السلام عليكم ورحمة الله
أنا بنت وعندي 13 سنه عندي اخت اكبر مني عندها 24 سنه وبتكرهني وبتتكبر عليا ولما تيجي تضربني والمسها عشان بتوجع تقول لاهلي اني ضربتها وجالي اكتئاب نفسي بسبب الموضوع ده واهلي كلهم كانو بيحبوني وانا بعاملهم حلو ولما اختي تضربني واجي المسها بس عشان بتوجعني تقوم تكسر عليا كذا حاجة وتقول اني كسرتها وضربتها وشتمتها وكل ما احاول اجي اصالحها تصالحني
واليوم الي بعده تضربني وتهزقني وانا تعبت ناس كتير قالولي اعمل كذا حاحه وفعلا عملت وكذلك مفيش فايده وتبقا بتقول لماما انا هروق الشقه كلها وفي الاخر أمي تمشي وتقولي انتي اعملي كذا كذا كذا وهي تقول هتعمل كذا
وفي الاخر بتخليني اعمل كل حاجه وانا بقولها حاضر وتعبت من كلمة حاضر وزهقت ومحدش بيحس بيا حتى لما بتشتكي بيضربوني انا بنت وعندي 13 سنه المفروض يحترموني يعني حتى مش يحترموني عشان سني طب عشان جنسيتي حتى كنت ههرب من البيت صديقتي المفضله ليا قالت لي مش هتضيعي نفسك عشان واحدة زاي دي وصديقتي هي الي مدياني امل علي اني هكون في حياة افضل لو حد عنده حل يقولي والنبي.😭
والسلام عليكم ورحمة الله تعالى وبركاته
أشكرك على انك عايزة تحلي المشكلة وإن نيتك سليمة أولا انتي ملكيش أي ذنب واختك هي اللي عندها نقص في شخصيتها لأنها حاسة انها ضعيفة فعايزة تثبت نفسها وتحس انها قوية فبتؤذيكي وتسود حياتك •والحل هنا إنك لازم تدخلي طرف كبير يحط بينكم حدود جهزي كل الكلام بكل تفاصيله في ورقة اكتبي هي بتعمل ايه وقولي انا تعبت ابدأي بالكبار اللي بتثقي فيهم •لو محدش خد الموضوع بجد فالحل هو انك تقاومي بنفسك والله يعينك .. ازاي تقاومي : أول حاجة هي قمة متعتها وراحتها انها تشوفك زعلانة وضعيفة عشان تحس ان في حد ضعيف زيها فكل ما تزهق تستفزك وتحرق اعصابك عشان تستمتع وانتي بتتألمي فالحل انك متديهاش المتعة دي بإنك كل ما تستفزك تكوني ولا كأنك شايفاها بكل برود وثقة في النفس ومتوريهاش انك بتتألمي جربي الحل ده في البداية هتزيد الاستفزاز عشان عايزاكي تتألمي فإنتي اصبري أكثر واتنفسي بعمق وبعد كم يوم هتلاقيها سكتت وراحت تدور على حد تاني تستفزه •أخيرا التعامل مع اللئيمين مرهق ومتعب نفسيا وجسديا ومع الوقت التعب هيتراكم ويتحوش جواكي لحد ما يمرضك والعياذ بالله فلازم تنفسي عن نفسك بعادات بسيطة صحية زي الخروج مع صاحبتك ، رياضة ، طبخ ، رسم ، فضفضة بالكتابة عالتلفون ، صلاة ..... وغيرها لازم تستمري عليهم وأهمهم الدعاء كل يوم قبل النوم لازم دعاء اسأل الله أن يحل مشكلتك ويعوضك
تم النشر الاثنين، ٢٠ يناير ٢٠٢٥
وعليكم السلام ورحمه الله وبركاته. اختك بقى انت ضروري تبدئي. اييي مش تتعاملي معاها حاضر ونعم وبس ولكن قبل ما ماما تمشي. تتفقوا قدامها مين عليه ايه ومين عليه ايه علشان الامور تبقى واضحه جدا والتزمي بالجزء اللي يخصك في حاجه لو عملتيها. هتفيدك لانك ممكن في اي وقت تكوني انت وهي بس.
تم النشر الاثنين، ٢٠ يناير ٢٠٢٥
نظرا للظروف الي بتمري بيها والوقت الصعب الي بيحدث لكي في كل يوم متفكريش يا اختي انك لما تهربي كدا هتكوني مرتاحه لا هيحصل العكس ثانيا لو حد من اهلك كان بيدور عليكي ولقاكي صدفه مش هيرحمك وخليني اقولهالك بالبلدي هيفرج عليكي اهل المنطقه كلها لان البنت لما بتهرب بتجيب العار لاهلها فا بتمنا انك متخليش حد يقول كلمة وحشه ف حقك او في حق اهلك علشان احساس انك مش مرتاحه لا اختك كبيره نعم ماشي وليها احترامها بردو ماشي بس ملهاش ضرب عليكي حاولي تتكلمي مع اقرب حد في العيله وبيفهمك وبتحبي تتكلمي معاه ووضحي ليه الفكره في كذا حل افضل من انك تمشي وتسيبي البيت علشان حقيقي الي هيحصل عكس منتي مفكره ومش هيكون كويس بالنسبالك ولاد الحرام كتير ومحدش فيهم بيعرف ربنا + انتي كدا كدا اهلك هيلاقوكي وهيكون منظرك وحش قدامهم لما يوضحو ليكي الفكره انك غلط الي عملتيه وبردو قدام صحابك الي بيحبو يشمتو هيسببولك حاله نفسيه من كتر مهيغيظو فيكي ويعايروكي بلاش من الفكره دي واقعدي مع اقرب حد في العيله بيسمعك ووضحي المشكله وباذن الله هتتحل متمني ليكي التوفيق
تم النشر الأحد، ١٩ يناير ٢٠٢٥
وعليكم السلام ورحمة الله وبركاته، أختي العزيزة، أود أن أعبّر لك عن تعاطفي مع ما تمرين به. إن العلاقات الأسرية قد تكون صعبة في بعض الأحيان، وخاصةً عندما يشعر أحد أفراد الأسرة بأنه مُعرّض للإساءة أو التجاهل. من الضروري أن تشعري بدعم العائلة والحب، وأنا آسفة لأنك لا تجدين ذلك في موقفك الحالي. أولاً، يجب أن تعرفي أنك لا تتحملين مسؤولية سلوك أختك. ربما تواجه مشاكل أو ضغوطات في حياتها تجعلها تعبر عن مشاعرها بشكل غير مناسب. لكن هذا لا يبرر سلوكها تجاهك. إليك بعض الأفكار التي قد تساعدك على التعامل مع الموقف: التحدث مع الأهل : حاولي التحدث بصراحة مع والديك حول ما تشعرين به. اشرحي لهم كيف يؤثر سلوك أختك عليك، واحرصي على أن تكوني هادئة أثناء حديثك. التحدث بصراحة يساعد الأسرة على فهم الوضع بشكل أفضل. تدوين أفكارك : يمكنك كتابة ما تشعرين به في دفتر يوميات. التعبير عن مشاعرك من خلال الكتابة يمكن أن يساعدك في تخفيف الضغط النفسي. الاتصال بصديقة : كما تفضلت صديقتك، يمكنك قضاء الوقت مع الأصدقاء الذين يدعمونك ويجعلونك تشعرين بالراحة والأمان. تعزيز ذاتك : ركزي على اهتماماتك وهواياتك. قد تساعدك الأنشطة التي تحبينها في استعادة شعورك بالراحة والثقة. التركيز على الإيجابيات : حاولي أن تكتشفي الأشياء الجيدة في حياتك، حتى لو كانت صغيرة، فهذا يمكن أن يساعد في تحسين حالتك النفسية. اللجوء للمساعدة : إذا استمرت المسألة، يمكنك البحث عن استشارة نفسية من متخصص يساعدك على التعامل مع مشاعرك وتنمية استراتيجيات التعامل مع المشاكل الأسرية. تذكري دائمًا، أنك تستحقين الحب والاحترام، ولا تجعلي أي سلوك سلبي يؤثر على تقديرك لذاتك. اتمنى لك الحياة الأفضل التي تسعين إليها، وأسأل الله أن يفتح لك أبواب الفرج. لا تترددي في الاستمرار في البحث عن الدعم، فأنت لست وحدك.
تم النشر السبت، ١٨ يناير ٢٠٢٥
انا عندي نفس مشكلتك ونفس عمرك كمان بس الفرق في اختلاف الاسباب المهم حاولي تتخطيها وملكيش علاقة بيها وقولي لحد كبير ولو اهلك مش بيصدقوكي متحكيش ليهم هما احكي لحد بتثقي فيه اللي مدايقك فيها وهو يديكي حلول او جربي تتكلمي معاها وتعاتبيها وحاولي ترجعي علاقتك بيها ولو عاتبتيها ومفيش فايدة ابعدي عنها واحكي لأهلك عن موضوع انها بتخليكي تعملي كل حاجه ده ولو قالولك هي الكبيرة قوليلهم ده ظلم واطلبي حقك منهم ولو مجابش نتيجه روحي لربنا واستنجدي بيه وادعي كتيير اوي بأن ربنا يهديها ليكي ويرجع علاقتكم احسن من دلوقتي وان شاء الله ربنا يهدي الدنيا عندك يبنتي ويهدي سركم كلكم
تم النشر السبت، ١٨ يناير ٢٠٢٥
اهتمي بصحتك شخصيتك اتعلمي تقولي لا
تم النشر السبت، ١٨ يناير ٢٠٢٥
الوعي الذاتي
تم النشر السبت، ١٨ يناير ٢٠٢٥
الحدود
تم النشر السبت، ١٨ يناير ٢٠٢٥
ايات اصلاح ذات البين
تم النشر السبت، ١٨ يناير ٢٠٢٥
لعرض السؤال في فدني اضغط هنا