك تصلح كل خاجه و تصارحها ب مشاعرك و هي هتسمعك لازم تصلحو كل اللي باظ سوا متقعدش ساكت كدا صلح اللي عملتو ابنك ميستاهلش يشوف اهلو بيتخانقو او دايما ف مشاكل و باباه قاعد ساكت مش عارف يصلح حاجه و صح يا ريت عشان الحوار دا بيأثر ع النفسيه جدا لو في مشاكل بينك و بين مراتك او اي حاجه عمتا تخص ماضيك متحكيهاش او تعملو و تحلو مشاكل قدام إبنك عشان مهما كان هو ملهوش ذنب دايما يلاقي البيت في مشاكل او انو يحس ب حاجه صدقني متقعدش ساكت تقدر لسه تصلح كل دا و متسيبش نفسك لدماغك خالص عوض مراتك ب خروجات سفريات و صارحها ب مشاعرك و افتكر ان اللي يخليها مكمله معاك رغم كل دا انها لسه بتحبك و ان في أمل تعوضها و تصالحك و تتحسن ما بينكوا العلاقه إذا كان ربنا يغفر للزاني و القاتل إذا تاب مراتك مش هتسامحك بالعكس هترجعوا احسن من الأول لو انت موقفتش مكتوف الأيد و بادرت ب انك تصارحها ب كل حاجه جواك الصحبه الصالحه يا ريت تصاحب المتدين اللي بيخاف ربو يمكن يعلمك ف امور دينك و يقف معاك وقت أزاماتك و يدلك ع الصح مش يدلك ع الشُرب و متقولش دماغي شمال مفيش حاجه اسمها كدا انت بتقنع نفسك و بتبرر لنفسك اللي بيحصل بطريقه غلط اسمها الشيطان هو اللي دعاك ف استجبت لقله إيمانك و افتكر إن و ما الحياه الدنيا إلا لهو و لعب و الدنيا امتحان لازم تجتازه عشان تكسب اخرتك ثقف نفسك دينياً اكتر هتتحل مشاكلك امشي ب اللي بقولو صدقني حياتك هتتحسن متقفش مكتوف الأيد انت اسه قدامك وقت تصلح اللي فات و ربنا يهديك و يهدينا جميعاً و يا رب حياتك تتحسن و تبقا أفضل من الأول
تم النشر السبت، ١٧ فبراير ٢٠٢٤
ممكن تبص للجانب الاجابى هى لسه موجوده طمنها ايوه صعب لانها وثقت فيك اكتر من مره بس حاول وعافر لغاية ماتثق فيك تانى وافتكر ان عندك بيبى فى كل مره هتضعف فيها افتكر ان انت سند لطفلك انت قدوته لسه فيه وقت والاهم منهم عشان ربنا قرب منه اكتر وادعى من قلبك يتوب عليك ويهديك باذن الله هتقدر بس ماتستسلمش لليأس لان دا من شيطانك انت هتكون افضل وهتعافر شجع نفسك دايما واشغل وقتك عشان ماتفكرش
تم النشر السبت، ١٧ فبراير ٢٠٢٤
اهم حاجه انك تتغير بجد سيبك من فكره انك بطلت اهم حاجه تغير دماغك من جوه ابعد تماماً عن الأفكار القديمه اشغل الأوقات الفاضيه ف يومه ب هوايه أو اي حاجه مش هقولك روح جيم و الشغل دا بس حاول تبعد أن شخصيتك القديمه ولو فعلاً عايز تعوض مراتك وطفلك الصغير هيتعوضو ب حاجه وحده انك تتغير للاحسن من كل حاجه ووقف حتي سجاير ومتقلش مقدرش عيب انت باين من كلامك انك انسان زكي وعاقل ف متضحكش على عقلك وتقول مقدرش ودي حاجه بسيطه مش عايز اقلك قرب ل ربنا و لدينك لأن دى حاجه بديهيه يعنى واكيد لازم تعمل كدا ومش محتاج اقلك ابعد عن اصدقاء السوء برضو دى حاجه كنا بنسمعها وحنا صغيرين من اهلينا ودي حقيقة الصاحب ساحب ي صحبي اهم حاجه انك متفكرش ف الماضي فكر ازاي تحسن من نفسك بس لو حسيت بملل ف حياتك ف اي وقت من الأوقات شوف الناس الطبيعية بتخرج من الملل ازاي وعمل زيهم متلجأش للحل السهل ال يدمر وصدقني مراتك هتنسي كل حاجه لما تشوفك اتحسنت بجد ورجعت الشخص ال حقيقي من نفسك وتأكد أن الفلوس مسيرها تيجي بس تجيلك وانت اب وزوج عاقل ومحترم المسئوليه مفتكرش أن انت محتاج نصيحه ل اي حاجه انت مريت بيها انت ناضج بما فيه الكفايه وعرفت نهايه كل طريق الدنيا بقت واضحه قدامك اختار حياتك صح وزي ما زمان جربت كل حاجه وحشه جه الوقت ال تجرب كل حاجه حلوه وصحيه وتعيش الحياه ال بجد بعيدا عن الوهم وعوض مراتك وطفلك ب حياه كويسه وأمنه والحياه الكويسه هنا مش بتتقاس ب الفلوس بتتقاس ب الطمأنينه والحب والثقه
تم النشر السبت، ١٧ فبراير ٢٠٢٤
قصه ابكتني والله اسأل الله الهدايه لك والثبات الدائم قرب من ربنا اكتر ده اولا ثانيا والاهم زوجتك طالما بتحبك مش هتعرف تكرهك هي بس كرهت السلوك والعصبيه بس الحل إنك توريها غير كده تصلي وتحسن علاقتك مع ربنا وهي تكون شايفه ده وخليك حنين معاها واحتو يها وطبطب عايها وقولها انا اسف ع اللي حصل مكانش بمزاجي وعارف إنك اطيب مني وهتسامحيني واوعدك إني توبت الي الله ومش هرجع للطريق ده تاني ان شاء الله ووبإذن الله مش هتتكرر تاني ❤👌وهي ان شاء الله هتسماحك
تم النشر السبت، ١٧ فبراير ٢٠٢٤
لعرض السؤال في فدني اضغط هنا