عندي مشكلة منذ الصغر مع أمي وعلاقتي بها كانت وما زالت سيئة وصارت أسوأ، ما العمل؟

Question

من وأنا صغير وانا عندي مشاكل مع امي، كانت دايما بتخليني معنديش ثقة بنفسي ، تتريق عليا ، تتكلم عليا وحش قدام الناس ، تحبطني ، كانت بتكدب عليا في بعض الأحيان و اتعلمت الكدب علي ايديها .. كنت بعيط بسببها كتير اوي و كانت فعلاً بتأذيني .. و كطفل كنت شايف أن مصدر الحنان بالنسبة لي هو نفسه مصدر الاذي و العياط و الانهيار النفسي كان شئ صعب جدا. كبرت و الحمد لله تخلصت من اغلب عقد الثقة بالنفس اللي عندي، بقيت شاب محترم و شاطر و ناجح الي حد ما، و لكن علاقتي ب امي كانت و ما زالت سيئة جدا .. كبرت و انا جوايا كره شديد ليها .. زمان كنت اعيط بسببها لما كبرت بقيت ازعق و اشخط و اقولها كلام مينفعش يتقال ل ام .. مينفعش يتقال ل حد اصلا .. ساعات في الخناقات ما بينا كنت اصارحها ب كل اللي جوايا و أقولها انا بكرهك و انتي ست غبية و انتي أصلا مش ام و مفيش ام تعمل كدا مع ابنها ... الخ كمان ساعات كنت بلاقيها بتعمل مع أختي الصغيرة نفس اللي كانت بتعمله معايا تقولها كلام سلبي علي شكلها علي طريقة كلامها، تقارنها ب بنات تانية و هكذا و بردو ساعتها كان في بركان جوايا بينفجر و كنت بعمل معاها خناقة كلها زعيق و عصبية ، لأني شايف أن اللي حصل معايا بيتكرر و بيلمس شئ جوايا و بيهز ثقتي بنفسي رغم أن الحمد لله دلوقتي بقا عندي ثقة بنفسي... و لكن كنت بثور عليها و كإن الكلام موجه ليا انا. عارف و مدرك اني كنت غلطان و لكن لما كنت بعمل كدا كنت بحس اني شيلت هموم من علي صدري اني قولتلها كل اللي جوايا، وكمان والله كنت بحاول افهمها ان اللي بتعمله دا غلط قبل ما تبوظ نفسيت اختي هي كمان. المهم من فترة .. حوالي سنة قررت اني عاوز اصلح العلاقة ما بينا ، انا أصلا بحب كل الناس و مبحبش ازعل حد ف يوم ما اكره حد يكون امي ؟!!! ولقيت نفسي فجأة بقول انا اصلا بحبها بس هي السبب في اني اكرهها بسبب التروما اللي عندي من وانا صغير .. حاولت اجيب اصل المشكلة و احلها من جذورها و اتصالح مع نفسي و مع اللي حصل و ابدأ معاها صفحة جديدة لأن محدش ضامن عمره و انا محبش اكيد اكون بغضب ربنا بسبب معاملة امي .. قررت اني هروح اتكلم معاها و احكيلها كل اللي جوايا من و انا صغير و أن هي سبب في مشاكل نفسية كتير عندي من و انا صغير و حاولت افهمها أن التريقة و الكلام السلبي و الكدب و التنمر دا شئ غلط و حرام و ميرضيش ربنا و بيسبب مشاكل و كوارث نفسية .. تخيلوا كان ردها ايه عليا ؟!!! ردها أن كل دا هزار و عادي يعني و انا اللي شخصية حساسة زيادة عن اللزوم و معقد نفسياً و بقف لها علي الكلمة ؟!!!!!!!!!!!!!!!! كمان قولتلها حولي تتغيري في المعاملة عشاني .. قالتلي أنا امك و اعمل اللي انا عايزاه و انتو اللي تستحمولني وانا مش هتغير ؟!!!!!!!!!!! ساعتها في حاجة اتكسرت جوايا .. و كإني فقدت الأمل خلاص في اني اتقبلها في حياتي . من ساعتها و احنا مكملين خناقات و فعلاً بقا بقيت بقفلها علي الكلمة و الموقف .. اي حاجه تقولها أو تعملها تضايقني بهب فيها و بتخانق معاها و كإني بطلع غضب عشرين سنة من جوايا .. لو حصلي موقف مضحك مثلاً و كل اللي قاعدين ضحكوا عليا مش بيبقي فارق معايا ، لكن هي تضحك عليا اقوم مطلع كل الغضب اللي جوايا فيها هي .. مبقتش عارف اتعامل معاها معاملة سوية .. مش شايفها تنفع ام أصلا بمستوي ذكائها الإجتماعي و فهمها للناس من حواليها .. فعلا مش عارف اعمل ايه ... !!!

Accepted Answer

الحل الوحيد هو التجنب وتحاول تكتم غضبك وما تديش رده فعل . ولو حصل وزعقت وكده فكر فى اي حاجه تانيه وخليها تقول كل ال عايزاه وفى الاخر لما تخلص اقلب الموضوع هزار واضحك عادي وما تتأثرش فى الاول والاخر احنا أبناء ولازم نطيعهم عشان ربنا يرضا عننا . اتعامل معاها كانك بتتعامل مع طفل صغير سيبه يطلع كل ال جواه واحستب كل ده عند ربنا . سعات كتيره أهلنا بيكونو كده بسبب بردك تربيتهم وهكذا فأنت حاول بقي فى المستقبل كل ده تصلحه وما تعملهوش مع أولادك أن شاء الله وتكون اب صالح ليهم

Answer

السلام عليكم ورحمه الله اهلا بيك متفهمه مشاعرك و محاولاتك و الضغوط اللي مريت بيها خصوصا لما تيجي من اقرب الناس. ✴️التراكمات بتبني حواجز و طبقات سميكه فوق بعض ، صعب انك تشيل كل الطبقات دي مره واحده. ✴️ في نفس الوقت دي علاقه دائمه و رحم و فيها رضا الله. يبقي لا ضرر ولا ضرار. خد المساحه الشخصيه بتاعتك و في نفس الوقت لازم تعمل واجباتك كأبن ، تكلم والدتك و تزورها و تطمن عليها ، لما تروح زياره و حسيت انك هتبدأ تنفعل أستأذن قول عندي مشوار مهم و هيبقي اجيلكم تاني امشي، لو بتتكلم في التليفون ثواني يا ماما خمس دقائق و هكلمك و خمس دقائق اعمل تمارين التنفس و ارجع كلمها و افتح اي موضوع تاني خالص. و ادعي ربنا يألف بين قلوبكم ✴️مارس تمارين الاسترخاء و التنفس هتلاقي فيديوهات علي اليوتيوب هتهدي الانفعال عندك شويه. ✴️ اي كلام بيتقال متخدوش أنه بيوصفك فعلا ، هي شايفه انك سلبي مثلا طيب ما تشوف ! دي وجهه نظرها هي انت مش مسؤل عنها بشئ ( اتقال علي الله أنه لديه صاحبه و لديه ابن ) هل دا غير شئ ! كلام و سيظل كلام و سيظل الناس يتكلموا عنك ولا يتفقوا علي أحد و هذه هي طبيعه البشر منذ بدايه الخلق، ف كل اما تتكلم انت تنفعل و تزعل و يصدر منك سلوك غير مرغوب فيه و ترجع تزعل اكتر من شكل العلاقه اللي بينكم اللي عماله تسوء و تفضل تلف في الدائره المفرغه دي لحد اما تقرر تاخد كلامها أنه مجرد كلام. متردش عليها، تحاول تغير الموقف ، وقف الدائره المفرغه علشان انت اللي ترتاح من الصراعات اللي جواك. ✴️ مارس التأمل و التدبر ، مارس اي رياضه ✴️ تصالح مع الماضي لانه خلاص عدي ، حاول في الحاضر ف انك تغير ردود أفعالك مع كلامها و دا علشانك انت ربنا يعينك و يوفقك و يراضيك تحياتي لك 💐

Answer

مهما كانت دي امك برضو في النهاية و مينفعش تعمل كده ومش معنى كلامي ان هي صح لا ، بس مينفعش تعمل كده حاول تتقبل الامور

عندي مشكلة منذ الصغر مع أمي وعلاقتي بها كانت وما زالت سيئة وصارت أسوأ، ما العمل؟

نفسية

اجتماعية

أهل

سؤال من احد أعضاء فدني

تم النشر الاثنين، ١٧ يونيو ٢٠٢٤

4 إجابة

1 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك