انا عارفه ان العلاقه بين الولد والبنت بدون اى حاجه رسميه هى حرام شرعاً ، لكن انا حابه افهم الحاجه الى حصلت دى كان سببها ايه ،
ف البدايه انا طفولتى كان فيها احداث كتيره ليها علاقه بتكوينى حاليا من بداية وجود مجموعه من قرايبي إلى بيعلقوا علي اى حاجه فى شكلي ك نوع من أنواع الهزار لحد بردو زمايلي فى المدرسه الي كانو بيتريقوا علي اى حاجه فيا رغم أن انا الحمدلله معنديش مثلا عيب خلقي او اى حاجه وانا شكلي مقبول عادى بس دايما كنت حاسه انى أقل برغم كلام ناس حواليا انى جميله وطيبه ولكن كنت بحس أن بعض الناس الي اتريقوا عليا زمان هما الي عندهم حق لكن الناس الي بتشكر فيا اكيد بتجامل علي مر السنين كان فى صراع كبير بيني وبين نفسي بردو حرب جوايا واراء مختلفه دايما بشوف نفسي مستحقش اى حاجه ابدا وحاولت اسمع ناس كتير وفعلا كان بيجيلي احساس أن لا انا مينفعش ابص لنفسي بالنظره دى لكن سعات الواحد بيمر عليه فى حياتو احداث بيحس نفسو قليل اوى زى مثلا أن هو يحب من طرف واحد أو يحب حد ويرتبط بحد تانى وده بيخلينى افضل افكر ليه انا مش متشافه وفى حجات كتير ومواقف كتير كنت بردو بحس نفسي فيها قليله جدا المهم حاولت احب نفسي وتقبلت شكلى وشخصيتي لأن انا كنت بردو كاره شخصيتي جدا وبفضل اقول ان عمرى ما حد هيحبني ولا يصاحبني ، لحد ما فى إعدادى كده حبيت ولد جدا جدا ولحد الان بحس انى لسه بحبه بس هو كان عارف انى بحبو ورغم كده ارتبط بصاحبتي وده سببلى أذى نفسي كبير رغم انى كنت ف مرحله عمريه صغيره لكن كنت فعلا حاسه انى حابه الشخص ده اتمنى تتفهموا مشاعرى فى السن ده رغم أن الموضوع غريب شويه ، المهم الموضوع ده من ضمن المواضيع الكتير اوى الي كانت مخليانى مش حابه نفسي ابدا وشايفه انى دايما طرف تالت حرفيا فى كل العلاقات ، نيجي فى ثانوى اتعرفت علي ولد وانا اصلا عمرى ما كنت عاوزه اتكلم بس هو كان باعتلي والكلام جر بعضو لحد ما اتصاحبنا بس انا حسيت أن الشخص ده غير اى حد كان بيحبني جدا جدا حب حتى اهلي عمرى ما حسيت انهم بيحبونى كده كان مهتم بيا وبيقولى كلام الواحد كان نفسو يتقالو الكلام الحلو ده عارفين يجماعه لما حد يكون جعان حب ؟ بجد والله ، المهم انا مكنتش مصدقه ينهار ابيض معقول الولد الجميل العسل ده يحبني انا ؟؟ طب ازاى وليه مش حد تانى انا متعوده انى اكون طرف تالت ايه الي حصل هو اعمى ولا ايه ؟ انا لمحتلو كتير وبفضل اسألو ايه الي عجبك فيا وهو لاحظ انى بقلل من نفسي وانا معاه وكان دايما يقولى انو شايفينى احسن حد ومش عاوز يكلم غيرى ولا يعرف غيرى وان انا حد مهم ف حياتو بس انا كنت حاسه انى تقيله أو كتيره عليه مع أن هو إنسان عادى جدا بس بالنسبالي كان حاجه كبيره مش اى حد حاسسني انى مهمه كده العلاقه بينا باظت خالص هو حاول كتير أوى يرضيني كان بيروح الكليه وعليه امتحانات وانا حرفيا بفضل ازن عليه عشان نتكلم 24 ساعه معرفش ازاى انا كده بس كنت بقولو نتكلم شات كتير وهكذا بس فعلا هو كان بيضغط علي نفسو عشانى وكنت بتخانق معاه 99٪ من علاقتنا خناقه بسبب انى كنت بغير عليه خايفه يزهق منى خايفه يسبنى خايفه محدش يقولى كلام حلو يحسسني بقيمتى تانى كنت خايفه يحب حد تانى مبينكدش عليه كان بيحلفلي انو مش شايف غيرى بس انا فعلا عندى تخيلات وهلاوس انو اكيد مش طيب ولا غلبان وان اكيد بيضحك عليا وسيبنا بعض احنا كل ده كنا صحاب علفكرا بس بنحب بعض بس لسه مخدناش خطوه الارتباط عشان انا كنت بقولوا انى مش مستعده وكمان قالي انو عايز يسافر لمحافظتى ويتقدملى لما يكبر وهنا قولت لا بقا مش طبيعي حد كويس كده اكيد هيطلع مش كويس واصلا قعدنا نتخانق كتير وبعدنا بسببي بس فعلا انا معرفش ليه انا غبيه اوى كده
السلام عليكم ورحمه الله وبركاته. بصي يا جميله الحلول كلها والفهم كله للموضوع انت كاتباه اصلا في التفاصيل بتاعه حياتك كلها اللي انت وضحتيها. المشكله الاساسيه هنا انك عندك حاجات عارفاها معلومات ولكن مش بتستخدميها في عندك شيء بيغلب كل المعلومات اللي انت عارفاها. ايه هي الحاجه اللي بتغلب دي هو التوقع السيء؟ بسبب ان بيكون عندنا تجارب سيئه او بسبب ان احنا مرت علينا نوعيه سيئه من المشاعر والنوعيه دي كانت متكرره لدرجه انها اتاكدت جوانا فبقينا كل اما نقابل حاجه في حياتنا بنتوقع الشيء السيء انه يحصل. لذلك بيبقى صعب علينا جدا ان احنا نصدق ان ممكن يكون في حاجه طعمها كويس او حاجه كويسه ممكن تحصل وبتكون قوه التوقع بتاعنا للاسف. اقوى بكتير من الحاجه الكويسه حتى لو حصلت فعلا. لو حتى يعني ان يكون ظهر لها بوادر ان في شيء كويس هيحصل. فالجزء اللي انت محتاجه تعرفي ان هو حصل هنا هو انك توقعتي السيء بزياده توقعت الشيء السيء لدرجه انك قررتي تاكدي وتحققي. وده تخلي بالك علشان ما يحصلش معك في حاجات تانيه كتير هو اه طبعا هياثر على علاقاتك بالاخرين اكتر من اي حاجه تانيه لان هو اساسه نابع من موضوع انك ناقصك حاجات من علاقتك باهلك ولكن ده ما يمنعش ان هو ممكن يزيد ويبقى في حاجات تانيه يعني مثلا لو رحتي واشتريتي فستان حلو مش هتتخيلي مثلا غير ان هو غالي جدا فلو لقيتيه موجود بسعر مناسب وبسعر انت ممكن تشتريه فممكن تقولي لا مش معقوله انا بكميه الفلوس اللي معايا دي اشتري فستان حلو قوي كده وممكن ما تشتريهوش. فتخلي بالك علشان ما يفضلش النمط ده متكرر معك وكل ما تلاقي نفسك بتتوقعي. شيء سيء جواك انه مش معقوله او تقولي مش معقول ان الشيء كويس يكون من نصيبك ابدئي اتعاملي عكس كده خالص واجبري نفسك انك تعملي حاجه عكس الفكره دي ده سبيل انك تغيري من اللي انت حكيتيه ده وما يتكررش في شيء تاني طبعا مش هنناقش موضوع انه كده كده الارتباط مش حاجه صح لان انت وضحت انك عارفه ده كويس جدا.
تم النشر الأربعاء، ٢٩ مايو ٢٠٢٤
شكرا ليكي ع المشاركة جميل ان الانسان يخرج اللي جواه فكلام ويطلع أفكاره علي الورق قدامه دا بيخفف زحمة الافكار شويه جوه الدماغ أنا بس محتاجة اعرف منك أنا ممكن اساعدك ازاي ؟ تحبي تتكلمي فإيه اكتر؟
تم النشر الأربعاء، ٢٩ مايو ٢٠٢٤
لعرض السؤال في فدني اضغط هنا