السلام عليكم ....انا عندي ١٦ سنه ...كنت عايشه ف قريه وبعدين نقلنا وروحنا لمدينه ....المهم انا بقالي تقريبا ٥ سنين ونصف ...بدأت اتصاحب علي بنات قدي وكلهم اخلاقهم كويسه جدا ...المهم بقينا ٥ ف الشله ....وكنا كلنا تمام ...الفكره بقي ان الشله بقت اتنين اتنين واحد ....وانا الواحد
دا ...قولت يمكن عشان هما بقالهم فتره اطول مع بعض وبتاع ...بس مش لدرجه التجاهل !!..ف الاجازه كنت بتصل بيهم واللي قريبين بروح اسلم عليهم ....وفي رمضان جبت لينا كلنا الفوانيس الخشب الصغيره دي ....واللي قريب روحت اديته ف بيته ...كمحاوله مني اني اكون اقرب ...طبعا كنت مستنيه بقي رد فعل جميل ....مش كان ف اي رد فعل لا حلو ولا وحش ...مفيش حد فيهم كان بيبعتلي عاتبت واحده قولتلها مش بتسالي ليه قالتلي كل واحد ف دنيته ومشغول وبتاع ..الرد لا يتناسب مع السن حتي لو عندها حاجه كنت مستنيه انها تقولي ...ف الاجازه كنت فاكره هتقعد نتكلم او نخرج ولما اقولهم نخرج يقولوا بنحب نقعد ف البيت وعرفت قريب ان ف ٣ منهم خرجوا وراحوا معرض الكتاب من غير ما يقولولي مع انهم بيعتولي في ايام الدراسه عشان يسألوني علي الدروس ...
فبدات اعمل حاجات شبه اختبارات صداقه شويه ينجحوا وشويات كتير لا ...ولأن ف اتنين منهم مزاجيين ودول اللي اكتر دروسي معاهم ...فلما بيتضايقوا كل واحد يمشي لواحده او نمشي سوا كلنا ساكتين !!..عارفه ان كل واحد ليه ظروفه بس مجرد ان نمشي ماشيين كان بيسحيب من طاقتي ..المهم حصل ما بيني وواحده منهم موقف ...بسبب اني انفجرت فيها بصراحه من التراكمات...وقعدنا م بعض واحنا ف القعده اللي هي المفروض قعده صلح قالت كلام ملوش لازمه زي مثلا قولتها انا مش بحب كذا وكذا قالتلي انتي هتعلميني ازاي اتعامل؟ مع انها كانت وقعت عليا زي السكينه ..وانا مش رديت لان الموقف كان طول لأسبوع فكبرت دماغي عن ان ارد ...بس قررت اني اتعامل بطريقه وجودك زي عدمك ...المهم ...هي طلعت كل اللي جواها عليا ودلوقتي بتتعامل احسن ما قبل ما يحصل موقف ...مع انهم متدينين وعلموني حاجات حلوه كتير ..بس فعلا بقيت حاسه اني غريبه ف وسطهم محدش بيكلمني ولا انا بكلم حد فيهم...السؤال دلوقتي ...هل المفروض ابتدي ابعد لاني مش حاسه منهم انهم صحابي ...لا اتغاضي ولا اعمل ايه ....انا عيطت كتير بسببهم ... وهل المواقف اللي فوق دي بتقول اني اساسا مش كان ليا مكان وسطهم ...مع العلم ان لو بعدت هبقي لوحدي وانا بقيت مش بنزل دروس وباخد اون لاين عشان اعمل صداقات جديده ..ولا اتعامل عادي لحد ما نوصل الجامعه وكل واحد يشوف طريقه ..بس لو عملت كدا انا هتعب ....مش عارفه ؟
وعليكم السلام, انا شايفة إنك تفضلي معاهم لأنهم صحبه صالحه وممكن تعتبريهم زمايل دراسه مش أكتر ومتديهمش أكبر من حجمهم.. يعني متتوقعيش منهم يسألوا ويكلموكي وهكذا, بل إتعاملي انهم زملاء دراسه اوقات الدروس والمدرسة وكل ده .. كمان انتي قلتي انكم 5 و 3 بس اللي راحوا معرض الكتاب يعني الأمر مش إنهم مش عايزينك بشكل شخصي بس عادي أعتقد لو كنتي قلتيلهم انك مهتمه تروحي كنتي هتروحي معاهم بشكل طبيعي.. لو هتعيطي كتير بسببهم و عامليلنك مشاعر سلبيه يبقى الأفضل تبعدي وتشوفي أصدقاء تانيين , لو هتقدري تتعاملي معاهم كزملاء مدرسه ودروس و تتكلمي معاهم بشكل طبيعي برضو عادي صحاب مدرسه لكن متنتظريش منهم حاجه وهي فتره مؤقته لحد ما توصلي الجامعه وتتعرفي على بنات أكتر وتعملي صحبه صالحه بإذن الله
تم النشر الأحد، ٧ أبريل ٢٠٢٤
أوقآت بيكونوا اشخاص غير مناسبين ليكي ، فربنا بيبعدهم عنك ! وممكن ربنا بيبعدهم عنك علشان تركزي الفتره دي في مستقبلك ويعوضك بالأصلح والمناسب ليكي ، السر في العلاقات الحقيقية والعلاقات المزيفه ، هو راحتك والمشاعر اللي بتوصلك بعد مقابلتهم وهي معيار مهم لجوده العلاقات، العلاقات اساسها الراحه والاطمئنان لوجود الاخرين ،بمعني ممكن يكونوا اشخاص لا يعيبها شيء ولكن غير مناسبه لكي .
تم النشر الثلاثاء، ٩ أبريل ٢٠٢٤
فيه قاعدة اساسية لازم تبقى معاكي .. ان مفيش حد اساسي لازم يكمل معاكي. سواء علاقات ارتباط، او صداقة. لان مفيش حاجه مضمونة .. وكمان مش لازم كل حاجه تكمل، فيه اوقات ممكن تكونوا كويسين مع بعض، بس فجأة كل شئ يتغير وينقلب. اما بقى عن المواقف اللي انتي ذكرتيها، انتي مش شرط تقطعي علاقتك بيهم، وتقاطعيهم، خصوصا انهم كويسين ومش صحبة فاسدة، ولكن نفسيا انا عارفه ان الموضوع مش كويس، علشان كده خليهم في نفس المنطقة اللي هما وضعوكي فيها. يعني في منطقة الزمالة، مش الصداقة المقربة، خلي بالك من اشلخص اللي قدامك، وشوفي هو وضعك في اي مرتبة من حياته، صديق مقرب، ولا عادي مجرد زميل وخلاص. ولا المرتبة اللي ما بينهم. وانتي برضه اتعاملي على هذا الاساس علشان متبقيش حاطه امل ع حاجه وهما اساسا في وادي تاني زي ما بيقولوا. متخافيش انك تبقى لوحدك .. لان دي حاجه احسن من انك تبقى مع اشخاص سييئن مثلا، مش ممكن تقعي ف ناس مش كويسة؟ هنا القرار هيكون بالابتعاد خالص بقى، هل هتقولي افضل معاهم علشان مبقاش لوحدي؟ لا انتي هنا لازم تختاري الصح .. واللي لازم يتعمل، الا هتدفعي تمن ده بعدين وتمنه هيبقى غالي اوى وقتها. وبالتوفيق.
تم النشر الأحد، ٧ أبريل ٢٠٢٤
ابعدي وكبري مخك وصاحبي غيرهم عشرة ومليون ياقلبي❤️❤️مدام صحاب يتعوضوا عادي اللي ميتعوضوش هم الأخوات غير كده في غيرهم،وصلة الرحم بس الي تخليكي تصبري وتضطري تتعاملي مع شخص يضايقك،دول مافيش بينك وبينهم صلة رحم يبقى ابعدي طبعا ده الصح لي تتعبي نفسك بجد،وعاوزة اقولك انه باين من طريقة كلامك إن مخك كبير وعاقلة ماشاءالله ولبقة كده وجميلة يعني بإذن الله تلاقي صحبة صالحة وهم اللي خسرانين مش انت.❤️👌👌
تم النشر الاثنين، ٨ أبريل ٢٠٢٤
وزي ماقولتلم انت لسة صغيرة كمان وياما هتقابلي صحاب تانية وهتنسيهم وكل مرحلةوليها صحابها،ابعدي عنهم وشوفي أصدقاء تانيين صالحين يستاهلوا قلبك الجميل ده❤️❤️🥰
تم النشر الاثنين، ٨ أبريل ٢٠٢٤
عشان ربنا هو الي هيعوضك عن اي حده ولو التزمتي بالصلاة ربنا يعوضك زي متعملهش اهتم عشان انتي الي خليتهم يواصل لمراحل دي معكي بسبب انك لطيف زياده عن اللزوم
تم النشر الأحد، ٧ أبريل ٢٠٢٤
بصي انتي لزم تعيش حياتك عادي وتتعودي أن مفيش حده يبقا أساسي في حياتك عشان كل ده فترة وهتخلص ولزم تقنعي نفسك انك احسن منهم وتصدقي نفسك انك بجد حده جميل اهم حاجه في الصلاة وقربك لربنا
تم النشر الأحد، ٧ أبريل ٢٠٢٤
لعرض السؤال في فدني اضغط هنا