انا عندي ابني في ثالثة اعدادي 15 سنة مش بيحب المذاكرة ومش بيحب يشغل دماغه ومش بياكل
وبيشتمني كتير وعنده كسل جدا مع العلم أنه يتيم. من سن 6 سنين أنا تعبت معاة عايز يقعد طول النهار يلعب بيس علي الموبايل ومش بيرضي يتحرك خالص أية الحل؟
علموا ابناءكم - اسمها "حضرتك" مش "انت" - اسمها "نعم" مش "ايه" - وطي صوتك - ماتحطش رجل على رجل قدام حد كبير - ماتبقاش قاعد و سايب حد كبير واقف - اقف بعيد عن الباب - متتصلش بحد متأخر - اقعد على الكرسي اللي مش كاشف البيت - ماتزعلش حد في بيتك - خبط على الباب قبل ما تفتحه -كل من ناحيتك و ابعد الطبق عنك شويه - قوم اول واحد من على الاكل لو معزوم - استنى كلهم يقوموا لو انت اللي عازم - متزورش حد فجأة - تدخل بيت حد تبقى اعمى و تطلع اخرس -في بيت غريب ماتقومش من مكانك غير لما حد يقولك - اقفلي رجلك و انت قاعده -افرد ضهرك و انت قاعد - انزل مع اختك خدي بالك من اخوكي - روح ودي دي لجارتنا و قولها ماما بتسلم عليكي - شيل من عمو الاكياس دي - قوم خلي طنط تقعد - ماتطلعش ورا بنت السلم يا تطلع قدامها يا تستنى شويه و تطلع - لو حد طالع وراكي اقفي في كورنر السلم عديه و بعدين اطلعي - انت مش احسن من حد ولا حد احسن منك - ماتقارنش نفسك بحد -قول شكرا قول اسف اللي يعتذر الاول هو الاقوى - ما تشدش حاجه من ايد حد -ماتسبقش حد كبير و انت ماشي -افتح الباب للكبير و للبنت - باب مقفول تخبط حتى لو عارف ان مافيش حد - قول الحق ولو على رقبتك - لبس النادي ده مينفعش يتخرج بيه - لبس البيت غير لبس النوم - عيب دا اكبر منك - دا حرام ويغضب ربنا - بطل دوشة الناس نايمة - متخليهمش يدفعوا .. ادفع انت - مترميش حاجه في الشارع - نضف مكان مبهدلت - متجيش ناحيتها دي أمانة الناس المحترمين ولاد الاصول زمان كانوا بيربوا اولادهم كده و لو عايزين خير و بركة زمان ترجع لازم نربي أولادنا كده مش كده ولا ايه.. -
تم النشر الثلاثاء، ٢٨ فبراير ٢٠٢٣
الله يعينك ويقويكي يارب هو السن ده سن تمرد بس برضو محتاج انك توازني بين الاحتواء والشده , ولازم يكون له كبير يحترمه فممكن لو خاله او عمه يتكلم معاه وبرضو الصحبه عامل قوي اوي فحاولي تشركيه فرياضه مع صحاب يشجعوه والمدرسين يشدوا عليه وتعملي باسوورد للنت مثلا يدخل فاوقات معينه بس بلاش تكوني انتي فالاصل ضاغطه عليه و مكتفاه يعني حاولي تشدي وتليني
تم النشر الخميس، ٢٣ فبراير ٢٠٢٣
حضرتك انا في السن ده اتغريت ١٨٠ درجة من واحد اهبل لواحد تاني خالص ووقتها اهلي كانوا مستغربين جدا بس فرحوا اكيد لاني اتغريت للاحسن الفترة دي برضه كانت من اصعب فترات حياتي بس الحمدلله ف معلش استحمليه شويه فترة البلوغ والمراهقة دي بتكون صعبة علي الانسان جدا لانه بيكتشف الدنيا وحضرتك برضه قدري انه والده مش جنبه ف يمكنه مأثر علي نفسيته
تم النشر الأحد، ٥ مارس ٢٠٢٣
ربنا يعينك بجد ويقويكي ويباركلك فيه ويجازيكي خير عن تربيتك ليه وصبرك شوفي هو محتاج تمشي معاه ف طريقين الاولاني تديله مشاعر الحب والحنيه والاحتواء والصحوبيه وانك تكون صاحبته ف السن ده ويفضل لو حد من عيلته شاب يقرب منه ف الفتره دي مهمه جدا ليه تاني حاجه محتاجين الحكمه ف الشده امتى تشدي وامتى تليني عموما المراهق بالذات لو مع والدته لسبب يتم او انفصال او سفر الوالد بيكون عنده نزعه السيطره وفرد العضلات والقوه انا معرفش عنده سلوكيات من دي ولا لا بس وارد تحصل مع معظم المراهقين دورك بس لو ظهر اي سلوك من دول تفهميه ان انا ماما المسؤله عنك ومهما كبرت مش هتكبر عليا وفي حدود لازم نلتزمها بقوه وثبات عشان بس ميعديش معامي الحدود دي حاجه كمان تحطي معاه اتفاقات زي خلص الجزء ده من المذاكره وهتقعد ع الفون او لو خلصت الاسبوع ده مذاكرت كذا وكذا وكذا هنخرج ف مكان معين انت نفسك فيه وده بيبقا اسمه التحفيز ولما يكسر القواعد والقوانين الي انت حطاها ومتفقه معاه عليها بيكون في حرمان من حاجه بيحبها لوقت محدد وده بيكون العقاب بالحرمان ف العموم دي الوصيله لتغير اي سلوك سيئ مع طفل او مراهق ل بس عرفتي تكوني مرنه ف انك تشدي وتليني ع حسب الموقف طلب ايه
تم النشر الجمعة، ٢٤ فبراير ٢٠٢٣
هو السن مبدأيا سن لغبطة و الاولاد بشكل خاص ممكن يخرجوا عن السياق كتير بس مسألة الشتيمة دى كده مش حاجة كويسة ابدا ودى لازم يكون ليكى رد فعل قوى عليها اكتر من اى حاجة تانية... نلحقة بقي من دلوقتى عشان ميطلعش شخص اعتمادى ولا يقدم شىء لنفسه او لمن حوله. اولا لازم تكونى حازمة جدا ولكن بدون ضغط...فقط يكون ليكى كلمة واضحة مبتتغيرش مهما حصل. ولازم تعيدى عليه القواعد الاساسية للحياة. ( هتحترم غيرك هتلاقى احترام ...احترامك لنفسك باحترامك للى قدامك ) ( زى ما بتاخد لازم تدى ...عاوز تشحن الموبايل مثلا...اتفضل ادى دورك بانك تساعدنى فى كذا ) انت مش بتشتغل عشان شغلانتك فى الحياه الدراسه...فين شغلك بقي. وطالما الموبايل يمثل ادمان ليه ...فلازم تساعديه فى الانسحاب واحده واحده .تطلبي منه حاجة مثلا ..حتى وهو قاعد ..تكون هيعملها بايديه الاتنين ..عشان يسيبه غصب عنه . شوفى لو تعرفى حد من صحابه واطلبي منه يساعدك فى الموضوع ده. وياريت نراقبيه عشان موضوع عدم الاكل ده مش اشارة كويسة. الافضل تاخديه يعمل شوية تحاليل اساسيه ومن غير ما تعرفيه اى حاجة اطلبي من المعمل يعمل تحليل مخدرات.
تم النشر الجمعة، ٢٤ فبراير ٢٠٢٣
اللهم صلي علي سيدنا محمد علموهن عند السبع واضروبهم عند العشره وهو كبر اهوه الله ينور ف انتي لنفسك هتستحملي التعامل بتاع ابنك ده زي م هو بقيت حياتك او تلحقي نفسك ف الكام شهر دولت والفون اظن ساعه او ساعتين ف اليوم حلوين اووي عليه ومش كل يوم وعارف حنان الأم لكن يا تعلميه انتي ياتسبيه ف الشارع والدنيا تعلمه المهم انه لازم يعرف قيمتك ويحترمك وحاولي توديه دروس قرآن وتامريه بالصله وفكريه لو نسه حتى لو انتي مبتصليش تاخديه صواب لو سمع الكلام وراح يصلي حتى عشان قدام شويه يصلي بيكي و لله الأمر من قبل ومن بعد وانتي حره ف تعاملك مع ابنك بردو والله اعلم يمكن ربنا يصلح حاله لوحده سلام عليكم
تم النشر الثلاثاء، ٢٨ فبراير ٢٠٢٣
• يحتاج إلى (جلسات تأهيل أكاديمي - صعوبات تعلم - تعديل سلوك).
تم النشر الخميس، ٢٥ يناير ٢٠٢٤
لعرض السؤال في فدني اضغط هنا