مساء الخير.. انا مرتبطه بواحد وهيبقى في خطوبه قريب إن شاء الله بس هو حالته الماديه صعبه شويه انا تقبلت دا عادي بس هو سألني هشتغل بعد الجواز أو لا و قالي أن براحتي لو عايزه اشتغل عشان اكفي احتياجاتي وقال إن هو كدا كدا هيجيبلي ال انا عاوزه بس كلامو دا قلقني أن هو كدا بكون عايز أن انا استغل بعد الجواز واساعدو
ست البنات الجميلة ...طبعا قلقك مفهوم بس بلاش نحاول ناخد كلام تانى من ورا الكلام المباشر. هو مزودش كلام عن الموضوع اكتر من انه وضحلك الاختيار هيكون بسبب ايه ...وانتى شايفه انه مادياته بسيطة فهو بيوضحلك انه لو احتياجاتك اكبر من انه يوفرها فمش هيمنعك تشتغلى عشان تجيبي اكتر او اعلى ....بس كده السؤال عن الشغل عادى سواء انتى سألتيه او هو سألك. موقفه المباشر بقي من عمل المرأه هو اللى هيحدد اذا انتوا متفقين ولا لا... بالنسبالك غالبا لو هو مع عمل المرأه هتزعلى ولو هو ضد عمل المرأه بردوا هتزعلى 😄 الحياة كده كده بتفرض علينا ظروف كتير...اهم حاجة تكونى مع حد بينكم احترام ورحمه فى كل الاحوال.
تم النشر الاثنين، ٢٧ فبراير ٢٠٢٣
الف مبروك مقدما ولكن بلاش نتوقع حاجات ممكن في الاصل تكون حاجة تاني. انا فاهماكي كويس من ناحية قلقك احسن يكون مستغل، بس سؤاله برده منقدرش نجزم به على دليل معين. فعلشان تحلي الاشكال ده .. اتكلمي معاه بصراحة في الموضوع، يعني هل لازم اشارك بمرتبي في مسؤوليات البيت، ولا لأ؟ وهتبقى فيه مشكلة لو مش عايزة اشتغل من اساسه ولا لأ. افتحي معاه كل المواضيع للي انتي شاكة فيها او اللي قلقاكي بصراحة. علشان الكلام يبقى في النور ويبقى كل واضح. ومتسبيش دماغك تقعد تودي وتجيب لوحدها
تم النشر الاثنين، ٢٧ فبراير ٢٠٢٣
دي حاجه مش احنا ال نحددها ...كل الاحتمالات واردة ممكن يكون مش هيلب منك حاجه وممكن يكون هيطلب منك حاجه ده بيبان من مواقفه معاك في فترة الخطوبة وتصرفاته بشكل عام بس انت لازم تبقي عارفه انك طالما قبلت الحاله الماديه الصعبه فده غالبا بيؤثر على احتياجاتك بشكل عام بمعنى انك بنسبه كبيرة هتلاقي نفسك مضطرة تتنازلي عن بعض الرفاهيات او الاحتياجات مقابل توفير حاجات تانيه مهمه او ممكن انت ال تحبي تشتغلي عشان تسدي حاجاتك الشخصيه لو مقدرتيش تتحملي ضيق الحاله الماديه الافضل في كل ده المواجهه والصراحه من البدايه انكم تتكلموا في كل النقاط دي وتفهمي منه
تم النشر الاثنين، ٢٧ فبراير ٢٠٢٣
شوفي هتفهمي ده من معاملتك معاه هل هو بيجبرك ف العموم ع اي حاجه او بيضغط عليكي نفسيا وانفعاليا ..وحاجه تانيه ان احتياجاتك اصلا هو ملزم بيها ملهاش علاقه بشغلك يعني ممكن تشتغلي وتاخدي منه مصروف لاحتياجاتك وفلوسك ملهوش علاقه بيها وذمتك الماليه منفصله ...لكن بيبقا في تقدير من الست الراجل بيتعب والظروف صعبه وممكن اشيل واساعد معاه عشان هو حقيقي مبيحرمنيش من حاجه ولو معاه مش هيقصر.. انتي بقا ففتره الخطوبه هتفهمي ده وهتختبريه معاه ف مواقف كتير وتقدري تقرري بعدها
تم النشر الاثنين، ٢٧ فبراير ٢٠٢٣
هو مفيش حاجه قالها تشكك.. وممكن يبقي قلقك من كتر القصص ورهاب ال بيحصل من مواقف ال حواليكي فالمجتمع.. كلكوعه صغيره يعني لكن حد بيقولك مش هجبرك وبراحتك وكده كده هكفي احتيجاتك فين مقلق ف كده.. وبعدين هو مش عيب أبدا يبقي في مشاركه وتقدير بينكم مش قانون ولا فرض عليكي ولا فرض عليه برضو زي ما بنفترض رجاله استغلاليه نفترض ستات طماعه مش بتقدر يعني ليهم مخاوف برضو فاهمه.. فاصلا لما تتناقشوا فالموضوع لا يبقي كلامك متطرف آوي إنه لا مش هديك جنيه ومليش دعوة وإنت وإنت وإنت. ولا برضو كل ال عاوزه هجبهولك وهو يبدأ يتكل عليكي مدام بتسدي.. يعني بهدوء وازني إنه مش مسؤوليتك تساعدي ولكن تقدير ومشاركه زي ماهو مسؤوليته غير أساسيات وإن أمكن ويارب يوسع عليه يبقي ترفيه كمان.. و فالعموم فتره الخطوبه المواقف هتعلمك هو بخيل واتكالي ولا مسؤول وكريم
تم النشر الاثنين، ٢٧ فبراير ٢٠٢٣
هتكون في خطوبه بعد اسبوع
تم النشر الاثنين، ٢٧ فبراير ٢٠٢٣
أحب أعرف لو أنا اشتغلت هل هتطلب مني أي حاجة من مرتبي ولا لا .. وهل عندك مشكلة لو ماشتغلتش خالص
تم النشر الاثنين، ٢٧ فبراير ٢٠٢٣
اقولو اي
تم النشر الاثنين، ٢٧ فبراير ٢٠٢٣
طيب ما تفتحي معاه الموضوع دة ببساطة
تم النشر الاثنين، ٢٧ فبراير ٢٠٢٣
سؤالي هنا هل سؤالو يخليني اشك من نينو انو هيعتمد عليا فيما بعد اني اساعدو
تم النشر الاثنين، ٢٧ فبراير ٢٠٢٣
طيب على بركة الله
تم النشر الاثنين، ٢٧ فبراير ٢٠٢٣
يعني إيه مرتبطة به من غير خطوبة؟ هو فيه حاجة زي كدة؟
تم النشر الاثنين، ٢٧ فبراير ٢٠٢٣
لعرض السؤال في فدني اضغط هنا