انا عمري محبيت حد ولكن في مره وانا في أولي ثانوي حبيت واحد بس كنت بقول في عقلي اكيد مش هيحبك علشان شكلي وكدا انا من النوع الي معنديش ثقه في نفسي وكمان انا تخينه شويه بصراحه عمري مكلمت ولاد ولا ارتبط ومش ناويه حتي ارتبط وفجاه صحبتي فضلت تقولي ازاي لازم تكلميه وكدا بصراحه كلمتو علي الانستا بس معبرتلوش عن اعجابي بس قولتلو نبقا أصحاب وانا ندمانه لحد دلوقتي اني كلمت ولد عملي بلوك واكتشفت بعد كدا الي هو مرتبط بس لما عملي بلوك دخلت كلمتو من اكونت تاني وقلتلو علي فكره صحبتي هي الي قالتلي اكلمك وانا مش بحبك ولا يجري وراك وكدا وانا الي عملتلو بلوك بصراحه كنت غيرانه من الي مرتبط بها حلوه ورائعه وفيها كل حاجه بس وبقالي تلت سنين بحبو ومش عارفه أنساه رغم أن اصحابي بيقولي ده ميستهلش انك تحبيه ده وحش حتي ومش حلو ودلوقتي هو انفصل عن الي بيحبوا بس انا بحبو ومش عارفه اعمل ايه وعارفه انو مستحيل يحبني اصحابي بيقولولي ده حب مراهقه بس انا مش حاسه انو مراهقه علشان بقالي تلت سنين بحبو وعيط كتير بسبب الموضوع ده ومش عارفه اعمل ايه ولا عارفه أنساه وبدعي كتير انو يكون من نصيبي
ولا بتحبيه ولا اى حاجة فعلا. انتى مقلله من قيمة نفسك وجمالك بسبب وزنك اللى اتكلمتى عنه وده اللى خلاكى تنقى حد مش حلو بدون اى معايير وتقولى لنفسك بشكل لاواعى ...هو ده اللى لو حبيته هيقبلنى كده. ممكن الولد يكون روش شوية كده وجامد وسط صحابه وتكون دى حاجة تتمنيها بردوا فى حد يحبك وتحبيه... بس كل القصص دى عامله زى اللى زعلان اوى انه مجربش يأكل سوشي وهو اصلا عارف نفسه ميقدرش يأكل سمك نى ...وكل ما يشوفف ناس بتاكله ومبسوطة يزعل على نفسه اوى ويقول بس انا احب اكون مبسوط كده زيهم بالسوشى. مفيش اصلا حاجة تربطك بالشخص ده غير تخيلات عندك ....انسي التخيلات دى هتقدرى تنسيه...حطى شخص وهمى بمواصفاتك للراجل اللى ممكن تحبيه هتبدا صورة الشخص ده تتلاشي واحده واحده
تم النشر الأحد، ١٦ يوليو ٢٠٢٣
حبيبتي أفتقادك للحب والإهتمام من الأهل نتج عنه قلة ثقتك بنفسك وبالتالي مجرد أهتمام لايذكر انتي الوحيده اللي موهومه بيه كان سبب في تعلقك بالشخص الغلط أولاً ده مش حب ده تعلق وحاسه أن هو مفتاح سعادتك بدليل انك بتدعي أنه يكون نصيبك بالرغم أنه هو مش شايفك ولا انتي في حساباته فوقي يا حبيتي ده تعلق بوهم ربنا خلق كل بنت جميلة بس كل واحده لها جمال خاص بيها وأنتي لفقدان ثقتك بنفسك مش شايفه الجمال ده حبي نفسك واهتمي بيها وعفيها واكتشفي جمالك في شخصيتك وربنا هيرزقك باللي يشوفك أجمل بنت بس تعفي نفسك وترضى ربنا وتبعدي عن أي حاجه تغضب ربنا وتأكدي أن ربنا بيختار الخير دائماً أحسني الظن بالله وأرضيه وربنا هيراضيكي ويسعدك يارب
تم النشر الأحد، ١٦ يوليو ٢٠٢٣
طيب اللي انتي فيه فعلا مش حب ولا اي حاجة الحب حاجه والانجذاب حاجه .. واللي بيعملوا عقلنا بقى حاجه تانية خالص. الحب ده مش هتدركيه الا بعد فترة طويلة .. اما الا اللي انتي فيه حاليا ده مجرد اعجاب، مفيش حاجه اسمها الولد ده حلو ف تحبيه؟ الحب ده جه منين ؟ انا معاكي انك ممكن تعجبي .. تعجبي فقط بشخص بانه مثلا فيه صفات كويسة، بانه كويس .. اي شئ ما .. ف تعجبي بالشخصية او حتى الشكل .. لكن الحب ده مش بيجي كده انتي علشان تقولي بتحبي حد ده ب يجي بعد علاقة مع الشخص ده وعشرة طويلة. طيب اللي انتي فيه ده اسمه ايه؟ اسمه مشاعر عادية بتحص في سن المراهقة للمعظم + حاجه تانية واللي هي مهمة جدا .. العقل قادر جدا يخليكي تبني حاجات كتير وتتوهمي بحاجات اكتر. يعني انتي ممكن تقعدي تبني كل شئ في عقلك ف تصدقي فعلا انك موهومه بيه. لكن في الحقيقة اوعدك انه بس شوية وقت ولما تكبر هتضحكي ع كل ده .. وهتقولي ايه اللي كنت بعمله ده!
تم النشر الخميس، ٢٠ يوليو ٢٠٢٣
مش ممكن انتي متعلقه بسبب الرفض؟ ولو اتعاملتي مع الشخص دا هتحسي أنه أقبح عن قرب ؟ فكري ف أن دا مش هيرضي ربنا وانتي اصلا شايفه أن دا ضد فطرتك .. استودعيه لربنا وادعي كتير بالخير ولو هو خير هيجي ف الوقت الصح .. تجنبيه وهمشيه م الدنيا اصلا ولا تبصيله ولا تركزي
تم النشر الاثنين، ١٧ يوليو ٢٠٢٣
ان شاء الله يكتبلك الي فيه الخير بس الي انتي عملتيه غلط من ناحية دينة اولا وكمان حتى من ناحية العلاقات حيث انتي عملتي اشياء ما كنت تعمليها قبل كمان بعد رفضه لك بدأو يقللو منه وكدا غلط هو إنسان ليه رأي و لو بيحبك هيقولك ز كمان من حقه يرفض و لو كنتي بتحبيه بقد حتكوني سعيدة بسعدته و فرحه و لو ربنا عز وجل كاتب لكم نصيب فامحدش يقدر يعمل حاجة وانتي لو عاوزة تحاولي معاه حاولي بحدود المعقول والحلال و الي يحفظك كرامتك و كبريائك في حال الرفض و اكيد ربي يعرف الأحسن لك وله
تم النشر الأحد، ١٦ يوليو ٢٠٢٣
يحب غيرك، ولّا يلتفت إليك، ويبلكك، ومع ذلك ما زلتِ تحبيه، بل تدعي الله أن يكون من نصيبك! فيا للعجب! لو تصوّرتي أن الذّليل لا يعيش محترمًا أبدًا أمام الناس ولّا أمام نفسه.. لكفاكِ زجرًا في البُعد عنه وتركه، فضلًا عن دعاء الله بأن يكون من نصيبك. حكّمي علقك ودوسي على قلبك الذي أوردك الموارد، وإلا فالعواقب وخيمة حتمًا! قاتل الله الحبّ الذي يعيش الإنسان من أجله= مهانًا لا كرامة له!
تم النشر الأحد، ١٦ يوليو ٢٠٢٣
السكة دي مضملمة وخسايرها ملهاش حدود، و أنت شوفتي بنفسك الألم النفسي الي جاي منه. استعيني بالله عز وجل واشغلي نفسك بمذاكرتك وتعليمك وهواياتك وأنوثتك ودينك وتطوير نفسك وشخصيتك ودوري على صحبة صالحة تعينك على الأمور النافعة وأمر دينك، ودايما ادعي ربنا يوفقك لما فيه الخير بلاش تدعي هو بالذات يكون من نصيبك، وارد دعاءك يستجاب ويبقى مش هو الخير وتعيشي حياة تعيسة برضو. وخلي بالك إن الحالة الي أنت فيها هي عبارة عن إنحذاب وإعجاب وقلب تعلق شوية بسبب الشعور بالفراغ العاطفي لكن هو مسمهوش حب يعني موصلش لكدا. ربنا سبحانه وتعالى يوفقك ويعينك ويرشدك للخير واحذري من الصديقات الي بيدلوكي على الخطأ زي الي دلتك إنك تكلميه من الأول.
تم النشر الأحد، ١٦ يوليو ٢٠٢٣
لى حصل معاكى دا حصل مع بنات كتير بس فى الأول والآخر لى ربنا كتبهولك هاتشفيه يمكن دا كان شر وربنا بعدو عندنك صلى وادعي لو فيه خير هايرجع لو فيه شر يبعد بس لزم تحمدى ربنا على كل حاجه ، وبكره يجى الوقت وشفى حد احسن منو ويحبك ويقدرك
تم النشر الاثنين، ١٧ يوليو ٢٠٢٣
حبيبتي، ماتزعليش نفسك كدة. اللي فات مات وكلنا بنغلط. خليكي قوية وابتدي حياة جديدة. ربنا هيرزقك بحب حقيقي في الوقت المناسب. دلوقتي ركزي على نفسك ومستقبلك. سيبي اللي فات ورا ظهرك. كلنا بنتعلم من أخطائنا. المهم ماترجعيش تغلطي تاني. ربنا معاكي يا قمر.
تم النشر الأحد، ١٦ يوليو ٢٠٢٣
لعرض السؤال في فدني اضغط هنا