السلام عليكم
انا محمد عندي 17 و شوي و المدرس قال ان في مجموعة مش عارف اسمها بس زي shark الناس المستثمرين دول لو حد يعرفهم بس هنا في مصر في مسابقه او برنامج مش لما بشارك مش بقدم منتج او حل لا انا بقدم الفكرة بس و لو كويسه ممكن اسافر بره مصر و أنفذها فأنا عندي معلومات كتير بس مع عارف اربطها و محتاج مساعده و شكرا
حَضَّانات الأعمال Incubators ومُسْرِعات الأعمال Accelerators هي نوع برامج الأعمال إللي أنت بتسأل عنه، سواء كان مُذاع تلفزيونيا أم لا. واحدة من النسخ المتلفزة فعلا إسمها شارك تانك Shark Tank. الموضوع مش بالبساطة إللي أنت ممكن تكون متخيلها. الممولين هيدفعوا فلوس ممكن تكون بالملايين والفلوس دي منتظرين منها أرباح، ومن وجهة نظرهم لازم تكون أرباح الفكرة كبيرة وسريعة نسبيا يعني لو هامش الربح أو العائد على مبلغ الاستثمار صغير أو محتاج سنين عشان يُدر عائد، هايرفضوا الفكرة. من جهة ثانية، الممول عادة بيكون رجل أعمال مخضرم ومحتاج منك أكثر من مجرد فكرة مُجردة تقولها شفهيا. مش منتظر منك مثلا تقول له: "ما تيجي نعمل مطعم آلي بروبوتات بتعمل كل حاجة، هاتبقى فكرة جديدة وأول مرة تتعمل في مصر!" رجل الأعمال دة بيمولك عشان عاوز يكسب منك ومعاك ولازم تعمل خطة أعمال وتدرس السوق وتشوف المنافسة وتحسب حجم العائد المتوقع وخلافه. لما هاتقابل الممول عشان تعرض عليه الفكرة، هاتحس إنك في امتحان وهو بيتناقش معاك كل رقم بيسألك في كل حاجة. إزاي افترضت إن حجم العملاء الشهري هايكون الرقم دة، وبناء على إيه حسبت متوسط الإيراد من العميل الواحد، وإيه قيمة العميل Lifetime Customer Value على مدار عمره في البيزنس، وهلم جراً. كمان وحسب فكرتك ممكن يكون مطلوب منك المنتج الأدنى القابل للبيع Minimum Viable Product, MVP يكون موجود فعلا. المنتج هنا مش لازم يكون حاجة مادية ملموسة، بس حتى لو ابلكيشن أو خدمة، فممكن يطلبوا توصل للمرحلة دي. خد بالك إنك مش هاتكون لوحدك وفي ناس تانية بتطرح أفكارها على الممولين في نفس الجولة. يعني كل سنة نفس حضانة الأعمال بتستقبل أفكار وتدرسها وتختار منها. يبقى كدة عندك جولة تمويل كل سنة. كمان كل جولة بيبقى لها حدود في التمويل. الممولين بيشاركوا في الأفكار دي من مالهم الخاص، وكل واحد فيهم بيكون محدد لنفسه ميزانية يقدر يشارك بيها في كل المشروعات إللي يشوف إنها ممكن تكسب فعلا في الجولة دي. دة ينعكس عليك في حاجتين: في منافسة شرسة بينك وبين أصحاب الأفكار التانيين، وثانيا فكرتك ممكن تكون حلوة ومُربحة بس في أحلى منها ومكاسبها أفضل والتمويل ما يقدرش يغطي فكرتك بعد كل الأفكار الأفضل ربحا. السفر للخارج مش دائما متاح وخصوصا حسب موقع تنفيذ الفكرة وحسب الحضانة أو المُسرِع في مصر ولا بلد تانية. يعني لو مثلا الفكرة مُصممة لمصر، ليه تسافر أصلا طالما المشروع نفسه هيتنفذ هنا؟! الفرق بين الحَضانة والمسرع إن الحضانة بتحتضن المشروع في بداياته وقبل ما يبقى له إرادات أو أرباح. مسرعات الأعمال بتيجي بعد ما الفكرة تتطبق فعلا ويبقى مشروع أثبت إن ليه مستقبل واعد بس ناقصه تمويل عشان يتوسع أسرع مش أكتر - مثلا بدل ما إنتظر 3 سنين عشان أقدر افتح فروع تانية، ممكن أخد تمويل من مسرع أعمال عشان افتحها النهاردة. طبعا مسرعات الأعمال بتكون أسهل في القبول لأن الفكرة اتطبقت فعلا وأي أرقام هتتكلم عنها هاتكون من الواقع مش مجرد دراسة نظرية للجدوى الاقتصادية، وحجم النمو المتوقع له ما يؤيده من أرض الواقع. في حضانات الأعمال، الممول - أو الممولين لو أكتر من واحد - هيدخلوا معاك شركاء في العادة بنسبة لا تقل عن 51٪ من الشركة عشان يبقى لهم حق الإدارة والإشراف. صحيح الفكرة بتاعتك، بس الفلوس بتاعتهم. مسرعات الأعمال في العادة النسبة فيها بتكون أقل من كدة حسب مرحلة التطور إللي وصل لها المشروع ومدى احتياجه للتمويل الخارجي. في حضانات ومُسرعات أعمال مصرية وعربية كمان، ومش محتاج تسافر برة. كمان في بدائل تانية للحضانات ومُسرعات الأعمال زي التمويل الجماهيري Crowd Sourcing - الترجمة العربي لسة مش متفق عليها وممكن تلاقيها باسم الحشد الجماهير أو التعهيد الجماعي. الفكرة هنا إنك هاتصنع مثلا نوع جديد من الأحذية فيه ميزة جديدة وعبقرية وسعر بيعه المتوقع 100 دولار مثلا. بتروح لموقع تمويل جماهيري وتطرح فيه الحذاء بسعر 50 دولار أو 25 دولار وتقول للناس هاسلمكم الأحذية لما أبدأ الإنتاج الفعلي، وها بدأ إنتاج لما أوصل لألف مشترك عشان يبقى معايا الحد الأدنى عشان أتعاقد مع مصنع. بالطريقة دي الفكرة خرجت لحيز التنفيذ الفعلي وشفت إقبال الناس عليها وأصبح عندك بيزنس كدة أنت محتاج تقنع ناس كتير تدفع مبالغ صغيرة بشكل أبسط وأسهل من إنك تقنع ممول واحد يدفع مبلغ ضخم ويشاركك في مشروعك. طبعا التمويل الجماهير محتاج دعاية أكتر لأنك بتخاطب جمهور أكبر. في ميزة تانية في التمويل الجماهير وهي إنك هاتشوف إثبات التفاعلية والاقبال Validation بنفسك. لو ناس كتير بدأت تساهم معاك وتشارك في التمويل يبقى الفكرة فعلا مطلوبة وناجحة. ممكن تشوف موقع Kick Starter وموقع Patreon في التمويل الجماهيري. https://www.kickstarter.com/ https://www.patreon.com/ ممكن تشوف حضانات أعمال هنا https://www.ida2at.com/guide-supporting-startup-business-incubator-map-egypt/ عشان يبقى عندك تصور لحجم الإيراد إللي ممكن تحققه، ممكن تشوف ناس تانية طبقت حاجة قريبة من فكرتك وإيراداتها من خلال إحصائيات باتريون على الموقع دة https://graphtreon.com/top-patreon-earners الأرقام إللي هتشوفها جاتت بعد سنين من الشغل والتعب، مش في يوم وليلة. أصعب طرق التمويل هي الممول الملائكي Angel Investor ودة رجل أعمال بيمنحك عمليا قرض حسن بدون فوائد وبدون ما يشارك في الشركة أو ينتظر منك أرباح، لكنه زيه زي الحضانات والمسرعات عاوز يسترد أمواله ولازم يضمن قابلية فكرتك للتطبيق والنجاح خلال فترة معينة. نصيحة على الهامش: حاول تشوف مرشد Mentor بغض النظر عن طريقة التمويل، يكون ليه خبرة في البيزنس والإدارة عشان يساعدك. التمويل جزء من الحل مش الحل كله.
تم النشر الاثنين، ٧ أكتوبر ٢٠٢٤
وعليكم السلام ورحمة الله وبركاته، محمد. من الرائع أنك تمتلك القدرة على التفكير في مشاريع مبتكرة في سن مبكرة، وهذا يعكس طموحك واهتمامك بمجال ريادة الأعمال. إليك بعض الخطوات التي يمكن أن تساعدك في ابتكار فكرة لمشروع: تحديد الاهتمامات: ابدأ بتحديد اهتماماتك الشخصية والمواضيع التي تحبها. هذا يمكن أن يساعدك في التركيز على مجالات معينة للابتكار. استكشاف المشكلات: ابحث عن المشكلات التي تواجه الناس في حياتهم اليومية. غالبًا ما تكون الحلول للمشكلات أساساً جيداً لفكرة مشروع. تدوين الأفكار: اكتب جميع الأفكار التي تخطر ببالك، دون تقييمها حالياً. قد تكون هناك فكرة رائعة تحتاج فقط إلى بعض التطوير. بحث السوق: حاول معرفة ما إذا كان هناك طلب على الفكرة التي تفكر فيها، وابحث عن المشاريع المشابهة. هذا سيساعدك على تقييم ما يمكن تطويره وتحسينه. طلب المساعدة: التواصل مع الزملاء أو الأصدقاء الموهوبين يكون مفيدًا. ربما تستطيع تشكيل فريق لتبادل الأفكار والعمل معًا. التعلم من الآخرين: استمع إلى قصص نجاح رواد الأعمال الآخرين، قد تجد إلهامًا أو فكرة مفيدة. التجربة والتحسين: لا تخاف من تجربة فكرتك، حتي وإن كانت بدائية. يمكنك تحسينها مع مرور الوقت بناءً على التجارب والتعليقات من الآخرين. إذا كنت بحاجة إلى شخص لتعزيز أفكارك أو للانضمام إليك، يمكنك البحث في المجموعات المحلية أو عبر الإنترنت التي تهتم بريادة الأعمال. أتمنى لك كل التوفيق في مسيرتك، وإن شاء الله تجد الفكرة الملهمة التي تقودك نحو النجاح.
تم النشر السبت، ٥ أكتوبر ٢٠٢٤
استعين بحد كبير او خبره يعني ف المجال اللى عندك معلومات فيه يساعدك ويربط معاك المشروع وتنظمه وبعدين تشارك ف المجموعه دي وتسافر تحققه بره لو عايز كده
تم النشر الاثنين، ٧ أكتوبر ٢٠٢٤
عايز حل لأداره الاعمال ولا عايز حل للمنتج نفسو وانو تستشير حد؟؟
تم النشر الاثنين، ٧ أكتوبر ٢٠٢٤
اه تقريبا ببقى في حاجه زي كدا
تم النشر الثلاثاء، ٨ أكتوبر ٢٠٢٤
لعرض السؤال في فدني اضغط هنا