انا بنت عندي ١٦ سنه …انا كنت كويسه جدا كنت بضحك ديما وبحب اقعد مع اهلي وديما بحب اقعد اتكلم معاهم ..بس بقالي فترة حوالي ٧ او ٨ شهور متغيره تماما عن الاول ..بقيت بميل للعزلة وبحب جدا اقعد لوحدي ..انا اصلا شخصيه انطوائيه ومعنديش غير زميلة واحده بس وفقدت اهتمامي بيها تماما مع فقدان اهتمامي لأهلي مع الوقت وبقيت بكره كلامهم وبقيت مبحبش اقعد معاهم ..لدرجة بقيت يوم اكون فيه مزاجي كويس كدا ويوم اللي بعديه علطول مزاجي وحش جدا ..فقدت اهتمامي تماما بأي حاجه كنت بعملها من سنه او من شهور وبقيت ديما حاسه بملل وخمول وبقيت بنام كتير عن المعتاد ..وكمان شخصيتي اتغيرت كتير عن الاول وأهلي مش عاجبهم اللي بيحصلي ده ..وساعات بابايا بيلجأ للعقاب بأنه ميكلمنيش او بحاجات تانيه..كمان بقيت بحب اقعد في البيت وبكره اني انزل للشارع بطريقه فظيعه ..لدرجه انا بقالي اكتر من شهرين مش بنزل من البيت …بس في نفس الوقت حاسه انه عاجبني شخصيتي بالطريقه دي وانا مرتاحه كدا اكتر بكتير عن الاول
فى البداية كده.انتى بنوته جميله واجتماعيه لكن من الواضح أن المحيط العائلى اللى بتعيشى فيه ممكن تكون طريقته وارائه مختلفه عنك . كتير مننا مر بالفترة دى لكن حاولى متبقيش لوحدك متستسلميش للوضع اللى انتى فيه . فى حاجات كتير ممكن تعمليها غير انك تكونى لوحدك. الوضع ده ممكن تكونى مرتاحه فيه دلوقت لكن مع الوقت هياخد مسار تانى مش هيكون مناسب ليكى سنك جميل كله تعاملات وتجارب وكمان هتشوفى أصدقاء جدد أدى لنفسك الفرصه دى لأنها مهمه جدا حاولى تقربى الأفكار بينك وبين اهلك وبطرق مختلفه علشان متفقديش لغة الحوار بينكم. حاولى ترجعى لصديقتك تانى طالما بترتاحى معاها اكتبى دايما كل اللى جواكى باستمرار وكل اللى بتحبى تعمليه. اللى بتلاقى نفسك فيه ارجعى اعمليه تانى .نمى موهبتك لأنها هتظهر جمالك الداخلى وهتبدعى فيه. انك تمرى بالمرحله دى عادى بس متستمريش فيها خليها كأنها محطة فى حياتك لكن مينفعش تكملى فيها. وافتكرى دايما أن ربنا معاكى فى كل خطواتك وبيساعدك .وانك قوية وهتقدرى 🌷
تم النشر الأربعاء، ٣ يوليو ٢٠٢٤
انصحك بأنك تقرأى عن الشخصية الانطوائية و ايه مواصفاتها . عشان تعرفى نفسك اكتر . على فكرة الشخصية الانطوائية مش عيب و لا مرض نفسى . دا نمط من أنماط الشخصيات . بس طبعا مش لدرجة العزلة . اصحاب الشخصية دى ليهم مواصفات مختلفة عن باقى الناس . يعنى بيشحنوا طاقتهم لما يكونوا فى عزلة و بيرجعوا تانى يتفعلوا مع محيطهم . أشخاص انتقائيين بدرجة كبيرة جدا . يعنى ميصاحبش اى حد . ملتزم و دقيق جدا . مرتب . فى حاجات حلوة كتير فى الشخصية الانطوائية. انصحك تتعمقى فى القراءة عن نمط الشخصية الانطوائية. و انصحك لا تنعزلى عن محيطك و العودة لأصدقائك. و انك تكبرى دايرة معارفك . حتى لو كانوا 3 أصحاب بس . بس ميقلش عن كدا . و متعزليش نفسك .
تم النشر الجمعة، ٥ يوليو ٢٠٢٤
بصى انتى من الشخصيات الهاديه .... بس بتحبى تعملى علاقات جدا وبتعرفي تعملى ده انتى فى حاله زهق..... حاجه معينه مضايقاكى ..... او فترة هتعدى زى ما هتعدى .... فى العموم انتى طبعتك مش بتحبى تسيبى نفسك توصلى للدرجه ديه من الكآبه انتى بتزهقى بسرعه ... جاهدى نفسك بس❤️❤️ ربنا يسعد قلبك
تم النشر الجمعة، ٥ يوليو ٢٠٢٤
يا حبيبتي، الظاهر انك بتمري بفترة صعبة ومشاعر مضطربة. الأعراض اللي وصفتيها ممكن تأشر على حاجات زي الاكتئاب أو القلق. أعراض الاكتئاب: فقدان الاهتمام بالحاجات اللي كنت بتحبيها. الشعور بالملل والخمول. تغييرات في النوم، زي انك بتنامي كتير. ميول للعزلة. أعراض القلق: تقلبات في المزاج. الشعور بالتوتر والاجهاد. مهم جدًا تاخدي في اعتبارك انه من الأفضل تتكلمي مع حد متخصص زي طبيب نفسي أو معالج نفسي. هما يقدروا يقدموا لك المساعدة المناسبة. في حاجات تقدري تعمليها لحد ما تتواصلي مع متخصص: اتكلمي مع حد تثقي فيه : ممكن مامتك أو صديقة مقربة. مارسي رياضة خفيفة : الحركة بتساعد على تحسين المزاج. خصصي وقت لنفسك : جربي تمارين الاسترخاء أو التأمل. حافظي على جدول يومي : خلي عندك روتين يساعدك في تنظيم وقتك. مش غلط انك تحبي القعدة في البيت بس مهم كمان تبقي على تواصل مع الناس وتاخدي بالك من صحتك النفسية والجسدية. أنا هنا لو حبيتي تتكلمي أكتر أو محتاجة دعم. انت مش لوحدك، وفي حلول موجودة تخليكي تحسين أحسن.
تم النشر الثلاثاء، ٢ يوليو ٢٠٢٤
انا من مواليد شهر ٢
تم النشر الجمعة، ٥ يوليو ٢٠٢٤
فترة صعبه بتعدي علي البنات والولاد في السن ده. انصحك انك تحاولي تشغلي نفسك با حاجه مفيدة ومتستسلميش للكسل والخمول وقتك دهب استغلي في تعلم لغه او تنميه هواية
تم النشر الجمعة، ٥ يوليو ٢٠٢٤
فترة وهتعدى..... بإذن الله... انتى مواليد شهر كام😁
تم النشر الخميس، ٤ يوليو ٢٠٢٤
اهم حاجه انك تقومي و تعافري و تقربي من ربنا و ادعي ان ربنا يقويكي و ينصرك ع الشيطان
تم النشر الأربعاء، ٣ يوليو ٢٠٢٤
دي فتره بتعدي علي الكل مش انتي لوحدك
تم النشر الأربعاء، ٣ يوليو ٢٠٢٤
لعرض السؤال في فدني اضغط هنا