ولا تكتئبى ولا تزعلى خاالص انتى فى وقعه من الوقعات بس ..وعشان تقومى وتبقى ثابته اكتر ضرورى تعالجى اللى فات ده صح وتفهميه صح جميل كل اللى عرفتيه من قراءاتك وهتعرفى اكتر منه كمان باجتهادك الجميل ده. فكرة الدوبامين اكبر من اللى واصلك ده فخلينا نبسطها اكتر . عارفه المرجيحة لما توصل لاقصى نقطة فى الهوا ...هو ده الاندفاع الحماسى من الفكرة اللى بتبقى ناوياها ...فجأه بقى بتلاقى نفسك راجعه تانى لاقل نقطة ...طب السبب ايه ...ان طريقة المرجيحة ممتعه بس مش دى اللى بنستخدمها لتحقيق اهداف مستمرة مش عاوزين اندفاع قوى يودينا بعيد ...لكن عاوزين طاقة متجددة نتحرك بيها خطوات ثابته حتى لو صغيره عشان النقطة اللى نوصلها مننزلهاش تانى ان شاء الله . بالنسبة لماما ..فالرضا مش دايما بالابتسامة وبس ...كتير من الامهات بسبب ضغوطات كتير مش قادرين يعبروا عنها بقوا مش عارفين يضحكوا . مش مطلوب تتأكدى من رضاها قد ما مطلوب تجتهدى فى برها ..والاجر من الله حتى لو هى فضلت ظاهريا مش راضية عنك لكن ربنا هيكون راضى ان شاء الله بسعيك واجتهادك فى بر امك. ابدأى بحاجات بسيطة جدا واستمرى عليها واستعينى بالله ...ثقى فى ربنا اكتر من نفسك هو يقدر ينقلك من حال لحال وتكونى فى احسن ما تتمنى كمان .
تم النشر الأحد، ١١ فبراير ٢٠٢٤
الاستاذة ياسمين توفيق و الاستاذ عبد الرحمن ردوا عليكى رد جميل و انا كمان هرد عليكى بس لما ارجع البيت لكن اللى اقدر اقولهولك دلوقت إنك عندك الرغبة و الارادة انك تصنعى من نفسك حاجة مهمة وفى فترة المراهقة كلنا لما مرينا بيها عشنا فيها كل التناقضات و التخبطات والشك و رفقا بنفسك شوية لا انتى سوبر مان ولا مطلوب منك تكونى ملاك لكن عيشى المرحلة على قد حجمها وركزى فى السنة اللى انتى فيها و خلى علاقتك بماما حاضر و نعم و متاخديش كلامها على انه طاقة سلبية او تكسير مقاديف لكن خديه زى منتى واخداه انه يكون دافع ليكى لاثبات نفسك وبالراحة عليها شوية انتى لسة صغيرة
تم النشر الاثنين، ١٢ فبراير ٢٠٢٤
طب لو انتي ذي ما بتقولي انك مش بتسيبي الفون خالص ودائماً ماسكاه باستمرار ماتستغليه في حاجة مفيدة ذي مثلاً انك تتكلمي مع ابوكي وتحكيلوه مشاعرك تجاه امك وانتي حاسه بأيه و ممكن كمان تتفرجي على دروسك اون لاين حتى لو ممسكتيش الورقة والقلم هتبقي فاكره المدرسين قالوا ايه من الفيديوهات التعليميه اللي شوفتيها وطالما انتي الموبايل معاكي باستمرار فهتركزي في شرح الدروس زي باقي المواقع التانية مثلاً واعتبريها اول خطوة ليكي في انك تتحسني ومن بعدها هتسيبي الموبايل تماماً وتمسكي الكتاب بداله وعاوز كمان اقولك على حاجه مفيش في الدنيا ام بتكره ولادها سواء صبيان او بنات انتي بس حاولي كده تساعديها حتى في اصغر الحاجات في البيت مثلاً او ساعديها في شراء الحاجات انزلي معاها باستمرار وهي اكيد هتحس انك بتتغير للاحسن وهي نفسها تبدأ تغير معاملتها وطريقتها معاكي وكمان تساعدك ،انتي بس استعيذي بالله وحافظي دائماً على صلاتك حاولي ماتفوتيش اي فرض من الفروض واكثري من الدعاء وأن شاء الله ربنا يستجيب وجربي فكره انك تتكلمي مع ابوكي دي اكيد على الاقل ممكن تغير اي حاجه.
تم النشر الاثنين، ١٢ فبراير ٢٠٢٤
باذن الله لما هتستمري هتبقي جامده
تم النشر الثلاثاء، ١٣ فبراير ٢٠٢٤
اعرفي شخصيه مامتك وازاي تتعاملى معاها علشان الموضوع دا هياخد منك طاقه كبيره خاصتا فى ٣ث هتحسي بفرق كبير لما تبدئوا تفهموا بعض هياخد منك وقت انك تكسبيها ولكن يستاهل المحاوله مليون مره من راي تخصصي التاب بتاع المدرسه للمذاكره والفون يكون حاجه لوحده علشان التشتت بالنسبه لصلاة او الرياضه او الاكل الصحي او النفسيه دي هتقومي وتوقعي كتير دا حالنا كلنا وحال الدنيا واحلى حاجه بقا متنسيهاش ان اي حاجه مهما كانت اي خلى النيه من انك تعملها خالصه لله وهتلاقي توفيق من ربنا اكتر حاجه انا لاحظتها ان لما باجي اللتزم على الصلاة على سيدنا محمد بحس بتيسير في يومي كدا وسهوله في حاجه بعملها بتكون متيسره فهماني فا جربي وربنا يرزقك حلمك ي جميل
تم النشر الثلاثاء، ١٣ فبراير ٢٠٢٤
صلي - والتزمي بالأذكار هاي الفترة يمر فيها معظم المراهقين تحتاج إلى صير وظبط المشاعر والتركيز على الأهداف والأحلام
تم النشر الاثنين، ١٢ فبراير ٢٠٢٤
بصي ف الاول كده والله انا فرحانه وفخوره بيكي انك رجعتي للصلاه تاني.. وربنا يثبتك ويهديكي يارب.. ثانيا بقا حاولي متقارنيش نفسك بحد ولا تحطي نفسك مقارنه مع حد قارني نفسك بنفسك.. بمعني جبتي امبارح ف الامتحان درجه تاني يوم الدرجه زادت.. ومتحطيش في دماغك كلام اي حد يحبطك نهائي.. ولا تحطي في دماغك مقارنه مع صحابك لانك هتتعبي والله.. خليكي مع نفسك بس قارني نفسك بتاعت امبارح بنفسك بتاعت النهارده.. وربنا يقف معاكي ويكرمك يا عيوني يارب.. وحاليا انتي لو في تانيه ثانوي.. ف انا كمان في تانيه وممكن تعتبريني اختك وصاحبتك..
تم النشر الاثنين، ١٢ فبراير ٢٠٢٤
بصي في الاول كده صلي علي النبي وخدي نفس عميق واقعدي مع نفسك.. انتي بتقولي انك مش حابه نفسك كده وعايزه ترجعي للبنوته الجميله بتاعت زمان اللي كانت كلها حيوية ونشاط وبتسعي علشان حلمها.. ليه متحاوليش من تاني ترجعي كده.. هتقعي في مرات كتير بس صدقيني مع المحاولة هتواظبي تاني.. الموضوع م هيرجع ف يوم وليله.. وقبل كل ده لازم لازم تصلي اغصبي علي نفسك.. مره واتنين وهتلاقيكي من تلقاء نفسك بتصلي ده اولا.. ثانيا بقا حاولي طول الفتره دي تكلمي مامتك في الموبايل وتطمني عليها.. بمعني تصلي الرحم وربنا اكيد شايف وعارف انتي بتعملي ايه... يعني اعملي اللي عليكي للاخر.. وكمان طول ما انتي ماسكه الفون حاولي تستغلي الوقت.. واقرأي كتب او هاتي احاديث او اسمعي بودكاست.. وشوفي ايه عقوبه تارك الصلاه.. وحاولي تشجعي نفسك علي المذاكره من تاني.. مره ع مره الموضوع هيرجع تاني.. ومتحاوليش دايما تسمعي لاي حد يحبط.. خليكي ايجابيه تجاهه نفسك وارجعي للرياضه مره تاني
تم النشر الاثنين، ١٢ فبراير ٢٠٢٤
احساسك تجاه والدتك غلط جربي واجهيها وقولي لها كل اللي جواكي عشان تقدري تكملي حياتك من غير تعب نفسي يبعدك عن المذاكرة وخلي اول حاجه واهم حاجه في حياتك هي الصلاة وعلاقتك بربنا واعملي ورد يومي من القرآن خليه ثابت كل يوم هتلاقي نفسك اتغيرتي180درجه وحياتك بقت احسن وهتحسي بالفرق بجد
تم النشر الأحد، ١١ فبراير ٢٠٢٤
شطوره وبإذن الله تفضلي مستمره على طول ومتستسلميش
تم النشر الأحد، ١١ فبراير ٢٠٢٤
شكرا بجد وانا رجعت النهارده صليت الحمدلله وهفكني من اي كلام يحبط حتي لو من أمي ..وانا عارفه فعلا أن ممكن امي تكون اختبار من ربنا فهصبر.. وهحاول تاني اني ارجع عاداتي اللي بحبها
تم النشر الأحد، ١١ فبراير ٢٠٢٤
شوفي أنا فاهمه انتي قد ايه تعبانه بس مش عشان امك مش راضيه عنك أو على اللي انتي بتعمليه انك تسيبي موضوع الصلاه شوفي احنا ف الدنيا دي ضيوف وهياجي علينا الوقت اللي هنمشي فيه ف المفروض اننا نعمل لاخرتنا واهم حاجه الصلاه دي مفيهاش تكاسل يعني انتي مينفعش تدي نفسك اي عذر عشان متصليش امك بتحاولي معاها لكن هي كدا ده مش ذنبك وده مش معناه انك بتعاني ان امك مش راضيه عنك لاء عادي ربنا بيحطنا ف ابتلاءات كثيره عشان يشوف العبد ده هيحمده ويدعيه ولا هيقول مش معنا أنا ماهو ده عايش حلو وده عايش حلو لاء الابتلاءات دي بتكون عشان تقوي ايمانا بربنا بإننا ندعيله وعثر كدا بناخد ثواب ف الدنيا وثواب ف الاخره تاني حاجه انا عارفه أن الواحد لما بيكسل عن أي حاجه بيبقى صعب أنه يرجع تاني احنا بناخد الحاجات واحده واحده يعني مثلا عايزه ترجعي تعملي رياضه تاني لازم تكون قد كلمتك مع نفسك ولازم تركزي انك حق هتعمليها مفيش كسل لازم كل يوم حتى لو حاجه بسيطه بس مجرد التعود هيخليكي مهتمه على طول انك تعملي كدا وانتي ونصيحه حاولي تقربي من ربنا ادعيله كثير أنه يجعلك من الصالحين صلي يعني مثلا صليتي الظهر ومثلا مصلتيش العصر متكسليش وتقولي خلاص لاء صلي المغرب وصلي العصر معاه مش عايزه انك أما تقفي خلاص مترجعيش لاء افضل حاولي كثير لحد ما بجد هتلاقي نفسك اعتودتي على الصلاه خلي عندك ثقه بنفسك مفيش مشكله انك تتخني ومفيش مشكله أن شكلك يتغير ده مش بيقلل منك خالص واي كلام وحش ولا كأنك سمعتيه ركزي بس على دراستك حاولي تعملي حاجه بتحبيها صدقيني انتي لو حطيتي ف دماغ انك عايزه تتغيري فعلا هتتغيري بس ده لازم يكون على شأنك انتي مش عشان حد لازم عشان نفسك لانك حابه نفسك كدا وحتى لو رجعتي تاني لازم تحبي نفسك بكل حالاتك عشان اي حد يحبك إذا انتي محبتيش نفسك مين اللي هيحبك ؟عايزاكي تواضبي على الموضع ده صدقيني هيغيرك فعلا أنا اللهم لك الحمد بجد نفستيتي اتحسنت بس الموضع ده اللي هو انك تقراي كل يوم وجه من القرآن أو نص على حسب أو أكثر بردو اهم حاجه أنه كل يوم ومش بصوت واطي لاء علي صوتك لازم تكوني سامعه نفسك وانتي بتقراي بجد هتحسي بشعور روعه بجد غير انك هتكسبي ثواب على كل حرف أنا كنت بستعجب على الناس اللي بتقول انها بعد ما بتقرأ القران نفسيتها بتتغير لان كنت بقرا ومش بحس بحاحه بس ده لاني كنت بقرا بسرعه ومش بعلي صوتي لكن انا عليت صوتي وسمعت حسيت براحه وبجد بتمنى ليكي التوفيق ف حياتك وانك تكوني ناجه ويارب يقربك من ربنا كمان وكمان ❤️ بس اهم حاجه عليكي المثابره انك على طول تعملي كدا حتى لو رجعتي شويه عادي بس الاهم انك متستسلميش ودعي لامك أن ربنا يصلح حالها ويهديها
تم النشر الأحد، ١١ فبراير ٢٠٢٤
يجب عليكي ان تصلي و تقرأين القرأن و تتقربي الي ربك لن يقف احد بجانبك غير ربك
تم النشر الأحد، ١١ فبراير ٢٠٢٤
خير بإذن الله وانا واثقه اننا هنكون قدها 🤎🤎🤎
تم النشر الاثنين، ١٢ فبراير ٢٠٢٤
احنا نعمل اللي علينا واللي يجيبه ربنا كويس😂🤎
تم النشر الاثنين، ١٢ فبراير ٢٠٢٤
خايفه اويي والله 😂😂
تم النشر الاثنين، ١٢ فبراير ٢٠٢٤
واو داخلين سوا علي الوحش الكبير 😂
تم النشر الاثنين، ١٢ فبراير ٢٠٢٤
الحمدلله رجعت اصلي دي اكتر حاجه كانت شاغله تفكيري بس تخيلي طلبت من ربنا يديني فرصه تانيه علي اشاره حاجه كدا 😂 وفعلا فتأكدت انها اشاره انو اللي عملته هيتغفرلي واطمنت جدا انو ملك ملوك رجع سامحني .. ماما هنا اصلا فعادي اتكلم معاها ..بس فعلا اللي بينا مش من يوم من زمان ..فصعب انو يتصلح ..حتي انها قالت لكتير في العيله زي عماتي و جدتي أن انا مقضياها نوم واكل ومش بذاكر ولا بعمل حاجه ( ودا فعلا بس مكنتش مبسوطه انا بلجأ لدا لما بحبط ووبقي عاوزه أعرب من افكاري ) واني مش نافعه وكلام من دا وان بيني وبين صاحبتي ١٥ درجه وان انا كدا بقا فاشله مع اني جبت نفس مجموع صاحبتي في أولي ..وزعقت وقتها برضه ..اللي هي اي مقارنه وخلاص..فأنا مبتقش قادره اثق فيها اصلا لأن الكلام اللي ٢٤ ساعه بتقول بنفس السيناريو بسمعه من اهلي هناك ..ونزلت بوست علي الفيس معناه انو فككوا مني ويارب بجد ..بس مش هتأثر بكلامهم المره دي
تم النشر الاثنين، ١٢ فبراير ٢٠٢٤
من وانا صغيره بواجهها بس ردود أفعالها دايما كانت بتحبطني وبندم اني قولت اللي جوايا ..فهكتب أو هقول لربنا احسن
تم النشر الاثنين، ١٢ فبراير ٢٠٢٤
لعرض السؤال في فدني اضغط هنا