علاقتي سيئة نوعا ما بأمي دقيقة عادي و دقيقة شد و دعا عليا دعوات زي ربنا ياخدك يبتليكي بمصيبة و هكذا الحق يقال ان من اول رمضان و الدعاوات مكنتش موجودة بس ده العادي برا رمضان أو تهزئ ليا
اللي قهرني اني مستحقش كدا انا دكتورة ف سنة اولي طب الأسنان بتعامل ف الكلية بمنتهي الاحترام ارجع البيت اتهزأ
امي عارفة اني كويسة و متربية بس دايما خايفة اني اكسر كلامها فبتعاند معايا ف الغلط بمعني انا عايزة دوا فلاني لا ده مش هيتجاب اللي لنا بقوله هو اللي هيتجاب طب اكشف لا طب ليه هو كدا المشكلة اني انا اللي ببقي في النص و ببقي تعبانة
امي بقت بتسيء الظن فيا اني هبقي ابنة عاقة
و انا زعلانة منها اوي انا مستخقش كدا انا بعمل ما بوسعي عشان ارضيها و هي طول الوقت بتقشر ف وشي مش بنتكلم غير ف خناقة أو طلب هي عايزاني اجيبه غير كدا لا مبقتش عايزة احتك معاها و عايزة انزل اشتغل عشان ده الحل الأمثل قربنا من بعض مضر
مبقتش عارفة هل في امل امي تتغير معايا
انا مش زعلانة بس أنا مقهورة منها
هو واضح كده ان والدتك حاسه بانك بتتباهى بنفسك بشكل يمثل خطورة . ده ملحوظ من جملتك ( انا دكتورة فى سنة اولى ) لو نفس المنطلق ده ظاهر فى شخصيتك وخصوصا فى تعاملك مع امك فدى نبره طبعا مرفوضة للاباء والامهات ..لانها بتصدر فكرة ...خلاص انا كبرت فهييقي ليا كيان منغصل عنكم وهبقي مش مهتم برأيكم ولا كلامكم ولا خبرتكم....وده شىء مؤذى ليهم وبيمثل خطر بيدافعوا قصاده بالشكل اللى انتى شايفاه ومضايقك اوى من ماما . خخفى من نبرة انا كبرت و بقيت وبقيت ( حتى لو بدون قصد او لو بتطلع بشكل غير مباشر ) لان غالبا ده الوقت اللى ماما بتكون هادية فيه ومش بتحس منك النبرة دى او الاحساس ده. زودى معاها من انك تحسسيها انك محتاجه ليها ولرايها وخبرتها فى الحياه ...متحسسيهاش انك بقيتى عارفه كل حاجة ولا حتى انك تعرفى اكتر منها. اجبرى بخاطرها حتى لو هى بتقول معلومة غلط ....مثلا قوليلها ....اهى المعلومه دى يا ماما كانت صح لحد ما اكتشفوا علميا حاجة غيرها ...اللى هى كذا ...فخلينا مع التطور بقي . حاسه بيكى ان الوضع مؤذى ليكى وبيوجع ...بس ابدأى من عندك واديها جرعة حب وحنيه زى ما هى من صغرك كانت بتديكى...هو ده بقي تبادل الادوار بعد ما نكبر ونبقي مسؤولين نديهم ونغرقهم شوية حنيه ودلع زى ما كانوا بيعملوا معانا وبيحايلونا لحد ما نضحك.
تم النشر الثلاثاء، ١١ أبريل ٢٠٢٣
والدتك أم مصرية طبيعية و بتتصرف من منطلق الخوف و القلق و دى مرجعيتها فى التربية عادى،الشغل مش حل بالعكش ممكن يزود الفجوة الى بينكم،أنا شايف ان طالما مفيش مشكلة كبيرة او موقف يستدعي ندخل حد بينكم يبقي منك لوالدتك فى وقت صافي و فاضيين و بعيدا عن الشغل و الكلية و البيت تقعدوا مع بعض و تتكلموا بحسن نية و تعرفيها إنك متضايقة من الضغط ده و من الدعوات و من التهزيق و عرفيها إنك مش قصدك تعندى معاها ولا تتعالى عليها و كلمتين حلوين و هى هتفهمك و هتلين معاكى ان شاء الله،و لو تسمحيلى ياريت بلاش أى أحكام مسبقة و تدخلى تكلميها بغرض أنكم تتراضوا و تصفوا لبعض و بكل حب منك و سؤالك صراحة باين فيه إنك بتقدريها و بتحبيها،ربنا يصلح ما بينكم و يوفقكم
تم النشر الاثنين، ١٠ أبريل ٢٠٢٣
مش لوحدك ي أختي الكثير يعانى من نفس الموضوع ولكن باشكال مختلفه ربناا ييسر أمرك
تم النشر الأربعاء، ١٢ أبريل ٢٠٢٣
لعرض السؤال في فدني اضغط هنا