عندي اتنين صحاب هم اخوات احنا نعرف بعض من 10 سنين تقريبا قريبين من بعض جدا بس فيهم واحدة انا بحبها جدا وغالية عالية اوي ودي ماي بيست فريند جت فترة بعدنا عن بعض وانا دخلت ف حالة وحشه اوي بسبب البعد ده بعدين رجعنا تاني بس هم عرفوا صحاب جداد وقربوا من بعض بعدين حصلت بينهم مشاكل ورجعولي تاني ووقفت جمبهم بعدين اتصالحوا ورجعوا صحاب ودلوقتي قطعوا علاقتهم بواحدة منهم وفاضلة واحدة حرفيا كل حاجة بيعملوها معاها والخروجات انا مش ممانعه ان يكون عندهم صحاب تانيين بس متركنش ويقعدوا بالشهور مش بيكلموني غير لو بادرت انا بالنسبالي ان انهي علاقات اسهل حاجة بس دول يختلفوا عمر ما فرق معايا صداقات وناس لكن هم انا متعلقة بيهم جدا بس حسه ان معتش ليا مكان خاصة اني عتبت كتير بس مفبش نتيجة زي ما تقولوا بقوا ضامنين وجودي اني بقف معاهم ف اي حاجة ودايما موجودى لما يحتاجوني او يرجعولي اعمل ايه انسحب؟ وانسحب ازاي؟
ست البنات الجميلة اللى قلبها ابيض. انتى من الصحبة الطيبة ان شاءالله اللى اى حد يتمناها....ويكفيكى فخرا انك عارفه انك بتقدمى الخير دايما. احنا طول الوقت فى حياتنا هنقابل ناس ونلاقيهم كويسين فنقرب منهم اوى ...وممكن نكتشف فيهم حاجات تبقي بالنسبالنا زى الشوك اللى بيشوكنا ...فناهد خطوات لورا عشان حتى لو الشوك ده هيفضل فيهم بس يبقي بعيد عننا ... ده اللى هتحتاجى تعمليه مع صحابك دول ...هتحددى بس مسافة مختلفة فى علاقتك بيهم. يعنى مثلا احنا صحاب وبنسأل على بعض...بس مش ضرورى كل يوم صحاب وبنخرج سوا ..بس مش كل الخروجات معاهم . صحاب وبنعرف تفاصيل بعض ..بس سطحيه مش دول اللى هكلمهم اقولهم انى متضايقه فيقدروا يحتوونى. مش ضرورى حل العلاقات يبقي بالقطع...هى مسافات بتتغير وبس على حسب الاحداث وعلى حسب اختلافات شخصياتنا وتقبلنا ليها. وساعات كتييير بنحب حاجات اوى بتكون مضرة فبنغضل نقلل منها شويه شويه لحد ما نبطلها خالص ( زى الاكلات والمشروبات الغير صحيه كده بالظبط . اتمنى يرزقك بصحبه صالحه طيبة تشبهك وساعتها مش هتشغلى بالك باى حد مش شبهك.
تم النشر الأربعاء، ٢٢ فبراير ٢٠٢٣
امشي بقاعده حلوه الي يمشيلك خطوه امشيله خطوه والي يفضل مكانه وميتحركش خليكي مكانك متتحركيش هم صحاب مصلحه ولما لاقوكي سامحتيهم بعد مبعدوا عنك ضمنوكي ودي حاجه لازم تفهميها ليهم انك مش مضمونه ان مش هتسعي لحد مسعاش ليكي بعتوا مسج ردي بعد ساعتين طلبوا تخرجوا اتحججي انك عندك معاد تاني ومش فاضيه واخرجي مع قرايبك زمايلك واتصوري هيعرفوا انك كمان ليكي حياتك وليكي ناس قريبه منك هيبدأوا يدايقوا ويحسسوكي اني صاحبه خاينه لانهم وقتها هيكونوا حسوا بالي عملوه معاكي وانه شعور مؤذي قد ايه
تم النشر الثلاثاء، ٢١ فبراير ٢٠٢٣
من حق طبعا اي حد انه يحدد شكل العلاقة اللي هو حابب يكون فيها، يعني من حقك تحسي بانك مهمة عند الشخصية ديه. بس مينفعش تبقى العلاقة مش واخده حقها .. يعني مثلا انتي لو قعدتي كل يوم تسقي الزرع .. فالمفروض الرد منه ان الزرع ده بعد كده هيكبر صح. ف فيه مردود عليكي منه في الاخر. فالمفروض دلوقت اي علاقة انتي فيها مع اي حد .. تفكري فيها كويس .. هي العلاقة ديه دورها ايه في حياتي .. وهي بتديني ايه وانا بديها ايه؟ طيب ياترى هل انا باخد منها زي ما بديها؟ ولا بس بفضل اعطي فقط .. ومش باخد اي حاجة! اظن انتي عارفه الاجابات ديه كويس جدا .... فكري كويس بعيدا عن انك بتحبي صحابك .. فكري اصلا هل هما يستاهلوا وجودهم في حياتك؟ طيب لما بعدوا هل اصبحوا ناس مش كويسة؟ منقدرش نقول كده .. طيب نقدر نقول ايه عموما .. علشان برده انا معرفش تفاصيل .. وجود اي شخصية في حياتك هي بمثابة رسالى ليكي .. رسالة انتي كنتي محتاجاها في الوقت ده بالذات .. اما عن البعد والقرب فالمفروض تفكري كويس في قيمتك .. مش اي حد عايز يدخل ويخرج منها زي ما هو عايز وزي ما يحب لأ .... انتي مش محطة
تم النشر الاثنين، ٢٠ فبراير ٢٠٢٣
لا مش تنسحبي بس غلي وجودك وعززيه وعرفيهم حدودك كويس فإنك لازم تتقدري صح.. ده مش بالكلام ده بالفعل لما يبقي فعلا وجودك مؤثر ومليان حب وود وخير وجدعنه ال عمرك ما تبطليها علي حسب الناس آنتي بتعملي كده لوجه الله وربنا بيقدر النوايا والافعال جدا لكن الناس بتنسي.. وإنتي لازم تتعلمي مش تتعلقي بحد ولا توقفي حياتك علي حد
تم النشر الاثنين، ٢٠ فبراير ٢٠٢٣
معتش اهتميت او كلمتهم بعدها بفترة واحدة منهم والي قولت ان هي اقربلي بعتت رديت بعدها بشوية برد ع قد السؤال بعني ازيك الحمدلله مش بقول وانتي حتي قالتلي انتي باردة وقفلت ومعتش اتكلمنا من وقتها لحد دلوقتي ولا هم بيسألوا عليا ولا انا بهتم يعني اول ما انا الي بطلت ابعت واهتم بقينا ولا كأننا نعرف بعض كمان بقا بينزلوا صور وفيديوهات مع صحبتهم اكتر من الاول كأن الي بيني وبينهم بينهم وبينها هي
تم النشر الأربعاء، ١ مارس ٢٠٢٣
لعرض السؤال في فدني اضغط هنا