من اول ما نتيجة تالته إعدادى ظهرت والناس عرفت أن انا مجبتش المجموع محدش اهتم ولا سأل نفسو ايه الاسباب الي ممكن تخليها تجيب أقل من ناس مستواهم اقل منها يعنى البنت الي ورايا غششتها ودخلت ثانوى عام وانا لسه بس الحمدلله على كل حال ده النصيب ، فعلا محدش بيهتم نفسيتك وظروفك ايه كل الناس همها الدرجه وبس ،
المهم يجماعه والدى حصل بينى وبينو مشاكل ياما وكان بيتقالي اسوأ الكلام محدش يقدر يتحملو وقد ايه هو مكسوف يقول للناس الي معاه ف الشغل أن بنتو منازل ومكسوف من اهل واخواتو وانى قليله وكلام كتير يعنى تعبنى نفسيا وقالي أن كل بيت كويس لازم يكون ربنا مخلى واحد فاشل وبيتنا انا فيه الحد الفاشل ده وان هو ندمان علي كل حاجه عملهالي وكلام كتير ياما بس عشان مطولش ،
المهم امبارح عمى الي والله العظيم يجماعه ما عرف هو شكلو ايه لانى اخر مره شوفتو ف ابتدائى تقريبا انا فعلا معرفش صوتو ولا شكلو ولا حتى هو يعرفنى بس عارف قريبتى الي قالتلو اخوك بنتو جابت أقل من بنتى ف اتصل علي ابويا بيقولوا وابويا اتدايق ونام زعلان
ياجماعه والله كل مره بتخانق فيها انا وبابا بنسا واقول كلام من ورا قلبو لكن المرادي حاسه ان فى حاجز كده او حاجه منعانى من انى ارجع اكلمو انا بقيت حاسه انى كرهاه مش عايزه اكلمو معرفش ليه يمكن عشان المرادى كان كلامو قاسي جدا جدا عليا غير كل مره بس فعلا انا بقيت حاسه انى مش عاوزه اشوفو حتى
حبيبتي انا حاسه بيكي ومتفهمه جدا وجهه نظرك ومشاعرك بس لازم تعرفي ان الاب والام ليهم حسبه تانيه في تعاملاتنا غير اي حد تاني يعني هو عمل معاكي اللي يعرفه واتربي عليه وممكن يكون كلام الاباء القاسي من وجهه نظرهم وبوعيهم هما ان ده لمصلحة ولادهم عشان يبقوا احسن ويشتغلوا علي نفسهم في النهايه هو باباكي علاقه مينفعش نقطعها او نبعد عنها حاولي تتكلمي معاه قوليله مشاعرك وانتي بتحسي بايه لما يقولك كده واسمعي مبرراته المشاعر اللي جواكي دي هتأذيكي انتي حاولي تتكلمي مع حد قريب منك ممكن يستوعبك وخرجي كل اللي جواكي ولو مفيش حد تكلميه اكتبي وابقي قطعي الورق بعد كده لو قلقانه حد يشوفه
تم النشر الخميس، ١٩ أكتوبر ٢٠٢٣
والله يا بنتى هو موقف تقيل انا عارفه وكلمة القريبين مش بتوجع بس بتدبح لكن الاب والام من ابواب برهم انك تتحملى تقصيرهم ومتقوليش مش هكلمه حقك يبان عليكى زعلك بس اتعاملى فى اقل الكلام وبكل احترام ...انجحى انتى فى مكانك لان كلها اسباب من ربنا تحطنا فى مكاننا اللى هيحتاجنا ربنا فيه. الدراسة مش اول ولا اخر الدنيا المهم تكونى انسانة سويه واثرك طيب على اللى حواليكى
تم النشر السبت، ٢١ أكتوبر ٢٠٢٣
للاسف في اهالي كل تفكيرها ان مصلحة ابناءها ف الدرجات العالية و بس و شايفين ان هي دي ال بتديهم قيمتهم ،، فالمهم ان انتي من جواكي متكونيش شايفة ابدا ان درجاتك الوحشة دي تقلل منك ،، لا ابدا انتي عليكي السعي و ربنا عليه النتيجة فانتي ارضي بقدر ربنا من ناحية و من ناحية تانية برضو خدي بالاسباب و اشتغلي ع نفسك شوفي ايه ال بيشتت تفكيرك و مبيخلكيش تزاكري مثلا او لو بتزاكري طب ايه ال بيخليكي تنسي يمكن محتاجة تاخدي ڤيتامينات مثلا او تزاكري بطريقة مختلفة ،، المهم ان كل دي حلول عشانك انتي لكن ع كل الاحوال انتي قيمتك محفوظة و درجاتك القليلة لا تقلل منك ابدا بالنسبة لباباكي بقى فحاولي تردي عليه بكلام منطقي ميقدرش يجادلك فيه ،، بابا احنا مخلوقين عشان نعبد ربنا و انا الحمدلله مهتمة بعبادتي و برضو باخد بالاسباب و اهتم بدراستي بس ربنا عليه النتيجة و هو اراد اجيب كده فهحاول اشتغل ع نفسي لكن كل ده ميقللش مني انا راضية بارادة ربنا ،، كده يعني و ايا كان رده متهتميش ولا تستني يقتنع المهم ان كلامه السلبي ميأثرش عليكي و ربنا يوفقك يارب💜
تم النشر الجمعة، ٢٠ أكتوبر ٢٠٢٣
هونى على نفسك... وبراحه كده.. عارفه إن هما بيكونو خايفين علينا أو نفسهم يشوفونا أحسن حاجه فى الدنيا ولكن للأسف مش بياخدو بالهم من الاسلوب أهالينا كلنا كأنو كده... وده طبعا دلوقتي بنحاول منعملوش مع ولادنا... آنتى أهدى وحطى فى بالك إنه نفسه يفرح بيكى... أو مستنيكي آنتى أللى تفرحى قلبه.. بس ردود أفعاله بتخونه مثلا نتيجه ضغط الناس أللى حواليه بولاده مثلا... أنا بفترض وبحط نفسى مكانه.. التمسى العذر.. لو تعرفى هو بيحبك قد إيه مش هتقولى كده.. عندى أبنى قدك.. وسعات بدون قصد اقسو عليه عشان أنا بحبه أو خايفه عليه.. وبرجع تأنى أصلح من نفسى فى التعامل معاه وأقوله متزعلش... كل واحد وطبعه خدي تصرفه من الزاويه أللى بقولك عليها ديه وأبقى قوليلى نظرتك هى هى ولا اتغيرت عشان لو هى هى نفكر تأنى... اهلينا بتحبنا آوى وبتخاف علينا بس أنا وأنا فى سنك كنت برضو شايفه زيك لما كبرت وبقيت أم فهمت... براحه جربى تغيرى نظرتك وقولى لو فى تغيير في نفسيتك أو لا
تم النشر الجمعة، ٢٠ أكتوبر ٢٠٢٣
اولا الناس ديما كدا مبيحكموش علي اي حاجه غير بالمظاهر وهما عما يصدقوا يلاقوا حاجه يتكلموا عليها اصلا ففكك منهم صدقيني هما ميعرفوش انتي تعبتي ازاي او الحصل عشان تجيبي المجموع دا هما بس بيشوفوا المظاهر فصدقيني كلام الناس مش هيفيدك وعرفه ان الكلام الوحش دا من قريبك وجرنكوا بس عادي الناس دم مكنوش معاكي وانتي تعبانه فمتتهزيش بكلام اي حدعشان ميعرفش ظروفك اما بالنسبه لأبوكي هو مضغوط والله من كلامهم زيك بالظبط كان عاوز يمشي يتبها بيكي ويقول انا قد اي فخور بيكي متنسيش من عاشر قوم صار منهم هو نظرتوا سطحيه شويه زيهم شويه اي كتير الصراحه🙂عموما حولي تسمحيه وتعزريه عشانك انتي اولا انتي مش نقصه يكون في قلبك حقد اتجاه حد صدقيني دا هيفيدك اوي اما لو عوزة تكلميه فهميه وقليلوا يبابا انت كنت معايا في نفس البيت وشايف انا كنت بذاكر قد اي وتعبانه تروح قايل الكلام دا ليا تكسرني اكتر منا مضغوطه من الدرجه والناس ومنك ونفسيتي وحشه اوي تروح عامل كدا عتبيه يعني وقليلوا ان ربنا عاوز كدا ودا رزق والربنا كتبه خير بس عني عليه متكنش ضدي
تم النشر الجمعة، ٢٠ أكتوبر ٢٠٢٣
ياحبيتي انتي ملكيش دعوة بحد هو ربنا كتبلك كدة لعله خير لان ربنا لايضيع اجر من احسن عملا وانتي متزعليش من بابكي لانك مش هتلاقي حد يحبك اده فانتي اجتهدي في مستقبلك وارفعي راس ابوك وندميهم كلهم
تم النشر الجمعة، ٢٠ أكتوبر ٢٠٢٣
اقولك حاجه لاني عديت بنفس مرحلتك دي بس مع أمي ولما حصلت خناقه وشدينا مع بعض في الكلام وقالتلي لأنتي بنتي ولا انا راضيه عنك طول ما انتي كدا اعصابي تعبت وزعلت وبكيت كتير وهي زعلت وبكت وانا مروحتش حتي اصالحها ولا اكلمها ولا رضيت احتك معاها في اي حاجه جت هي وفضلت تانب فيا وانا صرحتها بكل حاجه جوايا وأنها قاسيه في معاملتها وبتكرهني ومش شايفه تعبي وهي في المقابل حضنتني وقالتلي أنها خايفه عليا وأنها بتحبني ودا كله من ورا خوفها عليا من كلام الناس وأنها عايزه تشوفني احسن واحده في الدنيا خلاصه الكلام انك لازم تكلمي ابوكي وتفهميه وحاولي تشرحيله لانك ملكيش غيره وملكيش حد هيخاف عليكي غيره
تم النشر الجمعة، ٢٠ أكتوبر ٢٠٢٣
لعرض السؤال في فدني اضغط هنا