أزاي أقدر أعالج أو أدير نمط التعلق القلِق الي عندي بسبب شوية حاجات من طفولتي ؟
عندي مشكلة وهو إن أنا محتاج أحب ولو أي حد عشان أعوض الاحتياج النفسي بالتعلق بحد دا
الخوف الاساسي بتاعك طبعا هو ان حد ممكن يسيبك، محتاجة اسالك سؤال هل انتي لسه جواكي ضيق من اللي حصل ايام طفولتك؟ بما ان طفولتك مكانتش محقق ليها الامان العاطفي بشكل ما! يعني لو جينا نتكلم عن أول جزء في تعاملنا مع نفسنا ومع الاخرين، لو نمط تعلقك قلق ف هتبقى بتشوفي نفسك بنظرة سلبية ومقللة صورتك الذهنية عن نفسك وبتعلي القيمة ديه عند الاخرين. يعني ديما بتشوفي نفسك أقل .. أو مش بتشوفي نفسك ع حقيقتها، سواء انجازاتك أو حتى بتنتقدي نفسك، حتى لو عارفه مميزات نفسك، بس بتركزي اكتر على عيوبك. ديما بتخافي انك تبقى لوحدك، لوحدك ديما في الحياة عموما، ف ده بينعكس طبعا على حياتك العاطفية، ف انتي عندك احتياج ديما انك لازم تبقى في علاقة . مهم جدا نعرف أن المشاعر اللي بتحسي بيها واللي هي على سبيل المثال .. لو حد مثلا سابك أو عاملك وحش أو عمل شئ ما .. انتي وقتها طبعا ممكن تدخلي في مرحلة سيئة جدا، وبتبقي في حالة ذعر وقتها من اللي حصل، مهم اوي انك تعرفي أن اللي بتحسي بيه مش بسبب الشخص ده، اللي بيحصل سببه نمط التعلق بتاعك مش اكتر، يعني مش علشان الشخص مهم أو قيمته عالية .. اه ممكن يكون كده، بس ك سبب رئيسي السبب في حالة الذعر ديه نمط تعلقك انتي مش ب سبب اهميه الشخص. ف ديه نقطة مهمة جدا أنك تعرفيها، علشان هتفرق معاكي في طريقة تعاملك مع نفسك. طيب ازاي اعرف اتعامل مع ده كله؟ _ التسرع مش في صالحك. يعني ايه الكلام ده؟ يعني بلاش نتسرع في علاقتنا مع الاخرين، بلاش حالة الذعر اللي جواكي او الخوف يبقى ليها أثر سلبي في تعاملك مع نفسك او الناس، على سبيل المثال انتي دلوقت مضايقة لسبب ما، بلاش ضيقك يكون سبب في انك تعملي حاجه غلط اكتر زيادة. نحاول نهدى شوية مع نفسنا ومع الناس. _ لو مضايقة من أي حاجه حاولي تدربي نفسك انك انتي اللي تعملي التهدئة ديه لنفسك. انتي اللي تعملي ده مش حد تاني، هاتي مذكرة وابدأي اكتبي فيها مشاعرك الحالية ! ايه اللي أنا خايفة منه بالظبط؟ ايه الحاجه اللي ممكن تهديني؟ _ ابدأي اعملي نشاطات لوحدك حاولي تحسي بالاستقلالية، وتعمليها كمان بدون ما يكون حد معاكي او معتمدة عليه. ابدأي اعملي لستة بالحاجات اللي بتفرحك، ملهاش علاقة بحد .. حاجه ليكي انتي بتفرحك وبتسعدك. _ اعملي وقت لنفسك انتي تكوني فيها مع ذاتك حاولي تقضي وقت مع نفسك، بدون ما تكوني مع حد، أو مع الفون أو ال T.V حاولي تنزلي مثلا تتمشي، تخرجي تروحي اي حته تشربي حاجه، حاولي تقعدي مع نفسك ومع افكارك، اسمعي نفسك. هو ده اللي عايزين نوصله، اسمعي نفسك. _ الكلام السلبي .. الانتقاد الذاتي ( بنكلم نفسنا ازاي)! لما بتغلطي بتكلمي نفسك ازاي؟ بتقعدي تجلدي فيها، تزعقي فيها تهزقيها! ده كله هينعكس تلقائيا عليكي مباشرة. مش عيب اننا نغلط .. ومش عيب كمان اننا نحاول نكلم نفسنا بطريقة مهذبة .. احترامنا لنفسنا مهم جدا، طريقة تعاملك مع نفسك هيفرق جدا برضه. واخيرا ،،، متكهريش نفسك، او النمط بتاعك، استوعبيه وحاولي تقربي منه وتفهميه، نمط التعلق بتاعك له مميزات وكويسة جدا كمان، زي مثلا الدقة عالية جدا، بتعرفي تعملي حسابك جدا في الحاجات اللي ممكن تحصل (المشاكل) وبتعرفي تتعاملي معاها. بتحبي ديما انك تعملي الحاجه كويس.
تم النشر السبت، ١ يوليو ٢٠٢٣
مفيش مشكلة اننا نوجه الحب اللى محتاجينه تجاه الاشخاص اللى حوالينا ...المهم منبقاش بالشكل المرضى التعلقى ده . ياريت تذكر بعض الاشياء الخاصة بالطفولة اللى شايفها مؤثرة فى الموضوع
تم النشر الأحد، ٢ يوليو ٢٠٢٣
اكيد هقولك حب نفسك بس مش ديه الاجابه لان اكيد كلنا بنحب نفسنا وان ديه اجابه نموذجيه جدا لكن اجابتى هتكون انك تتعلق بس بحاجات لو ادتها حبك مش تخذلك حب عاده اتعلق بتقاليد يعنى حب انك تتعلم حاجه جدبده حب انك تواظب على ذكر او تساعد حد محتاج فتشوف فى عيونهم الحب زور دار ايتام واتعلق بيهم وحبهم هيدوك الحب اللى محتاجه بجد بلاش تجعل حبك لشخص معين لانه ممكن يخذلك لكن لو حبيتك اللى بتعمله للحد او لحياتك مش هتتخذل عن تجربه شخصيه
تم النشر الخميس، ٢٩ يونيو ٢٠٢٣
مفيش مشكلة اننا نوجه الحب اللى محتاجينه تجاه الاشخاص اللى حوالينا ...المهم منبقاش بالشكل المرضى التعلقى ده . ياريت تذكر بعض الاشياء الخاصة بالطفولة اللى شايفها مؤثرة فى الموضوع
تم النشر الأحد، ٢ يوليو ٢٠٢٣
كن لطيفاً مع نفسك واعط نفسك الحب والدعم الذي لم تتلقاه في الطفولة. اعتني بنفسك كما لو كنت تعتني بطفل صغير.
تم النشر الجمعة، ٣٠ يونيو ٢٠٢٣
لعرض السؤال في فدني اضغط هنا