جربت كل المحاولات لأجعل زوجي يتغير ويهتم بي ولا فائدة، ماذا أفعل معه؟

Question

اناعندى 25سنه ومجوزه عن حب باختصار كده زوجى زى رجاله كتير مبيحبش الخروج دايما يا إما بيشتغل ايجى يأكل وينام ويلعب مع بنته شويه وخلاص لكن مبيقعدش معايا ولا بيخرجنى ولابيخرج حتى بنته وخايفه بنتي تتطلع معقده ومحدش قادر عليه وهو شخصية عنيده لأفصى درجة. عملت كل محاولات معاه خصام مجبش نتيجة مسايسه مفيش نتيجه كل حاجه اعمل إيه اناعاوزه أعرف اعمل إيه

Accepted Answer

السلام عليكم يا أخت أشكرك على النية الحسنة والبحث عن حلول وانتي زوجة مثالية والغلط مش فيكي بل فيه هو أسأل الله أن يفرج همك ويدخل السرور على عائلتك المشكلة : • الزوج لا يهتم بالجانب النفسي الترفيهي •بتشعري انك ملكيش قيمة ومش جذابة المخاوف : • تطلع البنت معقدة •حاسة بتهميش وقلة إهتمام وإن ملكيش قيمة الشعور: •خيبة أمل في الواقع •قلق على شخصية البنت •حاسة بانعدام القيمة ردة الفعل :خصام أو مسايسة تحليل الموقف باختصار الواضح إن زوجك جاف بسبب مشاكل نفسية بتخليه يتجاهلك عشان يرضي غروره ويحس بقيمته لما يشوفك وانتي بتستميتي له وبتحرقي نفسك لرضاه وانتي تعبتي يا بنت الناس وبتعملي كوووول إللي تقدري عليه وفي الآخر ببساطة يقول : لا معجبنيش فهو بيستمتع وهو متجاهلك فإنتي نفسك في لحظة راحة وامان والمصيبة انك فاكرة ان العيب فيكي !! والغريب ان هو عايز اي ردة فعل عشان يحس بوجوده حتى لو هتخاصميه قبل كل حاجة لازم تهتمي بنفسك وتقوي ثقتك وشخصيتك وتكتفي بنفسك فإنتي مش محووجة لحد يذلك وده لانك تستحقي تكوني مرتاحة في بيتك وتستحقي الإحترام وتاني حاجة لان بنتك محتاجاكي في صحتك وروقانك عشان ترعيها وتربيها . تهتمي منفسك ب •تقوي علاقتك بأهلك هيزيد عندك المشاعر الإيجابية •لازم تكتبي أفكارك كل يوم ولو سطرين الكتمان هيدمرك مع الوقت فضفضي على ورق أو عالتلفون ودي انا بعملها •خلي لنفسك وقت راحة كل يوم عالأقل نص ساعة تعملي حاجة بتحبيها •اخرجي مع بنتك استمتعوا واتمشوا راحتك النفسية هتعدل علاقتك بزوجك أما عن التعامل مع المشكلة بخطوتين •تقبل الواقع والحمد لله •فاجئيه بحاجة مختلفة صدقيني جربي اللي هقول لك عليه وهتلاحظي الفرق العظيم المعتاد : انك بتعملي كل اللي عليكي وبتشتغلي طول النهار عشان لحظة حلوة معاه فبتقدمي له الأكل وهو بيكون جعان بس مش جعان للأكل بس لا ده جعان للإستماتة والتذلل بتاعك فبياكل ويتجاهلك عشان تبدأي في فقرته المفضلة وهي انه يتجاهلك وانتي تتذللي فالمفاجأة هنا إنك مش هتستميتي لا أبدا هتقعدي تشوفي حاجة تعمليها وولا هتعبريه (بس تكوني عاملة له الأكل وكل حاجة) باختصار عامليه بالمثل بيتجاهل اتجاهلي بيتكلم اتكلمي عامليه زي المراية كوني معاه على نفس الخط هتتفاجئي (ممكن مش من أول يوم) بس هتلاقيه فجأة أتغير وارتبك وحس باختلاف وهتلاقيه بيتقرب منك والله يوفقكم ويسعد بيتكم

Answer

جوزك مش محتاج عقاب ولا طريقه تخليه يتغير انتى محتاجه تفكرى فى اهتمامات زوجك وتعرفوا تقضوا وقت الاول مع بعض جوه البيت بعدها ممكن تعملى الموضوع بالتدريج انكم تخرجوا فى مشوار مثلا ..وقبل ما تروحوا تقفوا على كوبرى الاول مره تانيه تقوليله هندخل نجيب اكل مثلا مره تانيه قوليله تعبت من المشوار ومحتاجه اقعد فى مكان اشرب قهوه مثلا او عصير وادخلوا كافيه شويه شويه هيبقى الامر معتاد مش شرط يروح البيت ويقدر ينزل تانى

Answer

السلام عليكم ورحمة الله وبركاته طيب ممكن تجهزي أكل ليه كويسه ويكون حلو كدا واستني لما يرجع من الشغل قابليه بضحكه حلوه زيك كدا جهزيله هدوم وخليه ياخد شاور وبعديها ياكل هيحس بالراحه وف نفس الوقت هيحس انك مهتميه بيه ابدئي إسأليه عن يومه كان عامل ايه وماشي ازاي وايه الصعوبه اللي واجهها في اليوم بكدا هيحس انك مهتميه بيه اكتر وبشؤونه وكمان بعد كدا لو حصلت معاه مشكله هيبدأ يجي يقولك يحكيلك وتحلوا المشاكل مع بعض بصي عموما الراجل بيبقا عليه أتعاب كتير وبيتعب اوي الصراحه وبعدين ملزوم منه بيت ومصاريف وانتي بردو بتتعبي بس هو بيواجه مشاكل كتير في شغله اكيد المهم حاولي تجربي اللي انا قولتلك عليه ولما تلاقيه بدآ يتفاعل معاكي في الكلام وكدا قومي مدياه دعوه حلوه كدا ف نص الكلام وحاولي تحتويه علشان يحتويكي يعني حاولي تبقي ام مش زوجه بس وهو لما يلاقي الاهتمام منك هيحاول يعمل اي حاجه علشان تبسطك قوليه انك بتحبيه وبتخافي على زعله وعرفيه بردو انك لما بتسيبي البيت وتمشي بيبقا غصب عنك قوليله انا بحبك بعتبرك اب ليا قبل ما تبقا زوج وتقوليله انك محتاجه منه اهتمام وعرفيه ان بنتكم محتاجه تاخد من وقتكم شويه قوليله بنتك يا حبيبي لازم تقعد معاك وتاخد من حنيتك علشان لما تكبر تبقا عارفه تواجه الدنيا وهي مطمنه ان وراها سند وتقوليله بنتك محتاجه انها تخرج معاك علشان تحس بالاهتمام وتحس انك بتحبها ممكن نخرج بس مش شرط نروح مكان غالي وكدا ممكن نخرج انا وانت وهي ولو حتى هنمشي لحد اخر الشارع بتاع بيتنا بس حقيقي هي محتاجه منك اهتمام اكتر وانا عارفه انك عايز تخرجها بس وقتك وشغلك مش بيسمح ليك استعطفيه وكلميه بطريقه كويسه ومنها كدا انك بتقوليه ايه انك مهتم بس هو بينه وبين نفسه هيحس انه مقصر ويقول انا مقصر في حقهم ومع ذلك مراتي بتقول ان انا مهتم ف دا هيجبره انه يخرجكم َقوليله مش لازم نخرج كل يوم يعني ممكن نخرج يوم في الشهر ولو حتى هننزل نشرب عصير او حتى ناكل آيس كريم انا مش عايزه الخروجه تبقا مكلفه يكفي بس ان بنتنا تحس اننا مهتمين بيها علشان لما تبقا مع صحابها ما تبقاش حاسه بالنقص كدا هيقول انك زوجه صالحه بتخافي عليه وعلى مشاعر بنته و مهتميه بيه وكمان مش طمعانه في خروجه كبيره مع ان دي من حقوقه عليكم اصلا بس بلاش تدخلي الأهل بينكم علشان المشاكل ما تكبرش دي حاجه بينك وبين جوزك يبقا مفيش حد لازم يعرفها يبقا مشاكلك تحليها علشان لا قدر الله لو لقى مشاكلكم بتوصل للأهل هيزعل ويتعصب ولا قدر الله ممكن يحصل انفصال بسبب كدا ما هي مشاكل الطلاق مش بتحصل غير لما بتوصل للأهل وربنا يهدي سركم يارب وبلاش بقا تسيبي البيت وتمشي زي ما قولتي ف الكومنتس وكدا واتمنى تفهمي كلامي كويس وتبقى مدركه ل اللي انتي هتعمليه وانا معاكي في اي وقت هنا على التطبيق وربنا معاكي وجربي بقا كل اللي قولتلك عليه م هتخسري حقيقي كل البيوت كدا

جربت كل المحاولات لأجعل زوجي يتغير ويهتم بي ولا فائدة، ماذا أفعل معه؟

اجتماعية

زواج

سؤال من tharaa khazbak

تم النشر الأربعاء، ٨ يناير ٢٠٢٥

4 إجابة

19 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك