انا زعلانة اوي وقلبي واجعني وكارهة كل حاجة
انا مش بعرف اتعامل مع الناس وبخاف منهم ومن اقل موقف ممكن اعيط حتى لما باجي اتكلم مع حد مش بعرف اجمع الكلام على بعضه وبفضل اتلغبط كاني بتعلم اتكلم
اسلوبي بقى وحش مع امي واخواتي وبقيت عصبية واقل حاجة بتخليني اصوتانا مش عايزة اكون كدا
انا نفسي ابقى كويسة مع اهلي وماتعصبش معاهم ولا اتخنق لاقل سبب واقدر اتعامل مع الناس واقدر ابص في عيونهم وانا بتكلم وما اعيطش لاي حاجة
حاسة اني فاشلة في كل حاجة ..بقيت بنسى بشكل رهيب انا لسة 20 سنة
بقيت خايفة طول الوقت ودايما مش مطمنة وحاسة اني مش قادرة اكون كويسة
انا طولت في الكتابة بس ارجوكم انا قلبي كل يوم بيوجعني اكتر من شخصيتي اللي مش عارفة اغيرها ومن عمري اللي بيجري بدون فايدة
ايه الحاجة اللى ناقصاكى اوى ومزعلاكى ؟ ايه اللى مستتياه من اللى حواليكى ؟
تم النشر الأربعاء، ٢٧ سبتمبر ٢٠٢٣
طب جربي تتكلمي مع متخصص وان شاءلله تبقي احسن وربنا يريح قلبك 🩵
تم النشر الثلاثاء، ٢٦ سبتمبر ٢٠٢٣
تخيلي معايا كده لو معاكي عصاية سحرية تغير حاجة واحده بس وتكوني احسن ممكن تكون ايه🤔؟
تم النشر الثلاثاء، ٢٦ سبتمبر ٢٠٢٣
طيب ليه بتخافي من الناس حد اذاكي قبل كده؟ وليه دايما مش مطمنه؟
تم النشر الثلاثاء، ٢٦ سبتمبر ٢٠٢٣
هل انتي اتعرضتي لأي صدمات الفترة اللي فاتت ممكن تكون هي اللي مأثرة عليكي ، صدمات عاطفية ، في الدراسة ، في الحياة عموما ؟ علاقتك مع أهلك من زمان هي كدا ولا حديثا موضوع العصبية و الزعيق و الصوت دا العالي دا ؟ علاقتك بربنا عامله ازاي ؟ دراستك بتحبيها ولا لا ؟ ، هل بتحطك تحت ضغط ؟ علاقتك بالسوشيال ميديا عامله ازاي و هل حاسه انك بتقضي وقت كتير عليها بدون فائدة ؟ اتكلمي و اكتبي كل اللي جواكي متخافيش أيا كانت المشكلة إن شاء الله في حل
تم النشر الاثنين، ٢٥ سبتمبر ٢٠٢٣
زعلانه من ايه طيب طول الوقت؟ والموضوع بدا معاكي من امتى بالظبط؟ وليه حاسه نفسك فاشلة ف كل حاجه؟ انتي لسه 20 سنة .. يعني يعتبر لسه هتقولي يا هادي! وايه هو سبب الخوف وعدم الاطمئنان اللي جواكي؟
تم النشر الاثنين، ٢٥ سبتمبر ٢٠٢٣
ممكن اقترح عليكي نصيحه و براحتك جدا ... موضوع انك تتغيري دا سهل جدا بس هيتوقف عليكي كذا عقبه ومنهم العيله ...ودا الطبيعي ..ممكن تجربي تعيشي شهر عند حد قريب منك مثلا جدك عمتك ..الخ بهدف انك تتغيري وتغيري من سلوكك للاحسن ..عادي انك تكلميها وتقوليلها انك هتغيري من نفسك للاحسن ... ولو فعلا هتعملي كدا اول حاجه قبل ما تبتدي الشهر لازم تكون عندك الاراده وانك مش هتستسلمي ... وبعد كدا هتبتدي تجيبي فيديوهات تطوير الشخصيه و الذات وكمان تنزلي كتب pdf عن نفس الموضوع و تقرايها برشحلك كتاب " العادات السبع للمراهقين الاكثر فاعليه " الكتاب ده هتقريه هتلاقي نفسك اتغيرتي 180 درجه بجد مهما اتكلمت انه اد ايه غيرني + وانصحك انك تبني عادات جديده وكمان تطبقيها اوعي تهمليها .. + 20 سنه انتي اعتقد لسه في جامعه وبتدرسي جربي اختلطي بصحاب كتير واتعرفي علي ناس جديده لو معرفتيش اعملي صحاب مش لازم دراسه ممكن تنزلي مكتبه او جيم او نادي هتلاقي نفسك عرفتي ناس ... جربي اعرفي هوايات جديده ... +قله التعامل مع الناس والعزله بتخلي الواحد بعد كدا يصعب عليه التعامل معاهم خليكي فاهمه النقطه دي .. +جزئية اللغبطه في الكلام ممكن تعالجيها بكذة نقطه 1- القراءه بصوت عالي او القراءة عامتا بس يفضل بصوت عالي عشان لسانك ما يتقلش و يعتاد علي الكلام .. 2- تابعي ناس ليها تأثير علي السوشيال 3- جربي اي كلمه تعجبك او جمله اكتبيها و احفظيها هتلاقيكي كتير بعد كدا بتقوليها و الخطوه دي مهمه زي الانجليزي بظبط 4- جربي اتكلمي مع حد جديد و فهميه انك بتحاولي تغيري من نفسك وجربي الموضوع دا ديما .... العصبيه زي ما بتقولي عندك دي فطرة زي اي حد ونا حقيقي بزعق و اتعصب كتير وصوتي ساعات بيوصل لاخر الشارع 😅 بس تقدري تغيري دا عادي بأنك يا تعملي الي قلتلك انك تروحي لحد قريب عشان تتغيري او انك تيجيبي المسبحه الالكترونيه .. عارفاها ؟ كل ما تتعصبي اوي جربي تفضلي تسبحي او تعدي لحد ما غضبك يروح و حاولي برضه بدل ما تتعصبي تعرفي سبب المشكله و تحليها بهدوء صدقيني هتلاقي عصبيتك اتحلت و اهم حاجه قبل اي حاجه انتي تقدري تكوني الشخص ال نفسك فيه ما تخليش حد يحبطك و اوعي تجلدي نفسك بأنك تقولي لنفسك كلام محبط انتي تقدري صدقيني جربي بدل ما تقولي انا فاشله ! قولي انا جميله انا قويه او اي حاجه ربنا انعم عليكي بيها ..اسف لاني طولت عليكي جدا بس حاولي علي قد ما تقدري انك تعملي اي حاجه من ال قلته +خلي ديما علاقتك بربنا الاول وبعدين الناس بيجوا في الاخر
تم النشر الثلاثاء، ٢٦ سبتمبر ٢٠٢٣
حاولي تكوني صحاب تروح اماكن جديده عليكي و حاول تتخطي فكره ان الناس مركزه معاكي اكيد الناس مش هتأذيني ، عدي و قوي ثقتك بنفسك
تم النشر الثلاثاء، ٢٦ سبتمبر ٢٠٢٣
لعرض السؤال في فدني اضغط هنا